Talaga Kadi a Kasapulan nga Agpadispensarkayo?

‘PULOS a diak agpadispensar,’ insurat ni George Bernard Shaw. ‘Ti napasamak ket napasamaken,’ mabalin a kunaen ti dadduma.

Nalabit agkedkedtay a mismo a mangbigbig iti biddut gapu iti panagamak a maibabain. Mabalin nga ikalintegantayo a ti parikut adda iti sabali a tao. Wenno mabalin nga agpadispensartayo ngem itantan pay laeng dayta agingga nga iti panagkunatayo nalipatanen kamaudiananna daydiay a banag.

Gapuna, no kasta, nasken kadi ti panagpadispensar? Talaga kadi nga adda maaramidanda?

Ayat ti Mangtignay Kadatayo nga Agpadispensar

Ti nainkabsatan nga ayat isut’ maysa a pakailasinan kadagiti pudno a pasurot ni Jesu-Kristo. Kinunana: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Idagadag ti Kasuratan kadagiti Kristiano nga ‘ayatenda ti maysa ken maysa a nasged unay manipud iti puso.’ (1 Pedro 1:22) Tignayennatayo ti nasged nga ayat tapno agpadispensar. Apay? Agsipud ta ti natauan a kinaimperpekto ti di maliklikan a pakaigapuan ti pannakasair ti rikna a manglapped iti ayat no dida aglunit.

Kas pagarigan, gapu kadagiti personal a di pagkinnaawatan iti maysa nga adda iti kongregasion Kristiano, mabalin a ditay kayat ti makisarita kenkuana. No datayo ti nakabasol, kasano a maisubli ti naayat a relasion? Iti kaaduan a kaso, babaen ti panagpadispensar sa kalpasanna ikagumaan ti makisarita iti nabara a pamay-an. Utangtayo ti ayat kadagiti kapammatiantayo, ket no kunaentayo a ladingitentayo ti panagbasoltayo, kiskissayantayo ti sumagmamano iti dayta nga utang.​—Roma 13:8.

Tapno iyilustrar: Nabayagen nga aggayyem ti dua a Kristiano a babbai a da Mari Carmen ken Paqui. Ngem, gapu ta namati ni Mari Carmen iti sumagmamano a makadangran a danondanon, limmamiis ti pannakigayyemna ken ni Paqui. Naan-anay a liniklikanna ni Paqui, nga awan aniaman a panangilawlawag. Gistay makatawen ti napalabas, naammuan ni Mari Carmen a saan a pudno ti danondanon. Aniat’ inaramidna? Ayat ti nangtignay kenkuana nga umadani ken Paqui ket sipapakumbaba nga inyebkasna ti nakaro a panagbabawina gapu iti di umiso nga inaramidna. Agpadpada a nagarubos dagiti luada, ket manipud idin simminged ti panaggayyemda.

Nupay ipagaruptay nga awan inaramidtayo a dakes, ti panagpadispensar mabalin a risutenna ti di pagkikinnaawatan. Malagip ni Manuel: “Adu a tawenen ti napalabas nagnaedkami ken ni baketko iti pagtaengan ti maysa kadagiti kabsattayo a babbai iti naespirituan bayat a nayospital. Inaramidmi ti amin a kabaelanmi a tumulong kenkuana ken kadagiti annakna kabayatan ti panagsakitna. Ngem idi nakaawiden, inreklamona iti maysa a gayyem a dimi inasikaso a naimbag dagiti paggastuan iti pagtaengan.

“Simmarungkarkami ket inlawlawagmi a nalabit gapu iti kinaubing ken kinakurang ti kapadasanmi, dimi naasikaso dagiti bambanag a kas iti panangasikasona. Dagus a simmungbat iti panangikunana nga isut’ nakautang kadakami ket pudno nga agyamyaman kadagiti amin a naaramidanmi kenkuana. Narisut ti parikut. Insuronakami dayta a kapadasan maipapan iti kinapateg ti sipapakumbaba a panagpadispensar no tumanor ti di pagkikinnaawatan.”

Binendisionan ni Jehova daytoy a pagassawaan gapu iti panangipakitada iti ayat ken ‘panangsurot kadagiti bambanag a mamataud iti talna.’ (Roma 14:19) Mairaman met iti ayat ti pannakaseknan kadagiti rikna dagiti sabsabali. Balakadannatayo ni Pedro a mangipakita iti “pannakipagmaymaysa ti rikna.” (1 Pedro 3:8) No addaantay iti pannakipagmaymaysa ti rikna, nalabit ad-adda a mariknatayo ti ut-ot a pinataudtayo gapu iti di naannad a sao wenno aramid ket matignaytayo nga agpadispensar.

“Bariksanyo ti Bagbagiyo iti Kinapakumbaba iti Panagpampanunot”

Uray dagiti matalek a Kristiano a panglakayen mabalin a pasaray maaddaanda iti panagsususik. (Idiligyo ti Aramid 15:37-39.) Dagitoy ti gundaway a makatulong unay ti panagpadispensar. Ngem aniat’ tumulong iti panglakayen wenno sabali pay a Kristiano a marigatan nga agpadispensar?

Kinapakumbaba ti tulbek. Imbalakad ni apostol Pedro: “Bariksanyo ti bagbagiyo iti kinapakumbaba iti panagpampanunot maipaay iti maysa ken maysa.” (1 Pedro 5:5) Nupay pudno nga iti kaaduan a susik agpada a mapabasol ti agsinnumbangir a partido, panunoten ti napakumbaba a Kristiano ti bukodna a pagkurkurangan ket situtulok a mangamin kadagitoy.​—Proverbio 6:1-5.

Daydiay pagpadispensaran rumbeng nga awatenna iti napakumbaba a pamay-an. Kas panangiladawan, ipapantayo a ti dua a lallaki a kasapulan nga agsarita ket sitatakder iti pantok ti dua nga agsinnumbangir a bantay. Talaga nga imposible ti panagsarita iti baet ti dariwangwang a namagsina kadakuada. Nupay kasta, no bumaba ti maysa kadakuada iti ginget ket kasta met ti aramiden ti maysa, nalaklakada a makapagsarita. Umasping iti dayta, tapno marisut ti dua a Kristiano ti dida pagkinnaawatan, tunggal maysa ti sipapakumbaba a makisinnabat iti ginget, no ar-arigen, sa mangaramid iti maitutop a panagpadispensar.​—1 Pedro 5:6.

Napateg iti Panagassawa ti Panagpadispensar

Ti panagassawa ti dua nga imperpekto a tao di maliklikan a mangipaay kadagiti gundaway tapno agpadispensar. Ket no ti agassawa agpada nga addaanda iti pannakipagmaymaysa ti rikna, daytat’ mangtignay kadakuada nga agpadispensar no makapagsao wenno makaaramidda iti makapasakit. Kuna ti Proverbio 12:18: “Adda agsao a sidadarasudos a kas kadagiti panagduyok ti kampilan, ngem ti dila ti masirib isu ti salun-at.” Din maibabawi dagiti ‘darasudos a panangduyok,’ ngem maagasan dagitoy babaen ti naimpusuan a panagpadispensar. Siempre, kalikaguman daytoy ti agtultuloy a panagannad ken panangikagumaan.

Maipapan iti panagasawana, kuna ni Susana: “Ag-24 a tawenen manipud idi nagassawakam ken ni Jackb, ngem addada pay laeng matakuatanmi a baro a bambanag maipanggep iti maysa ken maysa. Nakalkaldaang, iti naminsan, nagsinakami ket dikam nagkabbalay iti sumagmamano a lawas. Nupay kasta, impangagmi ti Nainkasuratan a balakad dagiti panglakayen ket nagtiponkami manen. Mabigbigmi itan a yantangay nagdumakam unay iti personalidad, rumsua la ketdi dagiti panagsubang. No mapasamak daytoy, dagus nga agpadispensarkami ket pudno nga ikagumaanmi a tarusan ti kapanunotan ti tunggal maysa. Maragsakanak a mangibaga a pudno a simmayaat ti panagassawami. Inayon ni Jack: “Nasursuromi met nga ilasin dagiti kanito a nalakakami a masair. Iti kakasta a gundaway tratuenmi ti maysa ken maysa buyogen ti nakaro a kinamannakipagrikna.”​—Proverbio 16:23.

Rumbeng kadi nga agpadispensarka no iti panagkunam ket saan a sika ti nakabasol? No nairaman dagiti nauneg a rikna, narigat ti agbalin a nainkalintegan maipapan iti no asino ti mapabasol. Ngem ti napateg ket talna iti panagassawa. Usigenyo ni Abigail, maysa nga Israelita a babai a ni lakayna trinatona a sidadakes ni David. Nupay di mapabasol iti kinamaag ni lakayna, nagpadispensar. “Dawatek, kenka, a pakawanem ti panaglabsing ti babai nga adipenmo,” impakpakaasina. Impangag ni David babaen ti siaasi a panangtratona kenkuana, a sipapakumbaba nga inaminna a no saan a maigapu kenkuana, nangibukbok koman iti inosente a dara.​—1 Samuel 25:24-28, 32-35.

Kasta met, marikna ti maysa a Kristiano a babai nga agnagan June, nga 45 a tawenen manipud idi nakiasawa, a kasapulan iti naballigi a panagassawa ti panagbalin a situtulok nga umuna nga agpadispensar. Kunana: “Kunak iti bagik a napatpateg ti panagassawami ngem iti riknak kas indibidual. Isu a no agpadispensarak, mariknak a tumultulongak iti panagassawami.” Kuna ti nataenganen a lalaki nga agnagan Jim: “Agpadispensarak iti asawak uray kadagiti babassit a banag. Manipud idi nakaro ti pannakaoperana, nalaka a madukotan. Gapuna kanayon nga arakupek sa kunaek, ‘Ladingitek, Dungngo. Diak inranta a sairenka.’ Kas iti maysa a mula a masibugan, dagus a sumaranta.”

No masairtayo ti tao nga ipatpategtay unay, epektibo unay ti dagus a panagpadispensar. Naimpusuan nga umanamong ni Milagros, a kunana: “Awan panagtalekko iti bagik, ket ti sidadarasudos a sao ni lakayko ti mamagdukot kaniak. Ngem no agpadispensar, dagus a lumag-an ti riknak.” Maiyanatup, kuna kadatayo ti Kasuratan: “Dagiti nakaay-ayo a sasao arigda la rara, nasam-itda iti kararua ket salun-at kadagiti tultulang.”​—Proverbio 16:24.

Sanayenyo ti Arte ti Panagpadispensar

No naiyugalitayon ti agpadispensar no kasapulan, nalabit makitatayo nga agtignay a sisasayaat dagiti tattao kadatayo. Ken nalabit uray isuda agpadispensarda a mismo. No ipagaruptayo a nasairtayo ti maysa, apay a ditay iyugali ti agpadispensar imbes nga ikagumaantay a liklikan nga aminen ti aniaman a biddut? Mabalin nga ipapan ti lubong a ti panagpadispensar ket tanda ti kinakapuy, ngem kinapudnona pammaneknek daytoy iti Nakristianuan a kinanataengan. Siempre, ditay kayat ti agbalin a kas kadagidiay mangbigbig iti biddut ngem iyaleng-alengda ti annongenda. Kas pagarigan, kunaentay kadi a ladingitentayo buyogen ti kinaawan kinapasnek? No sumangpettayo a naladaw ket kasta unay ti panagpadispensartayo, determinadotay kadi a mangparang-ay ti kinamanagsapsapatayo?

Gapuna, no kasta, talaga kadi a kasapulan nga agpadispensartayo? Wen, kasapulan. Rebbengentayo ken iti sabsabali ti panangaramid iti dayta. Makatulong ti panagpadispensar a mangep-ep iti ut-ot a pinataud ti kinaimperpekto, ken maagasanna dagiti nadadael a relasion. Ti tunggal panagpadispensartayo ket leksion iti kinapakumbaba ken sanayennatayo nga agbalin nga ad-adda a maseknan kadagiti rikna ti sabsabali. Kas resultana, matmatandatayo dagiti kapammatian, assawa, ken dadduma pay kas maikari iti pammateg ken panagtalekda. Maaddaantayo iti talna ti panunot, ket bendisionannatayo ni Jehova a Dios.

[Dagiti Footnote]

[Dagiti ladawan iti panid 23]

Dagiti naimpusuan a panagpadispensar itandudoda ti Nakristianuan nga ayat