No Apay a Kasapulantayo ti Pammati ken Sirib
Dagiti Tampok Manipud Surat ni Santiago
DAGITI ad-adipen ni Jehova kasapulanda ti panagibtur no addada iti sidong ti pannakasuot. Masapul met a liklikanda dagiti aramid a mangibunga ti di pananganamong ti Dios. Dagita a bambanag ti naipaganetget iti surat ni Santiago, ken ti panangaramid kadagiti banag a positibo maipapan kadagitoy sapulenna ti aktibo a pammati ken nailangitan a sirib.
Ti mannurat dina ipabigbig ti bagina kas maysa kadagiti dua nga apostol ni Jesus nga agnagan Santiago ngem kas “maysa nga adipen ti Dios ken ni Kristo.” Umas-asping, ni Judas a kabsat ni Jesus kinunana nga isu ket maysa nga “adipen ni Kristo Jesus, ngem maysa a kabsat ni Santiago.” (Santiago 1:1; Judas 1; Mateo 10:2, 3) No kasta, nalawag a ni Santiago a kabsat ni Jesus ti nangisurat iti surat a nakainaigan ti naganna.—Marcos 6:3.
Daytoy a surat saanna a dakamaten ti pannakadadael ti Jerusalem idi 70 K.P., ket ti historiador a ni Josephus impakitana a ni Santiago napapatay kalpasan la unay ti ipapatay ti Romano a prokurador a ni Festo idi agarup 62 K.P. Nalawag, ngarud, ti surat ket naisurat sakbay ti 62 K.P. Naiturong daytoy kadagiti “sangapulo ket dua a tribo” ti naespirituan nga Israel, agsipud ta naiturong daytoy kadagidiay mangsalsalimetmet iti “pammati ken Apotayo a Jesu-Kristo.”—Santiago 1:1; 2:1; Galacia 6:16.
Nagusar ni Santiago kadagiti ilustrasion a makatulong kadatayo a manglagip iti pammagbagana. Kas pangarigan, impakitana a ti maysa a tao nga agdawdawat ti sirib iti Dios saan koma nga agduadua, “ta ti managduadua umasping iti maysa a dalluyon ti baybay, nga iduron ti angin ket agpallayug.” (1:5-8) Tenglentay koma ti dilatayo agsipud ta mabalinna nga iturong ti dalantayo a kas ti maysa a timon iturongna ti sasakayan. (3:1, 4) Ken tapno makapagballigi kadagiti pakasuutan, kasapulantay nga iparangarang ti panaganus a kas ti agtaltalon no ur-urayenna ti panagani.—5:7, 8.
Ti Pammati, dagiti Pakasuotan, ken Ar-aramid
Umuna nga impakita ni Santiago a makapagragsaktayo kas Kristiano uray adut’ pakasuotantayo. (1:1-18) Dadduma kadagitoy a pakasuotan, a kas koma kadagiti saksakit, gagangayda laeng kadagiti amin a tattao, ngem dagiti Kristiano agsagabada met gaput’ panagbalinda nga ad-adipen ti Dios ken ni Kristo. Ni Jehova ipaayna ti sirib a kasapulan iti panagibtur no kanayontayo nga agdawat iti dayta babaen ti pammati. Dinatay pulos suoten kadagiti dakes a bambanag, ken makapagtalektay kenkuana a mangipaay no ania ti naimbag.
Tapno umawat tulong ti Dios, masapul nga agdawattay kenkuana babaen kadagiti aramid a mangidemostrar ti pammatitayo. (1:19–2:26) Daytoy kasapulanna a “managtungpaltay koma iti sao,” saan a basta managdengngeg laeng. Masapul a ngedngedantay ti dila, aywanan dagiti ulila ken balo, ken agtalinaed nga awan tulawna manipud lubong. No idumdumatay dagiti nabaknang ket ipueratayo dagiti napanglaw, masalungasingtayo “ti naarian a linteg” ti ayat. Laglagipentayo met a ti pammati ket maipakita babaen kadagiti ar-aramid, kas iladawan a naimbag dagiti ulidan da Abraham ken Rahab. Pudno, “ti pammati nga awanan ar-aramid, natay.”
Nailangitan a Sirib ken Panagkararag
Dagiti mannursuro kasapulanda agpadpada ti pammati ken sirib tapno maitungpalda ti annongenda. (3:1-18) Addaandat’ nadagsen unay a responsabilidad kas instruktor. Kas kadakuada, kasapulan a ngedngedantay ti dila—banag a pangtulongan ti nailangitan a sirib kadatayo nga aramiden.
Ti sirib pagbalinennatayo met a makabigbig a ti itutulok kadagiti nailubongan a pagannayasan dadaelenna ti relasiontayo iti Dios. (4:1–5:12) No nagreggettayo tapno magun-odan dagiti agimbubukodan a panggep wenno kinondenartayo dagiti kakabsattayo, kasapulantay ti agbabawi. Ken anian a nagpateg a liklikan ti pannakigayyem iti daytoy a lubong, ta maysa daytoy a naespirituan a pannakikamalala! Ditay pulos laksiden ti pagayatan ti Dios babaen kadagiti namaterialistikuan a panagplano, ket agannadtayo a maibusor iti espiritu ti kinadarasudos ken panagsao a maibusor iti maysa ken maysa.
Siasinoman a masaksakit iti naespirituan sapulenna koma ti tulong dagiti panglakayen ti kongregasion. (5:13-20) No nakaaramid kadagiti basol, dagiti karkararag ken nasirib a pammagbagada makatulongto a maipasubli ti naespirituan a salun-at ti maysa nga agbabbabawi a managbasol. Kinapudnona, “ti mamagbabawi iti maysa a managbasol iti pannakaallilaw ti dalanna isalakannanto ti karuarua [ti nagaramid ti dakes] manipud [naespirituan ken agnanayon] nga ipapatay.”
[Kahon iti panid 23]
Managtungpal iti Sao: “Managtungpaltay koma iti sao, ket saan laeng a managdengngeg.” (Santiago 1:22-25) Ti maysa a basta managdengngeg laeng “umasping iti maysa a tao a kitkitaenna ti nakayanakanna a rupa iti maysa a sarming.” Kalpasan apagbiit a panangsukimat, pumanaw “ket malipatanna a daras no ania ti kitana a tao idi.” Ngem ti maysa a ‘managtungpal ti sao’ siaannad a matmatanna ti perpekto, wenno naan-anay, a linteg ti Dios, a saklawenna ti isuamin a kasapulan iti maysa a Kristiano. Isu “agtalinaed iti dayta,” nga itultuloyna a sukimaten dayta a linteg tapno mangaramid ti panangpalinteg tapno makitunos a sisisinged iti dayta. (Salmo 119:16) Kasano a “ti maysa a managtungpal iti aramid” maigiddiat manipud maysa a tao a kumita iti sarming ket malipatanna no ania ti ipanayagna? Ay ket, ti managtungpal pagkurrienna ti sao ni Jehova ket tagiragsakenna ti anamongna!—Salmo 19:7-11.