Salsaludsod Dagiti Agbasbasa
Ania ‘ti gubat ti Dios a Mannakabalin-amin’ idiay Har–Magedon, ken anianto ti resultana?—Apocalipsis 16:14, 16.
Iti simple a pannao, ti gubat ti Har–Magedon tukoyenna ti sangalubongan a gubat a mapasamak iti masanguanan inton dagiti kabusor ti Dios ket dadaelen ni Jesu-Kristo, ti Ari a dinutokan ni Jehova. Ibaga ti Biblia a dagitoy a kabusor, ‘ti ar-ari iti intero a mapagnaedan a daga,’ tignayento dagiti “ebkas nga impaltiing dagiti sairo” tapno maurnongda “iti gubat ti naindaklan nga aldaw ti Dios a Mannakabalin-amin . . . iti disso nga iti Hebreo maaw-awagan iti Har–Magedon.”—Apocalipsis 16:14, 16.
Saan a literal ti lugar a pakaurnongan dagiti agkalaban a dasig. Ti nagan a Har–Magedon, a naipatarus kas “Armagedon” iti dadduma a patarus ti Biblia, kaipapananna “Bantay ti Megiddo.” (Apocalipsis 16:16) Awan a talaga ti bantay a kasta ti naganna. Maysa pay, imposible a literal a maummong iti maymaysa a lugar “ti ar-ari ti daga ken dagiti buyotda.” (Apocalipsis 19:19) Imbes ketdi, ‘ti disso’ tuktukoyenna ti kasasaad a pakaiturongan dagiti lider ti politika ken dagiti mangsupsuporta kadakuada―dagidiay bumusbusor ken ni Jehova ken ‘kadagiti buyot nga adda sadi langit’ iti sidong ti namilitariaan a panangidaulo ti “Ari ti ar-ari ken Apo ti ap-appo,” ni Jesu-Kristo.—Apocalipsis 19:14, 16.
Makapainteres ta ti sao a “Har–Magedon” ket nainaig iti Megiddo, maysa a nagkauna a siudad ti Israel. Masarakan daytoy iti daya ti Bantay Carmelo. Maysa daytoy a kangrunaan a dalan mainaig iti negosio ken militar kadagidi a panawen. Napasamak met dita dagiti gubat a nalawag no siasino ti nangabak. Kas pagarigan, kadagiti “dandanum ti Megiddo” a pinarmek ti Israelita nga ukom a ni Barak ti nabileg a buyot dagiti Canaanita nga indauluan ni Heneral Sisera. (Uk-ukom 4:12-24; 5:19, 20) Iti dayta met laeng a lugar a pinarmek ni Ukom Gideon dagiti Midianita. (Uk-ukom 7:1-22) Babaen ti pananginaigna iti Megiddo ken iti umad-adani a gubat, ipanamnama kadatayo ti Biblia a ti Dios, babaen ti Anakna, naan-anayto a talipuposenna ti amin a kabusor.
Anianto ti resultana? Ti gubat ti Har–Magedon ti mangikkatto iti amin a kinadakes ken kinakillo ditoy daga. Iyegna ti kadayagan a panawen iti intero a pakasaritaan ti tao. (Apocalipsis 21:1-4) Iti sidong ti naayat a panangiwanwan ti Pagarian ti Dios, agbalinto ti daga a maysa a paraiso a pagbiagan dagiti nalinteg iti agnanayon.―Salmo 37:29.