Ti Mensahe a Masapul nga Iwaragawagtayo

“AGBUTENGKA ITI PUDNO A DIOS KET SALIMETMETAM DAGITI BILINNA”

NABAYAG kasakbayan ti panawen dagiti Kristiano, imbaga ni Jehova ken matalek nga Abraham ti maipapan iti urnos para kadagiti “amin a nasion iti daga” tapno mabendisionanda ti bagbagida. (Gen. 22:18) Pinaltiinganna met ni Solomon a mangisurat iti maipapan iti kangrunaan a rebbengen dagiti amin a tattao: “Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.” (Ecl. 12:13) Ngem kasano a maammuan dagiti tattao nga agnanaed iti amin a nasion dagitoy a bambanag?

Nupay kanayon nga adda dagiti tattao a mamati iti sao ti Dios, ipasimudaag ti Biblia a naikeddeng a maaramid iti “aldaw ti Apo” ti naganetget a sangalubongan a panangikasaba iti naimbag a damag nga aktual a dumanon iti amin a nasion. Nangrugi daytoy idi 1914. (Apoc. 1:10) Maipapan iti dayta a tiempo, impakpakauna ti Apocalipsis 14:6, 7 a ti napateg a panangiwaragawag babaen ti panangiturong dagiti anghel ket maaramid “iti tunggal nasion ken tribu ken pagsasao ken ili.” Maidagadag kadakuada: “Agbutengkayo iti Dios ket idayawyo, agsipud ta dimtengen ti oras ti panangukomna, ket ngarud agdaydayawkayo iti Daydiay nangaramid iti langit ken iti daga ken baybay ken kadagiti ubbog ti dandanum.” Pagayatan ti Dios a maipakaammo daytoy a mensahe. Pribilehiotayo ti makiraman iti dayta a trabaho.

“Ti Pudno a Dios.” Idi kinuna ni Jehova, “Dakayo dagiti saksik,” masupsupiat idi ti isyu maipapan iti Kinadios. (Isa. 43:10) Ti mensahe a masapul a maipakaammo ket saan a basta maaddaan koma dagiti tattao iti relihion wenno mamatida iti maysa a dios. Imbes ketdi, masapul a maikkanda iti gundaway a mangammo a ti Namarsua iti langit ken daga ket isu ti maymaysa a pudno a Dios. (Isa. 45:5, 18, 21, 22; Juan 17:3) Ti laeng pudno a Dios ti mapagtalkan a makaibaga iti mapasamak iti masanguanan. Pribilehiotayo a mangipakaammo a ti pannakatungpal ti sao ni Jehova iti napalabas ket mangted iti natalged a pangnamnamaan a pumudnonto dagiti amin nga inkarina a mapasamak iti masanguanan.​—Jos. 23:14; Isa. 55:10, 11.

Siempre, adu kadagiti makaskasabaantayo ti agdaydayaw kadagiti sabali a didios wenno mangibagbaga nga awan a pulos ti dios a daydayawenda. Tapno maallukoytay ida a dumngeg, mabalin a kasapulan nga irugitayo ti makisarita maipapan kadagiti banag a paginteresanda. Makatulong kadatayo ti ehemplo a nailanad iti Aramid 17:22-31. Paliiwem a nupay nataktika ni apostol Pablo, sibabatad nga imbagana nga amin a tattao adda sungsungbatanda iti Dios a Namarsua iti langit ken daga.

Panangipakaammo iti Nagan ti Dios. Dimo liplipatan a dakamaten ti pudno a Dios babaen ti naganna. Ipatpateg ni Jehova ti naganna. (Ex. 3:15; Isa. 42:8) Kayatna a maammuan dagiti tattao dayta a nagan. Impaisuratna iti Biblia ti nangayed a naganna iti nasurok a 7,000 a daras. Responsabilidadtayo nga ipakaammo dayta a nagan kadagiti tattao.​—Deut. 4:35.

Agpannuray ti masakbayan ti amin a tattao iti panangammoda ken ni Jehova ken iyaawagda kenkuana buyogen ti pammati. (Joel 2:32; Mal. 3:16; 2 Tes. 1:8) Nupay kasta, kaaduan a tattao ti di makaammo ken ni Jehova. Karaman kadakuada dagiti nagadu nga agkunkuna nga agdaydayawda iti Dios a sarsaritaen ti Biblia. Uray no adda Bibliada ken basbasaenda dayta, mabalin a saanda latta nga ammo ti personal a nagan ti Dios agsipud ta naikkat dayta kadagiti adu a moderno a patarus. Ti laeng nakaammuan dagiti dadduma a tattao iti nagan a Jehova ket idi imbilin dagiti relihioso a panguluenda a saanda nga usaren dayta.

Kasanotayo a maipakaammo kadagiti tattao ti nagan ti Dios? Awan ti mas epektibo ngem ti panangipakita iti dayta kadakuada iti Biblia​—iti mismo a kopiada no mabalbalin. Kadagiti dadduma a patarus, agparang dayta a nagan iti rinibu a daras. Kadagiti dadduma, iti laeng Salmo 83:18 wenno Exodo 6:3-6 ti mabalin a pagparanganna, wenno masarakan iti footnote ti Exodo 3:14, 15 wenno 6:3. Iti adu a patarus, agparang dagiti sandi a sasao a kas iti “Apo” ken “Dios,” a naiduma ti pannakaisuratda no naglaon iti personal a nagan ti Dios ti manuskrito iti orihinal a lenguahe. No ti personal a nagan ti Dios ket inikkat nga interamente dagiti moderno a managipatarus, mabalin a kasapulan nga agusarka iti immun-una a patarus ti Biblia tapno maipakitam kadagiti tattao no ania ti inaramid dagiti nagipatarus. Kadagiti dadduma a pagilian, mabalinmo nga ipakita ti nagan ti Dios nga agparang kadagiti narelihiosuan a himno wenno naikitikit iti maysa a publiko a patakder.

Uray kadagiti agdaydayaw iti sabali a didiosen, mabalin nga usaren a sieepektibo ti Jeremias 10:10-13 iti Baro a Lubong a Patarus. Saanna laeng a dakamaten ti nagan ti Dios no di pay ket sibabatad nga ilawlawagna ti kinasiasinona.

Dimo suksukatan ti nagan ni Jehova kadagiti awag a kas iti “Dios” ken “Apo,” a kas ar-aramiden ti Kakristianuan. Di kayat a sawen daytoy nga usarem dayta a nagan tunggal irugim ti saritaan. Gapu iti di umiso a panangipapanda, gupden dagiti dadduma ti kasta a saritaan. Ngem no makitam a mabalinmo nga ituloy ti saritaan, dika bumdeng a mangusar iti nagan ti Dios.

Makapainteres ta iti Biblia ad-adu a daras a nausar ti personal a nagan ti Dios ngem kadagiti titulo a kas iti “Apo” ken “Dios” uray no pagtitiponen amin dagita. Ngem uray no kasta, saan nga inkagumaan dagiti nagsurat iti Biblia nga inusar ti nagan ti Dios iti tunggal sentensia. Inaramatda dayta iti natural, sibubulos, ken nadayaw a wagas. Nasayaat dayta a pagwadan a suroten.

Ti Persona a Tuktukoyen Dayta a Nagan. Nupay napateg a kinapudno ti banag nga adda personal a nagan ti Dios, pangrugian la dayta ti panangammo kenkuana.

Tapno ayatenda ni Jehova ken umawagda kenkuana a buyogen ti pammati, masapul a maammuan dagiti tattao no ania a kita a Dios ni Jehova. Idi impakaammona ti naganna ken Moises idiay Bantay Sinai, saanna a basta inulit-ulit ti sao a “Jehova.” Dinakamatna ti sumagmamano kadagiti nagsasayaat a galadna. (Ex. 34:6, 7) Maysa dayta a pagwadan a tuladentayo.

Mangaskasabaka man iti kabbaro nga interesado a tao wenno agpalpalawagka iti kongregasion, no saritaem ti maipapan kadagiti bendision ti Pagarian, ipakitam no ania ti ipasimudaag dagitoy maipapan iti Dios a nangikari kadagita. No madakamatmo dagiti bilinna, igunamgunammo ti sirib ken ayat nga iyanninaw dagita. Ibatadmo a saan a makapadagsen kadatayo dagiti kalikaguman ti Dios, no di ket nairanta dagita nga agpaay iti pagimbagantayo. (Isa. 48:17, 18; Mik. 6:8) Ipakitam no kasano a tunggal ebkas ti pannakabalin ni Jehova adda ipalgakna maipapan iti personalidad, dagiti pagalagadan ken panggepna. Dakamatem ti kinatimbeng ti wagas a panangiparangarang ni Jehova kadagiti galadna. Mangngeg koma dagiti tattao ti panangyebkasmo iti mismo a rikriknam maipapan ken Jehova. Ti panagayatmo ken Jehova matukayna kadagiti dadduma ti kasta a panagayat.

Ti naganetget a mensahe iti kaaldawantayo idagadagna kadagiti amin a tattao nga agbutengda iti Dios. Babaen ti ibagbagatayo, ikagumaantay nga abbukayen ti kasta a nadiosan a panagbuteng. Daytoy a buteng ket umiso a panagbuteng, panagamak ken Jehova, nauneg a panagraem kenkuana. (Sal. 89:7) Ramanenna ti panangbigbigtayo a ni Jehova ti katan-okan nga Ukom ket ti biagtayo iti masanguanan agpannuray iti anamongna. (Luc. 12:5; Roma 14:12) No kasta, naisinggalut ti kasta a panagbuteng iti nauneg a panagayattayo kenkuana ket, pagbanaganna, iti nasged a tarigagay a mangay-ayo kenkuana. (Deut. 10:12, 13) Ti nadiosan a panagbuteng tignayennatayo met a manggura iti dakes, agtulnog kadagiti bilin ti Dios, ken agdayaw kenkuana a buyogen ti naan-anay a puso. (Deut. 5:29; 1 Cron. 28:9; Prov. 8:13) Saluadannatayo dayta maibusor iti panagserbi iti Dios bayat nga ay-ayatentayo dagiti banag nga adda iti lubong.​—1 Juan 2:15-17.

Ti Nagan ti Dios​—“Napigsa a Torre.” Sagrapen dagiti tattao a pudpudno a makaammo ken Jehova ti dakkel a salaknib. Daytoy ket saan laeng a gapu ta us-usarenda ti personal a naganna wenno maibinsabinsada ti sumagmamano kadagiti galadna. Maigapu daytoy iti panagtalekda ken Jehova a mismo. Maipapan kadakuada, kuna ti Proverbio 18:10: “Ti nagan ni Jehova ket napigsa a torre. Iti dayta nga agtaray ti nalinteg ket maipaayan iti salaknib.”

Usarem a naimbag dagiti gundaway a mangidagadag kadagiti sabsabali nga agtalek ken Jehova. (Sal. 37:3; Prov. 3:5, 6) Ti kasta a panagtalek ipamatmatna ti pammati ken ni Jehova ken kadagiti karina. (Heb. 11:6) No ‘umawag [dagiti tattao] iti nagan ni Jehova’ gapu ta ammoda nga isu ti Soberano iti Uniberso, ayatenda dagiti dalanna, ken naan-anay a patienda nga agtaud laeng kenkuana ti pannakaisalakan, maisalakandanto kas impanamnama kadatayo ti Sao ti Dios. (Roma 10:13, 14) Bayat nga isursurom dagiti sabsabali, tulongam ida a mangpatanor iti dayta a kita ti pammati iti amin a benneg ti biag.

Adu a tattao ti mangsarsaranget kadagiti nakaro a personal a problema. Nalabit awan makitada a solusion. Idagadagmo nga adalenda ti daldalan ni Jehova, agtalekda kenkuana, ken iyaplikarda ti maadalda. (Sal. 25:5) Paregtaem ida nga agdawat a sipapasnek iti tulong ti Dios ken agyaman kenkuana gapu kadagiti bendision nga ipapaayna. (Fil. 4:6, 7) Inton maam-ammoda ni Jehova, saan laeng a gapu iti mabasbasada iti Biblia no di pay ket gapu ta mapaspasaranda ti kaitungpalan dagiti karina iti mismo a biagda, mangrugi a mariknada ti kinatalged nga itden ti pudpudno a pannakaawatda iti kaipapanan ti nagan ni Jehova.​—Sal. 34:8; Jer. 17:7, 8.

Usarem a naimbag ti amin a gundaway a tumulong kadagiti tattao a mangipateg iti kinasirib ti panagbuteng iti pudno a Dios, ni Jehova, ken panangsalimetmet kadagiti bilinna.

“PANANGSAKSI KEN JESUS”

KALPASAN ti panagungarna ken sakbay ti isusublina sadi langit, binilin ni Jesu-Kristo dagiti adalanna, a kunkunana: “Dakayto dagiti saksik . . . agingga iti kaadaywan a paset ti daga.” (Ara. 1:8) Nadeskribir dagiti nasungdo nga adipen ti Dios iti kaaldawantayo a kas dagidiay “addaan iti trabaho a panangsaksi ken Jesus.” (Apoc. 12:17) Kasano ti kasaetmo a mangipapaay iti kasta a panangsaksi?

Adu dagidiay sipapasnek nga agkuna a mamatida ken Jesus ngem awan a pulos ti ammoda maipapan iti kaaddana sakbay a nagbalin a tao. Saanda a mabigbig nga isu ket pudpudno a tao idi adda ditoy daga. Saanda a matarusan ti kaipapanan ti panagbalinna nga Anak ti Dios. Bassit la ti ammoda maipapan iti pasetna iti pannakatungpal ti panggep ti Dios. Saanda nga ammo no ania ti ar-aramidenna ita, ken saanda a mabigbig no kasano a ti aramidennanto iti masanguanan apektaranna ti biagda. Mabalin a sibibiddut nga ipagarupda pay ketdi a di mamati dagiti Saksi ni Jehova ken Jesus. Pribilehiotayo nga ikagumaan nga ipakaammo ti kinapudno maipapan kadagitoy a bambanag.

Adda met dagiti tattao a saan a mamati a pudpudno a nagbiag ti maysa a tao a kas ken Jesus a nadeskribir iti Biblia. Maysa laeng a natan-ok a tao ti pangibilangan dagiti dadduma ken Jesus. Laksiden dagiti adu ti ideya nga isu ket Anak ti Dios. Ti “panangsaksi ken Jesus” kadagita a tattao kalikagumanna ti ad-adda a regget, anus, ken kinataktika.

Uray pay no ania ti panangmatmat dagiti umim-imdeng kenka, masapul a maammuanda ti maipapan ken Jesu-Kristo tapno masagrapda ti probision ti Dios maipaay iti biag nga agnanayon. (Juan 17:3) Nabatad a pagayatan ti Dios nga amin a sibibiag masapul a ‘sipapanayag a bigbigenda a ni Jesu-Kristo ket Apo’ ken agpasakupda iti autoridadna. (Fil. 2:9-11) Gapuna, ditay mabalin a liklikan ti isyu no makasaritatayo dagiti tattao nga addaan kadagiti natibker ngem di umiso a kapanunotan wenno agdadata a bumusbusor. Iti dadduma a kasasaad, nawayatayo a makapagsao maipapan ken Jesu-Kristo​—uray iti damo nga isasarungkartayo​—​ngem iti dadduma, mabalin a kasapulan nga annadantay ti agsao tapno matulongantayo dagiti umim-imdeng nga agpanunot a siuumiso maipapan kenkuana. Nalabit kasapulan met a mangpanunottayo kadagiti pamay-an no kasano nga iserrek dagiti kanayonan nga aspeto dayta a topiko iti masanguanan nga isasarungkartayo. Nupay kasta, mabalin a saantayo a masalaysay amin a nainaig iti dayta agingga a ditay mayadalan ti maysa a tao iti Biblia iti pagtaenganna.​—1 Tim. 2:3-7.

Ti Napateg nga Akem ni Jesus iti Panggep ti Dios. Masapul a tulongantayo dagiti tattao a mangtarus a tangay ni Jesus “ti dalan” ken ‘awan ti makapan iti Ama malaksid no baeten kenkuana,’ di mabalin a maaddaan ti maysa a tao iti naanamongan a relasion iti Dios no awan pammatina ken Jesu-Kristo. (Juan 14:6) Malaksid no mabigbigna ti napateg nga akem nga intuding ni Jehova iti inauna nga Anakna, dina maawatan ti Biblia. Apay? Agsipud ta daytoy nga Anak ti inaramid ni Jehova a kangrunaan nga agakem iti pannakatungpal ti amin a panggepna. (Col. 1:17-20) Naisentro dagiti padto ti Biblia iti daytoy a kinapudno. (Apoc. 19:10) Babaen ken Jesu-Kristo, maipaay ti solusion kadagiti amin a parikut a pinataud ti iyaalsa ni Satanas ken panagbasol ni Adan.​—Heb. 2:5-9, 14, 15.

Tapno maawatanna ti akem ni Kristo, masapul a bigbigen ti maysa a tao ti nakakaasi a kasasaad a nakaadipenan dagiti tattao. Nayanaktayo amin iti basol. Apektarannatayo daytoy iti nadumaduma a wagas iti unos ti panagbiagtayo. Nupay kasta iti di agbayag, agbanag dayta iti ipapatay. (Roma 3:23; 5:12) Ibagam dayta a kinapudno kadagiti tattao a kasabaam. Kalpasanna, ilawlawagmo a babaen ti subbot a daton ni Jesu-Kristo, siaayat a pinagbalin ni Jehova a posible ti pannakaispal manipud iti basol ken ipapatay a maipaay kadagidiay mamati iti dayta a probision. (Mar. 10:45; Heb. 2:9) Daytoy ti mangted kadakuada iti gundaway a mangsagrap iti biag nga agnanayon iti perpekto a kasasaad. (Juan 3:16, 36) Saan a posible daytoy iti aniaman a sabali a pamay-an. (Ara. 4:12) Kas mannursuro, iti pribado man wenno iti kongregasion, saanmo a basta ibaga dagitoy a kinapudno. Siaayat ken siaanus a patanorem kadagiti umim-imdeng kenka ti panagyamanda iti akem ni Kristo kas Mannubbottayo. Ti panangapresiar iti daytoy a probision dakkel ti epektona iti panangmatmat, kababalin, ken kadagiti kalat iti biag ti maysa a tao.​—2 Cor. 5:14, 15.

Siempre, namimpinsan nga indaton ni Jesus ti biagna. (Heb. 9:28) Nupay kasta, isu ket aktibo nga agserserbi kas Nangato a Padi ita. Tulongam dagiti sabsabali a mangtarus iti kaipapanan dayta. Maburburiborda aya, maup-upay, agsagsagaba, wenno agparparikut gapu iti kinaawan asi dagiti tattao nga adda iti aglawlawda? Idi nagbalin a tao ni Jesus, napasaranna amin dagitoy. Ammona ti riknatayo. Gapu ta imperpektotayo, mariknatay aya a kasapulantayo ti asi ti Dios? No dawatentayo ti pammakawan ti Dios maibatay iti daton ni Jesus, agtignay ni Jesus kas “katulongan iti Ama.” Siaasi nga ‘agdawat maipaay kadatayo.’ (1 Juan 2:1, 2; Roma 8:34) Maibatay iti daton ni Jesus ken babaen ti panagserbina kas Nangato a Padi, mabalintayo ti umadani “iti trono ti di kaikarian a kinamanangngaasi” ni Jehova tapno makaawattayo iti tulong iti umiso a tiempo. (Heb. 4:15, 16) Nupay imperpektotayo, makapagserbitayo iti Dios buyogen ti nadalus a konsiensia babaen ti tulong nga ipaay ni Jesus kas Nangato a Padi.​—Heb. 9:13, 14.

Kanayonanna, ar-aramaten ni Jesus ti dakkel nga autoridadna a kas daydiay dinutokan ti Dios nga Ulo ti kongregasion Kristiano. (Mat. 28:18; Efe. 1:22, 23) Kas Ulo, ipaayna ti kasapulan a panangiturong a maitunos iti pagayatan ti Dios. No isurom dagiti sabsabali, tulongam ida a mangtarus a ni Jesu-Kristo, saan ketdi nga asinoman a tao, ti Ulo ti kongregasion. (Mat. 23:10) Iti damo pay laeng a pannakisaritam kadagiti interesado, awisem idan kadagiti gimong ti lokal a kongregasion, a pakaadalantayo iti Biblia iti tulong dagiti publikasion a maipapaay babaen “ti matalek ken masirib nga adipen.” Ilawlawagmo kadakuada saan laeng a no siasino ti “adipen” no di pay ket no siasino daydiay Apo tapno mabigbigda ti kinaulo ni Jesus. (Mat. 24:45-47) Iyam-ammom ida kadagiti panglakayen, ket ilawlawagmo dagiti Nainkasuratan a kualipikasion para kadagiti agbalin a panglakayen. (1 Tim. 3:1-7; Tito 1:5-9) Ilawlawagmo a ti kongregasion ket saan a kukua dagiti panglakayen no di ket tultulongandatayo a mangsurot kadagiti addang ni Jesu-Kristo. (Ara. 20:28; Efe. 4:16; 1 Ped. 5:2, 3) Tulongam dagitoy nga interesado a mangtarus nga adda ti organisado, sangalubongan a sosiedad nga agtigtignay iti sidong ti kinaulo ni Kristo.

Kadagiti Ebanghelio, maammuantayo nga idi simrek ni Jesus idiay Jerusalem idi umad-adanin ti ipapatayna, isu ket intan-ok dagiti adalanna kas “ti Maysa nga um-umay kas Ari iti nagan ni Jehova!” (Luc. 19:38) Bayat nga umad-adu ti maad-adal dagiti tattao iti Biblia, maammuanda a ni Jehova ginaladannan ni Jesus iti autoridad a mangituray a mangapektar kadagiti tattao iti amin a nasion. (Dan. 7:13, 14) No agpalawagka iti kongregasion wenno mangyadalka, tulongam ida a mangapresiar iti kaipapanan kadatayo amin ti panagturay ni Jesus.

Ipaganetgetmo a ti wagas ti panagbiagtayo ipakitana no pudpudno met laeng a mamatitayo a ni Jesu-Kristo ket Ari ken no situtuloktayo nga agpaituray kenkuana. Itampokmo ti trabaho nga impaannong ni Jesus kadagiti pasurotna kalpasan ti pannakapulotna kas Ari. (Mat. 24:14; 28:18-20) Ilawlawagmo ti kinuna ni Jesus, ti Nakaskasdaaw a Manangbalakad, maipapan iti ipangpangrunatayo iti biag. (Isa. 9:6, 7; Mat. 6:19-34) Iturongmo ti atension iti kababalin nga imbaga ti Prinsipe ti Kappia nga iparangarang dagiti pasurotna. (Mat. 20:25-27; Juan 13:35) Agannadka a dimo ikeddeng no kasano kaadu ti rumbeng nga aramiden dagiti sabsabali, no di ket paregtaem ida a mangutob no ania ti ipasimudaag ti tigtignayda maipapan iti panagpasakupda iti kinaari ni Kristo. Iti panangaramidmo iti dayta, bigbigem a masapul nga aramidem met ti kasta.

Panangisaad ken Kristo kas Pamuon. Iyarig ti Biblia ti trabaho a panangaramid iti Kristiano nga adalan iti panangbangon iti maysa a patakder a naisaad ken Jesu-Kristo kas pamuon. (1 Cor. 3:10-15) Tapno maaramid daytoy, tulongam dagiti tattao a mangammo ken Jesus sigun iti ibagbaga ti Biblia maipapan kenkuana. Agannadka di la ket ta agbalinda a pasurotmo. (1 Cor. 3:4-7) Iturongmo ti atensionda ken Jesu-Kristo.

No nasayaat ti pannakaisaad ti pamuon, maawatan dagiti iyad-adalam a nangibati ni Kristo iti pagwadan “tapno sisisinged a suroten[tayo] dagiti addangna.” (1 Ped. 2:21) Tapno mapatanormo dayta, paregtaem dagiti iyad-adalam a mangbasa kadagiti Ebanghelio a saan a basta agpaypayso a historia no di ket kas pagwadan a suroten. Tulongam ida a mangipapuso kadagiti kababalin ken galad nga imparangarang ni Jesus. Paregtaem ida a mangimutektek no kasano ti panagrikna ni Jesus maipapan iti Amana, no kasano a dinaeranna dagiti sulisog ken suot, no kasano a nagpasakup iti Dios, ken no kasano a nakilangen kadagiti tattao iti nadumaduma a kasasaad. Ipaganetgetmo ti aktibidad nga impangpangruna ni Jesus iti biagna. Iti kasta, inton maipasango ti iyad-adalam kadagiti pangngeddeng ken suot iti biag, isaludsodna iti bagina: ‘Ania ngata ti aramiden ni Jesus iti kastoy a kasasaad? Ipakita ngata ti panagtigtignayko ti umiso a panangapresiar iti inaramidna maipaay kaniak?’

No palawagam ti kongregasion, dimo ipapan a tangay mamatin ken Jesus dagiti kakabsatmo, saanen a kasapulan nga iturong ti naisangsangayan nga atension kenkuana. Naun-uneg ti kaipapanan ti ibagbagam no usarem a kas pamuon dayta a pammati. No dakamatem ti maipapan kadagiti gimong, inaigmo daytoy iti akem ni Jesus kas Ulo ti kongregasion. No salaysayem ti maipapan iti tay-ak ti ministerio, iturongmo ti atension iti kababalin nga impakita ni Jesus idi intungpalna ti ministeriona, ken idatagmo ti ministerio maitunos iti kinapudno a madama nga ur-urnongen ni Kristo kas Ari dagiti tattao a maisalakan nga agturong iti baro a lubong.

Nabatad a saan nga umdas ti panangammo laeng kadagiti pamunganayan a kinapudno maipapan ken Jesus. Tapno agbalin dagiti tattao a pudpudno a Kristiano, masapul a mamatida kenkuana ken pudpudno nga ayatenda. Ti kasta nga ayat gutugotenna ti nasungdo a panagtulnog. (Juan 14:15, 21) Dayta ti tumulong kadagiti tattao nga agtakder a sititibker iti pammati iti baet ti rigat, agtultuloy a mangsurot kadagiti addang ni Kristo iti intero a panagbiagda, ken mangpaneknek nga isuda ket natataengan a Kristiano a sititibker a ‘naparamut ken naipasdek iti pamuon.’ (Efe. 3:17) Pakaidayawan dayta ni Jehova, ti Dios ken Ama ni Jesu-Kristo.

“DAYTOY NAIMBAG A DAMAG TI PAGARIAN”

IDI intedna dagiti detalye ti pagilasinan ti kaaddana ken ti panungpalan ti sistema ti bambanag, impadto ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—Mat. 24:14.

Ania aya nga agpayso daytoy mensahe a masapul a mairakurak? Maipapan daytoy iti Pagarian nga insuro ni Jesus nga ikararagtayo iti Dios, a kunkunana: “Umay koma ti pagariam.” (Mat. 6:10) Iti Apocalipsis 11:15, nadeskribir dayta kas ti “pagarian ni Apotayo [ni Jehova] ken ni Kristona” agsipud ta nagtaud ken ni Jehova ti autoridad a mangituray ket naited dayta ken ni Kristo kas Ari. Nupay kasta, imutektekam a ti mensahe nga imbaga ni Jesus a maiwaragawag iti kaaldawantayo ket ad-adu ti ramanenna ngem ti inkasaba dagiti pasurotna idi umuna a siglo. Imbagada kadagiti tattao: “Ti pagarian ti Dios immasidegen kadakayo.” (Luc. 10:9) Ni Jesus, daydiay napulotan nga Ari, ket adda idi iti nagtetengngaanda. Ngem kas nailanad iti Mateo 24:14, impadto ni Jesus ti sangalubongan a pannakaipakaammo ti napateg a pasamak a kaitungpalan ti panggep ti Dios.

Adda idi nasirmata ni propeta Daniel maipapan iti daytoy a pasamak. Nakitana ti “maysa a kasla anak ti tao,” ni Jesu-Kristo, nga umaw-awat manipud “iti Kadaanan iti Al-aldaw,” ni Jehova a Dios, iti “panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo.” (Dan. 7:13, 14) Natungpal idi tawen 1914 idiay langit dayta a pasamak a mangapektar iti intero nga uniberso. Kalpasanna, naitappuak ditoy daga ti Diablo ken dagiti demoniona. (Apoc. 12:7-10) Simreken ti daan a sistema ti bambanag kadagiti maudi nga al-aldawna. Ngem sakbay a naan-anay a maikkat, maiwarwaragawag iti intero a lubong nga agturturayen manipud iti nailangitan a tronona ti Mesianiko nga Ari nga insaad ni Jehova. Mapakpakaammuan dagiti tattao iti amin a lugar. Ti reaksionda ti mangpaneknek no kasano ti panangmatmatda iti Kangatuan kas Agturay “iti pagarian ti sangatauan.”​—Dan. 4:32.

Pudno, adu pay ti mapasamak​—ad-adu nga amang! Ikarkararagtayo pay laeng nga, “Umay koma ti pagariam,” ngem dina kayat a sawen a maipasdekto pay laeng iti masanguanan ti Pagarian ti Dios. Imbes ketdi, kaipapananna nga agtignayto ti nailangitan a Pagarian iti pamay-an a tungpalenna a naan-anay dagiti padto a kas iti Daniel 2:44 ken Apocalipsis 21:2-4. Pagbalinennanto ti daga a paraiso a napno kadagiti tattao a mangay-ayat iti Dios ken iti padada a tao. Bayat nga ikaskasabatayo “daytoy naimbag a damag ti pagarian,” saritaentayo dagiti banag a mapasamak iti masanguanan. Ngem addaan panagtalek nga ipakaammotayo met a ginaladanen ni Jehova ti Anakna iti naan-anay nga autoridad a mangituray. Ipagpaganetgetmo kadi daytoy a naimbag a damag no ikaskasabam ti Pagarian?

Panangilawlawag iti Pagarian. Kasanotay a maitungpal ti annongentayo a mangipakaammo iti Pagarian ti Dios? Mabalin a matukaytayo ti interes babaen ti panangirugi iti saritaan maipapan iti nadumaduma a topiko, ngem iti di agbayag agbatad koma a ti mensahetayo ket maipapan iti Pagarian ti Dios.

Ti napateg nga aspeto daytoy a trabaho isu ti panangbasa wenno panangadaw kadagiti teksto a mangdakdakamat iti Pagarian. No dakamatem ti Pagarian, siguraduem a maawatan dagidiay kasarsaritam no ania dayta. Nalabit saan nga umdas ti basta panangibaga a ti Pagarian ti Dios ket maysa a gobierno. Adda dagidiay marigatan a mangpanunot a gobierno ti maysa a banag a dida makita. Mabalinmo ti makirinnason kadakuada iti nagduduma a wagas. Kas pagarigan, ti grabidad ket di makita ngem dakkel ti epektona iti biagtayo. Ditay makita Daydiay nangaramid iti linteg ti grabidad, ngem nabatad a dakkel ti pannakabalinna. Iti Biblia, isu ket naawagan iti “Ari ti kinaagnanayon.” (1 Tim. 1:17) Wenno mabalinmo nga irason nga iti maysa a dakkel a pagilian, adu dagiti umili a di pay nakapan iti kabesera wenno nakakita iti mismo nga agturay kadakuada. Madamdamagda ti maipapan kadagitoy babaen kadagiti pagiwarnak. Kasta met, ti Biblia, a naipablaak iti nasurok a 2,200 a lenguahe, ibagana kadatayo ti maipapan iti Pagarian ti Dios; ipakaammona kadatayo no asino ti nakaitalkan ti autoridad ken no ania ti ar-aramiden ti Pagarian. Ti Pagwanawanan, a maipabpablaak iti ad-adu a lenguahe ngem iti aniaman a sabali a magasin, ket nairanta a ‘Mangibunannag iti Pagarian ni Jehova,’ kas nadakamat iti akkubna.

Tapno matulongan dagiti tattao a mangtarus no ania ti Pagarian, mabalin a dakamatem ti sumagmamano a banag a kayatda nga ipaay dagiti gobierno: natalged nga ekonomia, talna, kinaawan ti krimen, di panangidumduma iti amin a grupo etniko, edukasion, ken pannakaaywan ti salun-at. Ibagam a babaen laeng ti Pagarian ti Dios a mapennekto a naan-anay dagitoy ken amin a dadduma pay a nasayaat a tarigagay.​—Sal. 145:16.

Ikagumaam a tukayen ti tarigagay dagiti tattao nga agpaituray iti Pagarian, a ni Jesu-Kristo ti agturay kas Ari. Ibagam a dagiti milagro nga inaramidna ket pakauna ti aramidennanto kas nailangitan nga Ari. Masansan a dakamatem dagiti makaay-ayo a kualidad nga imparangarangna. (Mat. 8:2, 3; 11:28-30) Ilawlawagmo nga indatonna ti biagna gapu kadatayo ket kalpasanna, pinagungar ti Dios iti imortal a biag idiay langit. Manipud langit, isu ket agturay kas Ari.​—Ara. 2:29-35.

Ipaganetgetmo nga agturturayen ti Pagarian ti Dios idiay langit. Ngem tandaanam a ti namnamaen ti kaaduan a tattao a mangpaneknek iti kasta a turay ket saan a dagiti kasasaad nga aktual a makitkita wenno mapaspasaranda. Bigbigem dayta, ket damagem no ammoda no ania ti imbaga ni Jesu-Kristo a kas pammaneknek iti dayta. Itampokmo ti sumagmamano a paset ti ragup a pagilasinan a nailanad iti Mateo kapitulo 24, Marcos kapitulo 13, wenno Lucas kapitulo 21. Kalpasanna, isaludsodmo no apay a ti pannakaisaad ni Kristo a kas ari sadi langit ket nangiturong iti kakasta a kasasaad ditoy daga. Iturongmo ti atension iti Apocalipsis 12:7-10, 12.

Kas aktual a pammaneknek iti ar-aramiden ti Pagarian ti Dios, ibasam ti Mateo 24:14, ket ilawlawagmo ti sangalubongan a programa a panangisuro iti Biblia a maar-aramid ita. (Isa. 54:13) Ibagam kadagiti tattao ti maipapan iti nadumaduma nga eskuelaan a pakagunggonaan dagiti Saksi ni Jehova​—a bin-ig a naibatay iti Biblia ken awan bayadna. Ilawlawagmo a malaksid iti ministeriotayo iti binalaybalay, ituktukontayo kadagiti indibidual ken pampamilia ti libre a panagadal iti Biblia iti pagtaengan iti nasurok a 230 a pagilian. Ania a natauan a gobierno ti makaipaay iti kasta a nasaknap a programa a panangisuro, saan laeng a kadagiti iturayanna, no di ket kadagiti tattao iti intero a daga? Awisem dagiti tattao a mapan iti Kingdom Hall, tumabuno kadagiti asamblea ken kombension dagiti Saksi ni Jehova, tapno makitada ti pammaneknek no kasano nga ap-apektaran ti kasta nga edukasion ti biag dagiti tattao.​—Isa. 2:2-4; 32:1, 17; Juan 13:35.

Ngem mabigbig ngata ti bumalay no kasano a maapektaran ti mismo a biagna? Mabalin a sitataktika nga ibagam a simmarungkarka tapno ilawlawagmo ti maipapan iti gundaway a mangpili iti biag kas iturayan ti Pagarian ti Dios, ket silulukat dayta a gundaway kadagiti amin a tattao. Kasano? Babaen ti panangadal no ania dagiti kalikaguman ti Dios ken panagbiag a mayannurot kadagita.​—Deut. 30:19, 20; Apoc. 22:17.

Panangtulong Kadagiti Sabsabali a Mangipangruna iti Pagarian. Uray no inawaten ti maysa a tao ti mensahe ti Pagarian, adda dagiti pangngeddeng a masapul nga aramidenna. Ania ti lugar ti Pagarian ti Dios iti mismo a biagna? Indagadag ni Jesus kadagiti adalanna nga ‘itultuloyda a sapulen nga umuna ti pagarian.’ (Mat. 6:33) Kasanotayo a matulongan dagiti padatayo a Kristiano a mangaramid iti dayta? Babaen ti panangipakitatayo a mismo iti nasayaat nga ulidan ken panangisarsarita kadagiti adda a gundaway. No dadduma, babaen ti panangdamag no inutoben ti maysa a tao dagiti posibilidad ken panangisalaysay kadagiti kapadasan a mangipakita no ania ti ar-aramiden dagiti dadduma. Babaen ti panangisarita kadagiti salaysay iti Biblia iti wagas a mangpauneg iti panagayat ken ni Jehova. Babaen ti panangigunamgunam iti kinaagpayso ti Pagarian. Babaen ti panangipaganetget no kasano kapateg a talaga ti trabaho a panangiwaragawag iti Pagarian. Masansan a ti kasayaatan a magapuanan ket, saan a babaen ti panangibaga kadagiti tattao no ania ti masapul nga aramiden, no di ket babaen ti panangabbukay kadakuada iti tarigagay a mangaramid iti dayta.

Di pagduaduaan a kangrunaan a naipamaysa ken ni Jehova a Dios, ni Jesu-Kristo, ken iti Pagarian ti nagpateg a mensahe a masapul nga iwaragawagtayo amin. Maipaganetget koma dagiti nagpateg a kinapudno maipapan kadagitoy iti panangasabatayo iti publiko, kadagiti kongregasiontayo, ken iti personal a kabibiagtayo. No aramidentayo dayta, ipakpakitatayo a pudpudno a magunggonaantayo iti edukasion nga ipaay ti Teokratiko nga Eskuelaan ti Panagministro.