BERILO

Nasin-aw wenno nalibeg a mineral a buklen ti silikato ti aluminum ken berilio. Natangtangken dayta ngem iti quartz ken gagangay a duyaw a berde, ngem no dadduma berde, duyaw, asul, puraw, nalusiaw a nalabaga, wenno awanan maris. Ti ngumisit a berde a berilo ket naklasipikar kas esmeralda, ti asul a berde ket aquamarine, ket ti kita a rosas naawagan morganita. Kadawyan a masarakan ti berilo iti batbato a granito a ti pormada ket innem sikiganda a kristal. Nasarakan dagiti sinaggaysa a berilo a kristal nga agdagsen iti nasurok a 25 a tonelada.

Ti berilo nalatak unay a bato ti alahas kadagidi kadaanan a tiempo. Nagaramid dagiti Griego kadagiti nasayaat nga inukit a ladawan manipud iti dayta, ket dagiti Romano inaramidda dagiti natural a kristal kas pabitin ti lapayag. Naminsan a nadakamat ti berilo (Gr., beʹryl·los) iti Kasuratan (NW, NE, RS), a dayta ti maikawalo a pamuon ti pader ti Baro a Jerusalem.​—Apo 21:2, 19, 20.