Ania Dagiti Kualidad ti Dios?

No ad-adda nga ammotayo dagiti kualidad ti maysa a tao, ad-adda nga am-ammotayo isuna, ket nasingsinged ti panaggayyemtayo. No ad-adda nga ammotayo dagiti kualidad ni Jehova, ad-adda a maam-ammotayo ti kinasiasinona, ket nasingsinged ti pannakigayyemtayo kenkuana. Kadagiti amin a nagsasayaat a kualidad ti Dios, uppat ti kangrunaan: ti pannakabalin, sirib, kinahustisia, ken ayatna.

TI DIOS KET MANNAKABALIN

“O Kangatuan nga Apo Jehova! Kitaem! Inaramidmo ti langit ken ti daga babaen ti dakkel a pannakabalinmo.”​—JEREMIAS 32:17.

Ti pannakabalin ti Dios ket makita kadagiti parsuana. Kas pagarigan, no addaka iti kainitan, ania ti marikna ti kudilmo? Ti bara ti init. Kinapudnona, marikriknam ti resulta ti pannakabalin ni Jehova nga agparsua. Kasano kabara ti init? Iti uneg ti init, ti kano temperaturana ket agarup 27,000,000 degrees Fahrenheit (15,000,000°C). Kada segundo, mangiruruar ti init iti enerhia a katupag ti panagbettak ti ginasut a milion a nuklear a bomba.

Ngem bassit ti inittayo no idilig iti adu kadagiti di mabilang a trinilion a bituen iti uniberso. Sigun iti panangtantiar dagiti sientista, agarup mamin-1,700 a dakdakkel ti diametro ti UY Scuti, a maysa kadagiti kadakkelan a bituen, no idilig iti init. Nagdakkel ti UY Scuti a no koma maipuesto ti tengngana iti ayan ti init, malaonna ti Daga ken uray agingga iti labes ti pagrikrikusan ti Jupiter. Mabalin a makatulong dayta tapno maawatantayo ti imbaga ni Jeremias nga inaramid ni Jehova a Dios ti langit ken daga, wenno ti uniberso, babaen ti dakkel a pannakabalinna.

Kasanotayo a mabenepisiaran iti pannakabalin ti Dios? Nakadepende ti biagtayo kadagiti parsua ti Dios, kas iti init ken iti amin a nagsasayaat a kinabaknang ti daga. Us-usaren met ti Dios ti pannakabalinna para iti pagimbagan ti tunggal maysa kadatayo. Kasano? Idi umuna a siglo, inikkan ti Dios ni Jesus iti pannakabalin nga agaramid kadagiti milagro a talaga a nakaskasdaaw. Mabasatayo: “Makakitan dagiti bulsek, makapagnan dagiti pilay, immimbagen dagiti agkukutel, makangngegen dagiti tuleng, napagungaren dagiti natay.” (Mateo 11:5) Ita ngay? Kuna ti Biblia: “Mangted iti pannakabalin iti daydiay nabannog,” ken innayonna: “Pumigsanto dagidiay mangnamnama ken Jehova.” (Isaias 40:29, 31) Maited ti Dios ti “bileg a nalablabes ngem iti gagangay” tapno kabaelantayo a sanguen wenno ibturan dagiti rigat ken pannubok iti biag. (2 Corinto 4:7) Saan aya a kayatmo la ketdi ti makisinninged iti Dios a siaayat unay a mangus-usar iti awan limitasionna a pannakabalinna a tumulong kadatayo?

TI DIOS KET MASIRIB

“O Jehova, anian a nakaad-adu dagiti inaramidmo! Pinarsuam amin ida babaen ti siribmo.”​—SALMO 104:24.

No ad-adu dagiti maammuantayo maipapan kadagiti inaramid ti Dios, ad-adda met nga agsiddaawtayo iti siribna. Kinapudnona, adda tay-ak ti panagadal a maawagan iti biomimetics, wenno biomimicry, a pangad-adalan dagiti sientista kadagiti parsua ni Jehova. Tultuladen dagiti sientista dagiti paset ti disenio iti nakaparsuaan tapno mapasayaat dagiti bukodda a disenio. Karaman kadagita ti simple a mamagdekket iti bambanag agingga iti disenio dagiti eroplano.

Ti bagi ti tao ti kangrunaan a pakakitaan iti nakaskasdaaw unay a sirib ti Dios. Kas pagarigan, kitaentayo ti proseso ti pannakabukel ti ubing. Mangrugi dayta iti maysa a pertilisado a selula, a naglaon kadagiti gene nga ayan ti amin a kasapulan nga instruksion. Mabingay dayta a selula tapno agbalin nga adu nga agpapada a selula. Ngem iti eksakto a tiempo, dagita a selula ket mangrugin nga agbalin a naiduma ti pormada, isu a mapatauden ti ginasut nga espesial a kita ti selula, kas kadagiti selula ti dara, selula ti nerbio, ken selula ti tulang. Di agbayag, maporman dagiti paset ti bagi ken mangrugidan nga agandar. Iti laeng siam a bulan, dayta a maysa a selula ket agbalinen a sibubukel a maladaga nga addaan iti binilion a selula. Gapu iti sirib a makita iti dayta a disenio, adu ti umanamong iti imbaga ti maysa a mannurat ti Biblia: “Idaydayawka ta makapaamanga ti nakaskasdaaw a pannakaaramidko.”​—Salmo 139:14.

Kasanotayo a mabenepisiaran iti sirib ti Dios? Ammo ti Namarsua dagiti kasapulantayo tapno naragsaktayo. Gapu iti kalawa ti pannakaammo ken pannakaawatna, ik-ikkannatayo kadagiti nainsiriban a balakad iti Biblia a Saona. Kas pagarigan, iparegtana kadatayo: “Itultuloyyo ti . . . situtulok nga agpipinnakawan.” (Colosas 3:13) Nainsiriban kadi dayta a balakad? Wen. Naammuan dagiti doktor a ti panangpakawan ket mangpasayaat iti pannaturog ken mangpababa iti presion ti dara. Mangkissay met iti posibilidad a tumaud ti depresion ken dadduma pay a sakit. Ti Dios ket kas iti maysa a masirib ken nadungngo a gayyem a di pulos mauma a mangted iti makatulong ken nagsayaat a balakad. (2 Timoteo 3:16, 17) Kayatmo kadi ti maaddaan iti kasta a gayyem?

TI DIOS KET DIOS TI KINAHUSTISIA

“Ayaten ni Jehova ti kinahustisia.”​—SALMO 37:28.

Kanayon nga umiso ti ar-aramiden ti Dios. Kinapudnona, “imposible nga agaramid ti Dios iti dakes, ken saan nga agaramid ti Mannakabalin-amin iti di umiso!” (Job 34:10) Nalinteg dagiti panangukomna, kas iti imbaga ti salmista ken Jehova: “Patas ti panangukommo kadagiti tattao.” (Salmo 67:4) Gapu ta “ti puso ti kitkitaen ni Jehova,” saan a maallilaw iti panaginsisingpet no di ket kanayon a makitana ti agpayso ken makaaramid iti umiso a pangngeddeng. (1 Samuel 16:7) Ammo met ti Dios ti amin a mapaspasamak a kinaawan hustisia ken kinadakes ditoy daga, ket inkarina nga asidegen a ‘maikkat dagiti dakes ditoy daga.’​—Proverbio 2:22.

Nupay kasta, ti Dios ket saan a naulpit nga ukom a magagaran a mangdusa. Mangipakita iti asi no kasapulan. Kuna ti Biblia: “Naasi ken mannakipagrikna ni Jehova,” uray kadagiti dakes no napasnek ti panagbabawida. Saan kadi a pudno a hustisia dayta?​—Salmo 103:8; 2 Pedro 3:9.

Kasanotayo a mabenepisiaran iti kinahustisia ti Dios? Kinuna ni apostol Pedro: “Saan a mangidumduma ti Dios, no di ket awatenna ti tao iti tunggal nasion nga agbuteng kenkuana ken agaramid iti umiso.” (Aramid 10:34, 35) Mabenepisiarantayo iti kinahustisia ti Dios gapu ta saan a pulos mangidumduma wenno awan ti pabpaboranna. Awatennatayo ken makapagdaydayawtayo kenkuana aniaman ti puli, pagilian, adal, wenno kasasaadtayo iti kagimongan.

Gapu ta kayat ti Dios a maawatantayo ti kinahustisiana ken mabenepisiarantayo iti dayta, inikkannatayo iti konsiensia. Inladawan ti Biblia ti konsiensia kas iti linteg a ‘naisurat iti pusotayo,’ nga “agserbi a kas testigo” no naimbag wenno dakes ti ar-aramidentayo. (Roma 2:15) Kasano a mabenepisiarantayo? No nasanay a naimbag ti konsiensiatayo, matignaynatayo a mangliklik kadagiti makadangran wenno dakes nga aramid. Ken no agkamalitayo, matignaynatayo nga agbabawi ken agbalbaliw. No maawatantayo ti kinahustisia ti Dios, makatulong dayta kadatayo ken sumingedtayo kenkuana!

TI DIOS KET AYAT

“Ti Dios ket ayat.”​—1 JUAN 4:8.

Ipakpakita ti Dios ti pannakabalin, sirib, ken hustisia, ngem saan nga ibaga ti Biblia a ti Dios ket pannakabalin, sirib, wenno hustisia. Ibaga ti Biblia a ti Dios ket ayat. Apay? Gapu ta iti kinaagpaysuanna, ti pannakabalin ti Dios ti makagapu a kabaelanna nga aramiden ti bambanag ken ti kinahustisia ken siribna ti mangiwanwan kenkuana kadagiti aramidenna. Ngem ti ayat ni Jehova ti manggutugot kenkuana nga agtignay. Amin nga ar-aramidenna ket maigapu iti ayat.

Awan ti kurang ken Jehova ngem ti ayatna ti nangtignay kenkuana a mangparsua kadagiti intelihente a persona idiay langit ken ditoy daga, tapno mabenepisiaranda ken tagiragsakenda ti ayat ken panangaywanna. Sipaparabur nga insaganana ti daga tapno perpekto a pagnaedan dagiti tattao a pinarsuana. Agtultuloy met nga ipakpakitana ti ayat iti amin a tattao ta “pagsilnagenna ti initna kadagiti dakes ken kadagiti naimbag ken pagtinnagenna ti tudo kadagiti nalinteg ken kadagiti nakillo.”​—Mateo 5:45.

Kanayonanna, “ni Jehova ket nadungngo unay ken naasi.” (Santiago 5:11) Ipakpakitana ti ayat kadagidiay sipapasnek nga agregget a mangam-ammo ken umasideg kenkuana. Makitkita ti Dios ti kasasaad ti tunggal maysa kadakuada. Kinapudnona, ‘ipatpategnatayo.’​—1 Pedro 5:7.

Kasanotayo a mabenepisiaran iti ayat ti Dios? Magusgustuantayo ti nagpintas nga ilelennek ti init. Maragragsakantayo a makangngeg iti panagkatawa ti ubing. Ipatpategtayo ti panagayat ti nadekket a kapamiliatayo. Mabalin a saan a dagita ti kapatgan ngem maparagsakda unay ti biagtayo.

Mabenepisiarantayo met iti sabali pay a panangipakita ti Dios iti ayatna: ti panagkararag. Iparegta ti Biblia kadatayo: “Dikay madanagan iti aniaman, no di ket ipakaammoyo koma iti Dios ti amin a kiddawyo babaen ti kararag ken panagpakaasi, agraman panagyaman.” Kas iti nadungngo nga ama, kayatna nga agpatulongtayo kenkuana kadagiti karirigatan a problematayo. Gapu iti kasta unay nga ayat ni Jehova kadatayo, ikarkarina nga ipaayna “ti talna ti Dios a mangartap iti amin a pannakaawat.”​—Filipos 4:6, 7.

Iti daytoy nga ababa a pannakailawlawag dagiti kangrunaan a kualidad ti Dios​—kas iti pannakabalin, sirib, hustisia, ken ayat​—nalawlawag kadin ti pannakaawatmo iti kinasiasino ti Dios? Tapno ad-adda pay a maapresiarmo ti Dios, itultuloymo a basaen dagiti naaramidannan ken aramidennanto pay a pakagunggonaam.