MARKA
Kadagiti saan nga Israelita, dagiti animal ken uray dagiti adipen ket mamarkaan iti pakakitaan no asino ti makinkukua kadagita. Kadagiti tattao, maikabil ti kasta a marka ti makinkukua iti napanayag a paset ti bagi, kas iti muging. No dadduma ipabigbig dagiti tattao ti bagbagida nga agdaydayawda iti ulbod a didios babaen ti panangikabilda iti marka ti didiosenda iti mugingda. Nupay kasta, imparit ti linteg ni Jehova iti Israel ti panangdadael iti langa dagiti tattao babaen ti panangikabil kadagiti marka a tato. Nakatulong daytoy tapno malapdan ti aniaman nga ar-aramid a nainaig iti panagdayaw iti idolo ken sinuruanna ida a mangraem kadagiti parsua ti Dios.—Le 19:28; kitaenyo ti TANDA A MARKA.
Piguratibo nga Usar. Dakamaten ti Kasuratan dagiti tanda a naimarka kadagiti tattao ken tukoyenna dagitoy iti piguratibo a pamay-an. Iti sirmata ni Ezequiel, nabilin ti maysa a lalaki nga addaan iti tintero ti sekretario a sursorenna ti intero a Jerusalem ken ‘mangikabil iti marka [Heb., taw] kadagidiay agsensennaay ken umas-asug gapu iti amin a nakarimrimon a bambanag a maar-aramid iti tengngana.’ Ipakita daytoy nga ar-aramidenda a nalintegda a tattao, ad-adipen nga agpaay ken Jehova, isu a maikarida a maitalimeng inton maiwayaten ti panangukom ni Jehova. Ti piguratibo a marka iti mugingda ti mangpaneknek iti dayta.—Eze 9; idiligyo ti Eze 9:4, Rbi8 ftn; 2Pe 2:6-8.
Iti sabali a bangir, dagiti tattao iti sirmata ni Juan nga umaw-awat iti marka (wenno, kitikit) ti atap nga animal iti mugingda wenno iti imada ket maikari iti pannakadadael. Ti marka iti mugingda ti mangipabigbig kadakuada iti publiko nga agdaydayawda iti atap nga animal ket ngarud ad-adipenna ida. Gapuna, dayta ti mangipakita a bumusbusorda iti Dios, ta ti atap nga animal inawatna ti autoridadna manipud iti dragon, ni Satanas a Diablo. Ti kaadda ti marka iti ima ket nainkalintegan laeng a mangipasimudaag iti aktibo a panangsuporta iti atap nga animal, ta ti ima ti maus-usar a pangitungpal iti aramid.—Apo 13:1, 2, 16-18; 14:9, 10; 16:1, 2; 20:4.
Kitaenyo met ti MUHON.