Gumawgaw-atkay Aya?

“No adda gumawgaw-at iti saad a manangaywan, naimbag nga aramid ti tarigagayanna.”​—1 TIMOTEO 3:1.

1. Ti panangtungpal ti ania a kalat ti addaan kangrunaan a kinapateg kadagiti Saksi ni Jehova?

DAGITI Saksi ni Jehova addaanda kadagiti maiyanatup a kalat a naiturong ken maitungtungpal iti nadiosan a pamay-an. Saan a nakaskasdaaw daytoy, ta ti Diosda addaan met kadagiti natakneng a kalat ken kanayon a maibambanagna ti pangpanggepna. (Isaias 55:8-11) Ti ad-adipen ni Jehova di rebbeng nga agbalinda kas kadagidiay tattao nga agkurang iti nasayaat a kalat ken lumasat a sililiway iti biag a bassit maar-aramidanda a pakagunggonaan ti asinoman malaksid iti bagida laeng. Ti addaan kangrunaan nga importansia kadagiti Saksi ti Dios isut’ panangtungpal ti natakneng a kalat ti panangiwaragawag ti mensahe ti Pagarian ken panangiranud kadagiti sabsabali pay ti makaited-biag a pannakaammo ti Sao ti Dios.​—Salmo 119:105; Marcos 13:10; Juan 17:3.

2. Ania a kalat agpaay kadagiti Kristiano a lallaki ti dinakamat ni Pablo idiay 1 Timoteo 3:1?

² Iti organisasion ni Jehova, addada met dadduma pay a natakneng a kalat. Insitar ni apostol Pablo ti maysa kadagitoy idi a nagsurat: “Papatien daytoy a sao. No adda gumawgaw-at iti saad a manangaywan, naimbag nga aramid ti tarigagayanna.” Ti kasta a tao tarigagayanna nga aramiden ti banag nga agpaay a pagimbagan ti sabsabali. Tarigagayanna ti “naimbag nga aramid,” saan a ti biag a nalag-an ken nadayag. Kuna pay ti sabali a patarus: “Adda kinapudno iti panagkuna a ti lalaki a mangisaad ti pusona iti kinapangulo addaan nadayaw nga ambision.”​—1 Timoteo 3:1, Phillips.

Dagiti Peggad kadagiti Panglakayen

3, 4. Apay a ti lalaki a gumawgaw-at iti panagbalinna a manangaywan rebbeng a saluadanna ti pusona?

³ Iti ania a pamay-an a ti lalaki a mangisaad ti pusona iti panagbalin a Kristiano a manangaywan addaan iti “nadayaw nga ambision”? Ti ambision isut’ nabara a tarigagay a mangragpat iti partikular a kalat. Pudno, addada dagiti natakneng ken di natakneng nga ambision. Ngem no sipapakumbaba a ragpaten ti maysa a lalaki ti saad ti kinamanangaywan agsipud ta kayatna ti agserbi kadagiti sabsabali, ti serbisiona ket maipaay nga addaan kadagiti nalinteg a motibo ket agbunga kadagiti naespirituan a bendision. Ngem masapul a saluadanna ti pusona.​—Proverbio 4:23.

⁴ Dadduma nga ambisioso a tattao agsapsapulda ti dayaw. Dadduma kayatda nga iturayan ti padada a tattao. Ti kinaagum iti kinaprominente wenno pannakabalin arignat’ nabungsot a ramut nga isut’ mangitumba ti nakasalsalun-at kitana a puon ti kayo. Uray met ti Kristiano mabalin a matnag iti kasta a di umisot’ pannakatignayna nga ambision. (Proverbio 16:18) “Nagsuratak bassit iti kongregasion,” kuna ni apostol Juan, “ngem ni Diotrefes, nga agumanna ti nagunggundaway a puesto ngem kadagiti dadduma [“a kayatnat’ agbalin nga ulo iti isuamin,” Phillips], saan nga umawat ti aniaman kadakami nga addaan dayaw. Gapuna, no umayak, ipalagipkonto dagiti bambanag nga ar-aramidenna, nga agsalsalawasaw iti maibusor kadakami kadagiti sasao a dakes. Ket saan pay a mapnek itoy, dina pay awaten dagiti kakabsat a sidadayaw, ket dina met palubosan dagiti mayat nga umawat ket pagtalawenna ida iti kongregasion.” (3 Juan 9, 10) Ti ambision ni Diotrefes ket di nakristianuan. Ti kinatangsit ken ti ambisioso a panangtarigagay ti pannakabalin kadagiti dadduma awan lugarda kadagiti pudno a paspasurot ni Jesus.​—Proverbio 21:4.

5. Iti ania a kababalin a rebbeng a tamingen dagiti manangaywan dagiti annongenda?

⁵ Ti manangaywan a Kristiano a tamtamingenna dagiti annongenna nga addaan umiso a motibo saannanto a suroten dagiti inaagum nga ambision. Ibilangnanto daytoy naimbag nga aramid ti panangaywan Kristiano kas inted-Dios a pribilehio ken ipastoranna ti arban ti Dios a “saan a mapilpilit, no di ket siaayat; saan met nga iti naalas a panagsapul, no di ket iti nasiglat a nakem; saan a kas agturay kadagidiay kas tawid ti Dios, no di ket agbalin [a pagulidanan] ti arban.” (1 Pedro 5:2, 3) Wen, rebbeng nga agannad dagiti manangaywan kontra ti panangpatanor ti kinatangsit ken panangsapul ti abusado a panangiggem ti pannakabalin.

6. Apay a ti panglakayen rebbeng a saanna iturayan ti ili ti Dios?

⁶ Ti panglakayen saan a rebbeng nga agturay kadagiti dadduma a Kristiano, ta isut’ kapadada nga agtrabaho, saan nga ‘agturay iti pammatida.’ (2 Corinto 1:24) Idi dadduma nga apostol tinarigagayanda ti kinatan-ok, kuna ni Jesus: “Ammoyo a dagiti panguluen dagiti nasnasion agturayda kadakuada ket dagiti natan-ok agbilinda a situturay kadakuada. Ngem kadakayo saanto a kasta; no di ket ti siasinoman nga agtarigagayto nga isu ti kadakkelan kadakayo isunto ti agserbi kadakayo, ket ti siasinoman nga agayatto nga isu ti umuna kadakayo isunto ti adipenyo. A kas met ti Anak ti tao, saan nga immay tapno pagserbian, no di ket tapno agserbi ken itedna ti biagna a maysa a subbot kadagiti adu.” (Mateo 20:20-28) Ti panglakayen saan nga isut’ Kangrunaan a Pastor no di ket katulongan laeng a pastor. No isut’ agturay iti arban, iparparangarangna ti espiritu ti kinatangsit. Nangnangruna a mangibunga ti pakadangranan no allukoyenna pay dagiti dadduma a tumulong kenkuana a pawadwaden dagiti natangsit nga ambisionna. Kuna ti proverbio: “Isuamin a natangsit ti pusona makarimon ken ni Jehova. Uray ti ima ken ima agpinnetpetda, isu saanto a di madusa.”​—Proverbio 16:5.

7, 8. (a) Apay a nesesita para kadagiti panglakayen a Kristiano a napakumbabada? (b) Mangted ehemplo iti napakumbaba a panglakayen.

⁷ Rebbeng ngarud a dagiti Kristiano a panglakayen ‘agpakumbabada iti mannakabalin nga ima ti Dios.’ Ti kinatangsit lapdannat’ naespirituan a kinausar, ta dagiti laeng napakumbaba ti addaan iti umiso a kasasaad ti puso ken isip a mangaramid ti nadiosan a pagayatan. “Ti Dios tallikudanna dagiti natangsit, ngem ikkanna ti di kaikarian a kinamanangaasi dagiti napakumbaba.” (1 Pedro 5:5, 6) Wen, bendisionan ni Jehova dagiti napakumbaba ti isipda. Manipud kadagitoy a madutokan dagiti kualipikado a lallaki nga agserbi kas Kristiano a papanglakayen.

⁸ Ti moderno a historia dagiti Saksi ni Jehova napunnoda kadagiti salaysay ti napakumbaba a serbisio nga ipapaay dagiti nadiosan a tattao. Kas pangarigan, usigenyo ni nakaem-emma a W. J. Thorn, naminsan a maysa a pilgrim, wenno agdaldaliasat a manangaywan, ken nabayag met a nagtartrabaho iti Bethel. Maipapan kenkuana, kuna ti maysa a Kristiano: “Diak pulos maliplipatan ti inyebkas ni Kabsat Thorn a nakatulong kaniak agingga itoy nga aldaw. Kunana, ket adawek, ‘No mangrugin nga agpampanunotak ti dakkel maipapan ti bagik, ilisik ti bagik iti maysa a suli, ti arigna, ket kunaek: “Sika a bassit a tapuk. Aniat’ adda a pagtangsitmo?”’” Anian a nagsayaat a kualidad nga ipamatmat dagiti panglakayen ken kadagiti dadduma pay! Laglagipenyo, “ti gunggona ti kinapakumbaba ken panagbuteng ken Jehova ket kinabaknang ken dayaw ken biag.”​—Proverbio 22:4.

Ti Inted-Dios a Tarigagay nga Agserbi

9. Apay a maikuna a ti tarigagay nga agserbi kas manangaywan ket inted-Dios?

⁹ Ti aya tarigagay nga agserbi kas manangaywan inted-Dios? Wen, ta ti espiritu ni Jehova mangted pakatignayan, tured, ken bileg a mangipaay ti sagrado a serbisio kenkuana. Kas pangarigan, aniat’ napasamak idi nagkararag dagiti maidaddadanes a paspasurot ni Jesus maipaay iti kinatured a mangasaba? “Daydi disso a nakaurnonganda nagkintayeg; ket napnoda amin iti nasantuan nga espiritu ket sinaoda a situtured ti sao ti Dios.” (Aramid 4:27-31) Idinto a ti nasantuan nga espiritu nakapataud ti kasta a bungbunga, mabalinna met a tignayen ti tao a rumagpat.

10. (a) Aniat’ maysa a rason no apay a ti maysa a lalaki a Kristiano saan a gumawgaw-at? (b) No ti Dios ikkannatayo ti pribilehio ti serbisio, aniat’ mabalin a masiguradotayo?

¹⁰ Apay a mabalin a ti nataengan a Kristiano ket saan a gumawgaw-at? Mabalin nga isut’ naespirituan a tao ngem mariknana a di makabael. (1 Corinto 2:14, 15) Siempre, rebbeng a maaddaantay ti nanumo a panangmatmat iti bagbagitayo, a pagaammotay dagiti limitasiontayo. (Mikias 6:8) Imbes a sitatangsit a pampanunoten a datayo ti pinakakualipikado a maipaay iti maysa a responsabilidad, nasayaat no laglagipen a “kadagiti napakumbaba adda ni sirib.” (Proverbio 11:2) Ngem rebbengtay met a bigbigen a no inikkannatay ti Dios ti pribilehio ti serbisio, itdenna met kadakayo ti pigsa a kasapulan a mangitungpal iti dayta. Kas kinuna ni Pablo: “Mabalinak dagiti amin a bambanag gapu iti daydiay mamapigsa kaniak.”​—Filipos 4:13.

11. Aniat’ maaramidan ti maysa a Kristiano a saan a gumawgaw-at agsipud ta mariknana a kurang ti supisiente a kinasirib a mangbalakad?

¹¹ Ti Kristiano mabalin a di gumawgaw-at agsipud ta patienna nga isut’ agkurang ti supisiente a kinasirib a mangted ti balakad. No kasta, mabalin nga isut’ makagun-od ti kinasirib babaen iti panagbalinna a naan-anep pay nga estudiante ti Sao ti Dios, ken siempre rebbeng nga ikararagna ti kinasirib. Nagsurat ni Santiago: “Ngem no siasinoman kadakayo agkurang iti kinasirib, agdawat koma iti Dios, isu a mangted a sikakaasi kadagiti isuamin ket saan a mangpabain; ket maitedto kenkuana. Ngem agdawat koma a babaen ti pammati nga awan ket ti panagduadua, ta ti managduadua umasping iti maysa a dalluyon ti baybay nga iduron ti angin ket agpallayug. Saan koma ngarud a panunoten daydiay a tao nga addanto aniaman nga awaten ken Jehova; ti tao a nagkaddua ti nakemna, saan nga agtalinaed kadagiti amin a daldalanna.” (Santiago 1:5-8) Kas sungbat iti kararagna, ti Dios inikkanna ni Salomon “iti maysa a masirib ken mannakaawat a puso” a nakatulong kenkuana a mangtingiting iti naimbag ken dakes no manguk-ukom. (1 Ar-ari 3:9-14) Ti kaso ni Salomon ket naisangsangayan, ngem babaen iti naanep a panagadal ken tulong ti Dios, dagiti lallaki a nakaitalkan ti responsabilidad iti kongregasion makabalakadda a sililinteg kadagiti dadduma. “Ta ni Jehova mangted iti sirib; agtaud iti ngiwatna ti pannakaammo ken pannakaawat.”​—Proverbio 2:6.

12. No gapu iti danagna ti maysa a lalaki ket saan a gumawgaw-at, aniat’ makatulong kenkuana?

¹² Ti bassit a panagdanag medmedanna ti maysa manipud iti igagaw-atna. Mabalin panunotenna a saanna a kabaelan nga ibaklay ti nadagsen a responsabilidad ti kinapanglakayen. Uray ni Pablo inadmitirna: “Ti mamarigat kaniak nga inaldaw, isu ti panangaywanko a sidadanag kadagiti isuamin a kongregasion.” (2 Corinto 11:28) Ngem ammo ti apostol ti aramidenna no aglaklak-am ti panagdanag, ta insuratna: “Dikay madanagan iti uray ania, no di ket kadagiti isuamin maipakaammo koma dagiti dawdawatyo iti Dios gapu iti kararag ken araraw agraman panagyaman; ket ti talna ti Dios a daeganna ti amin a pannakaawat aywanannanto dagiti puspusoyo ken dagiti panunotyo ken Kristo Jesus.” (Filipos 4:6, 7) Wen, ti kararag ken panagtalek iti Dios makatulong a mangkissay ti panagdanag.

13. Kasanot’ mabalin a panagkararag ti maysa a lalaki no masikoran maipapan ti igagaw-atna?

¹³ No agtultuloy latta ti bassit a panagdanag, ti lalaki a masikoran maipapan igagaw-atna mabalin nga agkararag kas ken David: “Usigennak, O Dios, ket ammuem toy pusok. Sukisukennak, ket ammuem dagiti makariribuk a pampanunotko, ket kitaem no adda dinadangkes a dalan kaniak, ket iturongnak iti dalan nga agnanayon.” (Salmo 139:23, 24) Aniaman ti kasasaad dagiti “makariribuk” wenno “makapadanag” a pampanunottayo, matulongannatay ti Dios a mangparmek kadakuada tapno mabalintay ti rumang-ay iti naespirituan. (Kitaenyo ti The New International Version.) Nagsayaat ti pannakaiyebkasna iti sabali a salmo: “Idi kinunak: ‘Toy sakak maikaglis,’ ti kinamanagayatmo, O Jehova, tinengngelnak. Iti kaadu dagiti makariribuk a pampanunot itoy unegko, dagiti pangliwliwam patalgedenda toy kararuak.”​—Salmo 94:18, 19.

Agserbi a Siraragsak kas Pagayatan ni Jehova

14. Apay a ti lalaki a saan a gumawgaw-at rebbeng nga ikararagna ti nasantuan nga espiritu ti Dios?

¹⁴ No gaput’ danag, dagiti rikna ti kinakapuy, wenno kinakurang ti pakatignayan, ti lalaki a Kristiano mapaay a gumaw-at, maiyanatup unay ti panangikararag ti espiritu ti Dios. Kuna ni Jesus: “No ngarud no dakayo, idinto a dakeskayo, ammoyo ti mangted kadagiti nasasayaat a sagsagut kadagiti annakyo, dinto aya nangnangruna ni Amayo a nailangitan a mangted ti nasantuan nga espiritu kadagiti agdawat kenkuana!” (Lucas 11:13) Yantangay ti talna ken panagteppel ket pasetda ti bunga ti espiritu, daytoy nga espiritu makatulong kadatayo a mangparmek ti dandanag wenno dagiti rikna ti kinakapuy.​—Galacia 5:22, 23.

15. Ania a kita dagiti kararag ti makatulong kadagidiay agkurang ti pakatignayan a mangipaay ti bagbagida kadagiti pribilehio ti serbisio?

¹⁵ Ti ngay kinakurang ti pakatignayan? Kas dagiti bautisado a Kristiano, kasapulan ti intay panangikararag a ti Dios tignayennatay koma a mangaramid ti makaay-ayo kenkuana. Indawdawat ni David: “Iparangmo kaniak dagiti daldalanmo, O Jehova . . . Iturongnak iti kinapudnom ket isuronak.” (Salmo 25:4, 5) Dagiti kararag kas itoy makatulongda kadatayo a lumisi iti di umiso a dana, ket mabalintay ti agkararag ti kasta no agkurang ti pakatignayantayo a gumaw-at. Mabalintay nga idawat ken Jehova a pagtarigagayennatay a mangakseptar kadagiti pribilehio ti serbisio. Kinapudnona, no ikararagtayo ti espiritu ti Dios ken tumuloktayo iti panangiturongna, awan duadua a pagbalinentay ti bagbagitayo a sisasagana no maitukon dagiti pribilehio ti serbisio kadatayo. Tutal, nikaanoman di kayat dagiti ad-adipen ti Dios a paayen ti espirituna.​—Efeso 4:30.

16. Ania a kababalin ti mangted napigsa a pakatignayan a gumaw-at iti responsabilidad iti kongregasion?

¹⁶ No addaantay “ti panunot ni Kristo,” pagragsakantayo nga aramiden ti nadiosan a pagayatan. (1 Corinto 2:16) Naaddaan ni Jesus ti isu met laeng a kababalin kas ti salmista, a nagkuna: “Pagragsakak nga aramiden ti pagayatam, O Diosko, wen, ti lintegmo adda iti uneg ti pusok.” (Salmo 40:8) Kuna ni Kristo: “Adtoy! Umayak tapno aramidek ti pagayatam,” ket nagturong dayta agingganat’ ipapatay iti kayo a pagtutuokan. (Hebreo 10:9, 10) Ti tarigagay a mangaramid ti aniaman a mabalinan iti serbisio ni Jehova mangted napigsa a pakatignayan a gumaw-at iti responsabilidad ti kongregasion.

Kumita iti Masanguanan

17. (a) Apay a dagiti lallaki a di agserserbi a naan-anay itatta kas iti panagserbida idi rebbeng a saanda a maupay? (b) Aniat’ kadadakkelan a pribilehio iti isuamin?

¹⁷ Gapu kadagiti problema ti salun-at wenno dadduma pay a rason, dadduma a naminsan nangasikason kadagiti nasken nga annongen ti kongregasion ket agdama nga awanandan kadagita a pribilehio. Saan koma a maupay dagitoy. Ammotayo nga adu a matalek a lallaki didan kabaelan nga agserbi a naan-anay kas iti sigud nga ar-aramidenda ngem agtaktakderda a sititibker kas manangsalimetmet ti kinatarnawda. (Salmo 25:21) Kinapudnona, dagiti nabayagen a napakumbaba a panglakayen makapagtultuloyda a mangiranud kadagiti kapadasanda babaen ti panagtalinaedda iti bagi dagiti panglakayen. Nupay napakapsutdan gaput’ edad wenno pagkapuyan, saan a kasapulan a dumsaagda. Kabayatanna, bay-an a tunggal Saksi ni Jehova patgenna koma ti kasasayaatan a pribilehio iti isuamin, ti ‘panangisasao ti dayag ti panagari ti Dios’ kas dagiti manangitandudo ti nasantuan a naganna.​—Salmo 145:10-13.

18. (a) No ti panglakayen wenno ministerial nga adipen ket naikkat, aniat’ mabalin a kasapulan? (b) Ania a nasayaat a kababalin ti impakita ti maysa a panglakayen a naikkat?

¹⁸ No maysakay idi a panglakayen wenno ministerial nga adipen ngem saankayon nga agserserbi ita iti dayta a kapasidad, makasigurokayo a ti Dios ay-ayatennakayo pay, ken nalabit itdennanto kadakayo dagiti di namnamaen a pribilehio iti masanguanan. (1 Pedro 5:6, 7) No kasapulanyo ti agaramid kadagiti panagbalbaliw, situtulokkay koma nga umawat ti biddutyo ken parmekenyo dayta babaen iti tulong ti Dios. Dadduma kadagiti naikkat a panglakayen nakapataudda ti di nakristianuan a kababalin, ket sumagmamanot’ nagbalin nga inaktibo wenno immikaydan manipud kinapudno. Ngem anian a nainsiriban ti agbalin kas kadagidiay mangipakpakita ti nasayaat nga espiritu! Kas pangarigan, idi ti maysa a panglakayen a nakapagserbin ti adu a tawtawen idiay Central America ket naikkat, kunana: “Nasaktanak unay a nakapukaw iti pribilehio nga impatpategko iti nakabaybayag. Ngem aramidek ti amin a kabaelak ti aniaman a kayat dagiti kakabsat a pangusaran kaniak ket pagreggetak a mapasubli dagiti pribilehiok ti serbisio.” Idi agangay, daytoy a kabsat nakapribilehio manen a nagserbi kas panglakayen.

19. Ania a maiyanatup a pammagbaga ti maited iti maysa a kabsat a lalaki a naikkat kas panglakayen wenno ministerial nga adipen?

¹⁹ No naikkatkayo kas panglakayen wenno kas ministerial nga adipen, ngarud, salimetmetanyo ti napakumbaba nga espiritu. Liklikanyo ti napait a kababalin a mangdiskualipikar kadakayo maipaay kadagiti masanguanan a pribilehio. Ti nadiosan nga espiritu makagun-od ti respeto. Imbes a maupay, panunotenyo no kasano a bembendisionan ni Jehova ti ministerioyo wenno ti sangakabbalayanyo. Pabilgenyo iti naespirituan ti pamiliayo, sarungkaranyo dagiti masakit, ken paregtaenyo dagiti nakapuy. Kangrunaanna, patgenyo ti pribilehio a panangidaydayaw iti Dios ken panangiwaragawag ti naimbag a damag kas maysa kadagiti Saksi ni Jehova.​—Salmo 145:1, 2; Isaias 43:10-12.

20. Kasano a mabalin matulongan ti bagi dagiti panglakayen ti dati a manangaywan wenno ministerial nga adipen?

²⁰ Ammuen koma ti bagi dagiti panglakayen a ti pannakaikkat ket mabalin a makapasakit iti dati a manangaywan wenno ministerial nga adipen, uray no siboboluntario nga insukona ti pribilehio. No isut’ saan a nailaksid, ngem dagiti panglakayen makitada a naladingit ti kabsat, rebbeng nga ikkanda ti naayat a naespirituan a tulong. (1 Tesalonica 5:14) Rebbeng a tulonganda a maawatanna nga isut’ kasapulan iti kongregasion. Uray no kinasapulan ti balakad, mabalin a saanto nga agbayag sakbay a ti napakumbaba ken managyaman a lalaki umawatto manen kadagiti kanayonan a pribilehio ti serbisio iti uneg ti kongregasion.

21. Asino dagiti naguray kadagiti pribilehio ti serbisio, ket aniat’ maisingasing kadagidiay agur-uray met kadagita itatta?

²¹ No gumawgaw-atkayo, mabalin nga aguraykayo bassit sakbay nga umawat ti kanayonan a pribilehio ti serbisio. Makaan-anuskay koma. Ni Moises naguray ti 40 a tawtawen sakbay nga isut’ inusar ti Dios idi a winayawayaanna dagiti Israelita manipud pannakakayawda idiay Egipto. (Aramid 7:23-36) Sakbay ti pannakadutokna kas suno ni Moises, nabayag a nagserbi ni Josue kas katulongna. (Exodo 33:11; Numeros 27:15-23) Naguray ni David ti mabayag bassit sakbay a naisaad iti trono ti Israel. (2 Samuel 2:7; 5:3) Nalabit da Pedro ken Juan Marcos naglasatda kadagiti panawen ti pannakagugor. (Mateo 26:69-75; Juan 21:15-19; Aramid 13:13; 15:36-41; Colosas 4:10) Gapuna no awanankay ita kadagiti annongen iti kongregasion, mabalin a palpalubosannakay ni Jehova a mamolmolde babaen ti pannakagun-od ti ad-adu pay a kapadasan. Iti aniaman a kaso, sapulenyo ti tulong ti Dios bayat a gumawgaw-atkayo, ket mabalin a bendisionannakayto kadagiti kanayonan a pribilehio ti serbisio. Kabayatanna, agtrabahokayo a sigagaget tapno makakualipikar iti responsabilidad ti kongregasion ket iparangarang ti espiritu ni David, a nagkuna: “Ti ngiwatko agsaonto iti panangidaydayaw ken Jehova; ket amin a lasag bendituenna koma ti nasantuan a naganna iti agnanayon awan inggana.”​—Salmo 145:21.

Kasano ti Panangsungbatyo?

◻ Maibusor kadagiti ania a peggad ti rebbeng pagannadan dagiti Kristiano a panglakayen?

◻ Aniat’ makatulong kadagidiay a gaput’ danagda wenno dagiti rikna ti kinakapuy saanda a gumawgaw-at?

◻ Aniat’ makatignay iti tao a mangipaay ti bagina maipaay iti responsabilidad ti kongregasion?

◻ Iti ania a kababalin rebbeng a kumita dagiti dati a panglakayen ken ministerial nga ad-adipen iti masanguanan?

[Ladawan iti panid 19]

Ni W. J. Thorn nangted ti nagsayaat nga ulidan kas napakumbaba a panglakayen

[Ladawan iti panid 21]

Kas ken Jesus, situtulokkay aya a mangaramid iti aniaman a mabalinan iti serbisio ni Jehova?