Makin-uneg nga Imnas
GEODE. Nakaskasdaaw a sao. Dayta ket nagtaud iti sao a Griego a ge·oʹdes, a kaipapananna “kas iti daga.” Dayta ket maysa a bato nga agarup nagtimbukel, naglungog, ken adda panagdudumana a 3 centimetros agingga iti nasurok a 0.3 metros ti diametrona. Ti naipakita ditoy ket ad-adda a nagbennat ngem nagtimbukel ket naggapu iti Brazil. Ti makinruar a buyana ket kastoy ken kasdiay, kas ti kasasaad dagiti batbato.
Ngem lukatantayo dayta! Kitaenyo ti unegna! Matmatanyo a naimbag dagidiay nabunton a naipekpek a rumimat nga eskarlata a kristal! Ti geode ket naporma iti lungog dagiti naarinsaedan a batbato. Bayat a dumakkel daytoy, agrikki ti rabawna, isu a mangipalubos ti danum nga addaan iti mineral nga umagsep, ken bayat ti itatangken ti mineral, dumakkel ti kristal iti uneg iti diding ti lungog. Bayat ti panaglabas ti tiempo maaddaantayon iti geode a napno iti kristal. Ti maysa a naipakita ditoy nangpataud iti eskarlata a kita dagiti timmangkenen a quartz a maawagan amethyst. Mabalin a saan unay a napintas ti pammarang a buyana, ngem ti makin-uneg a kinapintasna ket rumimat!
Adda kadi am-ammoyo a tattao a managayat kadagiti geodes? Naulimek, mabalin a managbabain, nalabit gagangay laeng ti itsurana iti ruar? Ngem maaddaankayo iti tiempo a mangammo iti dayta, ket iparangarangda ken ipakitada kadakayo ti makin-uneg a kinapintas a rumimat. Maysa a nabara, naasi nga espiritu ti tumaud, maysa a makaay-ayo a personalidad ti maiparangarang. Makadiskubrekayo kadagiti makin-uneg a kualidad a saanyo a ninamnama.
Mangrugi a maapresiaryo ti kinuna ni apostol Pedro: “A ti arkosyo saan koma a ti arkos iti ruar, ti panagsallapid iti buok ken ti panangikapet kadagiti alahas a balitok wenno ti naarkos a pagan-anay. Ngem ti tao a makin-uneg iti puso maarkosan koma iti kawes a mataginayon ti maysa a nakem a naemma ken natalna, isu a dakkel ti pategna iti imatang ti Dios.”—1 Peter 3:3, 4.
Ket padasenyo a matmatan dagiti bambanag sigun iti panangmatmat ti Dios: “Ti tao kitaenna iti akinruar a panagparang, ngem ni Jehova kitaenna ti puso.”—1 Samuel 16:7.