Asidegen ti Baro a Lubong!

ADUT’ naikunkunan dagiti pangulo ti estado maipapan ti baro a lubong nga urnos nga aramidenda a bukbukod. Sawendat’ maipapan ti panangruk-at iti lubong manipud buteng ken dagiti lapped ti kooperasion iti nagbaetan dagiti tattao ken dagiti estado. Ngem agpannuray kadi kadagiti tattao ti panangiyeg iti maysa a baro a lubong?

Naaddaanen ti sangatauan kadagiti sinigsiglo tapno ipasdek ti sangalubongan a talna ken talged. Awan duadua, adu dagiti napasnek unay kadagiti kasta a panggep. Aniaman a sangal dagiti gobierno a binukelen dagiti tattao tapno itungpal ti kasta a panggep, nupay kasta, napaneknekan a pudno dagiti sasao ti Biblia: “Saan nga agtaud iti tao a magna uray ti panangiturongna iti addangna.”​—Jeremias 10:23.

Maysa a Baro a Lubong a Naikari

Kaskasdi, ti isu met la a napaltiingan a Sao ti Dios mangipaay ti pammasiguro nga addanto ti maysa a baro a lubong. Kalpasan ti panangipadtona ti panungpalan ti maysa a daan a sistema dagiti bambanag, indeklara ni Kristiano nga apostol Pedro: “Adda baro a langlangit ken baro a daga nga ur-urayentayo sigun iti karina, ket kadagitoy agtaeng ti kinalinteg.”​—2 Pedro 3:10-13.

Makin kari iti daytoy? Daytat’ inted awan sabali no di ni Jehova, “ti Kangatuan iti isuamin a daga.” (Salmo 83:18) Iringpasnanto ti di kabaelan nga iringpas dagiti tattao. Wen, iyegto ni Jehova a Dios ti maysa a baro a lubong. Ngem kaano?

Nakaas-asidegen ti Baro a Lubong!

Sakbay nga agbalin a naan-anay-kasaknapna a kinapudno ti inkari ti Dios a baro a lubong, ti agdama a “lubong,” wenno “sistema dagiti bambanag,” masapul nga agpatingga. Maipapan itoy, inimtuod dagiti adalan ni Jesu-Kristo: “Ibagam kadakami, kaanonto ti pannakaaramid dagitoy? ken anianto ti pagilasinan iti iyaaymo, ken ti panungpalan toy lubong?” (Mateo 24:3, King James Version) Kas kunaen ti mas umiso a New World Translation, inimtuod dagiti pasurot ni Jesus: “Ibagam kadakami, Kaanonto ti pannakaaramid dagitoy a bambanag, ket anianto ti pagilasinan ti kaaddam ken iti panungpalan ti sistema dagiti bambanag?”

Iti sungbatna, impadto ni Jesus ti adu a paset ti pagilasinan ti di makita a kaaddana kas maysa nga espiritu a persona iti nailangitan a pannakabalin ti Pagarian. (1 Pedro 3:18) Kas pangarigan, kinunana: “Tumakderto ti nasion a bumusor iti nasion ken pagarian a bumusor iti pagarian, ket addanto kinakirang ti taraon ken ginggined iti nadumaduma a disso.” Manipud “maysa a pangrugian dagiti ladingit” idi 1914, “daytoy a kaputotan” nga intudo ni Jesus napadasannan ti agtultuloy a gubat, kinakirang ti taraon, ken ginggined kas paset ti pagilasinan iti di makita a kaaddana.​—Mateo 24:7, 8, 34.

Dagiti gubat ti nanglikmut iti daytoy a kaputotan iti di maartapan a pamay-an nanipud pay 1914. Ti Gubat Sanglubongan I innalana ti napattapatta a 14 a milion a biag. Kabayatan ti Gubat Sangalubongan II, 55 a milion a mannakigubat ken sibilian ti napapatay. Ay ket, nanipud pay 1914 nasurok a 100 a milion a biag ti napukawen iti gubat! Sigurado, daytoy markaanna ti paset ti pagilasinan ti kaadda ni Jesus.

Dagiti kinakirang ti taraon, nga impadto met ni Kristo, dinadaelna ti adu a dagdaga kalpasan dagiti dua a sangalubongan a gubat. Agpapan pay dagiti sientipiko nga irarang-ay, ngangngani kakapat ti lubong ti mabisbisin itatta. Iti tunggal tawen, minilion nga ubbing ken dadduma pay ti matmatay gapu iti malnutrision. Kuna ti The World Book Encyclopedia: “Kaaduan kadagiti napanglaw a nasion ti Africa, Asia, ken Latin America agkurkurangda ti umdas a taraon para kadagiti umilida. Minilion kadagitoy a pagilian ti mabisbisin. No bumaba ti produksion wenno panaglako iti taraon gapu iti aniaman a rason, mabalin a tumaud ti bisin ket rinibo wenno minilion a tattao ti matay.”

Innala met dagiti ginggined ti dakkel a bilang ti biag kabayatan daytoy kaputotan a mangmarmarka “iti panawen ti panungpalan.” (Daniel 12:4) Nagduduma dagiti pattapatta iti napapatay gapu ti ginggined. Ngem nanipud pay 1914 ngimmato ti panangdadael babaen kadagiti ginggined iti intero a daga, ket dagitoy pinatayda ti ginasgasut a ribo a biag. Iti panagkumentona iti dua laeng kadagitoy, ti Yorkshire Post ti Oktubre 19, 1989, kinunana: “Idi 1920 ti ginggined idiay probinsia ti Jiangsu idiay China pinapatayna ti 180,000 ken idi Hulio 28, 1976, sinagaba ti China ti kadadaksan a ginggined iti moderno a historiana. Di kumurang a 240,000 ti natay idi a ti siudad ti Tangshan a masarakan iti amianan a daya a paset ti China ti ngangngani naan-anay a napatag babaen ti ginggined a nasukat a 7.8 iti Richter a pagrukodan.” Ti pagiwarnakan inlistana ti nasurok a 30 a dadakkel a ginggined iti maika-20 a siglo.

Naipadto met ti trabaho a panangikasaba iti Pagarian kas maysa a paset ti pagilasinan ti kaadda ni Jesus. Imbagana kadagiti agim-imtuod nga adalanna: “Daytoy naimbag a damag ti pagarian maikaskasabanto iti isuamin a mapagnaedan a daga kas pammaneknek kadagiti amin a nasion; ket iti kasta umayton ti panungpalan.” (Mateo 24:14) Kas impadto ni Jesus, maar-aramiden daytoy trabaho a panangaskasaba iti intero a daga iti 212 a dagdaga babaen kadagiti nasurok nga 4,000,000 a Saksi ni Jehova.

Dagiti agdama-aldaw a kaitungpalan dagitoy ken dadduma pay a padpadto paneknekanda a pudno nga agbibiagtayon “iti maudi nga al-aldaw.” (2 Timoteo 3:1-5) Ti adda iti sanguanantayo isu ti “dakkel a rigat” nga impadto met ni Jesus. Agpatingga inton “gubat ti dakkel nga aldaw ti Dios a Mannakabalin-amin” idiay Har–Magedon, ipatinggananton ti agdama a dakes a sistema dagiti bambanag. (Mateo 24:21; Apocalipsis 16:14-16) Kalpasanna agbalinton a maysa a kinapudno ti baro a lubong nga inkari ti Dios.a

Dagiti Bendision a Di Maiyeg dagiti Tattao

Agparparammag dagiti pangulo ti estado maipapan iti maysa a baro a lubog nga urnos nga aramidenda a bukbukod. Ngem ni Jehova, ti Dios ti langit ken daga, pulos a dina kinalikaguman kadagiti tattao a suktanda ti agdama a sistema iti maysa a baro a lubong. Isu a mismo ti mangaramidto iti dayta iti aldaw ken oras nga isu laeng ti makaammo. (Mateo 24:34, 36) Ti lakayen nga apostol Juan naaddaan iti daytoy sirmata ti aramidento ti Dios, saan a ti tao:

“Ket nakitak ti maysa a baro a langit ken maysa a baro a daga; ta daydi immuna a langit ken daydi immuna a daga naglabasen, ket ti baybay awanen. Nakitak met ti nasantuan a siudad, ti Baro a Jerusalem, a bumabbaba manipud langit nga aggapu iti Dios ken naisagana a kasla maysa a nobia a naarkosan a maipaay iti asawana. Ket nangngegko ti maysa a napigsa a timek manipud trono nga agkunkuna: ‘Adtoy! Ti tabernakulo ti Dios adda iti sangatauan, ket makipagnaedto kadakuada, ket isudanto dagiti tattaona. Ket ti Dios a mismo addanto kadakuada. Ket punasennanto ti amin a lulua kadagiti matada, ket awanton ni patay, awanto metten ti sasaibbek wenno sangsangit wenno rigrigat. Dagiti immuna a bambanag napalabasdan.’ Ket Daydiay nakatugaw iti trono kinunana: ‘Adtoy! Pagbalinek dagiti isuamin a bambanag a baro.’ Kasta met, kinunana: ‘Isuratmo, ta dagitoy a sasao matalek ken pudnoda.’”​—Apocalipsis 21:1-5.

Ti “baro a langit” isut’ nailangitan a Pagarian ni Jesu-Kristo. Ti “baro a daga” ket saan a sabali a naindagaan a globo ngem maysa a baro a sosiedad dagiti tattao iti daytoy a planeta​—aminda ti natulnog nga iturayan ti Pagarian ni Kristo, nga awanan rasial, nasional, wenno linguistiko a panagsisinasina. (Idiligyo ti Salmo 96:1.) Ti agdama a simboliko a langit ken daga​—ti sistema dagiti bambanag ti Diablo agraman ti nagobiernuan a sangalna nga inimpluensiaan ni Satanas ken dagiti demoniona​—madadaeldanton. (1 Juan 5:19) Nupay agtalinaedto dagiti literal a baybay, ti piguratibo a baybay ti nariribuk, nadangkes a sangatauan maawanton. Dagiti kakadua ni Jesus a nailangitan nga agtuturay buklenda ti Baro a Jerusalem ken iti pannakikadua kenkuana buklenda ti kabisera nga organisasion a mangiturayto iti nalinteg a natauan a sosiedad. Ti Dios ‘makipagnaedto’ iti natulnog a sangatauan bayat a naan-anay a maikapkappiada kenkuana babaen ken Kristo kabayatan ti sangaribo-tawen nga Aldaw ti Panangukom.​—Apocalipsis 14:1-4; 20:6.

Iti sidong ti panagturay ti Pagarian addadanto nagadu a rason maipaay ti kinaragsak. Ti sasaibbek, sangsangit, ken rigrigat a nagresulta manipud sakit, ladingit ken dagiti umasping a bambanag ket kapkapadasanton iti napalabas. Uray pay ti ipapatay a nagsaknap iti sangatauan manipud ti immuna nga amatayo, ni managbasol nga Adan, iti sangatauan ti maawanton. (Roma 5:12) Anian a rag-o ti agsaknapto inton daytoy sangalubongan a pakaigapuan ti sangsangit ti maawanton iti agnanayon!

Saan a dagiti matmatay a tattao ngem ti Dios a mismo ti mangted ti pammasiguro maipapan kadagitoy a bendision. Isu Daydiay agkunkuna: Apo 21:5“Adtoy! Pagbalinek dagiti isuamin a bambanag a baro.” Wen, ken ni Jehova a Dios ti nangibaga ken apostol Juan: “Isuratmo, ta dagitoy a sasao matalek ken napudnoda.”

Naan-anay a Mapennek dagiti Pamunganayan a Kasapulan

Idiay baro a lubong nga aramiden ti Dios, iti kamaudiananna ti daga agbalinton a maysa a paraiso. Sigurado daytoy, ta inkari ni Jesus iti agladladingit a managdakdakes a nailansa iti sibayna: “Pudno kunak kenka ita nga aldaw, Makipaggiankanto kaniak idiay Paraiso.” (Lucas 23:43) Iti sidong dagiti naparaisuan a kasasaad, dagiti kasapulan ti tao a taraon ken pagtaengan ti naan-anayton a maipaay.

Dagiti kinakirang ti taraon ti mangpappapatay iti minilion a biag itatta. Kasanoman kadayag dagiti panagregget a mangpakan kadagiti mabisbisin, ti kinaagum ken dadduma pay a makagapu ti manglaplapped kadagiti tattao a mangsolbar kadagiti kasta a parikut. Kas pangarigan, ti Saturday Star, maysa a pagiwarnakan ti Johannesburg, South Africa, ipadamagna: “Dagiti napolitikaan nga argumento, nangina a bayad ti gasolina ken ti panagdandanag ti kaaduan iti kasla awan-patinggana a supsuppiat iti Africa ti agtiptipon a mangitantan ti pannakabang-ar . . . Idiay Sudan, maysa kadagiti naapektaran unay iti bisin, 5 a milion ingganat’ 6 a milion a tattao sangsanguenda ti panagbisin iti 1991.” Ngem ti bisin malipatanton idiay baro a lubong ti Dios. Iti sidong ti turay ti Pagarian “addanto nawadwad a bukel iti daga; addanto panaglaplapusasan agingga iti tapaw dagiti bantay.”​—Salmo 72:16.

Ti pagtaengan ket sabali pay a kasapulan ti tao nga agkurkurang iti kaaldawantayo. Minilion ti agnanaed iti bassit, nakakaasi a balbalay wenno naan-anay nga awananda ti pagtaengan. Sigun ti The New York Times, iti maysa a daga idiay Dumaya, “iti maysa a kompania ti electronics. . . ., dagiti 20-años nga empleado sangsanguenda ti 73-tawen ti pagurayan a listaan tapno makaala iti pagtaengan,” ket ti maysa a report ti gobierno ipakitana a dadduma a tattao masapul nga agnaedda “kadagiti bodega, opisina wenno uray pay kadagiti kasilias.” Ngem anian a naidumanto dayta idiay baro a lubong! Idiay Paraiso iti masanguanan, “agbangondanto kadagiti balay ket agnaeddanto; ken agmuladanto kadagiti kaubasan ket kanenda dagiti bungada. Didanto agbangon ket sabali ti agnaed; didanto agmula ket sabali ti mangan. Ta kas iti aldaw ti maysa a kayo kastanto ti al-aldaw ti ilik; ket aramatento a naan-anay dagiti pinilik ti aramid dagiti bukodda nga ima.”​—Isaias 65:21, 22.

Dagiti ekolohikal a problema maawandanton idiay inkari ti Dios a baro a lubong. Awanton ti mangpapeggad-salun-at ken mangdadael-mula a panangrugit iti angin. Ti polusion ken pannakadadael dagiti nabiag a mangdangdangran itan iti adu a mula ken adu a kita dagiti animal saaanton a peggad. Ket dagiti pakaigapuan a kas ti pannakaibus ti ozone layer didanton papeggaden ti biag ditoy daga. Makasiguradotayo a ni Jehova a Dios solbarennanto amin dagitoy a problema, ta ti Saona ipasiguradona kadatayo nga “iyegnanton ti pannakadadael dagidiay a mangdaddadael iti daga” iti mabiiten.​—Apocalipsis 11:18.

Idiay baro a lubong, ti gubat ket banagton iti napalabas saan a gapu ta dagiti pangulo iti estado nagballigida iti panangikkat ti ar-armas kadagiti nasion. Imbes ketdi, ti Dios agtignayto no sadino a napaay dagiti napolitikaan nga agtuturay. Iyegnanton ti talna iti natulnog a sangatauan kas panangsalimetmetna kadagitoy a sasao ti salmista: “Umaykayo, dakayo a tattao, imatanganyo dagiti aramid ni Jehova, no kasano nga impasdekna dagiti nakaskasdaaw a pasamak ditoy daga. Pasardengenna dagiti gubat inggana iti ungto ti daga. Rungrungduenna ti ba-i ti pana ket gupdenna a mamimpinsan ti gayang; puuranna dagiti lugan iti apuy.” (Salmo 46:8, 9) Idiay inkari ti Dios a baro a lubong a nakaas-asideg unayen, dagiti tattao didanton makigubat ngem tagiragsakendanton ti pudno a talna ken talged.​—Mikias 4:2-4.

Addakayto Kadi Sadiay?

Maaddaankayo ti panagtalek iti baro a lubong nga inkari ni Jehova a Dios. Isut’ saan nga agulbod. (Hebreo 6:17, 18) Ti Saona, ti Biblia, ket pudno, ket no ania ti ikarina kankanayon a maaramid.​—Juan 17:17.

Ti naimbag a damag ti nakaskasdaaw a bendision nga agpaay iti natulnog a sangatauan isut’ pagregreggetan dagiti Saksi ni Jehova nga iranud kadagiti amin a nasingpet-panagpuspusoda a tattao. Rebbeng a mangaramidkayo kadagiti panagregget itan a manggun-od ti pannakaammo iti nadiosan a panggep, ken agtignay kadagiti nakaskasdaaw a kari a masarakan idiay Nasantuan a Kasuratan. Daytoy a kurso mangiturong iti awan patinggana a biag, ta kinuna ni Jesus: “Daytoy kaipapananna ti biag nga agnanayon, ti pananggun-odda ti pannakaammo kenka, ti kakaisuna a pudno a Dios, ken daydiay imbaonmo, ni Jesu-Kristo.” (Juan 17:3) Ngarud addaankayto ti pribilehio a mangtagiragsak kadagiti naragsak a panawen nga adda iti masanguanan, ta ti baro a lubong ti Dios asidegen!

[Footnote]