Ania ti Masakbayan ti Dagatayo?

“Awan sabali a siglo a makaartap iti rekord ti maika-20 a siglo no maipapan iti nadawel a sibil a kinaranggas, iti bilang dagiti panagrurupak, iti kaadu dagiti nagkamang, iti minilion a tattao a naungaw kadagiti gubat, ken iti kinadakkel ti gastos para iti ‘depensa,’” kuna ti World Military and Social Expenditures 1996. Agbalbaliwto kadi daytoy a kasasaad?

Impalagip ni apostol Pedro kadagiti Kristiano ti kari ti Dios adu a siglo sakbayna: “Adda baro a langlangit ken maysa a baro a daga nga ur-urayentayo sigun iti kari [ti Dios], ket kadagitoy nga agtaeng ti kinalinteg.” (2 Pedro 3:13) Dagitoy a sasao ket orihinal a paset ti padto ni Isaias. (Isaias 65:17; 66:22) Napadasan ti Israel ti umuna a pannakatungpalna idi a ti ili naisubli iti daga a naikari iti dayta kalpasan ti pannakakautibona idiay Babilonia iti 70 a tawen. Babaen ti panangulitna iti kari a “baro a langlangit ken baro a daga,” impakita ni Pedro a matungpalto ti padto iti nalawlawa pay a pamay-an​—sangalubongan!

Pagayatan ti Dios ti pannakaipasdek ti nalinteg a kasasaad iti intero a daga, ket aramidento daytoy ti nailangitan a Pagarianna a ni Kristo ti Ari. “Ti maysa a nasion saannanto nga itag-ay ti kampilan a maibusor iti nasion, ket didanto met adalenen ti pannakigubat uray kaano.” (Isaias 2:4) Ti kastoy a naan-anay a kinatalna ken kinatalged iti daga ti insuro ni Jesus kadagiti pasurotna nga urayen ken ikararag iti gagangay a maaw-awagan iti Amami, wenno ti Kararag ti Apo, a kunkunana: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.”​—Mateo 6:9, 10.

Matagiragsakyonto kadi ti agbiag iti lubong a ti kinalintegna ket kasla idiay langit? Dayta ti namnama nga ituktukon ti Biblia iti amim a naimpusuan a mangbirok iti Dios ken agbiag maitunos kadagiti nalinteg a dalanna.