Ad-adda a Manayon Ngem Puro a Balitok
ADU ti agsapsapul iti balitok agsipud ta nasudi ken manayon. Kangrunaanna a matarigagayan gapu iti di agkupas a silengna ken ti kasla saanna a pulos panaglati. Ti balitok ket saan ngamin nga agsagepsep iti danum, oksihena, asupre, ken nganngani amin a makaperdi nga elemento. Adu dagiti balitok nga artifact a nadiskobre kadagiti limned a barko ken dadduma pay ti nagtalinaed a nasilap kalpasan ti ginasut a tawen.
Nupay kasta, makapainteres ta ibaga ti Biblia nga adda banag nga ad-adda a manayon ken “dakdakkel unay ti pategna ngem ti balitok a madadael agpapan pay pannakasubokna babaen iti apuy.” (1 Pedro 1:7) Ti balitok a ‘nasubok,’ wenno nagugoran, iti apuy ken dadduma pay a proseso ket mabalin a maragpatna ti 99.9 porsiento a kinapuro. Kaskasdi, uray ti nagugoran a balitok ket madadael, wenno marunaw, no mayuper iti aqua regia (nabileg a danum), ti naglaok a tallo kapaset a hydrochloric acid ken maysa a kapaset a nitric acid. Gapuna, no mainaig iti siensia, umiso ti Biblia idi kunaenna a ti ‘balitok madadael.’
Iti kasunganina, ti pudno a Nakristianuan a pammati ‘taginayonenna a sibibiag ti kararua.’ (Hebreo 10:39) Dagiti tattao mapapatayda ti tao a nabileg ti pammatina, kas iti inaramidda ken Jesu-Kristo. Ngem naikari kadagidiay napudno ti pammatida: “Paneknekam ta bagim a matalek uray agingga ken patay, ket itedkonto kenka ti korona ti biag.” (Apocalipsis 2:10) Dagidiay matay maigapu iti pammatida agtalinaedda iti lagip ti Dios, ket pagungarennanto ida. (Juan 5:28, 29) Saan a maaramidan dayta ti uray mano a balitok. Mainaig iti daytoy, ti pammati ket pudno nga adayo a napatpateg ngem ti balitok. Ngem tapno maaddaan ti pammati iti kasta nga umartap a pateg, masapul met a masubok, wenno magugoran. Kinapudnona, “ti nasubok a kualidad ti pammati” ti imbaga ni Pedro a napatpateg ngem balitok. Pakaragsakan dagiti Saksi ni Jehova ti tumulong kadakayo a mangadal iti Biblia tapno mapatanor ken mataginayonyo ti nabileg a pammati iti pudno a Dios, ni Jehova, ken iti Anakna, ni Jesu-Kristo. Sigun ken Jesus, dayta “kaipapananna ti agnanayon a biag.”—Juan 17:3.