Sawen ti Nadalus a Pagsasao ket Agbiag nga Agnanayon!
“Birukenyo ni Jehova . . . Birukenyo ti kinalinteg, birukenyo ti kinaemma. Nalabit a dakayo maitalimengkayto iti aldaw ti pungtot ni Jehova.”—SOFONIAS 2:3.
1. (a) Aniada a metodo ti us-usaren dagiti estudiante a mangadal ti ganggannaet a pagsasao? (b) Apay sawen ti nadalus a pagsasao?
DAGITI estudiante mabalin nga adalenda ti maysa a baro a pagsasao babaen ti panangusar ti gramatika a metodo wenno maibalikas-pagsasao a metodo. Iti sidong ti gramatika a metodo, gagangay nga agusarda kadagiti libro ket adalen dagiti pagalagadan ti gramatika. Iti sidong ti maibalikas-pagsasao a metodo, tuladenda dagiti aweng ken padron ti sao a sawen ti mannursuroda. Mausar ti agpadpada a metodo iti panangadal ti “nadalus a pagsasao.” Ken napateg a sawentayo daytoy a pagsasao no inanamaentayo ti “maitalimeng iti aldaw ti pungtot ni Jehova.”—Sofonias 2:1-3; 3:8, 9.
2. Kasanotay a maadal ti mabalin a maawagan dagiti pagannurotan ti gramatika para ti nadalus a pagsasao?
2 Ti kangrunaan a libro a mausar iti panangadal ti nadalus a pagsasao isu ti Biblia. Ti nagaget a panangadal iti dayta ken dagiti naibatay-Biblia a publikasion isuronakayo iti mabalin a maawagan pagannurotan ti gramatika ti nadalus a pagsasao. Ti panagadal ti Biblia idiay pagtaengan nga idaulo ti maysa a Saksi ni Jehova ket naimbag a pangrugian. Kadagidiay dedikadon iti Dios, napateg ti regular ken nagaget a panangadal kadagiti Kasuratan. Ngem addada kadi naisangsangayan nga epektibo a pamay-an a panangadal ti nadalus a pagsasao? Ket aniada a gunggona ti agresulta manipud panagsao iti dayta?
No Kasano nga Adalen ti Nadalus a Pagsasao
3. Aniat’ maysa a pamay-an ti panangadal ti nadalus a pagsasao?
3 Maysa a pamay-an ti panangadal ti nadalus a pagsasao isut’ panangitimpuyog kadagiti kinapudno a maad-adalyo kadagiti puntos nga ammoyon, no kasano a mabalin a sirarang-ay nga inaig ti estudiante ti pagsasao dagiti nadumaduma a pagannurotan ti gramatika. Kas pangarigan, iti naminsan mabalin a pagaammoyo a ni Jesu-Kristo ket Anak ti Dios, ngem bassit laeng ti ammoyo maipapan kadagiti annongenna. Manipud idin, ti panangadal ti Biblia mabalin a nangisuro kadakayo a ni Kristo agturturayen kas maysa a nailangitan nga Ari ket kabayatan ti Sangaribo a Tawen a Panagturayna, ti natulnog a sangatauan maiyegto iti kinaperpekto. (Apocalipsis 20:5, 6) Wen, ti panangitimpuyog kadagiti baro a pannakaawat kadagidiay nga ammoyon parang-ayenna ti pannakaawatyo iti nadalus a pagsasao.
4. (a) Aniat’ sabali pay a pamay-an ti panangadal kadagiti ‘pagannurotan ti gramatika’ ti nadalus a pagsasao, ket ania a salaysay ti Biblia ti nausar tapno iyilustrar daytoy? (b) Aniat’ napasamak idi a nagtignay ni Gideon ken ti tallo gasut a tattaona? (c) Ti salaysay maipapan ken Gideon isurona ti ania a leksion?
4 Ti sabali a wagas ti panangadal kadagiti ‘pagannurotan ti gramatika’ ti nadalus a pagsasao isut’ panangiladawan iti panunot kadagiti pasamak ti Biblia. Kas panangyilustrar: Padasenyo a ‘kitaen ken denggen’ ti salaysay a nailanad idiay Oc-ocom 7:15-23. Adtoy! Ti Israelita nga ukom a ni Gideon biningayna dagiti buyotna iti tallo a grupo iti sagtunggal sangagasut a lallaki. Iti kasipngetan, siuulimek a simmalogda manipud Bantay ti Gilboa ket linikmutda ti kampo dagiti matmaturog a Madianitas. Armadoda kadi unay, dagitoy tallo gasut? Saan no namilitariaan. Ay ket, pagkakatawaan laeng ida dagiti natangsit a militarista! Tunggal lalaki addaan tangguyob, maysa a dakkel a gorgorita, ken aluten idiay uneg ti gorgorita. Ngem denggenyo! Iti maited a sinias, ti sangagasut a lallaki a kadua ni Gideon pagunienda dagiti tangguyobda ken buongenda dagiti gorgoritada. Kasta met ti aramiden dagiti dadduma pay a dua gasut. Bayat nga aminda ti mangitagtag-ay kadagiti umap-apuy nga aluten, mangngegyo ida nga agpukpukkaw: “Ti kampilan ni Jehova ken ni Gideon!” Anian a nangpabuteng daytoy kadagiti Madianitas! Rimmuarda manipud toltoldada, dagiti makaturturog pay a matmatada ti nagmulagat gaput’ butengda kadagiti lumaglagto nga ap-apuy a mangitampok kadagiti kas anniniwan a langa ken nangpataud ti inaanito a buteng. Idi a mangrugin nga agtataray dagiti Madianitas, intultuloy a pinaguni dagiti buyot ni Gideon dagiti tangguyobda, ket ti Dios pinaglalabanna dagiti kabkabusorda iti maysa ken maysa. Anian a nagpigsa a leksion iti nadalus a pagsasao! Kabaelan nga isalakan ti Dios dagiti ad-adipenna nga awan ti aniaman a natauan a puersa militar. Mainayon pay, “ni Jehova dinanto idian ti ilina gapu ti dakkel a naganna.”—1 Samuel 12:22.
5. Kasano a dagiti Nakristianuan a gimgimong makatulongda tapno mapasayaat ti panagsaotayo?
5 No masursuruan dagiti estudiante iti ganggannaet a pagsasao babaen ti maibalikas-pagsasao a metodo, padasenda nga uliten a siuumiso dagiti aweng ken padron ti sao ti mannursuroda. Anian dagiti nagsasayaat a gundaway a sawen ti nadalus a pagsasao kadagiti Nakristianuan a gimgimong! Sadiay mangngegantayo dagiti sabsabali a mangiyebkas kadagiti bagbagida iti Nainkasuratan a kinapudno, ket addaantay met pribilehio nga agkumento a mismo. Agamaktay aya di la ket ta adda maisaotayo a di umiso? Saan koma a daytat’ kangrunaan a pakaseknantayo, ta ti biddut a siaasi a korehiren ti panglakayen a mangidadaulo iti kasta a gimong kas ti linawas a Panagadal ti Pagwanawanan ket pasayaatenna ti panagsaotayo. Gapuna, regular a tumabuno ken makiraman kadagiti Nakristianuan a gimgimong.—Hebreo 10:24,25.
Iseserrek dagiti Kinarugit
6. Apay nga adda ti kasta a panamagdilig iti nagbaetan dagiti Saksi ni Jehova ken dagiti narelihiusuan nga organisasion ti Kakristianuan?
6 Dagidiay a mangiwaragawag ti panggep ni Jehova ken mangiyanunsio ti nailangitan a Pagarianna sasawenda ti nadalus a pagsasao kas dagiti Saksina. Ipakaammoda ti naganna ken agserbida kenkuana “a situtunos,” wenno addaan maymaysa a pananganamong. (Sofonias 3:9) Nupay dagiti relihion ti Kakristianuan addaandat’ Biblia, dida agsasao ti nadalus a pagsasao wenno umawag iti nagan ti Dios buyogen ti pammati. (Joel 2:32) Awanandat’ agtutunos a mensahe a naibatay iti Kasuratan. Apay? Agsipud ta ipangpangrunada dagiti narelihiusuan a tradision, nailubongan a pilosopia, ken dagiti napolitikaan a kinasungdo ngem ti Sao ti Dios. Dagiti pangpanggepda, namnamada, ken metododa adda amin iti daytoy nadangkes a lubong.
7. Aniat’ naipakita idiay 1 Juan 4:4-6 a nagdumaan dagiti Saksi ni Jehova ken dagiti ulbod a relihion?
7 Ti Kakristianuan—kinapudnona, ti intero a sangalubongan nga imperio ti ulbod a relihion—dida agsasao ti isu met laeng a pagsasao a kas kadagiti Saksi ni Jehova. Makapainteres, kadagidiay agsasao ti nadalus a pagsasao, insurat ni apostol Juan: “Dakayo tattaonakayo ti Dios, . . . ket inabakyo dagidiay a tattao, ta dakdakkel daydiay adda kadakayo ngem ti adda iti lubong. Isuda tattao ida ti lubong; gapu itoy agsaoda iti maipapan iti lubong ket ti lubong denggenna ida. Datayo tattaonatayo ti Dios. Ti makaammo iti Dios denggennatayo; ti saan a tao ti Dios saannatay a denggen.” (1 Juan 4:4-6) Dagiti ad-adipen ni Jehova pinarmekda dagiti ulbod a mannursuro agsipud ta ti Dios, nga adda kadagiti tattaona, “ket dakdakkel ngem [ti Diablo, isu] nga adda iti lubong,” ti di nalinteg a natauan a sosiedad. Yantangay dagiti apostata “tattao ida ti lubong” ken addaanda ti dakes nga espirituna, “agsaoda iti maipapan iti lubong ket ti lubong denggenna ida.” Ngem dagiti kasla karnero nga indibidual denggenda dagidiay tattao ti Dios, mabigbigda a ti ili ni Jehova agsasao ti nadalus a pagsasao ti kinapudno ti Biblia a naipaay babaen ti organisasionna.
8. Ania ti pakabigbigan ti tao ti kinadakes?
8 Naipadto ti naindaklan a panagapostasia, ken ti ‘misterio ti kinadakes’ agan-andaren idi umuna a siglo K.P. Idi agangay, dagiti tattao a nangakseptar—wenno nangagaw—ti saad a panangisuro iti kongregasion nagisuroda kadagiti adu nga ulbod a doktrina. Ti pagsasaoda adayo iti kinadalus. Gapuna timpuar ti napamaysa a “tao ti kinadakes,” ti klero ti Kakristianuan, a naigamer kadagiti ulbod a narelihiusuan a tradision, nailubongan a pilosopia, ken di nainkasuratan a sursuro.—2 Tesalonica 2:3, 7.
Nangngeg ti Nadalus a Pagsasao iti Sangalubongan
9. Ania ti adda a narelihiusuan a panagrang-ay kabayatan ti maika-19 a siglo?
9 Bassit laeng a minoridad dagiti managbuteng-Dios a tattao ti ‘nakidangadang a sibibileg gapu iti pammati a naited kadagiti sasanto.’ (Judas 3) Sadino ti pakasarakan kadagiti kakasta a manamati? Iti sinigsiglon, ti ulbod a relihion inkabilna dagiti umariwekwek iti naespirituan a kinasipnget, ngem ammo ti Dios dagidiay sumagmamano nga addaan ti anamongna. (2 Timoteo 2:19) Ket, iti tengnga dagiti komersial, industrial, ken sosial a panagbalbaliw idi maika-19 a siglo, timpuar dagiti timek a naisalsalumina manipud ti gagangay a babel ti ulbod a narelihiusuan a kinariribuk. Dagiti bassit a grupo pinadpadasda a basaen dagiti pagilasinan ti panawen ket pinugtuanda ti maikadua nga iyaay ni Jesus, ngem saan nga amin ket nagsao ti nadalus a pagsasao.
10. Ania a “maikadua nga iyaay” a grupo ti pinili ti Dios nga agsao ti nadalus a pagsasao, ket apay a nalawag nga adda kadakuada ti ima ni Jehova?
10 Idi 1879, nupay kasta, nagbalin a nalawag no ania a “maikadua nga iyaay” a timek ti pinili ni Jehova nga agsao ti nadalus a pagsasao kas dagiti Saksina. Idin maysa a bassit a grupo ti panagadal-Biblia nga indauluan ni Charles Taze Russel ti nagtataripnong idiay Pittsburgh, Pennsylvania, E.U.A. Nasiertoda a ti maikadua nga iyaay ni Jesus mangrugi iti di makita a kaaddana, a maysa a panawen ti sangalubongan a rigat ti adda iti masanguanan, ket daytoyto ti sarunuen ti Sangaribo a Tawen a Panagturay ni Kristo a mangipasublinto ti Paraiso ditoy daga, agraman agnanayon a biag para kadagiti natulnog a tattao. Idi Hulio 1879 dagitoy nga estudiante ti Biblia rinugianda nga ipablaak ti magasin a pagaammo itan kas Ti Pagwanawanan. Innem a ribo a kopia laeng ti naiwaras iti umuna a ruarna. Ngem ti “ima ni Jehova” adda kadagidiay a Saksi, ta daytoy a pagbasaan ket maipabpablaak itan iti 111 a pagsasao, addaan promedio ti pannakayimprenta a nasurok a 15,000,000 iti kada ruar.—Idiligyo ti Aramid 11:19-21.
11, 12. Aniada dagiti sumagmamano a Nainkasuratan a kinapudno a naawatan dagidiay agsasao ti nadalus a pagsasao?
11 Babaen ti Biblia ken dagiti publikasion dagiti Saksi ni Jehova, ken kangrunaanna babaen kadagitoy naregta a Kristiano a mangiwarwaragawag ti naimbag a damag, naammuanen ti nadalus a pagsasao iti intero a daga. Ket anian nga engrande a gunggona ti tagtagiragsaken dagidiay agsasao iti dayta! Imbes a kunaenda a ‘ti Dios ket Dios, ni Kristo ket Dios, ken ti Espiritu Santo ket Dios’ iti misterioso a sasao ti Trinitarianismo, umanamongda iti takder ti Biblia a ni Jehova isu ti Kangatuan, ni Jesu-Kristo kas nababbaba isu ti Anakna, ken ti nasantuan nga espiritu isu ti nakaskasdaaw nga aktibo a puersa ti Dios. (Genesis 1:2; Salmo 83:18; Mateo 3:16, 17) Dagiti agsasao ti nadalus a pagsasao ammoda a ti tao di nagtaud manipud nababbaba a porma ti biag ngem naparsua babaen ti naayat a Dios. (Genesis 1:27; 2:7) Mabigbigda a ti kararua agsardengen iti kaaddana iti ipapatay—maysa a kinapudno a mangikkat ti panagbuteng kadagiti natay. (Eclesiastes 9:5, 10; Ezequiel 18:4) Matartarusan ti impierno kas ti gagangay a tanem ti sangatauan, saan a maysa nga umap-apuy a disso a pagtutuokan a pinartuat ti maysa a nauyong a didiosen. (Job 14:13) Ammoda met a ti panagungar ket inted-Dios a namnama dagiti natay.—Juan 5:28, 29; 11:25; Aramid 24:15.
12 Dagidiay nga agsasao ti nadalus a pagsasao ipakitada ti panagraem iti dara ken biag. (Genesis 9:3, 4; Aramid 15:28, 29) Bigbigenda a ti naindagaan a biag ni Kristo isu ti gatad ti subbot a nabayadan agpaay kadagiti natulnog a tattao. (Mateo 20:28; 1 Juan 2:1, 2) Pulos a dida agkararag kadagiti “sasanto,” a pagaammoda a dagiti karkararagda masapul a maiturong ken Jehova baeten ken Jesu-Kristo. (Juan 14:6, 13, 14) Yantangay kondenaren ti Sao ti Dios ti idolatria, di maus-usar dagiti ladladawan iti panagdaydayawda. (Exodo 20:4-6; 1 Corinto 10:14) Ken maliklikanda dagiti peggad ti demonismo agsipud ta laklaksidenda ti espiritismo, a makondenar met idiay Biblia.—Deuteronomio 18:10-12; Galacia 5:19-21.
13. Apay a di masmasdaawan dagidiay agsasao ti nadalus a pagsasao?
13 Dagiti ad-adipen ni Jehova, nga agsasao ti nadalus a pagsasao, dida pagsidsiddaawan no sadino ti ayandan iti agus ti panawen. Insuro ida ni Jehova nga addatayon iti “panawen ti panungpalan,” nga addan ni Jesus kas maysa a nadayag a di makita nga espiritu. (Daniel 12:4; Mateo 24:3-14; 2 Timoteo 3:1-5; 1 Pedro 3:18) Agraman nabibileg a nailangitan a buybuyot iti likudanna, agturongen ni Kristo iti pannakigubat tapno aramidenna ti panangukom ti Dios maibusor daytoy sistema dagiti bambanag. (Daniel 2:44; Apocalipsis 16:14, 16; 18:1-8; 19:11-21) Wen, ken dagidiay agsasao ti nadalus a pagsasao kupadoda a mangiwarwaragawag ti naimbag a damag a ti Pagarian ti Dios iti sidong ni Kristo iyegnanton iti mabiit dagiti engrande a bendision agpaay ti isuamin a natulnog a sangatauan iti paraiso a daga. (Isaias 9:6, 7; Daniel 7:13, 14; Mateo 6:9, 10; 24:14; Lucas 23:43) Amin dayta, ket paset laeng kadagiti maaramidanna! Sigurado, ti nadalus a pagsasao ti kabaknangan, kasudian a pagsasao ditoy daga!
14. Aniada dagiti dadduma pay a gunggona a tagtagiragsaken dagidiay agsasao ti nadalus a pagsasao?
14 Dagiti gunggona a tagtagiragsaken dagidiay agsasao ti nadalus a pagsasao iramanna “ti talna ti Dios” a mangsaluad ti puspuso ken pampanunot. (Filipos 4:6, 7) Agtulnogda kadagiti linlinteg ti Biblia, a mangparang-ay ti salun-at, kinaragsak, ken pannakapnek nga agtaud iti panangay-ayo ken Jehova. (1 Corinto 6:9, 10) Wen, ken dagiti agsasao ti nadalus a pagsasao addaanda ti namnama ti agnanayon a biag iti baro a lubong nga inkari ti Dios.—2 Pedro 3:13.
Usaren Dayta wenno Mapukaw Dayta
15. Kasano a magunggonaankayo iti nasayaat a pannakaawat iti nadalus a pagsasao?
15 No sawenyo ti nadalus a pagsasao iti baro a lubong, masapul nga ammoyo a naimbag dayta tapno agbalin a pagsasao a mapampanunotyo. No ti maysa a tao adalenna ti maysa a pagsasao, umuna nga agpanunot iti katutubo a pagsasao ket ipatarusna ti pampanunotna iti baro a pagsasao. Ngem bayat a lumalaingen iti baro a pagsasao, mangrugin nga agpanunot iti dayta a saanen kasapulan ti panangipatarus. Umas-asping, babaen nagaget a panagadal, magun-odanyo ti kasta a nasayaat a pannakaawat iti nadalus a pagsasao nga ammoyonto no kasano nga iyaplikar dagiti linteg ken prinsipio ti Biblia tapno masolbar dagiti parikut ken agtalinaed iti “dana ti biag.”—Salmo 16:11.
16. Ania ti mabalin a mapasamak no diyo usaren a regular ti nadalus a pagsasao?
16 Masapul a regular nga usarenyo ti nadalus a pagsasao, ta no saan mapukawyonto ti abilidadyo a sawen dayta a naimbag. Tapno mayilustrar: Tawtawen ti napalabasen, dadduma kadatayo naadalda ti ganggannaet a pagsasao. Mabalin a malagiptayo ti dadduma a sasao iti dayta a pagsasao ngem mabalbalin a napukawtayon ti laingtayo iti dayta gapu ta ditayon kankanayon nga us-usaren dayta. Ti isu met laeng a banag ti mapasamak iti nadalus a pagsasao. No ditay regular nga usaren dayta, mapukawtay ti laingtayo iti dayta, ket daytat’ addaan kadagiti napeggad a pagbanagan iti naespirituan. Sawentay ngarud a regular dayta kadagiti gimgimong ken iti Nakristianuan a ministerio. Dagitoy nga ar-aramid, a napakuyogan ti personal a panagadal, ti mamagbalinto kadatayo a sawen dagiti bambanag a siuumiso iti nadalus a pagsasao. Ket anian a nagpateg dayta!
17. Ania ti mangyilustrar a ti panagsao mabalin a mangispal-biag wenno mangyeg ipapatay?
17 Ti panagsao mabalin a mangispal-biag wenno mangyeg ipapatay. Naipakita daytoy kabayatan ti maysa a suppiat iti nagbaetan ti Israelita a tribo ti Efraim ken ni Ukom a Jepte ti Galaad. Tapno mailasin dagiti Efraimitas a mangpadpadas nga aglibas iti ballasiw ti Karayan Jordan, dagiti taga Galaad inusarda ti paglasat a sao a “Shibboleth,” nga addaan pakpakauna nga “sh” nga aweng. Dagiti lallaki ti Efraim liniputanda ti bagbagida kadagiti soldado a taga Galaad idiay pagballasiwan ti Jordan babaen panangikunada “Sibboleth” imbes a ti “Shibboleth,” a di umiso ti panangibalikasda ti panglukat nga aweng ti sao. Kas resultana, 42,000 nga Efraimitas ti napapatay! (Oc-ocom 12:5, 6) Umas-asping, ti isursuro ti klero ti Kakristianuan mabalin a ngangngani kaaw-aweng ti nadalus a pagsasao para kadagidiay di unay nasursuruan iti kinapudno ti Biblia. Ngem ti panagsao iti ulbod a narelihiusuan a pamay-an mapaneknekanto a makapapatay inton aldaw ti pungtot ni Jehova.
Nakaykaysa Agtalinaedtayo
18, 19. Ania ti kaipapanan ti Sofonias 3:1-5?
18 Iti panangtukoy ti di matalek a Jerusalem idi ugma ken ti moderno a kapadana, ti Kakristianuan, naikuna idiay Sofonias 3:1-5: “Asipay daydiay nasungit ken narugit, ti manangilupit a siudad! Isu saan a nagtulnog iti timek; saan nga immawat iti panangisuro. Saan a nagkammatalek ken Jehova. Saan nga immasideg iti Diosna. Dagiti piprinsipena iti nagtengngaanna isuda dagiti ngumerngernger a leon. Dagiti uk-ukomna isuda dagiti lobo ti rumabii nga agngatngatingat ti tulang agingga ti bigat. Dagiti mammadtona nadursokda, ken manangallilawda a tattao. Dagiti papadina binassawangda ti nasantuan; sinalungasingda ti linteg. Ni Jehova nalinteg iti nagtengngaanna; dinto agaramid iti kinadakes. Iti tunggal bigat iyegna ti kinahustisiana. Iti lawag isu saan nga agkurang. Ngem ti nakillo dina ammo ti bain.” Ania ti kaipapanan dagidiay a sasao?
19 Agpadpada ti kadaanan a Jerusalem ken ti moderno-aldaw a Kakristianuan immalsada maibusor ken Jehova ket rinugitanda ti bagbagida iti ulbod a panagdayaw. Ti kinadakes dagiti papanguloda nangibunga ti panangilupit. Agpapan pay maulit-ulit a pammakdaar ti Dios, dida dimngeg ken immadani kenkuana. Dagiti piprinsipeda arigda dagiti narungsot a leon, a sikukuspag a dida ikabkabilangan ti kinalinteg. Kas kadagiti mabisbisinan a lobo, dagiti uk-ukomda pinisangpisangda ti kinahustisia. Dagiti papadida ‘binassawangda ti nasantuan ken sinalungasingda ti linteg’ ti Dios. Gapuna ni Jehova mangrugin nga ‘urnongenna dagiti nasnasion ken ummongenna dagiti pagpagarian, tapno ibukbokna kadakuada ti ungetna, ti isuamin a narungsot a pungtotna.’—Sofonias 3:8.
20. (a) Aniat’ masapul nga aramiden tapno makalasat iti aldaw ti pungtot ni Jehova? (b) Kasano nga inanamaenyo a tagiragsaken dagiti agnanayon a bendision manipud ti Dios?
20 Ti aldaw ti pungtot ni Jehova ket umas-asidegen a nakaparpardas. Tapno makalasat nga agturong iti baro a lubong ti Dios, ngarud, adalen ken sawen ti nadalus a pagsasao a din agtaktak. Babaen laeng ti panangaramid a kasta a masalaknibankayo manipud naespirituan a pannakadidigra itan ken manipud napardas-idadatengna a sangalubongan a kalamidad. Iwarwaragawagen dagiti Saksi ni Jehova ti aldaw ti pungtot ti Dios ken ti nakaay-ayat a mensahe ti Pagarianna. Anian a pagrag-oanda ti agsao maipapan ti dayag ti kinaarina! (Salmo 145:10-13) Makikaykaysakayo kadakuada, ket inanamaenyo a tagiragsaken ti agnanayon a biag ken dadduma pay a bembendision manipud Namunganay ti nadalus a pagsasao, ti Soberano nga Apo Jehova.
Kasanot’ Panangsungbatyo?
◻ Ania dagiti sumagmamano a pamay-an ti panangadal ti nadalus a pagsasao?
◻ Apay a makagunggona a sawen ti nadalus a pagsasao?
◻ Ania ti mabalin a mapasamak no diyo usaren a regular ti nadalus a pagsasao?
◻ Kasano a makalasat ti maysa a tao iti aldaw ti pungtot ni Jehova ket tagiragsaken dagiti agnanayon a bendision?
[Ladawan iti panid 16]
Ni Gideon ken dagiti tattaona pinuyotanda dagiti tangguyobda ket intag-ayda dagiti alutenda
[Ladawan iti panid 18]
Manipud 1879 nga agpatpatuloy nagbalin a nalawag a ni Charles Taze Russell ken dagiti kakaduana inusar ida ti Dios a mangparang-ay ti nadalus a pagsasao
[Dagiti ladawan iti panid 20]
Naikaykaysakayo kadin kadagiti Saksi ni Jehova iti panagsao ti nadalus a pagsasao?