Napadasanyo Kadin ti Nagbalin a Pakaigapuan ti Uram iti Bakir?
SIEMPRE SAAN, kunaenyo. Ngem mabiit laeng! Nalabit napadasanyon. Imdenganyo dagiti sasao ni adalan a Santiago: “Kasta met ti dila maysa a kamkameng a bassit, ket pagpasindayagna dagiti dadakkel a bambanag. Kitaenyo! Ti nagdakkel a kakaykayuan silmutan ti bassit nga apuy!”—Santiago 3:5.
Ti dila ket maysa a napateg nga organo ti panagsao, ngem anian a di umiso ti pannakausar dayta! Usaren dagiti tao ti dila nga agulbod ken mamardaya. Babaen dayta sigugubsang nga uyawenda dagiti sabsabali, dadaelenda ti naimbag a pakasarsaritaanda, ken allilawenda ida. Usaren dagiti nasikap a managpalawag ti dila a manggutugot kadagiti tao nga umalsa. Inusar ni Adolf Hitler ti dilana a mangtignay iti nasion a makigubat—wen, maysa nga ‘uram iti bakir’!
Uray dagidiay addaan kadagiti naimbag a motibo makapataud iti babassit nga ‘uram iti bakir.’ Napadasanyo kadin ti nakaisawang iti banag sa kalpasanna dagus a nagbabawianyo met laeng dayta? No kasta, matarusanyo ti kayat a sawen ni Santiago idi a kinunana: “Ti dila, saan a mabalin a paammuen ti uray siasino a tao.”—Santiago 3:8.
Nupay kasta, mabalintay nga ikagumaan nga usaren ti dilatayo iti nasayaat. Kas ti salmista, sititibker a maikunatay met: “Annadakto dagiti dalanko tapno diak makabasol babaen itoy dilak.” (Salmo 39:1) Imbes a sigugubsang nga uyawen dagiti sabsabali, pabilgentay ketdi ida. Imbes a mamardaya kadagiti tattao, dagiti ketdi nasayaat a pakasarsaritaanda ti sawentayo. Imbes a mangallilaw ken mangulbod, sawentay ketdi ti kinapudno ken mangisurotayo. No tinignay ti nasayaat a puso, makapagsao ti dila kadagiti makaparagsak ken makapabileg a sasao. Inusar ni Jesus ti dilana iti kasayaatan a pamay-an tapno maisuro iti sangatauan ti maipapan iti pannakaisalakan.
Wen, “patay ken biag addada iti pannakabalin ti dila.” (Proverbio 18:21) Ti kadi dilayo mangiturong iti patay wenno mangipaay iti biag? Dayta kadi ti pakaigapuan ti ‘pannakauram ti bakir’ wenno mangiddep iti uram? Inkararag ti salmista iti Dios: “Ikankanta koma toy dilak ti saom, ta amin dagiti bilbilinmo kinalinteg.” (Salmo 119:172) No sukayentayo ti kababalin ti salmista, mausartay met ti dilatayo nga agpaay iti nasayaat.
[Picture Credit Line iti panid 32]
Ladawan a kukua ti U.S. Forest Service