Ti Pannakaammo iti Umiso a Relihion Adda Kakuyogna a Responsabilidad
“Naragsak dagidiay dumdumngeg iti sao ti Dios ken mangsalsalimetmet iti dayta!”—LUCAS 11:28.
1. Iti kanito a mailasinda ti umiso a relihion, ania a kita ti tattao ti agbiag a mayannurot iti dayta?
SAAN nga umdas ti basta panangilasin laeng iti umiso a relihion. No ipatpategtayo ti umiso ken pudno, iti kanito a nasarakantayon ti pudno a relihion, agbiagtayo a mayannurot iti dayta. Saan laeng a maysa a kapanunotan ti pudno a relihion; maysa dayta a wagas ti panagbiag.—Salmo 119:105; Isaias 2:3; idiligyo ti Aramid 9:2.
2, 3. (a) Kasano nga impaganetget ni Jesus ti kinapateg ti panangaramid iti pagayatan ti Dios? (b) Ania ti responsabilidad ti tunggal maysa a makaammo iti umiso a relihion?
2 Impaganetget ni Jesu-Kristo ti kinapateg ti panangaramid iti impalgak ti Dios a pagayatanna. Iti pananggibusna iti naawagan a Sermon iti Bantay, kinuna ni Jesus a saan nga amin nga umawag kenkuana kas Apo (iti kasta agak-aklonda a Kristiano) ket sumrek iti Pagarian; no di ket dagidiay laeng mangar-aramid iti pagayatan ni Amana. Kinunana a dagiti dadduma mailaksidda kas “agar-aramid ti kinakillo.” Apay a kinakillo? Agsipud ta kas kuna ti Biblia, maysa a basol ti di panangaramid iti pagayatan ti Dios, ken amin a basol ket kinakillo. (Mateo 7:21-23; 1 Juan 3:4; idiligyo ti Roma 10:2, 3.) Mabalin nga ammo ti maysa a tao ti umiso a relihion, mabalin a komendaranna dagidiay mangisursuro iti dayta, ken mabalin a padayawanna pay dagidiay mangal-alagad iti dayta, ngem isu ket addaan met iti responsabilidad a mangipatungpal iti dayta iti biagna. (Santiago 4:17) No awatenna dayta a responsabilidad, masarakannanto a napnuan iti kaipapanan ti biagna, ken maaddaanto iti rag-o a di magun-odan iti sabali a pamay-an.
3 Iti napalabas nga artikulo, inusigtayo dagiti innem a pakailasinan ti pudno a relihion. Saannatay laeng a tulongan ti tunggal maysa kadagitoy a mangilasin iti umiso a relihion no di pay ket mangipasango iti tunggal maysa kadatayo kadagiti karit ken gundaway. Kasano?
Kasano ti Panangipangagyo iti Sao ti Dios?
4. (a) Bayat a rugian dagiti kabbaro ti makilangen kadagiti Saksi ni Jehova, iti saan a mabayag ania ti mapaliiwda maipapan iti panangaramat dagiti Saksi iti Biblia? (b) Kasano a ti pannakataraon a naimbag iti naespirituan apektaranna dagiti adipen ni Jehova?
4 Bayat a yad-adalan dagiti Saksi ni Jehova iti Biblia dagiti kabbaro nga interesado, adu kadagitoy a kabbaro ti makailasin a daras a ti maisursuro kadakuada ket naggapu iti Biblia. Kas sungbat kadagiti saludsodda, saan a dagiti kredo ti iglesia, tradision ti tao, wenno kapanunotan dagiti nalatak a tattao ti maisursuro kadakuada. Ti Sao ti Dios a mismo ti autoridad. No mapanda idiay Kingdom Hall, mapaliiwda nga uray sadiay ti Biblia ti kangrunaan a libro a maaramat. Mabiit la a mabigbig dagiti napasnek nga agsapsapul iti kinapudno a ti kangrunaan a makagapu iti rag-o a makitada kadagiti Saksi ni Jehova isu ti pannakataraonda a naimbag iti naespirituan manipud iti Sao ti Dios.—Isaias 65:13, 14.
5. (a) Ania a karit ti naipasango kadagidiay makapalpaliiw kadagiti Saksi ni Jehova? (b) Kasanoda a makiraman iti rag-o dagiti Saksi?
5 No bigbigenyo daytoy, kasano ti panagtignayyo? No maawatanyo ti kaipapanan dayta, di mabalin ken diyo kayat a yaleng-aleng dayta. Ipakita ti Biblia a dagidiay “managdengngeg laeng” ngem saan a “managtungpal iti sao” ‘al-allilawenda ti bagbagida iti ulbod a panagrasrason.’ (Santiago 1:22) Al-allilawenda ti bagbagida agsipud ta saanda a mabigbig nga uray pay ania ti ibagbagada, ti saanda a panagtulnog iti Dios ipakitana a saanda a pudpudno nga ay-ayaten ti Dios. Ti panangako ti maysa nga adda pammatina ngem awanan met iti ar-aramid ket natay a pammati. (Santiago 2:18-26; 1 Juan 5:3) Maigidiat iti dayta, ti maysa a tao a ti panagayat ken Jehova ti nangtignay kenkuana nga agbalin a “managaramid iti trabaho” ket “naragsakto iti panangaramidna iti dayta.” Wen, kas inlawlawag ni Jesu-Kristo, “naragsak dagidiay dumdumngeg iti sao ti Dios ken mangsalsalimetmet iti dayta!”—Santiago 1:25; Lucas 11:28; Juan 13:17.
6. No pudpudno nga ipatpategtayo ti Sao ti Dios, aniada nga oportunidad ti personal nga ikagumaantayo a gundawayan?
6 Dumakkel dayta a rag-o bayat a rumang-ay ti pannakaammoyo iti pagayatan ti Dios ken yaplikaryo dagiti kanayonan a banag a maad-adalyo. Kasano kapasnek ti panagreggetyo nga agadal iti Sao ti Dios? Pinullo a ribu a tattao a di makabasa ti nangikagumaan nga agsursuro nga agbasa, nangruna tapno mabasada dagiti Kasuratan ken maisuroda dagitoy kadagiti dadduma a tattao. Dagiti dadduma masapada a bumangon iti tunggal bigat tapno inaldaw a mabasada ti Biblia ken dagiti katulongan iti panagadal iti Biblia, kas Ti Pagwanawanan. Kabayatan ti agsasaganad a panagbasayo iti Biblia wenno panangsukimatyo kadagiti kasuratan a nadakamat iti sabali pay a material a maadal, imutektekanyo a naimbag dagiti linteg ken bilin ni Jehova, ken ikagumaanyo nga ilasin dagiti adu a prinsipio nga adda sadiay a mangiwanwan kadatayo. Utobenyo no ania ti ipalgak ti tunggal paset maipapan iti Dios, iti panggepna, ken iti pannakilangenna iti sangatauan. Palubosanyo daytoy a mangsukog iti pusoyo. Panunotenyo no adda dagiti pamay-an a mayaplikaryo a naan-anay ti balakad ti Biblia iti biagyo.—Salmo 1:1, 2; 19:7-11; 1 Tesalonica 4:1.
Naan-anay Kadi ti Debosionyo ken Jehova?
7. (a) Kasano nga inimpluensiaan ti doktrina a Trinidad ti panagregget dagiti tattao nga agdaydayaw iti Dios? (b) Ania ti mabalin a mapasamak no maammuan ti maysa a tao ti kinapudno maipapan ken Jehova?
7 Riniwriw a tattao ti nabang-aran a nakaammo a ti pudno a Dios ket saan a maysa a Trinidad. Pulos a saanda a napnek iti panangilawlawag a “maysa dayta a misterio.” Kasanoda a makaasideg iti maysa a Dios a di maawatan? Kas resulta dayta a sursuro, saanda idi nga inkankano ti Ama (a ti naganna pulos a saanda a nangngeg iti simbaan) ken nagdaydayawda ken Jesus kas Dios wenno inturongda ti panagdaydayawda ken Maria (a naisuro kadakuada nga isu kano ti “Ina ti Dios”). Ngem siraragsak a nangipangag ti pusoda idi inukrad ti maysa kadagiti Saksi ni Jehova ti Biblia ket impakitana kadakuada ti personal a nagan ti Dios, a Jehova. (Salmo 83:18) Kasta unay ti ragsak ti maysa a babai a taga-Venezuela idi naipakita kenkuana ti nagan ti Dios nga urayna la inarakup ti balasitang a Saksi a nangiranud kenkuana iti dayta a nagpateg a kinapudno ken immannugot a maaddaan iti panagadal iti Biblia iti pagtaengan. Idi naammuan dagiti kasta a tattao a tinukoy ni Jesus ti Amana kas “Diosko ken Diosyo” ken inawagan ni Jesus ti Amana kas “ti maymaysa a pudno a Dios,” nabigbigda a ti isursuro ti Biblia maipapan iti Dios ket nalaka a maawatan. (Juan 17:3; 20:17) Idi naammuanda dagiti kababalin ni Jehova, simmingedda kenkuana, rinugianda ti agkararag kenkuana, ken kayatda nga ay-ayuen. Ania ti resultana?
8. (a) Gapu iti panagayatda ken Jehova ken iti tarigagayda a mangay-ayo kenkuana, ania ti inaramid dagiti riniwriw a tattao? (b) Apay a nagpateg ti panagpabautisar kas maysa a Kristiano?
8 Iti napalabas a sangapulo a tawen, 2,528,524 a tattao kadagiti innem a kontinente ken adu a purpuro ti nangidedikar iti biagda ken Jehova ken nangisimbolo iti daytoy a dedikasion babaen ti panagpabautisarda iti danum. Maysakay kadi kadakuada, wenno agngayngayangaykay kadin nga agpabautisar? Ti bautismo ket maysa a napateg a pagteng iti biag ti tunggal pudno a Kristiano. Binilin ni Jesus dagiti pasurotna a mangaramid kadagiti adalan kadagiti tattao iti amin a nasion ken bautisaran ida. (Mateo 28:19, 20) Imutektekanyo met ta kalpasan la unay ti pannakabautisar ni Jesus, nagsao ni Jehova a mismo manipud langit, a kunana: “Sika ti Anakko, ti dungdunguen; inanamonganka.”—Lucas 3:21, 22.
9. Tapno mataginayon ti naanamongan a relasion ken Jehova, ania ti rumbeng nga aramidentayo?
9 Ti naanamongan a relasion ken Jehova ket maysa a banag a rumbeng nga ipateg. No simrekkayo iti kasta a relasion babaen ti dedikasion ken bautismo, liklikanyo ti aniaman a mangdadael iti dayta. Diyo palubosan dagiti pakaringgoran iti biag ken ti pannakakumikom kadagiti material a banag a mangikabil iti dayta iti maikadua a lugar. (1 Timoteo 6:8-12) Pudpudno nga agbiagkayo a maitunos iti balakad ti Proverbio 3:6: “Kadagiti amin a dalanmo bigbigem [ni Jehova], ket isu iturongnanto dagiti desdesmo.”
Kasano Kadakkel ti Epekto Kadakayo ti Ayat ni Kristo?
10. Apay a ti panagdaydayawtayo ken Jehova saan nga isu ti makagapu a ditay ikankano ni Jesus?
10 Siempre, ti umiso a panangipateg ken Jehova kas ti maymaysa a pudno a Dios ket saan nga isu ti makagapu a di ikankano ti maysa a tao ni Jesu-Kristo. Ngem ketdi, kuna ti Apocalipsis 19:10: “Ti panangsaksi ken Jesus isu ti mangipaltiing iti panagipadto.” Manipud Genesis agingga iti Apocalipsis, mangipaay dagiti naipaltiing a padto kadagiti detalye maipapan iti akem ni Jesu-Kristo iti panggep ni Jehova. Bayat a masursuro ti maysa a tao dagitoy a detalye, agparang ti makaay-ayo a ladawan nga awanan kadagiti tiritir ken di umiso a kapanunotan a resulta dagiti ulbod a sursuro ti Kakristianuan.
11. Kasano a ti pannakaammo iti pudno nga isursuro ti Biblia maipapan iti Anak ti Dios inapektaranna ti maysa a babai idiay Polandia?
11 Ti pannakaawat iti kinapudno maipapan iti Anak ti Dios mabalin a dakkel ti epektona iti maysa a tao. Pudno dayta ken Danuta, maysa a babai idiay Polandia. Walo a tawenen a makikadkadua kadagiti Saksi ni Jehova, a maragragsakan iti isursuroda, ngem saanna a pinagbalin ti pudno a panagdaydayaw a wagas ti panagbiagna. Kalpasanna nakaawat iti libro a Ti Katan-okan a Tao a Nagbiag Pay Laeng, a mangisalaysay iti biag ni Kristo iti pamay-an a nalaka a maawatan.a Iti tengnga ti rabii, inukagna ti libro, a panggepna ti agbasa iti maysa laeng a kapitulo. Nupay kasta, naungpotna ti libro agingga iti pumarbangon. Nagsangsangit. “Jehova, pakawanennak,” impakpakaasina. Gapu iti nabasana, ad-adda a naamirisna ti ayat nga impakita ni Jehova ken ti Anakna. Nabigbigna nga iti unos ti walo a tawen awanan panagyaman a linaksidna ti tulong a siaanus nga ipapaay ti Dios kenkuana. Idi 1993 nagpabautisar ni Danuta kas simbolo ti dedikasionna ken Jehova a naibatay iti pammati ken Jesu-Kristo.
12. Kasano nga apektaran ti umiso a pannakaammo ken Jesu-Kristo ti biagtayo?
12 Nainaig ti “umiso a pannakaammo ken ni Apotayo a Jesu-Kristo” iti panagbalin nga aktibo ken nabunga a Kristiano. (2 Pedro 1:8) Kasano kadakkel ti pasetyo iti kasta a trabaho, a mangiranud iti mensahe ti Pagarian kadagiti sabsabali? Adu a kasasaad ti mangapektar iti kaadu ti maaramidan ti tunggal maysa. (Mateo 13:18-23) Adda dagiti kasasaad a saantay a mabalbaliwan; kabaelantayo dagiti dadduma. Ania ti mangtignay kadatayo a mangilasin ken mangaramid kadagiti panagbalbaliw a maaramidantayo? Insurat ni apostol Pablo: “Ti ayat nga adda ken Kristo pilitennakami”; iti sabali a pannao, naisangsangayan ti ayat nga impakitana babaen ti panangidatonna iti biagna a maipuon kadatayo ta bayat a dumakkel ti panangipategtayo iti dayta, magutugot iti kasta unay ti pusotayo. Kas resulta, mabigbigtayo a di rumbeng nga itultuloytayo a ragpaten dagiti agimbubukod a kalat ken agbiag kangrunaanna a maipaay iti bukodtayo a pagragsakan. Imbes ketdi, itunostayo dagiti aramidtayo tapno mayun-una ti trabaho nga insuro ni Kristo kadagiti adalanna nga aramidenda.—2 Corinto 5:14, 15.
Naisina iti Lubong—Kasano Kainget?
13. Apay a ditay kayat ti agbalin a paset ti maysa a relihion a paset ti lubong?
13 Saan a narigat a makita ti pakasarsaritaan ti Kakristianuan ken dagiti dadduma pay a relihion agsipud ta kayatda ti agbalin a paset ti lubong. Mabusbusbos dagiti pundo ti simbaan iti panangsuportar iti rebolusion. Adda dagiti papadi a nagbalin a gerilia. Inaldaw a maipadpadamag kadagiti pagiwarnak dagiti relihiuso a bunggoy kadagiti nadumaduma a paset ti daga nga agpipinnatay. Agtedtedted ti dara kadagiti imada. (Isaias 1:15) Ket iti intero a lubong saan nga agsardeng dagiti klero a mangpadpadas a mangiturong iti politika. Awan paset dagiti pudno a managdaydayaw iti daytoy.—Santiago 4:1-4.
14. (a) Ania ti masapul a liklikantayo tapno makapagtalinaedtayo a naisina iti lubong? (b) Ania ti makatulong kadatayo a mangliklik kadagiti nailubongan a kababalin ken ar-aramid?
14 Ngem saan la a dayta ti ramanen ti pannakaisina iti lubong. Iti lubong, gagangay ti panagayat iti kuarta ken ti magatang ti kuarta, ti panagtarigagay iti personal a kinalatak, ken ti di agsarday a panangsapul iti ragsak, kasta met dagiti bambanag a kas iti kinaawan pudpudno a pannakaseknan kadagiti dadduma, panagulbod ken dakes a panagsasao, panangbusor iti autoridad, ken kinaawan panagteppel. (2 Timoteo 3:2-5; 1 Juan 2:15, 16) Gapu iti kinaimperpektotayo, mabalin a no dadduma mayanninawtay dagidiay a kababalin. Ania ti makatulong kadatayo iti panangikagumaantayo a mangliklik kadagiti kasta a silo? Kasapulan a palagipantay ti bagbagitayo no asino ti adda iti likudan ti amin. “Ti intero a lubong adda iti pannakabalin daydiay nadangkes.” (1 Juan 5:19) Uray pay no makaallukoy ti maysa a banag, uray kasano kaadu dagiti tattao nga agbibiag iti kasta a wagas, no sipapanunottayo a ti kangrunaan a kabusor ni Jehova, ni Satanas a Diablo, ti adda iti likudan dayta, mabigbigtayo no kasano kalaad a talaga dayta.—Salmo 97:10.
Aginggat’ Sadino ti Madanon ti Ayatyo?
15. Kasano a ti di agimbubukod nga ayat a napaliiwyo tinulongannakayo a mangilasin iti umiso a relihion?
15 Idi damo a makilangenkayo kadagiti Saksi ni Jehova, mabalin a ti ayat nga ipakpakitada iti maysa ken maysa ti nakaallukoyanyo gapu ta naiduma dayta iti espiritu ti lubong. Ti panangipaganetget iti di agimbubukod nga ayat ti mangiduma iti nadalus a panagdaydayaw ken Jehova kadagiti amin a dadduma pay a porma ti panagdaydayaw. Mabalin a dayta ti nangkumbinsir kadakayo a pudno nga al-alagaden dagiti Saksi ni Jehova ti umiso a relihion. Kinuna ni Jesu-Kristo a mismo: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”—Juan 13:35.
16. Ania dagiti gundaway a mabalintay kas indibidual ti lumawa iti panagayattayo?
16 Ilasinnakay met kadi dayta a kababalin kas maysa kadagiti adalan ni Kristo? Adda kadi dagiti pamay-an a mabalinyo ti lumawa iti panangipakitayo iti ayat? Awan duadua a kabaelantay amin nga aramiden dayta. Saan laeng a ti kinamannakigayyem kadagiti dadduma idiay Kingdom Hall ti ramanen dayta. Ket no dagiti laeng mangay-ayat kadatayo ti ay-ayatentayo, ania ngarud ti pakaidumaantayo iti lubong? “Kangrunaan iti amin, maaddaankayo iti nasged nga ayat iti maysa ken maysa,” idagadag ti Biblia. (1 Pedro 4:8) Siasino ti mabalintay a pangipakitaan iti dakdakkel nga ayat? Maysa kadi a Kristiano a kabsat a lalaki wenno babai a naiduma ti nalikudanna ket ti panangar-aramidna kadagiti sumagmamano a banag ket karurodtayo? Maysa kadi a tao a, gapu iti sakit wenno kinalakay, saanen a regular a makatabuno kadagiti gimong? Ti kadi asawatayo? Wenno, nalabit, dagiti kadi lumakay ken bumaketen a nagannak kadatayo? Dagiti dadduma a nasayaat ti panangiparangarangda kadagiti bunga ti espiritu, agraman ti ayat, mariknada a kasla sursuruenda manen amin dagitoy no maipasangoda kadagiti narigat a situasion a mabalin a tumaud iti panangipaay iti gistay naan-anay a panangaywan iti maysa a kameng ti pamilia a baldado. Siempre, uray pay no maipasangotayo kadagitoy a kasasaad, rumbeng nga ipakitatay met ti ayat iti ruar ti bukodtayo a sangakabbalayan.
Panangpaneknek Maipapan iti Pagarian—Kasano Kapateg Kadakayo?
17. No personal a nagunggonaantayo kadagiti isasarungkar dagiti Saksi ni Jehova, ania ti rumbeng nga aramidentayo itan?
17 Ti maysa a napateg a pamay-an a maipakitatayo ti panagayat kadagiti padatayo a tao ket babaen ti panangpaneknek kadakuada maipapan iti Pagarian ti Dios. Maymaysa laeng a grupo dagiti tattao ti mangar-aramid iti daytoy a trabaho nga impadto ni Jesus. (Marcos 13:10) Dagitoy ket isu dagiti Saksi ni Jehova. Personal a nagunggonaantayo iti dayta. Ita pribilehiotayo ti tumulong kadagiti dadduma. No ti panangmatmattayo iti dayta a banag ket kas iti panangmatmat ti Dios, dakkel ti paset daytoy a trabaho iti biagtayo.
18. Kasano nga impluensiaan ti panangbasatayo iti libro a Dagiti Saksi ni Jehova—Manangiwaragawag iti Pagarian ti Dios ti pannakiramantayo iti panangpaneknek maipapan iti Pagarian?
18 Ti makaparagsak a salaysay no kasano a maisaksaknap ti mensahe ti Pagarian kadagiti adayo a paset ti daga kadagitoy maudi nga al-aldaw ket naidatag iti libro a Dagiti Saksi ni Jehova—Manangiwaragawag iti Pagarian ti Dios. No magun-odan dayta iti pagsasaoyo, basaenyo. Ket bayat ti panangbasayo iti dayta, imutektekanyo dagiti amin a pamay-an ti pannakiraman dagiti dadduma iti panangpaneknek maipapan iti Pagarian. Adda kadi dagiti sumagmamano a ti ulidanda ket mabalinyo a tuladen? Adu ti gundaway a silulukat kadatayo amin. Sapay koma ta tignayennatayo ti panagayat ken Jehova a mangaramat a naimbag kadagitoy.
19. Kasanotay a magunggonaan no awatentayo ti responsabilidad a kakuyog ti pannakaammo iti umiso a relihion?
19 No ikagumaantayo nga aramiden ti pagayatan ni Jehova, masarakantayo ti sungbat iti saludsod nga, Aniat’ kaipapanan ti biag? (Apocalipsis 4:11) Saantayon nga agar-arikap, a nabaybay-an a makarikna iti kinakawaw. Awanen ti sabali pay a karera a mabalinyo a pangipaayan iti bagiyo a mangyeg iti dakdakkel a pannakapnek ngem ti naimpusuan a panagserbiyo ken Jehova a Dios. Ket anian a naindaklan a masakbayan ti ipaay dayta! Maysa nga awan inggana a makapnek a biag iti baro a lubongna, a sadiay mausartayto a naan-anay dagiti kabaelantayo a maitunos iti naayat a panggep ti Dios a nangparsua iti sangatauan.
[Footnote]
a Impablaak ti Watchtower Bible and Tract Society of New York, Inc.
Kasanoyo a Sungbatan?
◻ Apay a nasken nga awaten ti maysa a relihion ti Biblia kas Sao ti Dios ken padayawanna ni Jehova kas ti pudno a Dios?
◻ Ania ti isursuro ti pudno a relihion maipapan iti akem ni Jesus kas Mannubbot?
◻ Apay a rumbeng nga agtalinaed dagiti Kristiano a naisina iti lubong ken ipakitada ti di agimbubukod nga ayat?
◻ Ania ti paset ti panangpaneknek maipapan iti Pagarian iti umiso a relihion?
[Dagiti Ladawan iti panid 16]
Ti bautismo ket maysa a napateg nga addang iti panangawat kadagiti responsabilidad ti pudno a panagdaydayaw. Iti tunggal bulan, ag-25,000 iti intero a lubong ti mangar-aramid iti dayta
Russia
Senegal
Papua
New
Guinea
E.U.A.
[Dagiti Ladawan iti panid 17]
Paset ti pudno a panagdaydayaw ti panangiranud kadagiti sabsabali iti kinapudno iti Biblia
E.U.A.
E.U.A
Brazil
Hong Kong