Natungpal Dagiti Panirpatan ti Pagarian ti Dios

“Naimbag ti ar-aramidenyo iti panangimdengyo iti [naimpadtuan a sao] kas iti pagsilawan nga agsilsilnag iti nasipnget a disso.”​—2 PEDRO 1:19.

1. Ania a panagsupadi ti makitatayo iti lubong ita?

AGSASARUNO ti krisis iti daytoy a lubong. Manipud iti pannakadadael ti ekolohia agingga iti sangalubongan a terorismo, agparang a di malapdan ti ilalanlan dagiti parikut ti sangatauan. Saan a nakatulong uray dagiti relihion iti daytoy a lubong. Kinapudnona, ad-adda a pakaruenda ti bambanag babaen ti panangrubrobda iti kinapanatiko, guranggura, ken nasionalismo a mamagsisina kadagiti tattao. Wen, kas naipadto, “ti napuskol a daguyemyem” inabbungotanna “dagiti nasional a bunggoy.” (Isaias 60:2) Ngem minilion ti mangnamnama a dumteng ti naraniag a masakbayan. Apay? Gapu ta agpapaidalanda iti naimpadtuan a sao ti Dios “kas iti pagsilawan nga agsilsilnag iti nasipnget a disso.” Agpapaiwanwanda iti “sao,” wenno mensahe, ti Dios a masarakan iti Biblia.​—2 Pedro 1:19.

2. Sigun iti padto ni Daniel maipapan “iti tiempo ti panungpalan,” siasino laeng ti maparaburan iti nauneg a pannakaawat iti pagayatan ti Dios?

² No maipapan “iti tiempo ti panungpalan,” insurat ni mammadto a Daniel: “Adunto ti agdakiwas, ket ti pudno a pannakaammo umadunto. Adunto ti mangdalus iti bagbagida ken mangpapudaw iti bagbagida ket mapasudidanto. Ket dagidiay nadangkes pudno unay nga agtignaydanto a sidadangkes, ket awanto a pulos kadagiti nadangkes ti makaawat; ngem maawatanto dagidiay addaan iti pannakatarus.” (Daniel 12:4, 10) Ti nauneg a pannakaawat iti pagayatan ti Dios ket agpaay laeng kadagidiay sipapasnek nga “agdakiwas,” wenno siaanep nga agadal, iti Sao ti Dios, agpaiwanwan kadagiti pagalagadanna, ken mangikagumaan a mangaramid iti pagayatanna.​—Mateo 13:11-15; 1 Juan 5:20.

3. Idi dekada 1870, ania a napateg a kinapudno ti naawatan dagiti nagkauna nga estudiante ti Biblia?

³ Idi rugrugi ti dekada 1870, sakbay a nangrugi ‘dagiti maudi nga aldaw,’ ad-adda a linawlawagan ni Jehova a Dios ‘dagiti sagrado a palimed ti pagarian ti langlangit.’ (2 Timoteo 3:1-5; Mateo 13:11) Iti daydi a tiempo, naawatan ti maysa a grupo dagiti estudiante ti Biblia a ti panagsubli ni Kristo ket saan a makita, maisupadi iti kaaduan a kapanunotan iti daydi a panawen. Kalpasan a maitrono kas ari idiay langit, agsubli ni Jesus iti anag nga iturongna ti atensionna ditoy daga. Mailasin dagiti adalanna a nangrugin ti di makita a kaaddana babaen iti makita ken ragup a pagilasinan.​—Mateo 24:3-14.

Inton Matungpal ti Maysa a Panirpatan

4. Kasano a pinabileg ni Jehova ti pammati dagiti moderno-aldaw nga adipenna?

⁴ Ti sirmata ti panagbalbaliw ti langa ni Jesus ket maysa a naraniag a panirpatan ti nadayag a kaadda ni Kristo iti Pagarian. (Mateo 17:1-9) Gapu iti dayta a sirmata, napabileg ti pammati da Pedro, Santiago, ken Juan idi tiempo nga adu ti nagsardeng a simmurot ken ni Jesus gapu ta dina tinungpal dagiti kayatda nga aramidenna a saan a Nainkasuratan. Umasping iti dayta, iti daytoy tiempo ti panungpalan, pinabileg ni Jehova ti pammati dagiti moderno-aldaw nga adipenna babaen ti panangipaayna iti kanayonan a lawag no kasano a matungpal dayta a makapikapik a sirmata ken ti adu pay a nainaig a padto. Usigentayo ita ti dadduma kadagita a naespirituan a kinapudno a makapabileg iti pammati.

5. Asino ti Baggak, ken kaano ken kasano a ‘nagbannawag’?

⁵ Iti panangtukoyna iti panagbalbaliw ti langa ni Jesus, insurat ni apostol Pedro: “Gapu itoy addaankami iti naimpadtuan a sao nga ad-adda a naipasigurado; ket naimbag ti ar-aramidenyo iti panangimdengyo iti dayta kas iti pagsilawan nga agsilsilnag iti nasipnget a disso, agingga nga agbannawag ti aldaw ket lumgak ti baggak, kadagiti pusoyo.” (2 Pedro 1:19) Dayta a piguratibo a Baggak, wenno “naraniag a bituen iti agsapa,” isu ni naipadayag a Jesu-Kristo. (Apocalipsis 22:16) ‘Nagbannawag’ ni Jesus idi 1914, idi a naipasngay idiay langit ti Pagarian ti Dios, ti panangrugi ti baro a panawen. (Apocalipsis 11:15) Iti sirmata ti panagbalbaliw ti langa ni Jesus, adda a makisarsarita ken ni Jesus da Moises ken Elias. Siasino ti iladawanda?

6, 7. Iti panagbalbaliw ti langa ni Jesus, siasino ti iladawan da Moises ken Elias, ken aniada a napateg a detalye ti imbuksilan ti Kasuratan maipapan kadagiti iladawanda?

⁶ Gapu ta kadua ni Kristo a naipadayag da Moises ken Elias, dagitoy a dua a matalek a saksi iladawanda dagidiay makipagturay ken Jesus iti Pagarianna. Ti pannakaawat nga adda dagiti makipagturay ken ni Jesus ket maitunos iti nasirmata ni mammadto a Daniel maipapan iti naitrono a Mesias. Nakita ni Daniel “ti maysa a kasla anak ti tao” nga immawat iti “di nakedngan ti kapautna a panagturay” manipud “iti Kadaanan iti Al-aldaw,” ni Jehova a Dios. Ngem imutektekanyo ti simmaruno a naipabuya ken ni Daniel. Insuratna: “Ti pagarian ken ti panagturay ken ti kinadaeg dagiti pagarian iti baba ti amin a langlangit naited kadagiti tattao isuda a sasanto Daydiay Katan-okan.” (Daniel 7:13, 14, 27) Wen, nasurok a lima a siglo sakbay ti panagbaliw ti langa ni Jesus, impalgak ti Dios nga adda sumagmamano a “sasanto” a makipagturay iti nadaeg a pagarian ni Kristo.

⁷ Siasino dagiti sasanto iti sirmata ni Daniel? Isuda dagiti tuktukoyen ni apostol Pablo idi kinunana: “Ti mismo nga espiritu mangsaksi a buyogen ti espiritutayo a datayo ket annak ti Dios. Ngarud, no datayo ket annak, agtawidtayo met: pudno a dagiti agtawid ti Dios, ngem makipagtawid ken Kristo, no la ket agsagabatayo a sangsangkamaysa tapno maipadayagtayo met a sangsangkamaysa.” (Roma 8:16, 17) Dagiti sasanto ket awan sabali no saan a dagiti napulotan iti espiritu nga adalan ni Jesus. Iti Apocalipsis, kuna ni Jesus: “Iti daydiay agballigi ipaluboskonto a makikatugaw kaniak iti tronok, kas iti mismo a panagballigik ken pannakikatugawko iti Amak iti tronona.” Dagita a napagungar a ‘nagballigi,’ nga agdagup iti 144,000, kaduadanto ni Jesus a mangituray iti intero a daga.​—Apocalipsis 3:21; 5:9, 10; 14:1, 3, 4; 1 Corinto 15:53.

8. Kasano a dagiti napulotan nga adalan ni Jesus inaramidda ti trabaho nga umasping iti inaramid da Moises ken Elias, ket ania dagiti resultana?

⁸ Ngem kasano a da Moises ken Elias iladawanda dagiti napulotan a Kristiano? Bayat ti kaaddada ditoy daga, dagiti napulotan a Kristiano aramidenda ti trabaho nga umasping iti inaramid da Moises ken Elias. Kas pagarigan, agserbida kas saksi ni Jehova, uray iti sidong ti pannakaidadanes. (Isaias 43:10; Aramid 8:1-8; Apocalipsis 11:2-12) Kas kada Moises ken Elias, situtured nga ibutaktakda ti palso a relihion ken idagadagda kadagiti napasnek a tattao nga ipaayda ti naipamaysa a debosion iti Dios. (Exodo 32:19, 20; Deuteronomio 4:22-24; 1 Ar-ari 18:18-40) Nagbunga kadi ti trabahoda? Wen! Malaksid a nakatulongda iti pannakaurnong ti amin a napulotan, natulonganda pay ti minilion a “sabsabali a karnero” a situtulok nga agpasakup ken ni Jesu-Kristo.​—Juan 10:16; Apocalipsis 7:4.

An-anayen ni Kristo ti Panagballigina

9. Ania ita ti kasasaad ni Jesus sigun iti Apocalipsis 6:2?

⁹ Maysa itan a mannakabalin nga Ari ni Jesus, saan ket a maysa a tao a nakasakay iti asno. Nailadawan a sisasakay ni Jesus iti maysa a kabalio​—nga iti Biblia, isimbolona ti pannakigubat. (Proverbio 21:31) “Adtoy! maysa a puraw a kabalio,” kuna ti Apocalipsis 6:2, “ket daydiay sisasakay iti dayta addaan iti bai; ket naited kenkuana ti maysa a korona, ket rimmuar a mangparmek ken tapno an-anayenna ti panagballigina.” Kanayonanna, insurat ni salmista a David maipapan ken ni Jesus: “Ti sarukod ti pigsam ibaonto ni Jehova manipud Sion, a kunkunana: ‘Mapanka mangparukma iti tengnga dagiti kabusormo.’”​—Salmo 110:2.

10. (a) Kasano a sidadayag a nangrugi ti panangparmek ni Jesus? (b) Kasano a ti umuna a panagballigi ni Kristo inapektaranna ti lubong?

¹⁰ Ti umuna a panagballigi ni Jesus ket maibusor kadagiti kabilgan a kabusorna​—ni Satanas ken dagiti demoniona. Pinapanawna ida idiay langit sana intapuak ditoy daga. Gapu ta ammoda nga ababan ti tiempoda, ti sangatauan ti nangibaw-inganda iti nakaro a pungtotda, a pakaigapuan ti nakaro a rigat. Iti Apocalipsis, dayta a rigat ket isimbolo ti panagpataray ti tallo pay a kumakabalio. (Apocalipsis 6:3-8; 12:7-12) Maitunos iti padto ni Jesus maipapan ‘iti pagilasinan ti kaaddana ken ti panungpalan ti sistema ti bambanag,’ ti panagpatarayda ket nangyeg iti gubat, bisin, ken makapapatay nga angol. (Mateo 24:3, 7; Lucas 21:7-11) Kas iti literal nga ut-ot ti panaganak, awan duadua nga agtultuloy a kumaro dagita nga “ut-ot ti panagrigat” agingga nga ‘an-anayen ni Kristo ti panagballigina’ babaen ti panangdadaelna iti amin a paset ti makitkita nga organisasion ni Satanas.a​—Mateo 24:8.

11. Kasano a ti pakasaritaan ti kongregasion Kristiano paneknekanna ti kinaari ni Kristo?

¹¹ Napaneknekan met ti kinaari ni Jesus babaen ti panangtaginayonna iti kongregasion Kristiano tapno maibanag dayta a kongregasion ti annongenna a mangikasaba iti mensahe ti Pagarian iti intero a lubong. Iti laksid ti nakaro nga ibubusor dagiti naulpit a gobierno ken ti Babilonia a Dakkel​—ti sangalubongan nga imperio ti palso a relihion​—saan laeng a nagtultuloy ti trabaho a panangasaba no di ket rimmang-ay dayta iti tukad a di pay pulos naragpat iti napalabas. (Apocalipsis 17:5, 6) Anian a nagbileg a pammaneknek ti kinaari ni Kristo!​—Salmo 110:3.

12. Apay a saan a mailasin ti kaaduan a tattao ti di makita a kaadda ni Kristo?

¹² Ngem nakalkaldaang ta kaaduan a tattao, agraman ti minilion nga agkunkuna a Kristiano, dida mailasin dagiti saan a makita a kinapudno iti likud dagiti agkakapateg a pasamak ditoy daga. Umsienda pay ketdi dagidiay mangibumbunannag iti Pagarian ti Dios. (2 Pedro 3:3, 4) Apay? Gapu ta binulsek ni Satanas ti pampanunotda. (2 Corinto 4:3, 4) Kinapudnona, adun a siglo nga inyabbungotna ti naespirituan a kinasipnget kadagiti agkunkuna a Kristiano, a tinignayna pay ida a mangtallikud iti nagpateg a namnama ti Pagarian.

Panangtallikud iti Namnama ti Pagarian

13. Ania ti nagbanagan ti naespirituan a kinasipnget?

¹³ Impakpakauna ni Jesus a dagiti apostata, a kas ruruot a naimula iti nagbabaetan dagiti trigo, makastrekda iti kongregasion Kristiano ket adu ti iyaw-awanda. (Mateo 13:24-30, 36-43; Aramid 20:29-31; Judas 4) Idi agangay, dagidi nga agkunkuna a Kristiano inannurotda dagiti pagano a piesta, kaugalian, ken sursuro, nga inawaganda pay ketdi dagita a “Nakristianuan.” Kas pagarigan, namunganay ti Krismas kadagiti seremonia a nainaig iti panagdayaw kadagiti pagano a didiosen a da Mithra ken Saturn. Ngem ania ti nangituggod kadagidi nga agkunkuna a Kristiano tapno annurotenda dagita a saan a nakristianuan a rambak? Kuna ti The New Encyclopædia Britannica (1974): “Ti Krismas, ti piesta ti pannakayanak ni Jesu-Kristo, ket naipasdek gapu ta manmano idin ti mamati nga asidegen ti panagsubli ni Kristo.”

14. Kasano a dagiti sursuro da Origen ken Augustine tiniritirda ti kinapudno maipapan iti Pagarian?

¹⁴ Usigenyo met ti pannakatiritir ti kaipapanan ti sao a “pagarian.” Ti libro a The Kingdom of God in 20th-Century Interpretation kunana: “Ni Origen [maysa a teologo idi maikatlo a siglo] binalbaliwanna ti Nakristianuan a kaipapanan ti ‘pagarian’ a kas turay ti Dios nga adda iti puso.” Nangibatayan ni Origen iti sursurona? Saan nga iti Kasuratan, no di ket “iti pilosopia ken panangmatmat ti lubong a naiduma iti kapanunotan ni Kristo ken iti nagkauna nga iglesia.” Sigun iti gapuananna a De Civitate Dei (Ti Siudad ti Dios), ni Augustine iti Hippo (354-430 K.P.) kinunana a ti Pagarian ti Dios ket isu ti iglesia a mismo. Ti kasta a di nainkasuratan a kapanunotan intuggodna dagiti relihion ti Kakristianuan a manggamgam iti napolitikaan a pannakabalin. Adu a siglo a nagpapasda iti dayta a pannakabalin, a masansan a nabuyogan iti kinaranggas.​—Apocalipsis 17:5, 18.

15. Kasano a natungpal ti Galacia 6:7 kadagiti adu a relihion ti Kakristianuan?

¹⁵ Ngem ita, ap-apitenen dagiti relihion ti immulada. (Galacia 6:7) Agparang a mapukpukawen ti impluensiada agraman dagiti parokianoda. Nakakadkadlaw dayta idiay Europa. Sigun iti pagiwarnak a Christianity Today, “dagiti dadakkel a katedral idiay Europa saandan [a maus-usar] kas lugar a pagdayawan no di ket kas museo, a pagpasiaran laengen dagiti turista.” Kasta met laeng ti mapaspasamak iti dadduma a paset ti lubong. Ania ti ipamatmatna dayta mainaig iti palso a relihion? Maungawto latta kadi ti relihion gapu ta awanton ti mangsuporta iti dayta? Ken kasano a maapektaran ti pudno a panagdayaw?

Agsagana Agpaay iti Naindaklan nga Aldaw ti Dios

16. Apay a napateg ti kumarkaro a panangbusor iti Babilonia a Dakkel?

¹⁶ No kasano a ti asuk ken dapo nga ipugpug-aw ti dati a di aktibo a bulkan ket mabalin a pagilasinan ti umad-adani a panagbettak, ti kumarkaro a panangbusor kadagiti relihion iti adu a paset ti lubong ket maysa a pagilasinan nga asidegen a manungpal ti palso a relihion. Iti din agbayag, tignayen ni Jehova dagiti napolitikaan nga elemento iti lubong tapno agkaykaysada a mangibutaktak ken mangdadael iti naespirituan a balangkantis a Babilonia a Dakkel. (Apocalipsis 17:15-17; 18:21) Rumbeng kadi a pagamkan dagiti pudno a Kristiano dayta a pasamak ken dagiti sumaruno a paset ti “dakkel a rigat”? (Mateo 24:21) Saan a pulos! Kinapudnona, adda rasonda nga agrag-o no agtignay ti Dios maibusor kadagiti nadangkes. (Apocalipsis 18:20; 19:1, 2) Usigenyo ti napasamak iti Jerusalem idi umuna a siglo ken kadagiti Kristiano nga agnanaed sadiay.

17. Apay a dagiti matalek nga adipen ni Jehova sitatalged a makapagtakderda bayat ti panungpalan daytoy a sistema?

¹⁷ Idi a dagiti buyot ti Roma linakubda ti Jerusalem idi 66 K.P., saan a naklaat wenno napabutngan dagiti Kristiano a sisasalukag iti naespirituan. Gapu ta siaanep nga ad-adalenda ti Sao ti Dios, ammoda nga ‘immasidegen ti pannakalangalangna.’ (Lucas 21:20) Ammoda met a mangipaay ni Jehova iti pagruaranda nga agturong iti natalged a lugar. Idi linuktan ni Jehova ti gundaway, dagus a nagtalaw dagiti Kristiano. (Daniel 9:26; Mateo 24:15-19; Lucas 21:21) Kasta met ita, dagidiay agserserbi iti Dios ken agtultulnog iti Anakna sitatalged a makapagtakderda bayat ti panungpalan daytoy a sistema. (2 Tesalonica 1:6-9) Kinapudnona, inton bumtak ti dakkel a rigat, sirarag-o a ‘tumakderda a sililinteg ket itangadda dagiti uloda agsipud ta ammoda nga asidegen ti pannakaispalda.’​—Lucas 21:28.

18. Anianto ti pagbanagan ti sapasap a panangraut ni Gog kadagiti adipen ni Jehova?

¹⁸ Kalpasan ti pannakadadael ti Babilonia a Dakkel, idauluanto ni Satanas, kas Gog iti Magog, ti sapasap a panangraut kadagiti managayat iti talna a Saksi ni Jehova. Gapu ta rumautda a “kas ul-ulep a mangabbong iti daga,” namnamaen ti bunggoy ni Gog a nalakada nga agballigi. Ngem anianto a pannakaklaatda! (Ezequiel 38:14-16, 18-23) Insurat ni apostol Juan: “Nakitak ti langit a naluktan, ket, adtoy! maysa a puraw a kabalio. Ket daydiay sisasakay iti dayta maawagan Matalek ken Napudno . . . Manipud iti ngiwatna rumrummuar ti natarumamis nga atiddog a kampilan, tapno kabilenna dagiti nasion babaen iti dayta.” Daytoy di maparmek nga “Ari ti ar-ari” ispalenna dagiti nasungdo nga agdaydayaw ken ni Jehova ken talipuposenna ti amin a kabusorda. (Apocalipsis 19:11-21) Anian a tampok dayta ti kaitungpalan ti sirmata ti panagbalbaliw ti langa ni Jesus!

19. Ania ti epektona kadagiti nasungdo nga adalan ni Kristo ti naan-anay a panagballigina, ken ania ti nasken a pagreggetanda nga aramiden ita?

¹⁹ Ni Jesus ket ‘mapagsidsiddaawanto iti dayta nga aldaw mainaig kadagidiay amin a nangwatwat iti pammati.’ (2 Tesalonica 1:10) Kayatmo kadi ti maibilang kadagidiay siraraem nga agamanga iti naballigi nga Anak ti Dios? Itultuloymo ngarud a pabilgen ti pammatim ken ‘paneknekam a sisasaganaka, agsipud ta iti oras a saanmo nga ipagarup nga isu dayta, ti Anak ti tao umay.’​—Mateo 24:43, 44.

Agtalinaedkayo a Siririing

20. (a) Kasanotay a maipakita nga apresiarentayo ti panangipaay ti Dios “iti matalek ken masirib nga adipen”? (b) Ania a salsaludsod ti imtuodentayo iti bagitayo?

²⁰ “Ti matalek ken masirib nga adipen” ket regular a mangidagdagadag kadagiti adipen ti Dios nga agtalinaedda a naridam iti naespirituan ken agtultuloyda a siririing. (Mateo 24:45, 46; 1 Tesalonica 5:6) Apresiarem kadi dagita a naintiempuan a pammalagip? Us-usarem kadi dagita a mangipasdek iti prioridadmo iti biag? Apay a dimo imtuoden iti bagim: ‘Nalawag kadi ti naespirituan a panangmatmatko tapno mabigbigko nga agturturayen idiay langit ti Anak ti Dios? Mabigbigko kadi nga isu ket nakasaganan a mangdadael iti Babilonia a Dakkel ken iti intero a sistema ni Satanas?’

21. Apay a kimmudrep ti naespirituan a panangmatmat ti dadduma, ket ania ti rumbeng a sigaganat nga aramidenda?

²¹ Impalubos ti dadduma a kameng ti ili ni Jehova a kumudrep ti naespirituan a panangmatmatda. Gapu ngata ta dida makaan-anus wenno makapagibtur, kas iti dadduma kadagiti nagkauna nga adalan ni Jesus? Apektadoda kadi kadagiti pakaringgoran ti biag, iti materialismo, wenno iti pannakaidadanes? (Mateo 13:3-8, 18-23; Lucas 21:34-36) Nalabit a marigatan ti dadduma a mangtarus kadagiti impormasion nga ipabpablaak ti “matalek ken masirib nga adipen.” No mapaspasaranyo ti aniaman kadagita, paregtaendakayo nga agadal iti Sao ti Dios buyogen ti napabaro a regta ken umararawkayo ken ni Jehova tapno maisubli ti nalagda, ken nasinged a relasionyo kenkuana.​—2 Pedro 3:11-15.

22. Ania ti epektona kenka ti panangusigtayo iti sirmata ti panagbalbaliw ti langa ni Jesus ken kadagiti mainaig a padto?

²² Ti sirmata ti panagbalbaliw ti langa ni Jesus ket naipakita kadagiti adalan ni Jesus bayat ti tiempo a kasapulanda ti pammaregta. Iti kaaldawantayo, adda dakdakkel a banag a mangpabileg kadatayo​—ti kaitungpalan dayta a makapikapik a panirpatan ken adu pay a mainaig a padto. Bayat nga utobentayo dagita a nadayag a kinapudno ken ti pategda iti masanguanan, sapay koma ta naimpusuan nga iyebkastay met ti narikna ni apostol Juan idi kinunana: “Amen! Umayka, Apo Jesus.”​—Apocalipsis 22:20.

[Footnote]

Malagipyo Kadi?

• Idi dekada 1870, ania ti natarusan ti maysa a bassit a grupo dagiti estudiante ti Biblia maipapan iti panagsubli ni Kristo?

• Kasano a natungpal ti sirmata ti panagbalbaliw ti langa ni Jesus?

• Ania ti epektona iti lubong ken iti kongregasion Kristiano ti naballigi a panangparmek ni Kristo?

• Ania ti nasken nga aramidentayo tapno mairamantayo kadagidiay makalasat inton an-anayen ni Jesus ti panagballigina?

[Dagiti Ladawan iti panid 17]

Natungpal ti panirpatan

[Dagiti Ladawan iti panid 18]

Ammoyo kadi ti napasamak idi rinugian ni Kristo ti panangparmekna?