Dagiti Saludsod Manipud Kadagiti Managbasa
◼ Ania ti “libro ti biag” ti Dios, ket kasano a maisurat ti naganko iti dayta ken mapagtalinaed sadiay?
Dagiti nadumaduma a teksto ti Biblia ipakitana a ni Jehova a Dios ket addaan iti maysa a “libro,” wenno “lukot ti pagbasaan,” a pangilistaan kadagiti nasungdo a tattao a nakadasig a mangawat iti biag nga agnanayon, idiay langit man wenno ditoy daga.
Manipud iti langlangit ti pudno a Dios makitana ti tattao a mangiparangarang iti pammati, a pakaikarian ti anamong ken pananglaglagipna. Mabasatayo maipanggep kadagiti sumagmamano a Judio idi kaaldawan ni Malakias: “Iti kasta dagiti nagbuteng ken Jehova nagsaoda iti maysa ken maysa, . . . ket ni Jehova nagimdeng ken nangipangag. Ket maysa a libro a pakalaglagipan nasuratan iti saklangna agpaay kadagidiay nagbuteng ken Jehova ken dagidiay a nagpanunot iti naganna.”—Malakias 3:16.
Nalawag, manipud idi panawen ni Abel ken agtultuloy, ti Dios ket agisursurat, a kasla isursuratna iti maysa a libro, dagidiay adda iti lubong ti mabalin a maisalakan a sangatauan a kasapulan a malaglagip no maipapan iti biag nga agnanayon. (Mateo 23:35; Lucas 11:50, 51) Kasta met, dagiti napulotan a Kristiano, adda dagiti ‘nagnaganda iti libro ti biag,’ wenno libro a pakalaglagipan para iti pannakaawat ti biag nga agnanayon, ken para kadakuada daytoyto ti nainlangitan a biag. (Filipos 3:14, 20; 4:3) Kas panamaggidiat, ti Apocalipsis 17:8 kunaenna kadagidiay “agsiddaaw” maipapan iti “atap nga animal”: “Dagiti nagnaganda saandanto a maisurat iti pagbasaan ti biag manipud pannakabangon toy lubong.”
Ngem ti pannakalaglagip ken pannakaanamong ti maysa a tao (nga adda a naisurat ti naganna iti “libro ti biag”) saanna kayat a sawen nga isut’ garantisado iti biag nga agnanayon, a kasla daytoy ti nasapsapa a naituding wenno saanen a mabalbaliwan. Maipapan kadagiti Israelitas, insaludsod ni Moises ken ni Jehova: “Nupay kasta ita no pakawanem ti basolda,—ket no saan, punasennak, dawatek kenka, iti libro a sinuratam.” Insungbat ti Dios: “Siasinoman a nakabasol iti maikaniwas kaniak, isu punasekto iti librok.” (Exodo 32:32, 33) Wen, uray pay kalpasan ti pannakailista ti maysa nga addaan iti pannakaanamong iti “librona,” ti indibidual ket mabalin a sumukir wenno panawanna ti pammatina. No daytat’ mapasamak, ti Dios ket “punasennanto ti naganna manipud libro ti biag.”—Apocalipsis 3:5.
Iti sabali a bangir, no adda ti nagantayo iti “libro ti biag” ti Dios, wenno “libro ti pananglaglagip,” kasapulan nga agtultuloytayo a mangalagad ti pammati. Iti dayta a pamay-an mapagtalinaedtay ti nagantayo sadiay. Maiyasping iti dayta, no maipapan kadagiti tattao a mapagungar iti um-umay a ‘panagungar dagiti nakillo,’ maaddaandanto ti gundaway a mangalagad ti pammati ket iti kasta makakualipikardanto a maisurat dagiti naganda iti dayta a libro. (Aramid 24:15) Kamaudiananna, dagiti indibidual a naisuraten ti naganda mapagtalinaeddanto ti nagnaganda iti agnanayon. Pudno dayta kadgiti napulotan kabayatan a paneknekanda ti bagbagida a “nasungdo agingga ken patay.” (Apocalipsis 2:10; 3:5) Maipapan kadagidiay addaan naindagaan a namnama, babaen iti panagmatalektay itan, agingga iti Milenio a Panagturay ni Kristo, ken kalpasanna agingga ti maudi a suot a sumaruno, ti nagnaganda ket agbalinto a permanente a “naisurat iti libro ti biag.”—Apocalipsis 20:5-15.