Ti Aktibo a Lidertayo Ita
“Rimmuar a mangparmek ken tapno an-anayenna ti panagballigina.”—APOC. 6:2.
1, 2. (a) Kasano a nailadawan iti Biblia dagiti aktibidad ni Kristo kas Ari sipud idi 1914? (b) Ania dagiti nagapuanan ni Kristo sipud pannakaitronona?
NAITRONO ni Kristo kas Ari iti Mesianiko a Pagarian ni Jehova idi 1914. Ania ti pampanunotentayo ita a kasasaadna? Maysa kadi nga agpampanunot nga ari a nakatugaw iti tronona, a pasaray a kitaenna no ania ti mapaspasamak iti kongregasionna? No kasta ti panangmatmattayo, masapul a baliwantayo dayta. Dagiti Salmo ken ti libro nga Apocalipsis iladawanda ni Jesus kas maysa nga aktibo nga ari a nakasakay iti kabalio tapno ‘mangparmek’ agingga a naan-anay nga ‘agballigi.’—Apoc. 6:2; Sal. 2:6-9; 45:1-4.
2 Ti umuna a nagapuanan ni Kristo kas ari kalpasan ti pannakaitronona ket ti panagballigina maibusor iti ‘dragon ken kadagiti anghelna.’ Kas Miguel arkanghel a mangidadaulo kadagiti anghelna, ni Kristo pinaksiatna ni Satanas ken dagiti demoniona manipud iti nasantuan a langlangit ket inggarangugongna ida ditoy daga. (Apoc. 12:7-9) Kalpasanna, kas “mensahero ti tulag” ni Jehova, sinukimatda ken Amana ti naespirituan a templo. (Mal. 3:1) Inukomna ti Kakristianuan, ti kangrunaan a makarimon a paset ti “Babilonia a Dakkel,” ket napaneknekanna a nakabasol daytoy iti panangibukbok iti dara ken iti naespirituan a pannakikamalala iti napolitikaan a sistema daytoy a lubong.—Apoc. 18:2, 3, 24.
Panangdalus iti Adipenna Ditoy Daga
3, 4. (a) Ania a trabaho ti intungpal ni Kristo kas “mensahero” ni Jehova? (b) Ania ti impalgak ti pannakasukimat ti templo? (c) Kas Ulo ti kongregasion, ania a panangdutok ti inaramid ni Jesus?
3 Iti panagsukimat ni Jehova ken ti ‘mensaherona,’ nakitada met iti naindagaan a paraangan ti naespirituan a templo nga adda grupo dagiti pudno a Kristiano a saan a paset dagiti relihion ti Kakristianuan. Ngem uray dagitoy a napulotan a Kristiano, wenno “annak ni Levi,” masapul a madalusanda. Maitunos dayta iti impadto ni propeta Malakias: “Masapul nga agtugaw [ni Jehova] a kas manangpasudi ken agdaldalus iti pirak ket dalusanna ti annak ni Levi; ket masapul a pasin-awenna ida a kas iti balitok ken kas iti pirak, ket sigurado nga agbalindanto ken Jehova nga ili a mangidiaya iti daton a sagut iti kinalinteg.” (Mal. 3:3) Inusar ni Jehova ti “mensahero ti tulag,” ni Kristo Jesus, a mangdalus kadagitoy a naespirituan nga Israelita.
4 Kaskasdi, nasarakan ni Kristo nga ikagkagumaan dagitoy a matalek a Kristiano nga ipaay ti naintiempuan a naespirituan a taraon agpaay kadagiti matalek nga agdaydayaw. Sipud idi 1879 nga agpatpatuloy, mangipabpablaakda kadagiti kinapudno iti Biblia maipapan iti Pagarian ti Dios babaen iti daytoy a magasin, iti man narigat wenno nasayaat a kasasaad. Impadto ni Jesus nga inton ‘dumteng’ tapno sukimatenna dagiti katulongna bayat ti “panungpalan ti sistema ti bambanag,” masangpetannanto ti maysa nga adipen a mangipapaay iti “taraonda iti umiso a tiempo.” Ideklarananto a naragsak dayta nga adipen ken “dutokannanto nga agaywan kadagiti amin a sanikuana” ditoy daga. (Mat. 24:3, 45-47) Kas Ulo ti kongregasion Kristiano, us-usaren ni Kristo daytoy a “matalek ken masirib nga adipen” a mangimaton kadagiti interes ti Pagarian ditoy daga. Mangipapaay iti instruksion kadagiti napulotan a “katulong” ken kadagiti kakaduada a “sabsabali a karnero” babaen iti Bagi a Manarawidwid.—Juan 10:16.
Panagani Ditoy Daga
5. Ania ti nasirmata ni apostol Juan nga inaramid ti Ari?
5 Adda sabali pay a nasirmata ni apostol Juan nga aramiden ti Mesianiko nga Ari bayat ti “aldaw ti Apo,” kalpasan a naitrono idi 1914. Insurat ni Juan: “Nakitak, ket, adtoy! maysa a puraw nga ulep, ket iti rabaw ti ulep adda maysa a situtugaw a kaasping ti anak ti tao, nga adda nabalitokan a korona iti ulona ken maysa a natadem a kumpay iti imana.” (Apoc. 1:10; 14:14) Nangngeg ni Juan ti maysa nga anghel ni Jehova a nagkuna iti daytoy a Paraani nga iwayatna ti kumpayna gapu ta “ti anien iti daga naan-anayen a natangkenan.”—Apoc. 14:15, 16.
6. Ania ti imbaga ni Jesus a mapasamak bayat ti panaglabas ti tiempo?
6 Daytoy a ‘panagani iti daga’ ipalagipna kadatayo ti pangngarig ni Jesus maipapan iti trigo ken dakes a ruot. Inyarig ni Jesus ti bagina iti maysa a tao a nagmula kadagiti bin-i ti trigo iti talonna a mangnamnama nga agani kadagiti nasayaat a trigo, a mangiladawan iti “annak ti pagarian,” dagiti pudno a Kristiano a napulotan tapno agbalin a kakaduana iti Pagarianna. Ngem bayat ti rabii, maysa a kabusor, “ti Diablo,” minulaanna met ti talon kadagiti dakes a ruot, ti “annak daydiay nadangkes.” Ti tao binilinna dagiti adipenna a bay-anda nga agpada a dumakkel dagiti trigo ken dakes a ruot agingga iti tiempo ti panagani, ti “panungpalan ti sistema ti bambanag.” Iti dayta a tiempo, ibaonna dagiti anghelna tapno ilasinda dagiti trigo manipud kadagiti dakes a ruot.—Mat. 13:24-30, 36-41.
7. Kasano nga itungtungpal ni Kristo ti ‘panagani iti daga’?
7 Kas kaitungpalan ti nasirmata ni Juan, idadauluan ni Jesus ti sangalubongan a trabaho a panagani. Nangrugi ti ‘panagani iti daga’ babaen ti pannakaurnong dagiti natda a paset ti 144,000 nga “annak ti pagarian,” ti “trigo” iti pangngarig ni Jesus. Ad-adda a nagminar ti nagdumaan dagiti pudno ken saan a pudno a Kristiano kalpasan ti Gubat Sangalubongan I, a nakatulong iti maikadua a paset ti ‘panagani iti daga’—ti pannakaurnong ti sabsabali a karnero. Saan nga isuda ti “annak ti pagarian” no di ket maysada a “dakkel a bunggoy” a sidadaan nga agpaituray iti Pagarian. Naanida manipud iti amin nga “ili, nasional a bungbunggoy ken pagsasao.” Agpasakupda iti Mesianiko a Pagarian a buklen ni Kristo Jesus ken ti 144,000 a “sasanto” a makikadua kenkuana iti dayta a nailangitan a gobierno.—Apoc. 7:9, 10; Dan. 7:13, 14, 18.
Panangidaulo Kadagiti Kongregasion
8, 9. (a) Ania ti mangipasimudaag a makitkita ni Kristo saan laeng a ti kondukta ti intero a kongregasion no di ket uray ti estilo ti panagbiag ti tunggal kamengna? (b) Kas makita iti ladawan iti panid 26, ania a “nauneg a bambanag ni Satanas” ti rumbeng nga ilaksidtayo?
8 Naammuantayo iti immuna nga artikulo no kasano a naan-anay a makitkita ni Kristo ti naespirituan a kasasaad ti tunggal kongregasion idi umuna a siglo K.P. Iti kaaldawantayo, kas agturturay nga Ari a nakaitalkan ti “isuamin nga autoridad . . . idiay langit ken ditoy daga,” ni Kristo a Lidertayo aktibo a mangidadaulo kadagiti kongregasion iti intero a lubong ken kadagiti manangaywanda. (Mat. 28:18; Col. 1:18) Isu ti ‘pinagbalin ni Jehova nga ulo iti amin a bambanag iti kongregasion’ dagiti napulotan. (Efe. 1:22) Kas ulo, makitana ti amin a mapaspasamak iti tunggal maysa kadagiti nasurok a 100,000 a kongregasion dagiti Saksi ni Jehova.
9 Kastoy ti mensahe ni Jesus iti nagkauna a kongregasion ti Tiatira: “Dagitoy ti bambanag a kuna ti Anak ti Dios, daydiay a dagiti matana umasping iti gumilgil-ayab nga apuy, . . . ‘Ammok dagiti aramidmo.’” (Apoc. 2:18, 19) Tinubngarna dagiti miembro dayta a kongregasion gapu iti imoral, napanuynoy iti bagi nga estilo ti panagbiag, a kinunana: “Siak daydiay mangsukimat kadagiti bekkel ken puspuso, ket mangtedakto iti tumunggal maysa kadakayo sigun kadagiti aramidyo.” (Apoc. 2:23) Ipasimudaag dagita a sasao a kitkitaen ni Kristo saan laeng a ti kondukta ti tunggal kongregasion no di ket uray ti estilo ti panagbiag ti tunggal kamengna. Kinomendaran ni Jesus dagiti Kristiano idiay Tiatira a “saan a nakaammo iti ‘nauneg a bambanag ni Satanas.’” (Apoc. 2:24) Maay-ayo met ita kadagiti agtutubo wenno natataengan a mangilaksid kadagiti “nauneg a bambanag ni Satanas” a nasaknap iti Internet wenno kadagiti naranggas a video game wenno kadagiti ballikug a panagrasrason ti tao. Anian a ragsak ni Jesus a makakita iti panagregget ken panagsakripisio ti adu a Kristiano ita a mangar-aramid ti amin a kabaelanda nga agpaidalan kenkuana iti amin nga aspeto ti panagbiagda!
10. Kasano ti pannakailadawan ti panangiturong ni Kristo kadagiti panglakayen iti kongregasion, ngem ania nga urnos ti masapul a mabigbig?
10 Siaayat nga iwanwanwan ni Kristo dagiti kongregasionna ditoy daga babaen kadagiti nadutokan a panglakayen. (Efe. 4:8, 11, 12) Idi umuna a siglo, napulotan iti espiritu ti amin a manangaywan. Nailadawanda iti Apocalipsis kas bitbituen iti makannawan nga ima ni Kristo. (Apoc. 1:16, 20) Ita, kaaduan a panglakayen iti kongregasion ket kameng ti sabsabali a karnero. Nadutokanda kalpasan ti kararag ken iti sidong ti panangiwanwan ti nasantuan nga espiritu. Gapuna, maibilangda met nga adda iti ima wenno panangiwanwan ni Kristo. (Ara. 20:28) Ngem bigbigenda nga us-usaren ni Kristo ti maysa a bassit a grupo dagiti napulotan a Kristiano a lallaki kas Bagi a Manarawidwid a mangidaulo ken mangiwanwan kadagiti adalanna ditoy daga.—Basaen ti Aramid 15:6, 28-30.
“Umayka, Apo Jesus”
11. Apay a magagarantayo a makakita iti sidadaras nga iyaay ti Lidertayo?
11 Iti sirmata a naited ken apostol Juan, maulit-ulit a kinuna ni Jesus nga umay a sidadaras. (Apoc. 2:16; 3:11; 22:7, 20) Awan duadua a tuktukoyenna ti iyaayna a mangiwayat iti panangukom iti Babilonia a Dakkel ken iti amin a paset ti dakes a sistema ti bambanag ni Satanas. (2 Tes. 1:7, 8) Gapu ta magagaran a makakita iti pannakatungpal ti amin a naipadto a naisangsangayan a pasamak, kinuna ti lakay idin a ni apostol Juan: “Amen! Umayka, Apo Jesus.” Datayo a sibibiag iti tiempo ti panungpalan daytoy dakes a sistema ti bambanag magagarantayo met a makakita iti Lidertayo nga umay kas Ari iti Pagarian ti Dios tapno santipikarenna ti nagan ni Amana ken alangonenna ti kinasoberano ti Dios.
12. Ania a trabaho ti masapul nga ileppas ni Kristo sakbay a mapalusposan dagiti mangdadael nga angin?
12 Sakbay nga umay ni Jesus maibusor iti makitkita nga organisasion ni Satanas, dagiti maudi a kameng ti 144,000 a naespirituan nga Israel awatenda ti naan-anay a pannakaselioda. Silalawag a kunaen ti Biblia a dagiti angin a mangdadael iti sistema ni Satanas ket saan a mapalusposan agingga a saan a makompleto dayta a pannakaselio ti 144,000.—Apoc. 7:1-4.
13. Kasano nga iparangarang ni Kristo ti kaaddana bayat ti umuna a paset ti “dakkel a rigat”?
13 Ti ‘kaadda’ ni Kristo sipud idi 1914 ket saan nga ammo ti kaaduan a tattao. (2 Ped. 3:3, 4) Ngem iti din agbayag, iparangarangna ti kaaddana babaen ti panangiwayatna iti panangukom ni Jehova kadagiti nagduduma nga elemento ti sistema ti bambanag ni Satanas. Ti pannakadadael “ti tao ti kinakillo,” ti klero ti Kakristianuan, ket awan duadua a ‘parangarang ti kaaddana.’ (Basaen ti 2 Tesalonica 2:3, 8.) Dayta ket nabileg a pammaneknek a nangrugin nga agtignay ni Kristo kas ti Ukom a dinutokan ni Jehova. (Basaen ti 2 Timoteo 4:1.) Ti pannakadadael ti kangrunaan a makarimon a paset ti Babilonia a Dakkel ket agserbi kas pangrugian ti naan-anay a pannakadadael ti dakes a sangalubongan nga imperio ti palso a relihion. Tignayento ni Jehova ti puso dagiti napolitikaan a lider tapno dadaelenda daytoy a naespirituan a balangkantis. (Apoc. 17:15-18) Dayta ti umuna a paset ti “dakkel a rigat.”—Mat. 24:21.
14. (a) Apay a mapaababa ti umuna a paset ti dakkel a rigat? (b) Inton makita “ti pagilasinan ti Anak ti tao,” anianto ti kaipapanan dayta iti ili ni Jehova?
14 Kinuna ni Jesus a mapaababa ti al-aldaw dayta a rigat “maigapu kadagiti napili,” dagiti natda kadagiti napulotan a Kristiano nga adda pay laeng ditoy daga. (Mat. 24:22) Saan nga ipalubos ni Jehova a mairaman dagiti napulotan a Kristiano ken ti kakaduada a sabsabali a karnero inton madadael ti palso a relihion. Innayon ni Jesus a “kalpasan ti rigat kadagidiay nga aldaw,” addanto dagiti pagilasinan iti init, bulan, ken bitbituen, “ket iti kasta ti pagilasinan ti Anak ti tao agparangto iti langit.” Ket dagiti nasion ditoy daga “saplitendanto ti bagbagida iti panagun-unnoy.” Ngem saanto a kasta kadagiti napulotan, nga addaan iti nailangitan a namnama, ken kadagiti sabsabali a karnero, nga addaan iti naindagaan a namnama. ‘Itangaddanto dagiti uloda, agsipud ta ti pannakaispalda umas-asidegen.’—Mat. 24:29, 30; Luc. 21:25-28.
15. Ania ti aramiden ni Kristo inton umay?
15 Sakbay nga an-anayenna ti panagballigina, umay ti Anak ti tao iti sabali pay a pamay-an. Impadtona: “Inton ti Anak ti tao dumteng iti dayagna, ket amin dagiti anghel maikuyogda kenkuana, iti kasta agtugawto iti nadayag a tronona. Ket amin dagiti nasion maurnongdanto iti sanguananna, ket paglalasinennanto dagiti tattao iti maysa ken maysa, a kas ti maysa a pastor ilasinna dagiti karnero manipud kadagiti kalding. Ket ikabilnanto dagiti karnero iti makannawanna, ngem dagiti kalding iti makannigidna.” (Mat. 25:31-33) Tuktukoyen dayta ti iyaay ni Kristo kas Ukom tapno paglalasinenna dagiti tattao manipud ‘iti amin a nasion’ iti dua a grupo: “dagiti karnero,” dagidiay aktibo a mangsupsuporta kadagiti naespirituan a kakabsatna (dagiti napulotan a Kristiano ditoy daga) ken “dagiti kalding,” dagidiay “saan nga agtulnog iti naimbag a damag maipapan ken Apotayo a Jesus.” (2 Tes. 1:7, 8) Dagiti karnero a nadeskribir kas “dagiti nalinteg” umawatdanto iti “agnanayon a biag” ditoy daga, ngem dagiti kalding ‘agturongdanto iti agnanayon a pannakagessat,’ wenno pannakadadael.—Mat. 25:34, 40, 41, 45, 46.
An-anayen ni Jesus ti Panagballigina
16. Kasano nga an-anayen ni Kristo a Lidertayo ti panagballigina?
16 Inton naan-anay a maselioan ti kompleto a bilang dagiti kakaduana nga agbalin nga ar-ari ken papadi ken mailasin dagiti karnero iti makannawan nga imana agpaay iti pannakaisalakan, mabalinnan nga ‘an-anayen ti panagballigina.’ (Apoc. 5:9, 10; 6:2) Kas lider ti nabileg a buyot dagiti anghel, ken awan duadua, dagiti napagungar a kakabsatna, dadaelenna ti intero a sistema ni Satanas ditoy daga mainaig iti politika, militar, ken komersio. (Apoc. 2:26, 27; 19:11-21) Naan-anayto ti panagballigi ni Kristo inton nadadaelnan ti dakes a sistema ni Satanas. Kalpasanna, igarangugongna ni Satanas ken dagiti demoniona iti mangliwengliweng nga abut iti sangaribu a tawen.—Apoc. 20:1-3.
17. Ania ti pangiturongan ni Kristo iti sabsabali a karnero bayat ti Sangaribu a Tawen a Panagturayna, ken ania ti masapul a determinasiontayo?
17 No maipapan iti “dakkel a bunggoy” ti sabsabali a karnero a makalasat iti dakkel a rigat, impadto ni apostol Juan a “ti Kordero, nga adda iti tengnga ti trono, ipastorannanto ida, ket idalannanto ida kadagiti ubbog ti dandanum ti biag.” (Apoc. 7:9, 17) Wen, bayat ti Sangaribu a Tawen a Panagturay ni Kristo, itultuloyna nga idauluan ti sabsabali a karnero, a pudno nga agtultulnog iti timekna, ken iturongna ida iti agnanayon a biag. (Basaen ti Juan 10:16, 26-28.) Sapay koma ta simamatalek a surotentayo ti natan-ok a Lidertayo—ita ken agingga iti inkari ni Jehova a baro a lubong!
Kas Repaso
• Ania ti inaramid ni Kristo kalpasan ti pannakaitronona?
• Ania dagiti makita nga instrumento nga us-usaren ni Kristo a mangidaulo kadagiti kongregasion?
• Kadagiti ania a pamay-an nga umay ni Kristo a Lidertayo?
• Kasano nga agtultuloy nga idauluannatayo ni Kristo iti baro a lubong?
[Ladawan iti panid 29]
Maiparangarang ti kaadda ni Kristo inton madadael ti dakes a sistema ni Satanas