Iyanninawyo Kadi ti Dayag ti Dios?

“Iyanninawtayo ti dayag ni Jehova a kasla kadagiti sarming.”​—2 CORINTO 3:18.

1. Ania ti nakita ni Moises, ket ania ti napasamak kalpasanna?

MAYSA dayta kadagiti kadadayagan a sirmata a nakita ti tao. Bayat nga agmaymaysa ni Moises iti nangato a Bantay Sinai, napatgan ti naisangsangayan a kiddawna. Adda naipakita kenkuana a di pulos nakita ti tao​—ti dayag ni Jehova. Siempre, ni Moises dina direkta a nakita ni Jehova. Nakarangranga ti langa ti Dios ket awan ti asinoman a tao a makakita kenkuana nga agtalinaed a sibibiag. Imbes ketdi, ni Jehova sinalaknibanna ni Moises babaen ti ‘dakulapna’ kas tabing agingga nga isu ket nakalabas, a nalawag a nangaramat iti anghel a pannakabagina. Kalpasanna, impalubos ni Jehova a makita ni Moises ti tartaraudi a raniag dayta a parangarang ti kinadayagna. Nakisarita met ni Jehova ken ni Moises babaen ti maysa nga anghel. Salaysayen ti Biblia no ania ti napasamak kalpasanna: “Ita naaramid idi simmalog ni Moises iti Bantay Sinai . . . a ti kudil ti rupana nangisilnag kadagiti sinamar gapu iti pannakisaona [ken Jehova].”​—Exodo 33:18–34:7, 29.

2. Ania ti insurat ni apostol Pablo maipapan iti dayag nga iyan-anninaw dagiti Kristiano?

² Iladawanyo ti bagiyo a kaduayo ni Moises iti dayta a bantay. Anian a makapikapik a maimatangan ti nakaranraniag a kinadayag ti Mannakabalin-amin ken mangngegan ti sasaona! Anian a pribilehio ti sumalog iti Bantay Sinai a kadua ni Moises, ti mangibabaet iti Linteg ti tulag! Ngem ammoyo kadi nga iti sumagmamano a pamay-an, iyan-anninaw dagiti Kristiano ti dayag ti Dios iti wagas a nasaysayaat ngem iti panangyanninaw ni Moises iti dayta? Daytoy a mamagpanunot a kinapudno ket masarakan iti surat ni apostol Pablo. Insuratna a dagiti napulotan a Kristiano ‘iyan-anninawda a kasla kadagiti sarming ti dayag ni Jehova.’ (2 Corinto 3:7, 8, 18) No an-anagen, uray dagiti Kristiano nga addaan iti naindagaan a namnama iyan-anninawda met ti dayag ti Dios.

No Kasano nga Iyan-anninaw Dagiti Kristiano ti Dayag ti Dios

3. Kasanotay a naam-ammo ni Jehova kadagiti wagas a saan a napadasan ni Moises?

³ Kasanotay a mayanninaw ti dayag ti Dios? Saantay a nakita wenno nangngeg ni Jehova a kas iti pamay-an a napadasan ni Moises. Nupay kasta, adda pannakaammotayo maipapan ken ni Jehova nga awan idi ken ni Moises. Sa laeng nagparang ni Jesus kas Mesias dandani 1,500 a tawen kalpasan ti ipapatay ni Moises. Gapuna, saan nga ammo ni Moises no kasano a natungpal ti Linteg ken ni Jesus, a natay tapno maispalna ti tattao manipud iti nakaro a pammarigat ti basol ken patay. (Roma 5:20, 21; Galacia 3:19) Maysa pay, limitado laeng ti pannakaawat ni Moises no maipapan iti kinatan-ok ti panggep ni Jehova, a naisentro iti Mesianiko a Pagarian ken iti naindagaan a Paraiso nga iyegna. Gapuna, makitatayo ti dayag ni Jehova, saan a babaen ti literal a matatayo, no di ket babaen kadagiti mata ti pammati a naibatay kadagiti sursuro ti Biblia. Kanayonanna, nangngegtayo ti timek ni Jehova, saan a babaen ti maysa nga anghel, no di ket babaen ti Biblia, nangnangruna dagiti Ebanghelio, a nakasaysayaat ti panangiladawanda kadagiti pannursuro ken ministerio ni Jesus.

4. (a) Kasano nga iyan-anninaw dagiti napulotan a Kristiano ti dayag ti Dios? (b) Kadagiti ania a wagas a dagidiay addaan iti naindagaan a namnama mayanninawda ti dayag ti Dios?

⁴ Nupay awan ti literal a sinamar kadagiti rupada a mangyanninaw iti dayag ti Dios, makuna a naraniag dagiti rupa dagiti Kristiano bayat nga isarsaritada ti nadayag a personalidad ken pangpanggep ni Jehova. No maipapan iti kaaldawantayo, impadto ni propeta Isaias a dagiti adipen ti Dios “sigurado nga isaritadanto ti maipapan iti dayag [ni Jehova] iti tengnga dagiti nasion.” (Isaias 66:19) Kanayonanna, iti 2 Corinto 4:1, 2, mabasatayo: “Yantangay adda kadakami daytoy a ministerio . . . , nagpanawanmi ti mailimlimed a bambanag nga ibain, a saan a magmagna a sisisikap, wenno lalaokan ti sao ti Dios, no di ket babaen ti panangiparangarang iti kinapudno nga irekrekomendami ti bagbagimi iti tunggal natauan a konsiensia iti imatang ti Dios.” Partikular a tuktukoyen ni Pablo dagiti napulotan a Kristiano, isuda a “ministro ti maysa a baro a tulag.” (2 Corinto 3:6) Ngem ti ministerioda adda epektona iti biag ti riniwriw a tattao a nakagun-od iti namnama a biag nga agnanayon ditoy daga. Ti ministerio dagitoy a dua a grupo iramanna ti panangyanninawda iti dayag ni Jehova saan laeng nga iti isursuroda no di ket iti wagas ti panagbiagda. Responsabilidad ken pribilehiotayo nga iyanninaw ti dayag ti Kangatuan a Dios!

5. Ania ti paneknekan ti naespirituan a kinarang-aytayo?

⁵ Iti kaaldawantayo, maikaskasaba iti amin a mapagnaedan a daga ti nadayag a naimbag a damag ti Pagarian ti Dios, kas impadto ni Jesus. (Mateo 24:14) Dagiti indibidual manipud iti amin a nasion, tribu, ili, ken pagsasao siraragsak nga impangagda ti naimbag a damag ken binalbaliwanda ti biagda tapno maaramidda ti pagayatan ti Dios. (Roma 12:2; Apocalipsis 7:9) Kas kadagiti nagkauna a Kristiano, dida agsardeng a mangisarsarita kadagiti bambanag a nakita ken nangngegda. (Aramid 4:20) Nasurok nga innem a milion a tattao ita ti mangyan-anninaw iti dayag ti Dios, nga ad-adu ngem iti aniaman a tiempo iti pakasaritaan ti tao. Maysaka kadi kadakuada? Ti naespirituan a kinarang-ay ti ili ti Dios ket natalged a pammaneknek a bembendisionan ken sarsaranayen ida ni Jehova. Nalawag met nga adda kadatayo ti espiritu ni Jehova no usigentayo dagiti nabileg a puersa a bumusbusor kadatayo. Kitaentayo ita no apay a makunatayo nga adda kadatayo ti espiritu ni Jehova.

Awan ti Mabalin a Mangpaulimek iti Ili ti Dios

6. Apay a kasapulan ti pammati ken tured iti panagtakder iti dasig ni Jehova?

⁶ Ipapantayo a naayabanka nga agtestigo iti korte maibusor iti maysa a naulpit a kriminal. Ammom nga adda nabileg a sindikatona ken usarenna ti amin a kabaelanna a manglapped kenka a mangibutaktak iti kinataona. Tapno makapagtestigoka maibusor iti dayta a kriminal, kasapulam ti tured agraman ti panagtalek a protektarannaka ti polisia. Kasta met laeng ti kasasaadtayo. Iti panangsaksitayo ken ni Jehova ken kadagiti panggepna, agtestigotayo maibusor ken ni Satanas a Diablo, nga ibutaktaktayo kas maysa a mammapatay ken naulbod a manangyaw-awan iti intero a mapagnaedan a daga. (Juan 8:44; Apocalipsis 12:9) Tapno makapagtakderka iti dasig ni Jehova ken maibusor ken ni Satanas, kasapulam ti pammati ken tured.

7. Kasano ti kabileg ti impluensia ni Satanas, ken ania ti ikagkagumaanna nga aramiden?

⁷ Siempre, ni Jehova ti Katan-okan. Di matukod ti pannakabalinna no idilig ken ni Satanas. Masiguradotayo a ni Jehova saannatayo laeng a kabaelan a salakniban no di ket magagaran pay a mangaramid iti dayta no sisusungdo nga agserbitayo kenkuana. (2 Cronicas 16:9) Nupay kasta, ni Satanas ti agturay agpadpada kadagiti demonio ken iti lubong ti sangatauan a naisina iti Dios. (Mateo 12:24, 26; Juan 14:30) Gapu ta naitapuak ni Satanas iti aglikmut ti daga ken napno iti “dakkel a pungtot,” sirurungsot a busbusorenna dagiti adipen ni Jehova ken us-usarenna ti iturayanna a lubong tapno pagulimekenna ti amin a mangikaskasaba iti naimbag a damag. (Apocalipsis 12:7-9, 12, 17) Kasanona nga ar-aramiden dayta? Iti di kumurang a tallo a pamay-an.

8, 9. Kasano nga usaren ni Satanas ti di umiso a panagayat, ken apay a nasken a pilientayo a naimbag dagiti pakikaduaantayo?

⁸ Ti maysa a pamay-an a singaennatayo ni Satanas ket babaen kadagiti pakaringgoran iti biag. Dagiti tattao kadagitoy maudi nga al-aldaw ket managayat iti kuarta, managayat iti bagbagida, ken managayat iti ragragsak. Saanda a managayat iti Dios. (2 Timoteo 3:1-4) Gapu ta okupadoda kadagiti inaldaw nga aktibidad ti biag, kaaduan a tattao ‘dida ikankano’ ti naimbag a damag nga idandanontayo kadakuada. Saanda nga interesado a mangammo iti kinapudno ti Biblia. (Mateo 24:37-39) Makaimpluensia ti kasta a kababalin, a mamagdungsa kadatayo iti naespirituan. No patanorentayo ti panagayat kadagiti material a bambanag ken ragragsak ti biag, bumaaw ti panagayattayo iti Dios.​—Mateo 24:12.

⁹ Gapu iti dayta a rason, pilien a naimbag dagiti Kristiano no siasino dagiti pakikaduaanda. “Daydiay makipagna kadagiti masirib a tattao agbalinto a masirib,” insurat ni Ari Solomon, “ngem daydiay addaan kadagiti pannakilangen kadagidiay maag nakadakdakesto ti pagtungpalanna.” (Proverbio 13:20) ‘Makipagnatayo’ koma kadagidiay mangyan-anninaw iti dayag ti Dios. Anian a makaay-ayo no aramidentayo dayta! Bayat a makitimpuyogtayo kadagiti kapammatiantayo a lallaki ken babbai kadagiti gimong ken dadduma a gundaway, makapabileg kadatayo ti ayat, pammati, rag-o, ken siribda. Ti kasta a makagunggona a pannakitimpuyog patibkerenna ti determinasiontayo a mangitultuloy iti ministeriotayo.

10. Kadagiti ania a pamay-an nga inusar ni Satanas ti panangumsi maibusor kadagidiay mangyan-anninaw iti dayag ti Dios?

¹⁰ Ti panangumsi ti maikadua nga us-usaren ni Satanas tapno pasardengenna ti amin a Kristiano a mangyanninaw iti dayag ti Dios. Saantayo a rumbeng a pakasdaawan daytoy a taktika. Bayat ti ministeriona ditoy daga, inum-umsida ni Jesu-Kristo​—kinatkatawaanda, inuy-uyawda, inaramidda a pagang-angawan, inin-insultoda, ken tinuptupraanda pay. (Marcos 5:40; Lucas 16:14; 18:32) Uray dagiti nagkauna a Kristiano nagbalinda met a puntiria ti pananglais. (Aramid 2:13; 17:32) Kasta met laeng a panangabuso ti mapaspasaran dagiti moderno-aldaw nga adipen ni Jehova. Sigun ken ni apostol Pedro, maibilangda pay kas “ulbod a mammadto.” “Kadagiti maudi nga aldaw,” impakpakauna ni Pedro, “umayto dagiti managuy-uyaw agraman ti panguy-uyawda, nga agtultuloyda maitunos iti bukodda a tartarigagay ket kunkunada: ‘Sadino ti ayan daytoy naikari a kaaddana? Ay ket, nanipud iti aldaw a naturog ken patay dagidi ammami, amin a bambanag nagtultuloy nga isu latta nanipud idi panangrugi ti sangaparsuaan.’” (2 Pedro 3:3, 4) Maum-umsi ti ili ti Dios gapu ta naibilangda a karkarna a tattao. Mamatmatan a daan unayen dagiti moral a pagalagadan ti Dios. Ibilang ti adu a kinamaag ti ikaskasabatayo a mensahe. (1 Corinto 1:18, 19) Gapu ta Kristianotayo, maipasangotayo iti pannakaumsi idiay eskuelaan, pagtrabahuan, ken no dadduma iti mismo nga uneg ti pamilia. Ngem ditay maupay no di ket itultuloytayo nga iyanninaw ti dayag ti Dios babaen ti panangasabatayo, yantangay kas ken ni Jesus, ammotayo a ti Sao ti Dios ket pudno.​—Juan 17:17.

11. Kasano nga inusar ni Satanas ti panangidadanes tapno pagulimekenna dagiti Kristiano?

¹¹ Ti maikatlo a pamay-an ti Diablo a mangpaulimek kadatayo isu ti ibubusor wenno panangidadanes. Kinuna ni Jesus kadagiti pasurotna: “Dagiti tattao iyawatdakayto iti rigat ken papatayendakayto, ket puntiriakayto ti pananggura ti amin a nasnasion maigapu iti naganko.” (Mateo 24:9) Kinapudnona, kas Saksi ni Jehova, maipaspasangotayo kadagiti nakaro a pannakaidadanes iti adu a paset ti daga. Ammotayo a nabayagen nga impakpakauna ni Jehova nga addanto panagginnura wenno panagbinnusor dagidiay agserserbi iti Dios ken dagidiay agserserbi ken ni Satanas a Diablo. (Genesis 3:15) Ammotayo met a no agtalinaedtayo a nasungdo iti sidong ti pakasuotan, pampaneknekantayo a ni Jehova a talaga ti soberano iti uniberso. Gapu ta ammotayo dayta, mapakired ti nakemtayo uray iti sidong dagiti karirigatan a kasasaad. Awan ti panangidadanes a permanente a mangpaulimek kadatayo no agtultuloytayo a determinado a mangyanninaw iti dayag ti Dios.

12. Apay a rumbeng nga agrag-otayo bayat nga agtalinaedtayo a matalek iti laksid ti ibubusor ni Satanas?

¹² Likliklikanyo kadi dagiti awis ti lubong ken agtalinaedkayo a matalek iti laksid ti panangumsi ken ibubusor? No kasta, adda rasonyo nga agrag-o. Impanamnama ni Jesus kadagidiay sumurot kenkuana: “Naragsakkayo inton umsiendakayo dagiti tattao ken idadanesdakayo ken siuulbod a sawenda ti tunggal kita ti nadangkes a banag a maibusor kadakayo maigapu kaniak. Agrag-o ken aglagtokayo gapu iti rag-o, yantangay dakkel ti gunggonayo iti langlangit; ta iti kasta a pamay-an indadanesda dagiti mammadto nga immun-una ngem dakayo.” (Mateo 5:11, 12) Ti panagibturyo ket pammaneknek nga agtigtignay kadakayo ti nasantuan nga espiritu ni Jehova, a mangpabileg kadakayo a mangyanninaw iti dayagna.​—2 Corinto 12:9.

Makapagibtur iti Tulong ni Jehova

13. Ania ti maysa a napateg a rason no apay nga agibturtayo iti Nakristianuan a ministeriotayo?

¹³ Ti maysa a kangrunaan a rason no apay nga agibturtayo iti ministerio ket gapu ta ay-ayatentayo ni Jehova ken pagragsakantayo nga iyanninaw ti dayagna. Adda pagannayasan ti tattao a mangtulad kadagidiay ay-ayaten ken raraemenda, ket awan ti sabali pay nga ad-adda a maikari a tuladen no saan a ni Jehova a Dios. Gapu iti dakkel nga ayatna, imbaonna ti Anakna ditoy daga a mangsaksi iti kinapudno ken mangsubbot iti natulnog a sangatauan. (Juan 3:16; 18:37) Kas iti Dios, tarigagayantayo nga agbabawi ken maisalakan ti amin a kita ti tattao; isu a kaskasabaantay ida. (2 Pedro 3:9) Dayta a tarigagay, agraman ti determinasiontayo a mangtulad iti Dios, tignayennatayo nga agtultuloy a mangyanninaw iti dayagna babaen ti ministeriotayo.

14. Kasanonatayo a pabilgen ni Jehova tapno makapagibturtayo iti ministerio?

¹⁴ Ngem ni Jehova ti kangrunaan a mangipapaay iti bileg tapno makapagibturtayo iti Nakristianuan a ministerio. Saranayen ken papigsaennatayo babaen ti espiritu, organisasion, ken Saona, ti Biblia. Ni Jehova ket “mangipaay iti panagibtur” kadagidiay sidadaan a mangyanninaw iti dayagna. Sungbatanna dagiti kararagtayo ken ipaayna ti sirib tapno madaerantayo dagiti pakasuotan. (Roma 15:5; Santiago 1:5) Kanayonanna, saan nga ipalubos ni Jehova a maipasangotayo iti aniaman a pakasuotan a ditay kabaelan nga ibturan. No agtalektayo ken ni Jehova, ipaayna ti tulong tapno maitultuloytayo a mayanninaw ti dayagna.​—1 Corinto 10:13.

15. Ania ti makatulong kadatayo nga agibtur?

¹⁵ Ti panagibturtayo iti ministeriotayo paneknekanna nga agtigtignay kadatayo ti espiritu ti Dios. Kas panangyilustrar: Adda nangkalikagum kadakayo a mangiwaraskayo iti libre a tinapay iti binalaybalay. Nakiddaw nga aramidenyo dayta iti bukodyo a gastos ken panawen. Maysa pay, naammuanyo di nagbayag a manmano laeng a tattao ti mayat iti tinapayyo; busoren pay ketdi ti dadduma ti panangikagumaanyo a mangiwaras iti dayta. Iti panagkunayo, kayatyo pay kadi nga itultuloy nga aramiden dayta a trabaho? Nalabit a saanen. Mabalin nga ikarkarigatanyo met nga ideklara ti naimbag a damag iti bukodyo a panawen ken gastos iti manon a tawen, dekada pay ketdin. Apay? Saan kadi a gapu ta ay-ayatenyo ni Jehova ket, babaen ti espirituna, binendisionanna ti panagreggetyo babaen ti panangtulongna kadakayo nga agibtur? Sigurado a kasta!

Maysa a Trabaho a Dinto Malipatan

16. No agibturtayo iti ministerio, ania ti magunggonatayo ken dagidiay umimdeng kadatayo?

¹⁶ Ti ministerio ti baro a tulag ket maysa a sagut nga awan kapadana. (2 Corinto 4:7) Umasping iti dayta, maibilang met a maysa a gameng ti Nakristianuan a ministerio nga itungtungpal ti sabsabali a karnero iti intero a lubong. Bayat nga itultuloyyo ti agibtur iti ministerioyo, ‘maisalakanyonto agpadpada ti bagiyo ken dagidiay agimdeng kadakayo,’ kas insurat ni Pablo ken ni Timoteo. (1 Timoteo 4:16) Panunotenyo ti kaipapanan dayta. Ti naimbag a damag nga ikaskasabayo ket mangipaay iti gundaway kadagiti sabsabali tapno agbiagda nga agnanayon. Agbalin a nasinged a gayyemyo dagidiay natulonganyo iti naespirituan. Panunotenyo nga anian a rag-o ti agbiag nga agnanayon iti Paraiso a kaduayo dagidiay natulonganyo a mangammo iti maipapan iti Dios! Sigurado a dida malipatan ti panagreggetyo a timmulong kadakuada. Anian a pakaigapuan ti pannakapnek!

17. Apay a ti kaaldawantayo ket naisangsangayan a panawen iti pakasaritaan ti tao?

¹⁷ Agbibiagtayo iti naisangsangayan a panawen ti pakasaritaan ti tao. Saanto pulosen a maikasaba ti naimbag a damag iti tengnga ti lubong a naisina iti Dios. Nagbiag ni Noe iti kasta a lubong, ket nakitana ti pannakadadael dayta. Ania la ketdin a ragsakna ta simamatalek nga intungpalna ti pagayatan ti Dios a mangbangon iti maysa a daong, a nangispal iti biagna ken iti pamiliana! (Hebreo 11:7) Mabalinyo met a masagrap ti kasta a rag-o. Panunotenyo ti mariknayo idiay baro a lubong inton lagipenyo dagiti inaramidyo bayat dagitoy maudi nga al-aldaw, nga ammoyo a nagporsegikayo a mangitandudo kadagiti interes ti Pagarian.

18. Ania a pammatalged ken pammaregta ti ipaay ni Jehova kadagiti adipenna?

¹⁸ Itultuloytayo ngarud nga iyanninaw ti dayag ti Dios. Ti panangaramidtayo iti dayta ket maysa a banag a malaglagiptayonto iti agnanayon. Laglagipen met ni Jehova dagiti aramidtayo. Kastoy ti pammaregta ti Biblia: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna, ta nagserbikayo kadagiti sasanto ken agtultuloykayo nga agserbi. Ngem tarigagayanmi a tunggal maysa kadakayo mangipakita iti isu met laeng a kinagaget tapno maaddaan iti naan-anay a pammasiguro iti namnama agingga iti panungpalan, tapno saankayo nga agbalin a nabuntog, no di ket agbalin a tumutulad kadagidiay a babaen ti pammati ken kinaanus tawidenda dagiti kari.”​—Hebreo 6:10-12.

Mailawlawagyo Kadi?

• Kasano nga iyanninaw dagiti Kristiano ti dayag ti Dios?

• Ania ti sumagmamano a pamay-an nga us-usaren ni Satanas tapno pagulimekenna ti ili ti Dios?

• Ania ti pammaneknek nga agtigtignay kadatayo ti espiritu ti Dios?

[Ladawan iti panid 15]

Ti rupa ni Moises ket nangyanninaw iti dayag

[Dagiti Ladawan iti panid 16, 17]

Iyanninawtayo ti dayag ti Dios iti ministeriotayo