KRISOLITO

Aganninaw wenno nasaragasag, duyaw wenno berde a medio napateg a bato a buklen dagiti silicate ti magnesium ken landok. Gagangay a tumaud dayta kadagiti bato ti bulkan (kasta met, kadagiti dolomite ken sumagmamano a kita ti apug a bato) a ti pormana ket solido, krimmistal, wenno nagtukel. Ti “krisolito” nagtaud iti Griego a sao a khry·soʹli·thos, kaipapananna ti “balitok a bato,” ket agparang nga uray kaskasano adda sumagmamano a nagkauna a tattao a nangaramat iti daytoy a nagan maipaay iti nadumaduma a saniata a duyaw ti marisna. Adda dagiti nasayaat ti kalidadna a krisolito a kristal a masarakan idiay Egipto.

Idi immawat ni Ezequiel iti dua a nagduma a sirmata mainaig iti uppat a pilid, napaliiwna a ti langa dagiti pilid ket “kasla iti rangrang ti krisolito.” (Eze 1:15-21; 10:9) Ti Sulamita a babai impadisna ti im-ima ti kaayan-ayatna a pastor iti “tubtubong a balitok, a napno iti krisolito.” Nalabit dagiti balitok a tubong tumukoyda kadagiti ramay ket dagiti panelsel a krisolito tumukoyda kadagiti kuko. (Sol 5:14) Umasping iti dayta, nagusar ni Daniel iti krisolito a pangdeskribir iti bagi ti “maysa a lalaki a sikakawes iti lienso” nga immay mangibaga iti mammadto no ania ti mapagteng iti ilina “iti kamaudianan a paset ti al-aldaw.” (Da 10:5, 6, 14) Iti sirmatana maipapan iti Baro a Jerusalem, napaliiw ni apostol Juan a ti maikapito a pamuon ti pader ti siudad ket krisolito. Naikitikit iti dayta ti nagan ti maysa kadagiti “sangapulo ket dua nga apostol ti Kordero.”​—Apo 21:2, 10, 14, 20; kitaenyo ti AL-ALAHAS KEN NAPATEG A BATBATO.