Kapitulo 14
Ti Kinadayag ti Nailangitan a Trono ni Jehova
Sirmata 2—Apocalipsis 4:1–5:14
Suheto: Dagiti makapaamanga a pasamak iti sanguanan ti trono a pangukoman ti Dios
Tiempo a pannakatungpalna: Naglaon daytoy a sirmata kadagiti pasamak a matungpal manipud 1914 agingga iti ngudo ken kalpasan ti Milenio, inton amin a parsua nga adda idiay langit ken ditoy daga idaydayawda ni Jehova.—Apocalipsis 5:13
1. Apay a rumbeng a maseknantayo unay kadagiti sirmata nga iranud kadatayo ni Juan?
IRUGI ni Juan nga iranud kadatayo ti dadduma pay a makagutugot a sirmata. Isu ket adda pay laeng iti aldaw ti Apo babaen ti panangipaltiing ti nasantuan nga espiritu. Gapuna, dagiti deskribirenna ket adda napateg a kaipapananna kadatayo nga aktual nga agbibiag iti dayta nga aldaw. Babaen kadagitoy a sirmata, lukaisan ni Jehova dagiti nailangitan a banag ket ipakaammona kadatayo ti panangmatmatna kadagiti panangukomna ditoy daga. Maysa pay, tumulong dagitoy a sirmata tapno maammuantayo no ania ti pasettayo iti panggep ni Jehova, nailangitan man wenno naindagaan ti namnamatayo. Amintayo ngarud, nasken nga agtultuloy koma a maseknan unay kadagiti sasao ni Juan: “Naragsak daydiay mangbasa a sipipigsa ken dagidiay dumngeg iti sasao daytoy a padto, ken mangtungpal iti bambanag a naisurat iti dayta.”—Apocalipsis 1:3.
2. Ania itan ti mapasaran ni Juan?
2 Ti sumaruno a maimatangan ni Juan artapanna ti aniaman a maipabpabuya iti telebision! Insuratna: “Kalpasan dagitoy a banag nakitak, ket, adtoy! maysa a naluktan a ruangan idiay langit, ket ti immuna a timek a nangngegko ket kas iti maysa a trumpeta, a makisasao kaniak, a kunkunana: ‘Umulika ditoy, ket ipakitak kenka ti bambanag a masapul a maaramid.’” (Apocalipsis 4:1) Babaen ti sirmata, nastrek ni Juan dagiti di makita a langit a pagnanaedan ni Jehova, a nangatngato nga amang ngem ti law-ang a nasirarak dagiti astronaut, iti labes pay dagiti galaxy iti uniberso. Kas iti iseserrek iti silulukat a ruangan, naawis ni Juan tapno penkenna dagiti matana kadagiti makapaamanga a buya ti kangatuan a naespirituan a langlangit nga ayan ti trono ni Jehova. (Salmo 11:4; Isaias 66:1) Anian a pribilehio!
3. Ania ti ipalagip ti timek a “kas iti maysa a trumpeta,” ken awan duadua a siasino ti Gubuayan dayta?
3 Saan nga ibaga ti Biblia no siasino ti nagsao iti “immuna a timek.” Kas iti napigsa a timek ni Jesus nga immun-una a nangngegan, napuersa daytoy a kasla iti uni ti trumpeta. (Apocalipsis 1:10, 11) Ipalagip dayta ti makatitileng nga uni ti tangguyob a nangipakaammo iti kaadda ni Jehova idiay Bantay Sinai. (Exodo 19:18-20) Awan duadua a ni Jehova ti nadaeg a Gubuayan dayta nga awag. (Apocalipsis 1:1) Inlukatna ti ruangan tapno babaen ti sirmata, makastrek ni Juan iti kasasantuan a disso iti intero a sakup ti kinasoberano ni Jehova.
Ti Nadaeg a Presensia ni Jehova
4. (a) Ania ti kayulogan ti sirmata ni Juan para kadagiti napulotan a Kristiano? (b) Ania met ti kayulogan dayta a sirmata kadagidiay mangnamnama iti biag nga agnanayon ditoy daga?
4 Ania ti nakita ni Juan? Agimdengtayo bayat nga iranudna kadatayo ti naisangsangayan a kapadasanna: “Kalpasan dagitoy a banag dagus a naaddaak iti pannakabalin ti espiritu: ket, adtoy! maysa a trono ti nakasaad idiay langit, ket adda maysa a situtugaw iti trono.” (Apocalipsis 4:2) Iti apagdarikmat, naipan ni Juan iti mismo a trono ni Jehova babaen ti aktibo a puersa ti Dios. Anian a makapikapik daytoy ken Juan! Ditoy a naipaayan iti makapasiddaaw a pakauna a buya dagiti mismo a langlangit a nakaisaganaan ti “di agrupsa ken di natulawan ken di agkupas a tawid” para kenkuana ken kadagiti dadduma pay a napulotan a Kristiano. (1 Pedro 1:3-5; Filipos 3:20) Adda met nauneg a kayulogan ti sirmata ni Juan kadagidiay mangnamnama iti biag nga agnanayon ditoy daga. Tulonganna ida a mangtarus iti nadayag a presensia ni Jehova ken iti nailangitan a turay nga usaren ni Jehova a mangukom kadagiti nasion sa kalpasanna, usarenna a mangiwanwan kadagiti tattao ditoy daga. Talaga a ni Jehova ket Dios a nakalalaing a mangorganisar!
5. Ania ti nakita ni Juan a napaypayso nga isimbolo ti akkub ti lakasa ti tulag?
5 Kaaduan kadagiti napaliiw ni Juan idiay langit ket umasping kadagiti paset ti tabernakulo nga adda idi idiay let-ang. Agarup 1,600 a tawen sakbayna, nabangon daytoy kas santuario ti pudno a panagdaydayaw dagiti Israelita. Masarakan ti lakasa ti tulag iti Kasasantuan a siled dayta a tabernakulo, ket iti ngatuen ti puro a balitok nga akkub dayta a Lakasa nga agsao a mismo ni Jehova. (Exodo 25:17-22; Hebreo 9:5) No kasta, nagserbi ti akkub ti Lakasa kas simbolo ti trono ni Jehova. Makita itan ni Juan ti napaypayso nga iladladawan dayta a simbolo: ti mismo a Soberano nga Apo Jehova a nakatugaw iti nadayag ken natan-ok a nailangitan a tronona!
6. Ania ti nakita ni Juan a pannakailadawan ni Jehova, ken apay a maitutop daytoy?
6 Saan a kas kadagiti immuna a propeta a nakasirmata iti trono ni Jehova, saan a detalyado ti panangdeskribir ni Juan iti Daydiay Nasantuan a situtugaw iti dayta. (Ezequiel 1:26, 27; Daniel 7:9, 10) Ngem ibaga kadatayo ni Juan no ania ti nakitana a pannakailadawan Daydiay situtugaw iti trono babaen kadagitoy a sasao: “Ket daydiay situtugaw, ti langana, umasping iti bato a jaspe ken iti napateg a nalabaga ti marisna a bato, ket iti aglikmut ti trono adda bullalayaw a ti langana umasping iti esmeralda.” (Apocalipsis 4:3) Anian nga awan kaaspingna a kinadayag! Nakita ni Juan ti natalinaay, rumimatrimat a kinaimnas a kas kadagiti nasilap, agan-anninaw a saniata. Anian a maitunos daytoy iti panangiladawan ni adalan a Santiago ken ni Jehova kas “Ama dagiti nailangitan a lawag”! (Santiago 1:17) Di nagbayag kalpasan nga insurat ni Juan ti Apocalipsis, kinunana a mismo: “Ti Dios ket silaw ken awan a pulos ti sipnget a naikaykaysa kenkuana.” (1 Juan 1:5) Talaga a napalalo ti kinadayag ti Persona ni Jehova!
7. Ania ti maadaltayo iti kaadda ti bullalayaw iti aglikmut ti trono ni Jehova?
7 Imutektekam ta adda nakita ni Juan a berde a bullalayaw a kas iti esmeralda iti aglikmut ti trono. Ti Griego a sao a naipatarus ditoy kas bullalayaw (irʹis) ipasimudaagna ti naan-anay a sirkulo a porma. Iti Biblia, damo a nadakamat ti bullalayaw idi tiempo ni Noe. Idi immes-esen ti Layus, pinagparang ni Jehova ti bullalayaw iti ulep sa inlawlawagna no ania ti isimbolo dayta, a kinunana: “Ti bullalayawko itedko iti ulep, ket agserbinto kas maysa a pagilasinan ti tulag iti nagbaetak ken iti daga. Ket pudno unay a lagipekto ti tulagko nga adda iti nagbaetantayo ken tunggal sibibiag a kararua iti isuamin a lasag; ket ti dandanum saanton nga agbalin a layus a mangdadael iti isuamin a lasag.” (Genesis 9:13, 15) Ania ngarud ti ipalagip ti nailangitan a sirmata ken ni Juan? Ti bullalayaw a nakitana impalagipna la ketdi ti kinapateg ti nasayaat a relasion ken Jehova, kas iti tagtagiragsaken ita ti klase Juan. Impasagepsep pay dayta iti panunotna ti kinatalinaay ken kinatalna ti presensia ni Jehova, kinatalinaay a mapasaranto dagiti amin a natulnog a tattao inton iyukrad ni Jehova ti toldana iti sangatauan iti kagimongan ti baro a daga.—Salmo 119:165; Filipos 4:7; Apocalipsis 21:1-4.
No Siasino Dagiti 24 a Panglakayen
8. Siasino dagiti nakita ni Juan iti aglikmut ti trono, ken siasino ti irepresentarda?
8 Ammo ni Juan a nadutokan dagiti papadi nga agserbi iti nagkauna a tabernakulo. Gapuna, mabalin a naklaat idi nakitana ti sumaruno nga iladawanna: “Ket iti aglikmut ti trono adda duapulo ket uppat a trono, ket kadagitoy a trono nakitak a situtugaw ti duapulo ket uppat a panglakayen a nakakawes iti puraw a makinruar a kawkawes, ket iti rabaw dagiti uloda nabalitokan a korkorona.” (Apocalipsis 4:4) Wen, imbes a papadi, adda 24 a panglakayen a situtugaw kadagiti trono ken nakoronaan a kasla ar-ari. Siasino dagitoy a panglakayen? Awan sabali no di dagiti napulotan a kameng ti kongregasion Kristiano, a napagungar ken immawat iti nailangitan a saad nga inkari ni Jehova kadakuada. Kasanotayo nga ammo a kasta?
9, 10. Kasanotayo nga ammo a dagiti 24 a panglakayen irepresentarda ti napulotan a kongregasion Kristiano iti nadayag a nailangitan a saadna?
9 Umuna iti amin, nakakoronada. Dakamaten ti Biblia a dagiti napulotan a Kristiano makagun-odda iti ‘di agrupsa a korona’ ken maragpatda ti agnanayon a biag—imortalidad. (1 Corinto 9:25; 15:53, 54) Ngem gapu ta nakatugaw iti trono dagitoy a 24 a panglakayen, dagiti balitok a korona iti daytoy a konteksto irepresentarda ti naarian nga autoridad. (Idiligmo ti Apocalipsis 6:2; 14:14.) Daytoy ti mangpatalged iti konklusion a dagiti 24 a panglakayen iladawanda dagiti napulotan a pasurot ni Jesus iti nailangitan a saadda, ta nakitulag ni Jesus kadakuada nga agtugawda kadagiti trono iti Pagarianna. (Lucas 22:28-30) Ni laeng Jesus ken dagiti 24 a panglakayen—saan a karaman uray dagiti anghel—ti nadeskribir nga agturay idiay langit iti presensia ni Jehova.
10 Maitunos daytoy iti inkari ni Jesus iti kongregasion idiay Laodicea: “Iti daydiay agballigi ipaluboskonto a makikatugaw kaniak iti tronok.” (Apocalipsis 3:21) Ngem saan laeng nga agturay iti gobierno ti nailangitan nga annongen dagiti 24 a panglakayen. Iti panglukat ti libro nga Apocalipsis, kinuna ni Juan maipapan ken Jesus: “Pinagbalinnatayo a pagarian, papadi iti Dios ken Amana.” (Apocalipsis 1:5, 6) Ar-ari ken papadida. “Isudanto ti papadi ti Dios ken ni Kristo, ket makipagturaydanto kenkuana kas ar-ari iti sangaribu a tawen.”—Apocalipsis 20:6.
11. Apay a maitutop a 24 ti bilang dagiti panglakayen, ken ania ti itakderan dayta a numero?
11 Ania ti itakderan ti numero a 24, tangay nakita ni Juan dagiti 24 a panglakayen iti aglikmut ti trono? Iti adu a pamay-an, dagiti 24 a panglakayen ket inladawan dagiti matalek a padi iti nagkauna nga Israel. Insurat ni apostol Pedro kadagiti napulotan a Kristiano: “Dakayo ket ‘maysa a napili a puli, maysa a naarian a kinapadi, maysa a nasantuan a nasion, maysa nga ili nga agpaay a naisangsangayan a sanikua.’” (1 Pedro 2:9) Makapainteres ta nabingaybingay iti 24 a benneg, wenno grupo, dagiti nagkauna a papadi a Judio. Adda batang ti tunggal benneg nga agserbi ken Jehova iti sumagmamano a lawas iti kada tawen, tapno agtultuloy a maaramid ti sagrado a panagserbi. (1 Cronicas 24:5-19) Maikanatad ngarud nga adda 24 a panglakayen a nailadawan iti sirmata ni Juan maipapan iti nailangitan a kinapadi gapu ta agtultuloy nga awan ressatna ti panagserbi dagitoy a padi ken Jehova. Inton makompleto, addanto 24 a benneg a tunggal maysa ket buklen ti 6,000 a nagballigi, ta kuna kadatayo ti Apocalipsis 14:1-4 a dagiti 144,000 (24 x 6,000) ket “nagatang dagitoy manipud iti sangatauan” tapno agtakderda iti nailangitan a Bantay Sion a kadua ti Kordero a ni Jesu-Kristo. Yantangay ti numero a 12 itakderanna ti kinabalanse ti organisasion ti Dios, ti ngarud 24 doblien wenno patibkerenna ti kasta nga urnos.
Dagiti Kimat, Timek, ken Gurruod
12. Ania ti sumaganad a makita ken mangngeg ni Juan, ken ania ti ipalagip ‘dagiti kimat ken timek ken gurruod’?
12 Ania ti sumaganad a makita ken mangngeg ni Juan? “Ket manipud iti trono adda rumrummuar a kimkimat ken timtimek ken gurgurruod.” (Apocalipsis 4:5a) Anian a nagsayaat a pammalagip daytoy iti dadduma pay a nakaam-amak a pannakaiparangarang ti nailangitan a pannakabalin ni Jehova! Kas pagarigan, kastoy ti impadamag ni Moises idi “simmalog” ni Jehova idiay Bantay Sinai: “Iti maikatlo nga aldaw idi bimmigaten naaramid a nangrugi a naggurgurruod ken nagkimkimat, ken adda napuskol nga ulep iti rabaw ti bantay ken natbag unay nga uni ti tangguyob. . . . Idi a ti uni ti tangguyob nagtultuloy a pumigpigsa, nangrugi nga agsao ni Moises, ket ti pudno a Dios nangrugi a sumungbat kenkuana babaen iti timek.”—Exodo 19:16-19.
13. Ania ti iladladawan dagiti kimat a naggapu iti trono ni Jehova?
13 Iti aldaw ti Apo, iparangarang ni Jehova ti pannakabalin ken presensiana iti nangayed a pamay-an. Saan, saan a babaen ti literal a kimat gapu ta bin-ig a pagilasinan dagiti makitkita ni Juan. Ania ngarud ti iladladawan dagiti kimat? Bueno, mangted lawag ti agkakanabsiit a kimat, ngem mabalin met a matay ti asinoman a mapuntaanna. Ngarud, dagiti kimat a naggapu iti trono ni Jehova maitutop nga iladawanda dagiti agsasaruno a lawag nga agtultuloy nga ipapaayna iti ilina ken, nangnangruna dagiti umap-apuy a mensahe maipapan iti panangukomna.—Idiligmo ti Salmo 18:14; 144:5, 6; Mateo 4:14-17; 24:27.
14. Kasano a mangngegan dagiti timek ita?
14 Dagiti ngay timek? Idi simmalog ni Jehova idiay Bantay Sinai, adda timek a nagsao ken Moises. (Exodo 19:19) Adu kadagiti bilin ken proklamasion iti libro nga Apocalipsis ti naited babaen ti timek manipud langit. (Apocalipsis 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Iti kaaldawantayo, mangipapaay met ni Jehova kadagiti bilin ken proklamasion iti ilina, a manglawlawag iti pannakatarusda kadagiti padto ken prinsipio iti Biblia. Masansan a maipalgak dagiti makaited lawag nga impormasion kadagiti internasional a kombension, ket kalpasanna, maipakaammo dagiti kasta a kinapudno iti Biblia iti intero a lubong. Kastoy ti kinuna ni apostol Pablo maipapan kadagiti matalek a manangaskasaba iti naimbag a damag: “Ay ket, iti kinapudnona, ‘iti intero a daga rimmuar ti timekda, ket agingga kadagiti ungto ti mapagnaedan a daga ti sasaoda.’”—Roma 10:18.
15. Iti daytoy a paset ti aldaw ti Apo, ania dagiti gurruod a naggapu iti trono?
15 Masansan a ti kimat ket sarunuen ti gurruod. Tinukoy ni David ti literal a gurruod kas “timek ni Jehova.” (Salmo 29:3, 4) Nadakamat a naggapu ken Jehova ti gurruod idi Isu ket nakidangadang kadagiti kabusor ni David. (2 Samuel 22:14; Salmo 18:13) Ni Eliu kinunana ken Job a kasla gurruod ti timek ni Jehova, bayat nga ar-aramidenna “ti naindaklan a bambanag a saantayo a maammuan.” (Job 37:4, 5) Iti daytoy a paset ti aldaw ti Apo, ‘naggurruod’ ni Jehova, a mamakpakdaar maipapan kadagiti naindaklan nga aramid nga iwayatnanto kadagiti kabusorna. Dagiti simboliko a gumgumluong a gurruod ket maulit-ulit nga agkallangugan iti intero a daga. Naragsakka no im-imdengam dagitoy a gumgumluong a proklamasion ken nainsiriban nga us-usarem ti dilam a mangpapigsa pay kadagitoy!—Isaias 50:4, 5; 61:1, 2.
Dagiti Pagsilawan nga Apuy ken ti Simmarming a Baybay
16. Ania ti itakderan dagiti “pito a pagsilawan nga apuy”?
16 Ania pay ti nakita ni Juan? Daytoy: “Ket adda pito a pagsilawan nga apuy a sumsumged iti sanguanan ti trono, ket dagitoy kaipapananda ti pito nga espiritu ti Dios. Ket iti sanguanan ti trono adda ti, no ar-arigen, maysa a simmarming a baybay nga umasping iti kristal.” (Apocalipsis 4:5b, 6a) Ibaga kadatayo ni Juan a mismo ti itakderan dagiti pito a pagsilawan: “Dagitoy kaipapananda ti pito nga espiritu ti Dios.” Ti numero a pito isimbolona ti nadibinuan a kinakompleto; ngarud, dagiti pito a pagsilawan irepresentarda ti kinanaan-anay ti mangted lawag a puersa ti nasantuan nga espiritu. Anian a yaman ti klase Juan ita gapu ta naitalek kadakuada daytoy a pannakalawag, nga addaan responsabilidad a mangyallatiw iti dayta kadagiti tattao a mabisbisin iti naespirituan iti intero a daga! Anian a ragsaktayo ta kada tawen ginasut a milion a kopia ti Pagwanawanan ti agtultuloy a mangisilsilnag iti daytoy a lawag iti agarup 150 a lenguahe!—Salmo 43:3.
17. Ania ti isimbolo ti “simmarming a baybay nga umasping iti kristal”?
17 Nakita pay ni Juan ti “simmarming a baybay nga umasping iti kristal.” Ania ti isimbolo daytoy no maipapan kadagidiay naawis iti nailangitan a paraangan ni Jehova? Nadakamat ni Pablo ti wagas a panangsantipikar ni Jesus iti kongregasion, ‘a dinalusanna a binugguan iti danum babaen ti sao.’ (Efeso 5:26) Sakbay ti ipapatayna, kinuna ni Jesus kadagiti adalanna: “Nadaluskayon gapu iti sao a sinaok kadakayo.” (Juan 15:3) No kasta, ti simmarming a baybay nga umasping iti kristal nalawag nga irepresentarna ti mangdalus a naisurat a Sao ti Dios. Dagidiay kameng ti naarian a kinapadi a dumatag iti presensia ni Jehova nasken a nadalusanda a naan-anay babaen ti Saona.
Kitaem—“Uppat a Sibibiag a Parsua”!
18. Ania ti nakita ni Juan iti tengnga ken iti aglawlaw ti trono?
18 Adda sabali pay a banag a nakita ni Juan. Insuratna: “Ket iti tengnga ti trono ken iti aglawlaw ti trono adda uppat a sibibiag a parsua a napno iti matmata iti sanguanan ken iti likudan.”—Apocalipsis 4:6b.
19. Ania ti iladladawan dagiti uppat a sibibiag a parsua, ken kasanotayo nga ammo dayta?
19 Ania ti iladladawan dagitoy a parsua? Ti sirmata nga insurat ti sabali pay a mammadto a ni Ezequiel, tulongannatayo a mangbirok iti sungbat. Nakita ni Ezequiel a situtugaw ni Jehova iti tronona iti nailangitan a karuahe, a kaduana dagiti sibibiag a parsua a kas kadagidiay dineskribir ni Juan ti langada. (Ezequiel 1:5-11, 22-28) Kalpasanna, nakita manen ni Ezequiel dayta a karuahe a trono agraman dagiti sibibiag a parsua. Ngem iti daytoy a gundaway, dinakamatna a kerubin dagiti sibibiag a parsua. (Ezequiel 10:9-15) Dagiti uppat a sibibiag a parsua a nakita ni Juan mabalin nga irepresentarda dagiti adu a kerubin ti Dios—dagiti parsua a nangato ti saadda iti organisasion ti Dios a buklen dagiti espiritu a parsua. Mabalin a saan a karkarna ken Juan ti makakita kadagiti kerubin a naisaad iti asideg a mismo ni Jehova, yantangay iti urnos ti nagkauna a tabernakulo, adda dua a kerubin iti rabaw ti balitok nga akkub ti lakasa ti tulag a mangirepresentar iti trono ni Jehova. Iti nagbaetan dagitoy a kerubin, nangted ti timek ni Jehova kadagiti bilin maipaay iti nasion ti Israel.—Exodo 25:22; Salmo 80:1.
20. Iti ania a pamay-an a maikuna a dagiti uppat a sibibiag a parsua addada “iti tengnga ti trono ken iti aglawlaw ti trono”?
20 Adda dagitoy nga uppat a sibibiag a parsua “iti tengnga ti trono ken iti aglawlaw ti trono.” Ania ti eksakto a kaipapanan daytoy? Mabalin nga iladawan daytoy a naisaadda iti aglikmut ti trono iti pamay-an a tunggal maysa sitatakder iti tengnga ti tunggal sikigan ti trono. Gapuna, kastoy ti panangipaulog dagiti nagipatarus iti Today’s English Version iti dayta orihinal a Griego a sao: “iti aglikmut ti trono iti tunggal sikiganna.” Wenno saan, mabalin met nga ipakita dayta nga ebkas a dagiti uppat a sibibiag a parsua addada iti makintengnga a paset idiay langit nga ayan ti trono. Mabalin a dayta ti gapuna no apay a kastoy ti panangipatarus ti The Jerusalem Bible: “iti tengnga, a nanglikmut iti mismo a trono.” Ti napateg isu ti kinaasideg dagiti kerubin iti trono ni Jehova, a mayarig kadagidiay kerubin a nakita ni Ezequiel iti tunggal suli ti arig karuahe nga organisasion ni Jehova. (Ezequiel 1:15-22) Maitunos amin daytoy kadagiti sasao iti Salmo 99:1: “Ni met laeng Jehova nagbalinen nga ari. . . . Isu agtugtugaw iti rabaw dagiti kerubin.”
21, 22. (a) Kasano a dineskribir ni Juan dagiti uppat a sibibiag a parsua? (b) Ania ti irepresentar ti langa ti tunggal maysa kadagiti uppat a sibibiag a parsua?
21 Kinuna pay ni Juan: “Ket ti umuna a sibibiag a parsua umasping iti leon, ket ti maikadua a sibibiag a parsua umasping iti urbon a toro, ket ti maikatlo a sibibiag a parsua addaan iti rupa nga umasping iti rupa ti tao, ket ti maikapat a sibibiag a parsua umasping iti tumaytayab nga agila.” (Apocalipsis 4:7) Apay nga agsasabali ti langa dagitoy nga uppat a sibibiag a parsua? Nabatad a dagitoy nagduduma ti langada a sibibiag a parsua itampokda dagiti espesipiko a galad ti Dios. Umuna, ti umasping iti leon. Iti Biblia, nausar ti leon kas simbolo ti kinatured, nangnangruna no iti panangannurot iti kinahustisia ken kinalinteg. (2 Samuel 17:10; Proverbio 28:1) Ngarud, ti leon maitutop nga irepresentarna ti natured a kinahustisia ti Dios. (Deuteronomio 32:4; Salmo 89:14) Umarngi iti urbon a toro ti maikadua a sibibiag a parsua. Ania a galad ti ipalagip kenka ti toro? Ti toro ket napateg a sanikua kadagiti Israelita gapu iti pigsana. (Proverbio 14:4; kitaem met ti Job 39:9-11.) Ti ngarud urbon a toro iladawanna ti pannakabalin, dinamiko nga enerhia nga ipapaay ni Jehova.—Salmo 62:11; Isaias 40:26.
22 Ti maikatlo a sibibiag a parsua adda rupana a kasla iti tao. Nalawag nga iladawan daytoy ti nadiosan nga ayat, yantangay ditoy daga, tao laeng ti naparsua iti ladawan ti Dios, a nagaladan iti kasayaatan a kita ti ayat. (Genesis 1:26-28; Mateo 22:36-40; 1 Juan 4:8, 16) Awan duadua nga iparparangarang dagiti kerubin daytoy a galad bayat nga agserserbida iti aglikmut ti trono ni Jehova. Ti ngay maikapat a sibibiag a parsua? Umarngi daytoy iti agtaytayab nga agila. Impalagip a mismo ni Jehova no kasano kapigsa ti panagkita ti agila: “Agingga iti adayo kumitkita dagiti matana.” (Job 39:29) No kasta, ti agila maitutop nga iladawanna ti di matukod a sirib. Ni Jehova ti Gubuayan ti sirib. Ipakpakat dagiti kerubin ti nadiosan a sirib bayat nga itungtungpalda dagiti bilin ti Dios.—Proverbio 2:6; Santiago 3:17.
Agallangogan ti Dayaw ni Jehova
23. Ania ti ipasimudaag ti banag a dagiti uppat a sibibiag a parsua “napnoda iti matmata,” ken ania ti ipaganetget ti banag nga addaanda iti tallo a paris ti payak?
23 Intuloy ni Juan ti panangdeskribirna: “Ket no maipapan iti uppat a sibibiag a parsua, tunggal maysa kadakuada addaan iti sagiinnem a payak; iti aglikmut ken iti sirok napnoda iti matmata. Ket awan ti panaginanada iti aldaw ken rabii bayat a kunaenda: ‘Santo, santo, santo ni Jehova a Dios, ti Mannakabalin-amin, nga adda idi ken adda ita ken um-umay.’” (Apocalipsis 4:8) Ti pannakapunnoda iti mata ipasimudaagna ti naan-anay ken adayo a panagkita. Awan sarday nga us-usaren daytoy dagiti uppat a sibibiag a parsua, ta saanda a kasapulan ti maturog. Tultuladenda Daydiay a maipapan kenkuana adda a naisurat: “No maipapan ken Jehova, mapan nga agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.” (2 Cronicas 16:9) Makita dagiti kerubin ti sadinoman gapu iti kinaadu ti matada. Awan ti makalisi iti imatangda. Naan-anay ngarud a nakasaganada nga agserbi iti Dios iti panangukomna. Naikuna maipapan kenkuana: “Dagiti mata ni Jehova addada iti amin a lugar, a sisisiput kadagidiay dakes ken kadagidiay naimbag.” (Proverbio 15:3) Ken gapu ta tallo a paris ti payakda—nausar iti Biblia ti numero a tallo a mangipaganetget—kabaelan dagiti kerubin ti agtignay a kas iti kapartak ti kimat tapno ipakaammo ken iwayatda dagiti pangngeddeng ni Jehova.
24. Kasano ti panangidayaw dagiti kerubin ken ni Jehova, ket ania ti kaipapanan daytoy?
24 Imdengam! Makaay-ayo ken makagutugot ti kanta a pangidayaw dagiti kerubin ken Jehova: “Santo, santo, santo ni Jehova a Dios, ti Mannakabalin-amin, nga adda idi ken adda ita ken um-umay.” Manen, ti tallo ipasimudaagna ti panangipaganetget. Sititibker a pasingkedan dagiti kerubin ti kinasanto ni Jehova a Dios. Isu ti Gubuayan ken ti kangatuan nga Estandarte ti kinasanto. Isu pay ti “Ari ti kinaagnanayon,” ti kanayon nga “Alfa ken ti Omega, ti umuna ken ti maudi, ti pangrugian ken ti panungpalan.” (1 Timoteo 1:17; Apocalipsis 22:13) Awan sarday dagiti kerubin a mangiwarwaragawag kadagiti di mapatasan a galad ni Jehova iti sanguanan ti amin a parsua.
25. Kasano a nagkaykaysa dagiti sibibiag a parsua ken dagiti 24 a panglakayen iti panangidayaw ken Jehova?
25 Agallangogan idiay langit dagiti langit dagiti ebkas ti panagdaydayaw ken Jehova! Intuloy ni Juan ti panangiladawanna: “Ket kaanoman a dagiti sibibiag a parsua mangipaayda iti dayag ken dayaw ken panagyaman iti Daydiay situtugaw iti trono, Daydiay sibibiag iti agnanayon ken awan inggana, ti duapulo ket uppat a panglakayen agruknoyda iti sanguanan Daydiay situtugaw iti trono ket daydayawenda Daydiay sibibiag iti agnanayon ken awan inggana, ket ipuruakda dagiti koronada iti sanguanan ti trono, a kunkunada: ‘Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.’” (Apocalipsis 4:9-11) Iti intero a Kasuratan, daytoy ti maysa kadagiti kadaegan nga ebkas ti panagdayaw ken ni Jehova a Dios ken Soberano nga Apotayo!
26. Apay nga impuruak dagiti 24 a panglakayen dagiti koronada iti sanguanan ni Jehova?
26 Addaan dagiti 24 a panglakayen iti panagpampanunot a kas iti imparangarang ni Jesus, nga uray la impuruakda dagiti koronada iti sanguanan ni Jehova. Adayo iti panunotda nga itan-okda ti bagida iti saklang ti Dios. Sipapakumbaba a bigbigenda a ti kakaisuna a panggep ti kinaarida isu ti panangidayaw ken panangitan-okda kenkuana, kas iti kanayon nga ar-aramiden ni Jesus. (Filipos 2:5, 6, 9-11) Buyogen ti panagpasakup a bigbigenda ti kinanumoda ken aklonenda nga agpannuray iti kinasoberano ni Jehova ti panagturayda. Iti kasta, naimpusuan a makituntunosda kadagiti kerubin ken iti dadduma pay a matalek a parsua a mangidayaw ken mangitan-ok iti Dios a namarsua iti amin a banag.—Salmo 150:1-6.
27, 28. (a) Ania koma ti epektona kadatayo ti sirmata a dineskribir ni Juan? (b) Ania dagiti tumaud a saludsod no maipapan iti sumaruno a nakita ken nangngeg ni Juan?
27 Siasino ti di matignay a mangbasa iti daytoy a sirmata nga insalaysay ni Juan? Nagdaeg ken nakangayngayed daytoy! Ngem anianto ketdin nga ad-adda pay a kasta ti mismo a langit? Ti mismo a kinadayag ni Jehova ti mangparegta la ketdi iti siasinoman nga addaan iti manangapresiar a puso a makidanggay kadagiti uppat a sibibiag a parsua ken dagiti 24 a panglakayen a mangidayaw Kenkuana, iti kararag ken iti publiko a panangiwaragawag iti naganna. Daytoy ti Dios a pribilehio a pagserserbian dagiti Kristiano ita kas saksina. (Isaias 43:10) Laglagipentayo nga agaplikar ti sirmata ni Juan iti aldaw ti Apo, a pagbibiagantayo ita. Sidadaan dagiti “pito nga espiritu” a mangidalan ken mangpabileg kadatayo. (Galacia 5:16-18) Adda ti Sao ti Dios a tumulong kadatayo ita nga agbalin a nasantuan iti panagserbitayo iti nasantuan a Dios. (1 Pedro 1:14-16) Sigurado a naragsaktayo a mangbasa a sipipigsa kadagiti sasao iti daytoy a padto. (Apocalipsis 1:3) Anian a panangparegtada kadatayo nga agbalin a matalek ken Jehova ket ditay ipalubos a singaen ti lubong ti narayray a panagkantatayo kas panangidayaw kenkuana!—1 Juan 2:15-17.
28 Agingga iti daytoy a punto, dineskribir laeng ni Juan ti nakitana idi naawis a sumrek iti silulukat a ruangan sadi langit. Kangrunaan iti amin, impakaammona a situtugaw ni Jehova iti nailangitan a tronona buyogen ti naan-anay a kinaranga ti kinadayag ken kinatan-okna. Isu ket nalikmut iti kabibilgan kadagiti amin nga organisasion—naraniag no iti kinangayed ken kinasungdona. Madaman ti bista iti Pangukoman ti Dios. (Daniel 7:9, 10, 18) Nakasaganan ti entablado para iti karkarna a pasamak. Ania a pasamak, ken kasano a maapektarannatayo dayta ita? Buyaentayo bayat a maibuksilan ti eksena!
[Ladawan iti panid 75]
[Ladawan iti panid 78]