Dagiti Saludsod Manipud Kadagiti Managbasa
Aniat’ kayat a sawen ni adalan a Santiago idi kinunana: “Saan koma nga adu kadakayo ti agbalin a mannursuro, kakabsatko, ta ammoyo nga awatentayto ti nadagdagsen a pannakaukom”?—Santiago 3:1.
Sigurado a saan nga up-upayen ni Santiago dagiti Kristiano iti panangisuro iti kinapudno kadagiti sabsabali. Iti Mateo 28:19, 20, imbilin ni Jesus kadagiti adalanna a “mangaramidkayo kadagiti adalan a tattao iti isuamin a nasnasion, . . . nga isursuroyo kadakuada a tungpalenda dagiti isuamin a bambanag nga imbilinko kadakayo.” Gapuna, amin a Kristiano ket rumbeng nga agbalin a mannursuro. Binalakadan ni apostol Pablo dagiti Kristiano a Hebreo gapu ta saanda pay a mannursuro. Insuratna: “Nupay rebbeng koman a mannursurokayo gapu iti panawenen, kasapulanyo manen ti mangisuro kadakayo manipud pangrugian kadagiti pagdamdamuan a bambanag dagiti sagrado a balbalikas ti Dios.”—Hebreo 5:12.
Ania ngarud ti sasawen ni Santiago? Dakdakamatenna dagidiay addaan kadagiti naisangsangayan a pribilehio a mangisuro iti kongregasion. Iti Efeso 4:11, mabasatayo: “Intedna [ni Jesu-Kristo, ti Ulo ti kongregasion] ti sumagmamano kas apostol, ti sumagmamano kas mammadto, ti sumagmamano kas managebanghelio, ti sumagmamano kas papastor ken mannursuro.” Adda idi dagiti naisangsangayan a pribilehio ti panangisuro kadagiti kongregasion idi umuna a siglo a kas met itatta. Kas pagarigan, ti Bagi a Manarawidwid isut’ mangibagi iti “matalek ken masirib nga adipen” ken addaan iti naisangsangayan a responsabilidad a mangiwanwan iti pannakaisuro ti sangalubongan a kongregasion. (Mateo 24:45) Addaan met dagiti agdaldaliasat a manangaywan ken dagiti panglakayen iti kongregasion kadagiti naisangsangayan a responsabilidad a mangisuro.
Ibagbaga kadi ni Santiago kadagiti kualipikado a Kristiano a lallaki a saanda koma nga awaten ti akem ti mannursuro gapu iti panagbuteng iti nadagdagsen a panangukom ti Dios? Saan. Ti kinapanglakayen ket maysa a dakkel a pribilehio, kas impakita ti 1 Timoteo 3:1, a kunana: “No ti asinoman a lalaki ragragpatenna ti akem a manangaywan, isu tartarigagayanna ti nasayaat nga aramid.” Ti maysa kadagiti makalikaguman iti pannakadutok kas maysa a panglakayen iti kongregasion ket isut’ maysa a lalaki a “kualipikado a mangisuro.” (1 Timoteo 3:2) Saan a sinupiat ni Santiago ti naipaltiing a sasao ni Pablo.
Nupay kasta, idi umuna a siglo K.P., agparang nga imbilang dagiti dadduma ti bagbagida kas mannursuro, nupay saanda a kualipikado ken saanda a nadutokan. Mabalin a nariknada a natan-ok dayta nga akem, ket tinarigagayanda ti personal a dayaw. (Idiligyo ti Marcos 12:38-40; 1 Timoteo 5:17.) Dinakamat ni apostol Juan ni Diotrefes, a ‘kayatna nga ikutan ti umuna a saad, ngem dina inawat ti aniaman manipud ken Juan buyogen ti panagraem.’ (3 Juan 9) Dakamaten ti 1 Timoteo 1:7 dagidiay ‘nagtarigagay nga agbalin a mannursuro iti linteg ngem dida natarusan uray dagiti bambanag a sasawenda wenno dagiti bambanag a sibibileg nga ipappapilitda.’ Dagiti sasao ti Santiago 3:1 ket nangnangruna a mayanatup kadagiti lallaki nga agtarigagay nga agbalin a mannursuro ngem addaan iti di umiso a motibo. Dagiti kasta a lallaki mabalin a dangranda unay ti arban ket umawatda ngarud iti nadagdagsen a pannakaukom.—Roma 2:17-21; 14:12.
Ti Santiago 3:1 ket nasayaat met a palagip kadagidiay kualipikado ken agserbi kas mannursuro. Yantangay adu ti naitalek kadakuada, adu ti makalikaguman kadakuada. (Lucas 12:48) Kinuna ni Jesus: “Tunggal di makagunggona a sasao a sawen dagiti tattao, ipaaydanto ti pannakikuenta maipapan iti dayta iti Aldaw a Panangukom.” (Mateo 12:36) Nangnangruna a pudno daytoy kadagidiay addaan iti nabilbileg nga impluensia, dagiti nadutokan a panglakayen.
Manungsungbat dagiti panglakayen iti wagas a pannakilangenda kadagiti karnero ni Jehova. (Hebreo 13:17) Ti sawenda ket apektaranna dagiti biag. Gapuna, agannad koma ti panglakayen a saanna nga itan-ok dagiti bukodna a kapanunotan wenno irurumen dagiti karnero a kas iti inaramid dagiti Fariseo. Masapul nga ikagumaanna nga ipakita ti isu met laeng a nauneg nga ayat nga impakita ni Jesus. Tunggal mangisuro, ken nangnangruna no nairaman kadagiti hudisial a banag, naannad koma ti maysa a panglakayen iti panagsaona, a saan nga agaramat kadagiti nadarasudos a sasao wenno agyeb-ebkas kadagiti bin-ig a personal a kapanunotan. Babaen ti naan-anay a panagtalek ken Jehova, iti Saona, ken iti panangiwanwanna babaen ti organisasionna, awatento ti pastor ti nabaknang a pammendision ti Dios, saan a ti “nadagdagsen a pannakaukom.”