Panangipakita iti Ayat Kadagidiay Agkasapulan
DAGITI Kristiano agpadpada nga addaanda iti obligasion ken pribilehio a mangipakita iti ayat kadagiti kakabsatda nga agkasapulan. (1 Juan 3:17, 18) Insurat ni apostol Pablo: “Aramidentayo koma ti naimbag kadagiti isuamin, ngem nangnangruna kadagidiay nainaig kadatayo iti pammati.” (Galacia 6:10) Iti di pay nabayag, napasaran ti maysa a kabsat nga agarup uppat a dekadan nga agserserbi ken Jehova ti ayat ti Nakristianuan a panagkakabsat idi nagsakit sa kalpasanna natay ni baketna. Insuratna:
“Sipud idi tinaripatok ni baketko iti pagtaenganmi kabayatan ti panagsakitna, saanakon a nakapagtrabaho iti sekular iti agarup dua a bulan. Anian a pannakabang-arko idi situtulok a timmulong kadakami dagiti gagayyem iti kongregasion! Adu ti sagut a kuarta—‘a tulong iti dadduma a paggastuan,’ kas kuna dagiti naipasurot a kard—a pinagbayadmi iti amortisasion, danum ken silaw, ken dadduma pay a paggastuan.
“Dua a lawas sakbay ti ipapatay ni baketko, sinarungkarannakami ti manangaywan iti sirkito ket napabilegkami. Impabuyana pay ti slides a buyaento ti kongregasion iti ngudo ti lawas. Nabalinanmi ti dimngeg kadagiti gimong babaen ti telepono—agraman dagiti taripnong sakbay a rummuar iti tay-ak nga indaulo ti manangaywan iti sirkito. Iti maysa kadagitoy a taripnong, kiniddawna iti amin a presente a mangibaga iti ‘komusta,’ kas grupo, ken ni baketko. Iti kasta, nupay naisina iti pisikal, dina pulos narikna nga agmaymaysa.
“Iti las-ud ti maysa nga oras kalpasan ti ipapatayna, gistay amin a panglakayen ket adda iti pagtaengak. Nasurok a sangagasut a kakabsat ti dimmagas iti daydi laeng a nagmalem. ‘Simimilagro’ a nagparang ti taraon iti lamisaan para iti isuamin a presente. Diak maibinsabinsa amin a sagut, ebkas ti pannakipagrikna, makaliwliwa a sasao, ken kararag a naipaay maigapu kaniak. Anian a makapabileg dagitoy! Kamaudiananna kinasapulan nga ibagak kadagiti kakabsat nga agsardengdan a mangipaay iti taraon ken tumulong iti panangdalus iti balay!
“Sadino koma pay no di laeng iti organisasion ni Jehova ti pakasarakantayo iti kakastoy nga awan-panagimbubukodanna nga ebkas ti pannakipagrikna, pannakaseknan, ken ayat? Mabilang ti kaaduan a tao ita iti maysa la nga imada dagiti pudno a gagayyemda. Binendisionannatayo ni Jehova iti dakkel a pamilia dagiti naespirituan a kakabsat!”—Marcos 10:29, 30.