“Nangngegyo ti Panagibtur ni Job”
“Nangngegyo ti panagibtur ni Job ket nakitayo ti nagbanagan nga impaay ni Jehova, a ni Jehova nadungngo unay iti panagayat ken naasi.”—SANTIAGO 5:11.
1, 2. Ania a suot ti nakaipasanguan ti maysa a pagassawaan idiay Poland?
AWAN pay makatawen ni Harald Abt kas maysa a Saksi ni Jehova idi sinakup ti buyot ni Hitler ti Danzig (Gdańsk itan) iti makin-amianan a Poland. Kalpasanna, rimmigaten ti kasasaad, a nakapegpeggad para kadagiti pudno a Kristiano sadiay. Dagiti Gestapo pinadasda a pinilit ni Harald a mangpirma iti dokumento a mangpaneknek a tallikudannan ti pammatina, ngem nagkedked daytoy. Kalpasan ti sumagmamano a lawas iti pagbaludan, naipan ni Harald iti kampo konsentrasion idiay Sachsenhausen. Naulit-ulit a napangtaan ken nakabkabil sadiay. Maysa nga opisial ti nangipatuldo iti simburio ti pagpuoran kadagiti bangkay ket kinunana ken ni Harald, “Agpangatokanto iti dayta agturong iti Diosmo a Jehova iti uneg ti 14 nga aldaw no dimo tallikudan ti pammatim.”
2 Idi naarestar ni Harald, agpaspasuso pay laeng ni baketna nga Elsa iti sangapulo ti bulanna a maladagada. Ngem saan nga inispal dagiti Gestapo ni Elsa. Di nagbayag, innalada ti anakna ket impanda ni Elsa iti pagtalipuposan a kampo sadi Auschwitz. Ngem nalasatanna dayta iti mano a tawen, kas ken ni Harald. Iti Pagwanawanan nga Oktubre 15, 1980, mabasayo ti kanayonan a detalye no kasanoda a nakapagibtur. Insurat ni Harald: “No gupgopen, 14 a tawen ti binusbosko kadagiti kampo konsentrasion ken pagbaludan gapu iti pammatik iti Dios. Naisaludsod kaniak: ‘Ni baketmo kadi ti maysa a makagapu no apay a maib-ibturam amin dagitoy?’ Pudno dayta! Ammok uray idi damo pay laeng a dina pulos ikompromiso ti pammatina, banag a nangpabileg kaniak. Ammok a kaykayatna a makitanak a matay ngem daydiay maammuanna a nawayawayaanak gapu ta nagkompromisoak. . . . Inibturan ni Elsa ti adu a rigat kabayatan dagiti tawtawen ti kaaddana kadagiti kampo konsentrasion idiay Alemania.”
3, 4. (a) Makin-ulidan ti makatulong kadagiti Kristiano nga agibtur? (b) Apay nga idagadag kadatayo ti Biblia nga usigentayo ti kapadasan ni Job?
3 Saan a nalaka nga ibturan ti dakes, kas patalgedan ti adu a Saksi. Dayta ti makagapu a balakadan ti Biblia ti amin a Kristiano: “Alaenyo kas pagtuladan iti panagsagaba iti dakes ken iti panangwatwat iti kinaanus dagiti mammadto, a nagsao iti nagan ni Jehova.” (Santiago 5:10) Iti sinigsiglon, adu nga adipen ti Dios ti naidadanes nga awan gapgapuna. Dagiti ulidan daytoy a dakkel nga “ulep dagiti saksi” paregtaendatayo nga agtultuloy iti Nakristianuan a pannakilumbatayo buyogen ti panagibtur.―Hebreo 11:32-38; 12:1.
4 Iti rekord ti Biblia, naisangsangayan a pagwadan ti panagibtur ni Job. “Adtoy! Kunaentayo a naragsak dagidiay nakapagibtur,” insurat ni Santiago. “Nangngegyo ti panagibtur ni Job ket nakitayo ti nagbanagan nga impaay ni Jehova, a ni Jehova nadungngo unay iti panagayat ken naasi.” (Santiago 5:11) Ti kapadasan ni Job ikkannatayo iti pangripiripan no ania ti gunggona nga agur-uray kadagidiay matalek, isuda a bendisionan ni Jehova. Napatpateg pay, ipalgakna dagiti kinapudno a makatulong kadatayo no maipasangotayo kadagiti rigat. Ti libro a Job tulongannatayo a mangsungbat kadagitoy a saludsod: No maipasango iti pakasuotan, apay nga ikagumaantayo koma a tarusan dagiti kangrunaan nga isyu a nairaman? Ania dagiti galad ken kababalin a tumulong kadatayo nga agibtur? Kasanotay a mapabileg dagiti padatayo a Kristiano nga agsagsagaba iti rigat?
Panangtarus iti Intero a Situasion
5. Ania a kangrunaan nga isyu ti kanayon a laglagipentayo no maipasangotayo kadagiti pakasuotan wenno pannulisog?
5 Tapno makapagtalinaedtayo a natimbeng iti naespirituan kabayatan ti rigat, masapul a matarusantayo no ania a talaga ti kasasaad. Ta no saan, dagiti personal a parikuttayo mabalinda a kullaapan ti naespirituan a panangmatmattayo. Napateg unay ti isyu mainaig iti kinasungdotayo iti Dios. Adda idagdagadag ti nailangitan nga Amatayo nga ipapusotayo koma kas indibidual: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” (Proverbio 27:11) Anian a naisangsangayan a pribilehio dayta! Iti laksid dagiti pagkapuyan ken kinaimperpektotayo, mabalintayo a paragsaken ti Namarsua kadatayo. Maaramidtayo dayta no ti panagayattayo ken ni Jehova ti mangtignay kadatayo a mangibtur kadagiti pakasuotan ken pannulisog. Ti pudno a Nakristianuan nga ayat ibturanna ti amin a banag. Saan a pulos a mapaay dayta.―1 Corinto 13:7, 8.
6. Kasano a ni Satanas um-umsienna ni Jehova, ken kasano kakarona?
6 Ti libro a Job nalawag a tukoyenna ni Satanas kas daydiay mangum-umsi ken ni Jehova. Ibutaktakna met ti kinadakes daytoy a di makita a kabusor ken ti tarigagayna a mangdadael iti relasiontayo iti Dios. Kas ipakita ti kapadasan ni Job, pagparangen ni Satanas nga inaagum ti motibo ti amin nga adipen ni Jehova ken ikagkagumaanna a paneknekan a mabalin nga agbaaw ti panagayatda iti Dios. Inum-umsina ti Dios iti rinibun a tawtawen. Idi napapanaw ni Satanas idiay langit, maysa a timek manipud langit ti nangdeskribir kenkuana kas “ti manangakusar kadagiti kakabsattayo” ken ar-aramidenna ti kasta a panangakusar “iti aldaw ken rabii iti sanguanan ti Diostayo.” (Apocalipsis 12:10) Ngem babaen ti matalek a panagibturtayo, mapaneknekantayo nga ulbod dagiti akusasionna.
7. Ania ti kasayaatan a pangsarangettayo iti pisikal a pagkapuyan?
7 Nasken a laglagipentayo a gunggundawayan ti Diablo ti aniaman a pakarigatan a mabalin a pakaipasanguantayo tapno mayadayonatayo ken ni Jehova. Kaano a sinulisogna ni Jesus? Idi mabisin ni Jesus kalpasan ti panagayunarna iti adu nga aldaw. (Lucas 4:1-3) Ngem gapu ta natibker ti espiritualidad ni Jesus, sibibileg a napagkedkedanna dagiti pannulisog ti Diablo. Anian a nagpateg a patibkerentayo ti espiritualidadtayo tapno masarangettayo ti aniaman a pisikal a pagkapuyan, maigapu man dayta iti sakit wenno panaglakay! Uray pay no ‘ti kinataotayo iti ruar ket kumapkapuy,’ saantay a sumuko gapu ta ‘ti kinataotayo iti uneg mapabpabaro iti inaldaw-aldaw.’—2 Corinto 4:16.
8. (a) Kasano a makadadael dagiti negatibo a rikna? (b) Ania ti pagannayasan ti isip ni Jesus?
8 Malaksid iti dayta, dagiti negatibo a rikna mabalinda a dadaelen ti espiritualidad ti maysa. ‘Apay ngamin aya nga ipalpalubos daytoy ni Jehova?’ nalabit a panunoten ti maysa. ‘Apay a kastoy ti panangtrato kaniak ti kabsat?’ nalabit nga iyimtuod ti maysa kalpasan ti saan a nasayaat a pannakatratona. No kasta ti riknatayo, mabalin a malipatantayo dagiti kangrunaan nga isyu ket ti laengen personal a kasasaadtayo ti pampanunotentayo. No kasano a nagsagaba ni Job iti pisikal gapu iti sagubanitna, nagsagaba met ti riknana gapu iti pannakaupayna kadagiti saan nga umiso a panagrasrason dagiti tallo a kakaduana. (Job 16:20; 19:2) Umasping iti dayta, impamatmat ni apostol Pablo a ti agpaut a pungtot mabalinna nga “ikkan ti lugar [wenno, gundaway] ti Diablo.” (Efeso 4:26, 27) Imbes nga iyebkas ti pannakaupay wenno unget kadagiti indibidual wenno ipaayan iti nalabes nga atension ti di nainkalintegan a kasasaad, nasaysayaat a tuladen dagiti Kristiano ti inaramid ni Jesus nga ‘intalekna ti bagina iti daydiay mangukom a sililinteg,’ ni Jehova a Dios. (1 Pedro 2:21-23) No tuladentayo ti kasta a “pagannayasan ti isip” ni Jesus, agserbi dayta a nabileg a salaknib maibusor kadagiti panangraut ni Satanas.―1 Pedro 4:1.
9. Ania ti ipanamnama kadatayo ti Dios maipapan kadagiti dadagsen nga ibaklaytayo wenno pannulisog a pakaipasanguantayo?
9 Kangrunaan iti amin, ditay koma pulos panunoten nga adda saan a nagustuan ti Dios kadatayo isu nga agpaspasartayo iti rigat. Ti kasta a di umiso a panangmatmat ti nangupay ken ni Job iti sumagmamano a tiempo idi naiturong kenkuana dagiti nagubsang a sasao dagiti rumbeng koma a mangliwliwa kenkuana. (Job 19:21, 22) Ipanamnama kadatayo ti Biblia dagitoy a sasao: “Iti dakes a bambanag saan a mabalin a suoten ti Dios ket isu saanna met a suoten ti asinoman.” (Santiago 1:13) Iti sabali a bangir, ikarkari ni Jehova a tulongannatayo aniaman a dadagsen ti umapay kadatayo ken ispalennatayo manipud iti aniaman a sulisog a maipasango kadatayo. (Salmo 55:22; 1 Corinto 10:13) Babaen ti panagtalinaed a nasinged iti Dios kadagiti panawen ti riribuk, mataginayontayo ti umiso a panangmatmat kadagiti bambanag ken sibaballigi a masarangettayo ti Diablo.―Santiago 4:7, 8.
Tulong Tapno Makapagibtur
10, 11. (a) Ania ti timmulong ken ni Job nga agibtur? (b) Kasano a nakatulong ken ni Job ti panangsalimetmet iti nadalus a konsiensia?
10 Iti laksid ti nakaay-ay-ay a kasasaad ni Job, agraman ti pananginsulto dagiti “manangliwliwa” kenkuana ken ti pannakarirona no ania a talaga ti pakaigapuan ti rigatna, tinaginayon latta ni Job ti kinatarnawna. Ania ti maadaltayo iti dayta a panagibturna? Awan duadua a ti napateg a rason no apay a nakapagballigi ni Job isu ti kinamatalekna ken ni Jehova. Isu ket ‘nagbuteng iti Dios ken simiasi iti dakes.’ (Job 1:1) Dayta ti wagas ti panagbiagna. Saanna a pulos a tinallikudan ni Jehova, uray no dina ammo no apay a kellaat a dimmakes ti kasasaadna. Patien ni Job a rebbengna a pagserbian ti Dios, nasayaat man wenno narigat ti kasasaad.―Job 1:21; 2:10.
11 Nakaliwliwa met ken ni Job ti panangsalimetmetna iti nadalus a konsiensia. Iti panawen a kasla mauyosen ti biagna, nakaliwliwa kenkuana ti pannakaammona nga inaramidna ti amin a kabaelanna a timmulong kadagiti sabsabali, nga inannurotna dagiti nalinteg a pagalagadan ni Jehova, ken liniklikanna ti aniaman a kita ti di umiso a panagdayaw.―Job 31:4-11.
12. Ania ti inaramid ni Job idi isu ket tinulongan ni Eliu?
12 Siempre, saan latta a mailibak ti kinapudno a kasapulan ni Job ti tulong tapno maatur ti panangmatmatna iti sumagmamano a banag. Sipapakumbaba nga inawatna ti kasta a tulong. Dayta ti maysa pay a rason a sibaballigi a nakapagibtur ni Job. Siraraem nga impangagna ti nainsiriban a balakad ni Eliu, ket nagtignay maitunos iti panangilinteg ni Jehova. “Nagsaoak, ngem saanko idi a maaw-awatan,” binigbigna. “Mangaramidak iti panangibabawi, ket agbabawiak iti tapok ken dapdapo.” (Job 42:3, 6) Iti laksid ti ib-ibturanna idi a sagubanit, nagrag-o ni Job gapu ta ti kasta a pannakaatur ti panunotna ti ad-adda a nangyadani kenkuana iti Dios. “Naammuak a kabaelam nga aramiden amin a bambanag,” kinuna ni Job. (Job 42:2) Iti tulong ti panangilawlawag ni Jehova, ad-adda a naawatan ni Job no ania ti takderna no idilig iti kinadaeg ti Namarsua.
13. Kasano a nagimbagan ni Job ti panangipakitana iti asi?
13 Kamaudiananna, nangipaay ni Job iti nagsayaat nga ulidan ti kinamanangngaasi. Nasair a talaga ti riknana kadagiti sinsinan a manangliwliwa kenkuana, ngem idi kiniddaw ti Dios nga ikararaganna ida, nagtulnog ni Job. Kalpasan dayta, insubli ni Jehova ti salun-at ni Job. (Job 42:8, 10) Nalawag, ti panangipempen iti sakit ti nakem dinatay matulongan nga agibtur. Iti sabali a bangir, makatulong ti ayat ken asi. Makapagin-awa iti naespirituan no ikkatentayo ti aniaman a sakit ti nakem nga adda kadatayo, ket bendisionan ni Jehova ti kasta a tignay.―Marcos 11:25.
Dagiti Masirib a Mamalbalakad a Tumulong Kadatayo nga Agibtur
14, 15. (a) Ania dagiti galad a tumulong iti mamalbalakad tapno mapaimbagna ti dadduma? (b) Ilawlawagyo no apay a nagballigi ni Eliu a nangtulong ken ni Job.
14 Ti sabali pay a masursurotayo iti napasamak ken ni Job isu ti pateg dagiti masirib a mamalbalakad. Arigna a maysada a kabsat a “tumulong iti tiempo ti rigat.” (Proverbio 17:17, Ti Baro a Naimbag a Damag Biblia) Ngem kas ipakita ti kapadasan ni Job, dadduma a mamalbalakad ti mabalin a mangpasakit imbes a mangpaimbag. Ti maysa a nasayaat a mamalbalakad masapul nga ipakitana ti empatia, panagraem, ken kinamanangngaasi, kas impakita ni Eliu. Dagiti papanglakayen ken dadduma a nataengan a Kristiano mabalin a kasapulan nga aturenda ti panangmatmat dagiti kakabsat a madagdagsenan kadagiti parikut. Iti panangaramidda iti dayta, adu ti masursuroda manipud iti libro a Job.―Galacia 6:1; Hebreo 12:12, 13.
15 Adu ti agkakaimbag a maadal no kasano a tinaming ni Eliu ti bambanag. Siaanus a nagimdeng sakbay a sinungbatanna dagiti di umiso a komento dagiti tallo a kakadua ni Job. (Job 32:11; Proverbio 18:13) Inaramat ni Eliu ti nagan ni Job ket nagpakaasi kenkuana a kas iti maysa a gayyem. (Job 33:1) Saan a kas kadagiti sinsinan a manangliwliwa, dina imbilang ti bagina a natantan-ok ngem ni Job. “Manipud iti pila nasukogak, siak met,” kinunana. Dina kayat a pakaruen ti panagsagaba ni Job babaen kadagiti makasair a sasao. (Job 33:6, 7; Proverbio 12:18) Imbes nga umsienna ti sigud a kababalin ni Job, kinomendaran ni Eliu ti nalinteg a kababalin ni Job. (Job 33:32) Kapatgan iti amin, minatmatan ni Eliu ti bambanag sigun iti panangmatmat ti Dios, ket tinulonganna ni Job a mangbigbig iti kinapudno a di pulos agtignay ni Jehova iti di nainkalintegan a wagas. (Job 34:10-12) Pinaregtana ni Job nga aguray ken ni Jehova, imbes nga ikagumaanna a paneknekan ti bukodna a kinalinteg. (Job 35:2; 37:14, 23) Makasursuro dagiti Kristiano a papanglakayen ken dagiti sabsabali manipud kadagita a leksion.
16. Kasano a nagpausar ken ni Satanas ti tallo a sinsinan a manangliwliwa?
16 Ti nainsiriban a balakad ni Eliu ket naiduma kadagiti makapasakit a sasao da Elifaz, Bildad, ken Zofar. “Saankayo a nagsao iti napudno maipapan kaniak,” kinuna kadakuada ni Jehova. (Job 42:7) Uray imbagada a nasayaat ti motiboda, nagpausarda latta ken ni Satanas imbes a nagtignayda koma a kas matalek a kakadua. Sipud pay idi damo, pinanunotda a ni Job met la ti makimbasol iti panagsagabana. (Job 4:7, 8; 8:6; 20:22, 29) Sigun ken ni Elifaz, awan ti talek ti Dios kadagiti adipenna, ken saan a napateg kenkuana no nalintegtayo wenno saan. (Job 15:15; 22:2, 3) Pinabasolna pay ni Job kadagiti banag a dina met inaramid. (Job 22:5, 9) Iti sabali a bangir, pinabileg ni Eliu ti espiritualidad ni Job, ti kanayon a kalat ti maysa a naayat a mamalbalakad.
17. Ania ti nasken a laglagipentayo no maipasangotayo iti pakasuotan?
17 Adda sabali pay a leksion maipapan iti panagibtur a maadaltayo iti libro a Job. Ti naayat a Diostayo makitkitana ti kasasaadtayo ket sidadaan ken kabaelannatayo a tulongan iti nadumaduma a pamay-an. Nadakamat itay ti kapadasan ni Elsa Abt. Panunotenyo ti nagtengna a konklusion: “Sakbay ti pannakaarestok, nabasak ti surat ti maysa a kabsat a babai a nagkuna nga iti sidong ti nakaro a pakasuotan, ti espiritu ni Jehova ti mangpakalma iti riknam. Kunak no medio panaglablabes dayta nga imbagana. Ngem idi naipasangoak kadagiti pakasuotan, napaneknekak a pudno ti kinunana. Kasta a talaga ti napasamak. Narigat nga iladawan dayta no dimo mapasaran a mismo. Ngem kasta a talaga ti napasarak. Tumulong ni Jehova.” Saan a tuktukoyen ni Elsa no ania ti kabaelan nga aramiden wenno inaramid ni Jehova idi panawen ni Job manon a milenio ti napalabas. Ti tuktukoyenna ket no ania ti ar-aramiden ni Jehova iti kaaldawantayo. Pudno a “tumulong ni Jehova”!
Naragsak ti Tao nga Agibtur
18. Ania dagiti gunggona a nasagrap ni Job gapu iti panagibturna?
18 Manmano la kadatayo ti maipasango iti nakaro a rigat a napasaran ni Job. Ngem aniaman a pakasuotan ti iyeg kadatayo daytoy a sistema ti bambanag, adda dagiti naimbag a rasontayo a mangsalimetmet iti kinatarnawtayo, kas inaramid ni Job. Kinapudnona, nagimbagan ni Job ti panagibturna. Dayta ti nanggugor kenkuana, a namagbalin kenkuana a nasaysayaat a tao. (Santiago 1:2-4) Napalagda ti relasionna iti Dios. “Iti alimadamad nangngegko ti maipapan kenka, ngem ita ti bukodko a mata makitanaka,” impatalged ni Job. (Job 42:5) Napaneknekan nga ulbod ni Satanas gapu ta dina nadadael ti kinatarnaw ni Job. Ginasgasut a tawen kalpasanna, nagtalinaed a minatmatan ni Jehova ti adipenna a ni Job kas maysa nga ulidan ti kinalinteg. (Ezequiel 14:14) Makapabileg ti pakasaritaan ti kinatarnaw ken panagibturna uray kadagiti adipen ti Dios ita.
19. Apay a matmatam a makagunggona ti panagibtur?
19 Idi nagsurat ni Santiago kadagiti Kristiano idi umuna a siglo maipapan iti panagibtur, dinakamatna ti maipapan iti pannakapnek nga iyeg ti panagibtur. Inusarna ti ulidan ni Job tapno ipalagipna kadakuada a sibabaknang a bendisionan ni Jehova dagiti matalek nga adipenna. (Santiago 5:11) Mabasatayo iti Job 42:12: “No maipapan ken Jehova, binendisionanna ti naud-udi a tungpal ni Job nga ad-adda ngem iti punganayna.” No ania ti napukaw ni Job, doble nga insubli dayta kenkuana ti Dios, ket tinagiragsakna ti napaut ken naragsak a biagna. (Job 42:16, 17) Umasping iti dayta, mapunas ken malipatanto iti baro a lubong ti Dios ti aniaman a saem, panagsagaba, wenno pannakapaay a mabalin nga ib-ibturantayo kabayatan ti panungpalan daytoy sistema ti bambanag. (Isaias 65:17; Apocalipsis 21:4) Naammuantayo ti panagibtur ni Job, ket determinadotayo a tuladen ti ulidanna, buyogen ti tulong ni Jehova. Ikari ti Biblia: “Naragsak ti tao nga agtultuloy nga agibtur iti pannakasuot, agsipud ta iti pannakaanamongna awatennanto ti korona ti biag, nga inkari ni Jehova kadagidiay agtultuloy nga agayat kenkuana.”—Santiago 1:12.
Ania ti Sungbatyo?
• Kasanotayo a maparagsak ti puso ni Jehova?
• Apay a ditay koma panunoten nga adda saan a magustuan ti Dios kadatayo isu nga agpaspasartayo iti rigat?
• Ania dagiti nakatulong ken ni Job nga agibtur?
• Kasanotayo a matulad ni Eliu no maipapan iti panangpabileg kadagiti kapammatiantayo?
[Ladawan iti panid 28]
Ti nasayaat a mamalbalakad ket mangipakita iti empatia, panagraem, ken kinamanangngaasi
[Dagiti Ladawan iti panid 29]
Da Elsa ken Harald Abt