Rebbeng Aya a Maitantan-okka?
TI ISKRIN ti TV ti nagbiag idi a dagiti kamera nakasentroda iti nalatak a managpabuya. Iti panangiparangna ti propesional nga isemna, kalpasanna nangrugin nga agtokar. Agimdengtayo a siraragsak iti musika. Ti kamera ti immasideg unay, a nangipalubos ti pannakabuyatayo ti langa ti rupana ken dagiti nasigo a ramramayna bayat ti panangtokarna ti musika manipud iti instrumentona.
Wen, daydiay managpabuya ti mangtagtagiragsak iti pannakaitan-okna. Ngem inton napalabasen ti pabuya, kitaenyo ti nagatiddog a listaan dagiti pammadayaw nga agparang iti iskrin—ti orkestra, konduktor, dagiti sound technicians, dagiti managretrato, dagiti direktor, produser, dagiti makeup artists, ken adu pay dagiti dadduma. Amin dagitoy nasken tapno mapagbalin a naballigi ti pabuya. Amin ket manangsuportarda.
Ti umas-asping a kasasaad ti adda met iti kongregasion Kristiano. Dadduma ti maus-usar a nangnangruna ngem dagiti dadduma, ngem dadduma, nupay kasta, ti gagangay laeng wenno ordinario a manangibunannag ti damag ti Pagarian. Rebbeng kadi a dagitoy, nupay kasta, mariknada a basbassit ti pategda gapu ta saanda a maitamtan-ok? Rebbeng kadi a mariribukanda no saanda a maragpat ti kinatan-ok?
“Amin Addanto ti Bingayda”
Ti salaysay a nakairamanan ni Ari David ti makaipanayag unay. Ipakpakita ti Biblia a naminsan isut’ nangidaulo iti maysa a buyot dagiti 400 a lallaki iti maysa a dramatiko a mision iti panangisalakan. Rimmuarda tapno alawenda dagiti pampamilia ken sansanikuada manipud kadagiti manangraut. Nupay kasta, dua gasut, ti nabati nga agbantay kadagiti al-alikamenda. Idi ti bunggoy dagiti manangispal nagsublida a sibaballigi a kaduadan dagiti babbai, ub-ubbing, ken dagiti sansanikuada, agraman ti adu a samsam, rimsua ti maysa a parikut: Asino dagiti makiraman iti samsam ti gubat? Dagidiay laeng aktual kadi a nakidangadang ti maibilang a maikari iti bingayda? Nangted ti sungbat ni David a daytat’ namatmatan kas maysa a pagwadan a legal, “maysa a hudisial a pangngeddeng nga agpaay iti Israel.” Kunana: “Ta no kasano ti bingay daydiay a simmalog iti gubat kastanto met ti bingay daydiay a nabati iti gargaret. Agbingaydanto iti agpada.” (1 Samuel 30:24, 25) Ni Jehova ti nangiturong ken David a mangaramid iti daytoy a pangngeddeng ket daytat’ nangisarming iti nauneg a panangapresiar ni Jehova kadagidiay agserbi iti paset a kas manangsuportar laeng.
Ngem pudno met aya daytoy a prinsipio iti kongregasion Kristiano? Sumungbat ni apostol Pablo iti maysa nga ilustrasion. Iti panangidiligna iti kongregasion iti natauan a bagi, kunana: “Ket saan a mabalin ti mata a sawen iti ima: ‘Awan pakasapsapulak kenka’; wenno, saan met a kunaen ti ulo kadagiti saksaka: ‘Awan pakasapsapulak kadakayo.’” wen, iti natauan a bagi tunggal kameng—uray pay ti kababassitan a ramay ti saka—ti addaan napateg a paset. Impakita ti Dios ti isu met la a kinasirib iti panangorganisar iti kongregasionna. “Ket ti Dios insaadna iti kongregasion,” a tinudingan dagiti nagduduma kadagiti nadumaduma met a rebbengen.—1 Corinto 12:21, 28.
Idi umuna a siglo, tinagiragsak ngarud dagiti dadduma a Kristiano ti maysa a rukod ti kinatan-ok. Ni Pedro, kas pangarigan, ti kaaduanna maitantan-ok. Isu ti pannakangiwat dagiti apostol iti historiko nga aldaw ti Pentecostes. (Aramid 2:14) Isut’ addaan ti pribilehio a nangtulong kadagiti damdamona a nakumberte a Gentil a nagbalin a Kristiano. (Aramid 10:44-48) Kinapudnona, dua a libro ti Biblia ti addaan iti naganna! Kaskasdi dadduma kadagiti dadduma nga apostol ti ngangngani di pay nadakdakamat. Ni Mateo, Nathanael (Bartolome), Tadeo (Judas, anak ni Santiago), ni Simon a naregta, ken ni Santiago, nga anak ni Alfeo (a maawagan met Santiago a Basbassit), bassit laeng ti pannakadakamatda. Nupay kasta, simamatalek a sinuportaranda ti Apoda iti kampaniana a panangasaba ken panangisuro.
Nanumo, Amin-Kararua a Serbisio
Ti umas-asping a kasasaad adda met itatta. Iti kongregasion Kristiano, kaskasdi a ni Jehova ‘nangikabil kadagiti kamkameng kas iti pagayatanna.’ Daytoy ti nangibunga a dadduma addada iti lugar a maitantan-ok ngem kadagiti dadduma. Ngem aniat’ rebbeng a kababalintayo koma iti pribilehiotayo iti serbisio, aniaman dayta? Kastoy ti panangiyebkas ti Colosas 3:23, 24: “Dagup ti aramidenyo, aramidenyo iti amin a kararua kas agpaay ken Jehova, ket saan a maipaay kadagiti tattao, a pagaammoyo nga iti biang ni Jehova awatenyonto ti gunggona a tawid.”
Adu kadagiti Saksi itatta ti maad-addaan ti pudpudno a ragsak manipud panagserserbida iti nanumo, mangsuportar laeng nga akem. Usigenyo, kas pangarigan, ni Edmundsen, maysa a Saksi nga agserserbi idiay Pietermaritzburg, Sud Africa. Isut’ nabautisaran idi 1946 ket simrek iti amin-tiempo a serbisio idi 1950. Kinapudnona pulos nga isu ti di maikabkabil iti pannakaitan-ok. Nupay kasta, isut’ maragsakan iti pannakakita kadagiti 15 nga annakna ken appokona a nagdedikar ken nabautisaran a Saksi, ket 27 a dadduma kadagiti appokona ken appokona iti tumeng ti makigimgimong iti kongregasion! Ket itatta, nupay isu ti marigatan gapu iti nakapuy a panagdengngeg ken panagkita, isut’ simamatalek a mangaskasaba kas auxiliary a payunir. Ta, iti edadna nga 84 kaskasdi nga agserserbi kas maysa a panglakayen ti kongregasion ket mangmangted met kadagiti palawag publiko! Nupay kasta, ti serbisio ni Edmundsen, iti kaaduan a pasetna, ket adda laeng iti liklikudan. Ngem kas kadagiti adu a rinibribo a matalek nga ad-adipen ti Dios, isut’ mangipapaay ti napateg, adut’ kaipapananna a serbisio ken Jehova. Wen, sapulenna ti kinapakumbaba tapno agserbi iti maliklikudan laeng.
Ngem daytoy ti mangipalubos met ti tiempo nga intay panangpatanor kadagiti personalidadtayo ken kinasigotayo sakbay a maipabaklay dagiti nadagsen a rebbengen kadatayo. Ni Ari Josias nagbalin nga ari ti Juda idi agtawen ti walo. (2 Ar-ari 22:1) Ngem sisasagana aya idi iti dayta nga akem? Ni Moises, iti kasumbangirna, ti naikabil iti 40 a tawtawen nga awan kinalatakna kas maysa a pastor idiay Madian sakbay a nagbalin a manangispal. Bayat dayta a tiempo, isut’ nakapatanor kadagiti kualidad ti kinaemma. (Numeros 12:3) Naadalna met ti agpannuray ken ni Jehova. Ken iti kamaudiananna isut’ inayaban ni Jehova a mangidaulo ti Israel iti sumaganad a 40 años, isu ti sisasaganan a maipaay iti daytoy a rebbengen!
Gapuna ti maysa a tao a makarikna a dagiti abilidadna ket saanda a maus-usar a naan-anay iti kongregasion saanda koma a maladingitan. Nalabit ammo ni Jehova a kasapulan met ti pannakapatanor ti ad-adu a kinamanaganus wenno kinapakumbaba sakbay nga ikkanna dayta a tao ti kanayonan a pribilehio. Laglagipenyo met, a ti nagadu nga ad-adipen ni Jehova ti agserserbi iti maliklikudan. Ti Pagwanawanan ti maysa a kangrunaan a paset ti programa iti panagad-adal dagiti Saksi ni Jehova iti nasuroken a maysa a siglo. Kaskasdi dagiti mannuratna saanda a naiyam-ammo. Panunotenyo met, dagiti adu a ribo nga agserserbi kadagiti pagtaengan a Bethel wenno dagiti payunir ken misionero. Natakkon ti kaaddada iti pannakaitantan-ok. Kaskasdi tagtagiragsakenda ti okupado, makagunggona a biag ken kapadasan, ti kasta unay a kinakontento a naipakuyog iti panangipaayda ti bagbagida iti panangtultulong kadagiti dadduma.—Aramid 20:35.
Ti Bungana Isu Dagidiay Agserserbi a Sipapakumbaba
Kadagiti orihinal a 12 nga apostol, maymaysa laeng ti napaneknekan a di nagballigi—ti traidor a ni Judas Iscariote. Dagiti dadduma tinagiragsakda ti nadayag a gunggona. Idiay Apocalipsis 21:10, 14 sinalaysay ti Biblia ti “nasantuan a siudad” kas naibangon kadagiti 12 a pamuon a batbato. Iti tunggal maysa, naisurat ti nagan ti maysa nga apostol ti Kordero. Makapainteres, dua kadagiti matalek nga apostol ti agnagan Simon. Daydiay napanaganan Simon Pedro ti maitantan-ok unay; daydiay agnagan Simon a naregta, ket saan. (Aramid 1:13) Kinapudnona, bassit unay ti maikuna maipapan iti daytoy a Simon. Ngem agpadpadada dagitoy a Simon ti immawat iti isu met laeng a gunggona—ti pribilehio nga agbalin a pamuon a kamkameng iti nailangitan a gobierno iti sidong ni Ari a Jesu-Kristo!
Siempre, saan nga amin a napagungar a napulotan ti nakalatlatak nga agserbi kas dagiti “pamuon a batbato.” Usarento ni Jehova dagiti kamkameng ti gobiernona iti aniaman a kapasidad a makitana a kasayaatan. Dagidiay nga addaan iti namnama nga agbiag nga agnanayon idiay Paraiso a daga ti makasiguro met nga iti sidong dayta nga urnos ti Aritayo ti mangusarto kadatayo iti kasasayaatan a pamay-an. Iti nakaay-ayatto nga aglawlaw, dagiti nasungdo a kakadua, ti nadumaduma a makaparagsak a trabaho, nga awanen ti pannakaup-upay wenno pannakauma, dagiti personalidadtayo ken kinasigotayo maparang-ayto iti naan-anay a kapasidadda!
Gapuna naawistay man iti nailangitan a gunggona wenno agur-uray iti biag iti napapintas a daga, kontentotay koma iti nakaitudingantayo iti serbisio iti organisasion ni Jehova ket aramidentayo dayta iti amin a kararua. Isu daytoy ti kurso ti kinasirib ken rag-o. Imbes a sigagaramugam a sapsapulen ti pannakaitantan-ok, sukayenyo ti napakumbaba a kababalin ni Ari David a nagkuna: “Maysa a banag ti dinawatko ken ni Jehova—isu a birukekto, ti panagtaengko koma iti balay ni Jehova iti dagup dagiti al-aldaw ti biagko, tapno agbuybuyaak iti sayaat ni Jehova ket imutektekak ti uneg ti templona.”—Salmo 27:4.