Ipaduyakyakyo iti Publiko ti Nagan ni Jehova
“Kankanayon koma nga idatontayo iti Dios ti sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna.”—HEBREO 13:15.
1. Aniat’ indagadag ni mammadto Oseas nga aramiden dagiti padana nga Israelita?
ADDA nagpateg a mensahe ti mammadto ni Jehova a ni Oseas kadagiti padana nga Israelita. Idi maikawalo a siglo kasakbayan ti Kadawyan a Panawen, ginutugotna dagiti nayaw-awan a kasadaranna nga agbabawi. Indagadagna: “Ikuyogyo dagiti sasao ket agsublikayo ken Jehova. Kunaenyo kenkuana, dakayo amin nga umili, ‘Pakawanem koma ti biddut; ket awatem ti naimbag, iti kasta idatonminto dagiti bumaro a baka ti bibigmi.’” (Oseas 14:2) Iti pananggutugotna kadagiti umili a mangidaton ken Jehova ‘kadagiti bumaro a baka ti bibigda,’ parparegtaen ti padto ni Oseas dagiti Israelita nga agbabawi ken mangipaay kadagiti daton ti napasnek a panagdaydayaw iti Dios.
2. Ania a kita ti sakripisio ti imparegta ni apostol Pablo nga ipaay dagiti Kristiano?
2 Mangidatdaton ita dagiti Saksi ni Jehova ‘kadagiti bumaro a baka ti bibigda.’ Ipangpangagda met ti pammaregta ni apostol Pablo, a nangtukoy kadagidiay a sao iti padto ni Oseas idi insuratna: “Baeten kenkuana [ni Jesu-Kristo] kankanayon koma nga idatontayo iti Dios ti sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna.” (Hebreo 13:15) Gapuna, dagiti adipen ti Dios sirarag-o nga idaydayawda ni Jehova, kas iti trabahoda a panangikasaba iti Pagarian.—Mateo 24:14.
3. Kasanotay a makaipaay ken Jehova iti “sakripisio ti panagdaydayaw,” ket akin-pakasaritaan ti intay usigen ita?
3 Maysa a di kaikarian a pribilehio para kadagiti imperpekto a tattao ti panangipaduyakyak iti nagan ni Jehova iti publiko. Anian a ragsaktayo a mangisarsarita kadagiti sabsabali ti maipapan iti Diostayo, iti kasta mangipapaay ken Jehova iti “sakripisio ti panagdaydayaw,” “dagiti bumaro a baka ti bibig[tayo]”! Kas pammaregta kadatayo iti publiko a panangikasaba iti naimbag a damag ti Pagarian ita, intay usigen no aniat’ kunaen ti Biblia kadatayo maipapan kadagiti mammadto ti Dios ken dadduma pay nga adipen ni Jehova. Adu ti maadaltayo iti pakasaritaanda a makatulong kadatayo a mangtagiragsak iti trabahotayo a panangasaba.—Roma 15:4.
Ti Akem Dagiti Mammadto
4, 5. (a) Kadagiti orihinal a pagsasao a nakaisuratan ti Biblia, aniat’ kangrunaan a kayulogan dagiti sao a naipatarus a “mammadto”? (b) Aniat’ mangipakita nga addaan dagiti mammadto iti napateg nga akem iti urnos ti Dios?
4 Naaddaan dagiti mammadto ni Jehova iti pribilehio a mangiwaragawag iti mensahena iti publiko. Saan a masinunuo ti namunganayan ti Hebreo a sao para iti “mammadto” (na·viʼʹ), ngem ipasimudaag ti pannakaaramatna iti Biblia a dagiti pudno a mammadto ket isuda ti pannakangiwat ni Jehova, tattao ti Dios nga addaan naipaltiing a mensahe. Ti Griego a sao a naipatarus a “mammadto” (pro·pheʹtes) literal a kayuloganna “sumasao,” a mangibaga iti maysa a banag “iti saklang” wenno “iti sanguanan” ti maysa a tao. Ti mammadto ket maysa a tao a mangipakaammo kadagiti mensahe a naggapu iti Dios. Masansan, ngem saan a kanayon, a nagipadles dagiti pudno a mammadto ti Dios kadagiti masanguanan a pasamak.
5 Maipapan iti napateg nga akem dagiti mammadto iti urnos ti Dios, kuna ti M’Clintock and Strong’s Cyclopædia: “No dadduma makiddaw ti balakadda . . . Ngem masansan a makisaritada kadagiti tattao iti kabukbukodanda uray no awan ti nangkiddaw iti balakadda, ket saanda a mabuteng nga agsao a sibibileg kadagiti lugar a sadiay ti langada, nalabit, ket mamagpungtot ken mangpabuteng.” (Tomo VIII, panid 640) Usigenyo ti sumagmamano a pagarigan no aniat’ nangtignay kadagiti mammadto a nangala iti kasta a natured a takder.
Dagiti Rikrikna ken Nakatignayanda
6, 7. Aniat’ impakan ni Jehova ken ni mammadtona nga Ezequiel, ket aniat’ epekto daytoy?
6 Sakbay ti pannakadadael ti Jerusalem idi 607 K.K.P., nagsao ni Jehova kadagiti Judio a nakayawan idiay Babilonia babaen ken mammadtona nga Ezequiel. Kinuna ni Jehova kenkuana: “Anak ti tao, kanem ti matumpongamto. Kanem daytoy a lukot, ket inka, agsaoka iti balay ti Israel.” Nagtulnog ni Ezequiel. Kinunana: “Gapuna a nagngangaak, ket impakanna kaniak daydi a linukot. Ket kinunana kaniak: ‘Anak ti tao, pakanem koma ti tianmo, ket punnuem dagita unegmo itoy a linukot nga itedko kenka.’ Idin kinnanko, ket adda iti ngiwatko a kas iti diro ti kinasam-itna.”—Ezequiel 3:1-3.
7 Sumagepsep iti bagitayo dagiti sustansia ti taraon a kanentayo, iti kasta agbalin dagitoy a paset ti bagitayo. Umasping iti dayta, ti “lukot” a kinnan ni Ezequiel—ti mensahe ni Jehova a masapul nga ipakaammo ti mammadto—ket nagbalin a paset ti bagina, a nangapektar iti emosionna. Immukuok iti kasta unay dagiti sao ti Dios iti kaunggan a rikrikna ni Ezequiel nga uray la a pagragsakanna nga ipakaammo dagitoy iti publiko. No maysaka a Saksi ni Jehova, pagragsakam kadi nga ipakaammo iti publiko ti mensahe ti Dios?
8, 9. Aniat’ nangtignay ken ni Amos nga agipadto?
8 Usigenyo met ni mammadto Amos. Nagbiag idi maikasiam a siglo K.K.P., isu ti maysa kadagiti kaunaan a Hebreo a mammadto a nagsurat iti libro ti Biblia a naipanagan kenkuana. Kas ken Ezequiel, ni Amos ket maysa a natured a manangiwaragawag iti sao ni Jehova. Kinapudnona, namin-11 a daras a naulit ti ebkas a “daytoy ti kuna ni Jehova” iti intero a libro a naipanagan kenkuana! (Amos 1:3, 6, 9, 11, 13; 2:1, 4, 6; 3:12; 5:4; 7:17) Narikna ni Amos a masapul a maipakaammo dagiti sao ti Dios iti publiko.
9 Kas mammadto ti Dios, impangag ni Amos dagiti nasantuan a sao babaen ti naalibtak a panagtignayna. Babaen ken Amos, kinuna ti Dios: “Naguga ti leon! Siasinonto ti di agbuteng? Ni Soberano nga Apo Jehova nagsao! Siasinonto ti di mangipadto?” (Amos 3:8) Awan ti makaigawid iti mammadto a mangipakaammo iti mensahe ni Jehova.
10. Kasanot’ panagtignay dagiti adipen ni Jehova iti agdama a panawen no busoren dagiti tattao ti trabahoda a panangasaba?
10 Mayarig iti panaguga ti leon ti panangyebkas ni Jehova kadagiti mensahe a pangukom iti agdama a dakes a sistema ti lubong. Kas ken Amos, marikna dagiti adipen ni Jehova iti agdama a panawen a masapul nga ipakaammoda dagiti sao ti Dios iti publiko. Uray no am-amsen ida dagiti bumusbusor, sursurotenda ti ulidan da apostol Pedro ken Juan, a siiinget a nangikuna: “No kadakami, dikam mabalin ti agsardeng nga agsao maipapan kadagiti bambanag a nakita ken nangngegmi.” Inyunay-unay pay dagiti apostol: “Masapul nga agtulnogkami iti Dios kas agturay imbes a kadagiti tattao.” (Aramid 4:20; 5:29) Komustatay met ngay? Nasayaat no sukimatentayo ti rikriknatayo maipapan iti panangipaduyakyak iti nagan ni Jehova iti publiko.
“Ti Naruay iti Puso”
11. Aniat’ rumbeng a mangtignay kadatayo nga agtultuloy a mangipaduyakyak iti nagan ni Jehova iti publiko?
11 Di pagduaduaan a siyayaman dagiti mammadto ni Jehova kadagiti pribilehioda. Ti umasping a panagyaman ken Jehova rumbeng a tignayennatay a mangipaduyakyak iti naganna iti publiko. Kuna ti Salmo 145:1, 2: “Itan-okkanto, O Diosko nga Arik, ket bendituekto ti naganmo iti agnanayon. Tunggal aldaw bendituenkanto, ket idaydayawkonto ti naganmo iti agnanayon.” Yanninaw kadi dagitoy a sao ti kababalinyo? Ti regular a panagadal iti Biblia tulongannatay a mangpauneg iti panangipategtayo iti naaramidan, ar-aramiden, ken aramidento pay laeng ni Jehova maipaay kadatayo. Ket no ad-adalentayo ti Biblia a sangsangkamaysa kas maysa a pamilia, saan kadi a mariknatayo ti bileg ti Sao ti Dios, a mangtignay kadatayo a mangisarsarita ti maipapan kenkuana ken iti pangpanggepna? (Hebreo 4:12) Tapno epektibo ti panangipaduyakyaktayo iti nagan ni Jehova iti publiko, kasapulan met nga aramatentay a naan-anay dagiti Nakristianuan a publikasion nga ipapaay ni Jehova a Dios babaen ti napulotan a “matalek ken masirib nga adipen.”—Mateo 24:45-47.
12. Kasano a matulongannatay dagiti Nakristianuan a panaggigimong ken ti panagmennamenna a mangaramid iti publiko a panangipaduyakyak?
12 Tapno maidaydayawtay ni Jehova manipud iti siyayaman a puso, nasken a regular a tumabunotayo kadagiti Nakristianuan a panaggigimong. Rumbeng nga ipangag dagiti amin a tattao ni Jehova ti balakad ni apostol Pablo: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian dagiti sumagmamano, no di ket agpipinnaregtatayo iti maysa ken maysa, ket nangnangruna a kasta bayat a makitkitayo a ti aldaw umas-asidegen.” (Hebreo 10:24, 25) Kanayon kadi nga addakayo kadagiti Nakristianuan a panaggigimong? Masansan kadi a pagsasaritaanyo dagiti Nainkasuratan a kinapudno, nasayaat a kapkapadasan, ken dagiti makaparagsak a damag maipapan iti teokratiko nga irarang-ay a mangngegyo iti panaggigimong dagiti tattao ti Dios? No bumdengkayo a mangisarsarita ti maipapan ken Jehova ken iti pangpanggepna, iwayaanyo ti tiempo para iti panagmennamenna iti Saona tapno umukuok iti kaunggan ti pusoyo ti pampanunotna. (Salmo 77:12; 143:5) Wen, matulongannakay nga agpadpada dagiti Nakristianuan a panaggigimong ken ti kanayon a panagmennamenna iti Sao ti Dios a mangipateg iti nagsayaat a pribilehio a mangipaduyakyak iti nagan ni Jehova iti publiko.
13. Kasanot’ ‘panangiruar[tayo] iti naimbag’ manipud iti pusotayo?
13 Buyogen ti puso a napnuan panagyaman ken Jehova, iruartayo dagiti naimbag a banag. “Ti maysa a naimbag a tao iruarna ti naimbag manipud iti naimbag a gameng ti pusona,” kinuna ni Jesus, “ngem ti maysa a nadangkes a tao iruarna ti dakes manipud iti nadangkes a gamengna; ta ti naruay iti puso sawen ti ngiwatna.” (Lucas 6:45) Adda pay kadi nasaysayaat a pamay-an a ‘panangiruar iti naimbag’ ngem ti panangipaduyakyak iti nagan ni Jehova iti publiko ken panangisarita ti maipapan iti pangpanggepna kadagiti kaarrubatayo, kakabagiantayo—wen, iti amin a masabettayo?
Dagiti Resulta ti Publiko a Panangipaduyakyak
14. (a) Aniat’ mapasaran ti manangiwaragawag ken ti dumngeg iti mensahe ti Pagarian? (b) Aniat’ magapgapuanan babaen ti pannakaikaskasaba ti Pagarian?
14 Nasarakan dagiti mammadto ti Dios ti rag-o iti panagserbida, ket dagiti sinaoda ginunggonaanna dagidiay nangipangag. Kasta met, ti panangipakaammo iti mensahe ti Pagarian iti publiko mangyeg iti dakkel a rag-o kadagidiay manangiwaragawag iti dayta. (Aramid 20:35) Ken anian a makagunggona daytoy kadagiti manangipateg a managdengngeg! Ti panangawat iti naimbag a damag tulonganna dagiti tattao a mangparmek iti liday wenno mangsaranget iti dayta. Maragsakan dagiti nagminatay iti namnama iti panagungar. Maruk-atan dagiti adikto manipud iti pannakaadipen iti nikotina, heroin, ken dadduma pay a makaadikto a substansia. Adu ti madalusan ti kabibiagda, ken amin nga umawat iti kinapudno iti Biblia mawayawayaanda iti naespirituan. (Juan 5:28, 29; 8:32) Ti panangiwaragawag iti Pagarian kas kakaisuna a namnama ti sangatauan pakdaaranna met dagiti managdakdakes, bayat nga allukoyenna dagiti nasingpet-panagpuspusona [a tattao]. Iti kasta mapaglalasin dagiti tattao a maipaay iti “agnanayon a pannakagessat,” wenno iti “agnanayon a biag” inton iwayat ti Dios ti panangukomna iti daytoy dakes a lubong. (Mateo 24:14; 25:31-46; Ezequiel 33:1-9; 1 Timoteo 2:3, 4) Ti panangaskasabatayo ket maysa nga awan kapadana a trabaho a panangalaw, ti kasaknapan pay laeng a publiko a panangiwaragawag a maar-aramid ditoy daga!
15. Aniat’ maaramidan tapno matulongan dagiti mainanama a maikari a tattao iti teritoria a pangaskasabaantayo?
15 Kas Saksi ni Jehova iti agdama a panawen, siraragsak ken sitatallugod nga agpaadipentayo iti nailangitan nga Amatayo. (Roma 12:11) Gapuna, maragsakantayo a regular a mangilasin iti tiempo a makiraman iti panangikasaba iti naimbag a damag iti publiko ken iti binalaybalay. (Aramid 5:42; 20:20) Ipakita ti sangalubongan a report nga adda pay laeng dagiti maikari iti teritoriatayo. Bayat nga agbaliwbaliw dagiti kasasaad iti lubong, maapektaran dagiti tattao iti nadumaduma a pamay-an. Adu ti di ninamnama a nagkamang kas ganggannaet iti sabali a daga. Nalabit adda sumagmamano kadagitoy a tattao iti teritoria a pangaskasabaantayo. No kasta, aramidentay koma ti amin a kabaelantayo a tumulong kadakuada iti naespirituan bayat ti panagtultuloytayo “iti nasantuan a trabaho iti naimbag a damag.” (Roma 15:16) Nagadal dagiti dadduma a Kristiano iti sabali a pagsasao tapno maipakaammoda ti naimbag a damag ti Pagarian kadagiti kasta a tattao.
16. Aniat’ makatulong kadatayo nga agtultuloy a mangipaduyakyak iti nagan ni Jehova?
16 Adu a mammadto ti Dios ti naaddaan kadagiti narigat unay nga annongen. Saan a nalaka kadakuada ti mangipakaammo iti mensahe ti Dios kadagiti aleng-aleng a tattao. Kasta met, saan a nalaka iti tunggal nagdedikar ken ni Jehova ti mangipaduyakyak iti naganna iti publiko, nangruna kadagiti teritoria a di mangipangag ti kaaduan. Nupay kasta, babaen ti panagtalek a bunga ti sikakararag a panagadal iti Sao ti Dios, a napakuyogan iti bileg nga ipapaay ni Jehova, kabaelantay nga itultuloy nga iwaragawag ti mensahe ti Pagarian. (Filipos 4:13; Apocalipsis 14:6) Iti daytoy a banag, ania pay ti maadaltayo kadagiti mammadto ni Jehova ken iti dadduma pay nga adipenna idi ugma?
Panagkakadua iti Tay-ak ti Ministerio
17. Ania dagiti sumagmamano a Nainkasuratan a pagarigan iti makagunggona a panagkakadua iti panagserbi iti Dios?
17 Iti panangitungpal iti annongenna, idi damo ti mammadto ti Dios a ni Moises ket tinulongan ni manongna nga Aaron. Kinuna ni Jehova ken ni Moises: “[Ni Aaron] ti pannakangiwatmo iti ili; ket maaramidto nga isunto ti ngiwatmo.” (Exodo 4:16) Usigenyo met ti kaaldawan da mammadto Elias ken Eliseo, idi naruay “ti annak dagiti mammadto.” Dagitoy ket nalabit bunggoy dagiti adipen ti Dios a nagtrabaho a sangsangkamaysa, nga awan duadua a tinagiragsakda ti nasayaat a panagkakadua. (2 Ar-ari 2:3-5; 4:38; idiligyo ti 1 Samuel 10:5, 10.) Siempre, saan a ti panangiwaragawag iti naimbag a damag ti Pagarian ti inaramid da Moises ken Aaron ken “ti annak dagiti mammadto.” Nupay kasta, makagunggona kadakuada amin ti panagkakaduada. Sumagmamano a siglo kamaudiananna imbaon ni Jesu-Kristo dagiti 70 nga adalan iti ministerio a “sagdudua,” ket awan duadua a nagunggonaan dagitoy iti panagkakaduada.—Lucas 10:1-16; idiligyo ti Aramid 17:10, 11; 20:20.
18. Kasano a makatulong ita ti panagkakadua iti ministerio?
18 Idi tawen 1953, inrusat dagiti Saksi ni Jehova ti maysa a programa a dagiti manangiwaragawag iti Pagarian nagtrabahoda a sangsangkamaysa iti tay-ak ti ministerio. Siempre, saan a naaramid daytoy maigapu laeng iti panagkakadua. Nairanta daytoy a programa a panagsanay a mamagbalin kadagiti adipen ti Dios nga ad-adda nga epektibo a mannursuro ken manangaskasaba iti naimbag a damag. Sipapanunot iti dayta a panggep, immadu dagiti aduan kapadasan nga agibumbunannag ti Pagarian a nakiraman iti ministerio a kadua dagiti kabbaro. Makagunggona unay daytoy a programa a panagsanay iti binalaybalay ken nakatulong kadagiti tattao ni Jehova a rumang-ay iti panangipaduyakyak iti naganna iti publiko. (1 Timoteo 4:16) Itatta, ti kinatalged ti maysa pay a rason a maibalakad kadagiti Kristiano a makiraman iti ministerio a “sagdudua,” nangruna iti dadduma a lugar.
19. Aniat’ rumbeng a laglagipentayo maipapan kadagiti personal a kalat iti ministerio?
19 Makipagtartrabahokay man iti maysa a kapammatian iti ministerio wenno agbukbukodkayo a mamalaybalay, pagreggetanyo a ragpaten ti sumagmamano a personal a kalat wenno panggep. Rumbeng a realistiko, kabaelanyo a ragpaten [dayta a kalat]. Kasapulanyo kadi ti tulong iti panangibagay iti introduksionyo tapno matukay ti interes dagiti tattao iti teritoriayo? No kasta, nalabit kayatyo ti kumuyog iti maysa a payunir, maysa nga amin-tiempo a manangiwaragawag iti Pagarian, wenno iti maysa nga agibumbunannag a mabalin a nalaing a mangusar kadagiti nasayaat nga introduksion. Mabalin a matulongannakay ti kaduayo iti panangisagana ken panangusar kadagiti introduksion a naibalabala iti Ministeriotayo iti Pagarian wenno iti libro a Panakirinnason manipud kadagiti Kasuratan. Iti panagkuyogyo a mangasaba iti binalaybalay, denggenyo a naimbag ti presentasion ti kaduayo. Kalpasanna padasenyo a tuladen ti presentasionna agingga a mairuamkayo iti daytoy a benneg ti ministerioyo.
20, 21. Aniat’ mamagbalin iti panagkakadua iti tay-ak ti ministerio a makatulong unay?
20 No ngay kasapulanyo ti tulong iti panangaramid iti epektibo a panagsarungkar nga addaan panggep a mangirugi ti panagadal iti Biblia iti pagtaengan? Nalabit a babaen ti konduktor iti Panagadal ti Libro ti Kongregasion, mabalin a mayurnos ti pannakipagtrabahoyo iti tay-ak ti serbisio iti maysa nga agibumbunannag ti Pagarian a nasigo a mangirugi iti panagadal iti Biblia. Saankay koma nga agbalin nga umel no agkuyogkayo a sumarungkar. Imbes ketdi, kalpasan a maipakita ti kaduayo no kasano ti panangtamingna kadagiti bambanag bayat ti maysa nga isasarungkar, mabalin a makagunggona ti panangtuladyo iti presentasionna iti sumaruno a sarungkaranyo. Madadaanto ti kaduayo a tumulong ken mangbalakad kalpasanna.—Idiligyo ti Galacia 6:6.
21 Ti kasta a naayat a pannaranay ti kaduayo iti tay-ak ti serbisio matulongannakay a mangragpat kadagiti kalatyo iti ministerio. Ti kastoy a tulong ken ti nauneg a panangapresiaryo iti naayat a kinamanangaasi ni Jehova iti panangipalubosna kadakayo a mangaramid iti daytoy napribilehiuan a trabaho tulongannakay nga agbalin nga ad-adda nga epektibo iti panangikaskasabayo iti Pagarian. Ket sapay koma ta ipategyo ti pribilehioyo a mangbendito ken Jehova babaen ti kanayon a panangidaydayaw kenkuana ken babaen ti regular a panangipaduyakyak iti naganna iti publiko.—Salmo 145:1, 2, 9-13.
22. Ania dagiti saludsod a masungbatan iti sumaruno a panagadaltayo?
22 Kas Saksi ni Jehova, maulit-ulit a sumarungkartayo iti binalaybalay a ministeriotayo. Adut’ mangipangpangag iti naimbag a damag a buyogen ti nauneg a panangapresiar. Nupay kasta, mabalin nga agkedked dagiti dadduma a dumngeg iti mensahe ti Pagarian. Aniat’ rumbeng nga aramidentayo iti sidong ti kakasta a kasasaad? Kasanotay a makapagtultuloy iti trabaho nga intuding ni Jehova kadagiti tattaona? Ania dagiti Nainkasuratan nga ulidan a makatulong wenno makaiwanwan kadatayo? Masungbatan dagitoy a saludsod iti sumaganad nga artikulo.
Naawatanyo Kadi Dagitoy a Punto?
◻ Aniat’ kinuna agpadpada da Oseas ken apostol Pablo maipapan kadagiti sakripisio iti Dios?
◻ Aniat’ nangtignay kada Ezequiel ken Amos nga agipadto?
◻ Kasanot’ rumbeng a panangmatmattayo iti trabahotayo a panangikasaba iti Pagarian?
◻ Ania dagiti gunggona a magun-od iti panagkakadua iti tay-ak ti ministerio?
[Dagiti Ladawan iti panid 13]
Ti addaan panggep a panagkakadua matulongannatay a rumang-ay iti ministerio