Apay a Nasinasina ti Iglesiak?

DAGITI pannakasinasina iti uneg ti Iglesia Katolika makita a naimbag ta adu a napasnek a Katoliko ti makarikna a kas iti panagrikna ni apostol Pablo, isu a nagsurat kadagiti nasinasina a Kristiano a taga Corinto: “Nga adda sussusik kadakayo. . . . Adda aya a nasinasina ni Kristo?”​—1 Corinto 1:11, 13, The New Jerusalem Bible.

Adu a managpaliiw a Katoliko ti naan-anay a makabigbig a ti Kinakristiano saan a masapul a “nasinasina.” Dagiti Katoliko, a nangnangruna ngem kadagiti dadduma nga agkunkuna a Kristiano, sipapanunotda iti panagkaykaysa iti pudno Nakristianuan a relihion. Pagarupenda nga ar-aramidenda ti kasta a nagkaykaysa a relihion iti Iglesia Katolika. Imbilangda ti Protestantismo a maysa a nariribuk aglalaok nga agsusupadi a relrelihion. Para kadakuada, ti Iglesia Katolika irepresentarna ti kinatalged ken, kangrunaan ngem amin, ti panagkaykaysa. Itan marirodan.

Apay a Nasinasina?

Ti Iglesia Katolika ket nabingaybingay iti nagbaetan iti sumupsuppiat a progresibo, ti uman-anamong a tradisionalista, ken ti kaaduan a Vatican II. Adu a sumupsuppiat a liberal a Katoliko ti mangikaskasaba kadagiti nadumaduma a teolohia iti wayawaya a mangikalintegan iti napolitikaan a rebolusion. Dadduma ti ngangnganin mangawat iti pamay-an dagiti Marxist ket ikalkalinteganda pay ti naarmasan nga iyaalsa. Kaskasdi, ti Namunganay iti Kinakristiano imbagana kadagiti ad-adalanna: “Saankay a taga lubong, agsipud ta pinilikayo manipud iti lubong. . . . Ti pagariak saan a ditoy a lubong.”​—Juan 15:19; 18:36, NJB.

Dagiti tradisionalista ikalkalinteganda ti inaramid-tao a tradision ken ti ritual a Latin a saan a nagtaud idi tiempo ti pannakaisurat iti Biblia, agsipud ta ti pagsasao ti immuna a Kinakristiano ket Griego, saan a Latin. Kasta met, babaen iti saanda a panangikankano ken ti kinaagresiboda, saan kadi a liblibakenda ti panagkunada a Kristianoda? Ni Henri Fesquet, dati a kolumnista iti relihion nagsurat iti inaldaw a pagiwarnak a Pranses a Le Monde: “Ti eksibision dagiti Kristiano a [Katoliko] a mangatake ken mangrabrabak iti maysa ken maysa ken agaapa maipapan iti luglugar a pagdaydayawan ket maysa a kontra a pammaneknek nga agbalandra laeng kadakuada. Ania ngarud ti usar ti panangikasaba iti lawag iti nagan iti Ebanghelio no ti tigtignay ti maysa pagbalinenna met nga ulbod dagiti sasao ti maysa?”

Imbaga ni Jesus kadagiti Fariseo: “Gapu iti tradisionyo pinagbalinyo nga awan ti mamaay ti sao ti Dios.” (Mateo 15:6, The New American Bible) Adu a napasnek a Katoliko mariknada ti kasta met laeng maipapan iti moderno-aldaw a tradisionalista.

Agpadpada dagiti progresibo ken dagiti tradisionalista (gapu iti agsupadi a rason) ibilangda a ti konsilio ti Vatican II ket nakapataud iti adu a nakapuy a Katoliko. Dagiti autor a da Puyo ken Van Eersel inimtuodda ti Pranses a Katoliko a pilosopo a ni Jean Guitton, miembro iti French Academy. Ginupgopda dagiti rikriknana iti sumaganad: “Ti Kredo a Katoliko, ti kababagas iti Iglesia, ket agsisimparat, ti kareregtaan kadagiti napasnek a Katoliko ti mangipaspasnek a naan-anay iti bagbagida iti politika, dagiti agtutubo a Kristiano a [Katoliko] ti sikakalma a makidenna sakbay iti panagasawa, awan ti makaammo a mangiyaplikar iti [Vatican] Council a siuumiso, ket ti ili ti Dios mariribukda.”

Kaawatan, dagiti napasnek a Katoliko agim-imtuodda, ‘Apay a nasinasina ti iglesiak?’ Ti sungbat ket: Agsipud ta awan ti uray maysa kadagiti nadumaduma a paspasetna ti mangawat iti Biblia a kas ti pudpudno nga autoridad a maipaay iti panangikeddeng iti saad iti pudno a Kristiano maipapan kadagiti amin a bambanag. Ngarud nasinasinada babaen kadagiti nadumaduma a teolohia ken panangipatarus kadagiti tradision.

Ania ti Maaramidan dagiti Napasnek a Katoliko?

Iti maysa nga okasion idi 1981, dagiti tradisionalista a Katoliko pinasardengda ti maysa nga ekumenikal a serbisio a maar-aramid iti maysa a simbaan a Katoliko idiay Paris. Ni Arsobispo (itan Kardinal) Lustiger iti Paris imbagana kadagidiay a nagtalinaed iti simbaan kalpasan iti pannakariribuk: “Immaykami ditoy tapno dawaten ti sagsagut iti Espiritu a mamagkaykaysa kadagiti nasinasina nga annak. Imbes ketdi, nakitami a naisarming iti pannakasinasina kadagiti Kristiano, ti pagam-amkan iti Babel.”

Ti Babel isu ti lugar a nangriribukan ti Dios iti pagsasao dagidiay a mangar-aramid iti ulbod a panagdayaw. (Genesis 11:1-9) Kamaudiananna, dayta ti lugar iti siudad iti Babilonia, ti nagtaudan ti nariribuk a nagduduma a didiosen. Iti Biblia dayta ti nagbalin a simbolo iti sangalubongan a relihiuso a sistema iti nariribuk a relihion. Kuna ti Theological Wordbook of the Old Testament: “Uray pay iti naladladaw ngem iti umuna a siglo K.P., [ti apostol] a ni Juan tinukoyna dagiti relihiuso a sistema, ti Babilonia, a kas ti ‘Ina dagiti balangkantis ken dagiti nakaap-aprang ditoy daga’ (Apoc 17:5).”

Babaen iti panangtukoyna iti daytoy a simboliko a Babilonia, wenno sangalubongan nga imperio iti ulbod a relihion, ti Biblia awisenna dagiti amin a napasnek a tattao nga agtignay a dagus, a kunkunana: “Rummuarkayo kenkuana, o tattaok, tapno dikay mairaman kadagiti basbasolna ken dikay mairaman kadagiti saplitna!”​—Apocalipsis 18:4, NAB.

Adu a napasnek a tattao ti pumampanaw kadagiti organisado a relrelihion iti Kakristianuan. Kas pangarigan, ti napeklan a Katoliko nga agnanaed idiay French Alps ti situtulok a nangisurat iti sumaganad iti Pranses a sanga nga opisina dagiti Saksi ni Jehova: “Maitunos iti 1,000-tawen a tradision iti Iglesia Katolika, nabautisaranak manipud iti pannakaipasngay iti pammati a Katoliko. Maysaak nga aktibo a Katoliko bayat iti 50 a tawenen. Idi agarup 1980, nakumbinsirak a ti Iglesia Katolika ket biddut. Naupayak ken nakigtotak. Adu ti pannakisupsuppiatko kadagiti papadi a saan a mangraraem kadagiti karkarida. Bayat iti sumagmamano a tawtawen nangnangngegakon ti maipapan kadagiti Saksi ni Jehova, a kaaduanna ket diak umanamong kadakuada. Kalpasan iti atiddog a panawen a panangpampanunot, linukatak ti ruanganko kadakuada. Tinulongandak a makakita a ti Biblia naglaon kadagiti sungbat dagiti salsaludsodtayo. Nabigbigko met a kalpasan iti 50 a tawtawen nga aktibo a panagserbi iti uneg ti Iglesia Katolika, awan ti ammok maipapan iti Biblia, nupay no addaanak iti Biblia. Dagiti Saksi ti nangtulong kaniak a ‘mangammo’ ti Biblia.”

Ni Ginette, nga agnanaed iti asideg iti Paris, ket maysa met a napeklan a Katoliko. Kinapudnona, idi a rinugian ti asawana ti nagadal iti Biblia a kadua dagiti Saksi ni Jehova, inaramidna ti amin a kabaelanna a manglapped kenkuana, ket tinaginayonna ti panangbusorna iti sumagmamano a tawtawen. Ania ti namagbalbaliw kenkuana? Isut’ nagsurat: “Napukawko ti panagtalekko. Ti iglesia awanen ti aniaman a nasayaat nga ipapaayna kaniak. Tapno rugian, inyurnosko ti panagsango ti padik ken dagiti Saksi. Ngem di nagbayag nakitak a ti padi dina masungbatan dagiti saludsodda.” Inawat ni Ginette ti panagadal iti Biblia a kadua dagiti Saksi. Itan isu ken ti asawana siraragsakdan nga agserserbi iti Dios iti uneg ti nagkaykaysa nga internasional a pamilia dagiti Saksi ni Jehova.

No mariribukkayo ken mariro gapu iti pannakasinasina iti uneg ti iglesiayo, awisendakayo a mangammo iti ad-adu pay nga impormasion manipud kadagiti Saksi a mangipapaay kadakayo itoy a magasin wenno agsurat kadagiti editorna. Dagiti Saksi ni Jehova maragsakandanto a tumulong kadakayo a mangsapul iti naayat nga internasional a pamilia dagiti Kristiano a pudno a nagkaykaysa iti panagdayawda iti Dios.

[Blurb iti panid 11]

“Ania ngarud ti usar iti panangasaba iti lawag iti nagan iti Ebanghelio no dagiti tigtignay ti maysa pagbalinenna nga ulbod ti sasao ti maysa?”​—Inaldaw a pagiwarnak a Pranses a “Le Monde”

[Blurb iti panid 12]

“Nakitami a naisarming iti pannakasinasina kadagiti Kristiano, ti pagam-amkan iti Babel.”​—Cardinal Lustiger iti Paris