PATMOS

Maysa nga isla a nakaidestieruan ni apostol Juan “gapu iti panagsao maipapan iti Dios ken panangsaksi ken Jesus.” (Apo 1:9) Bayat ti kaaddana sadiay, naawatna ti Apocalipsis. Sigun iti nabayagen a patpatien, ni Juan, ket indestiero ni Domitian iti isla ti Patmos, ngem naluk-atan kalpasan ti ipapatay daytoy nga agturay (96 K.P.).​—The Ante-Nicene Fathers, Tomo VIII, p. 562, “Acts of the Holy Apostle and Evangelist John the Theologian.”

Ti Patmos ket masarakan iti Baybay Icaria (maysa a paset ti Aegeano) nga agarup 55 km (34 mi) iti laud ti Asia Menor, ken agarup 60 km (37 mi) manipud laud nga abagatan-a-laud ti Mileto ken nakurang a 240 km (150 mi) manipud amin a pito a kongregasion nga espesipiko a natukoy iti Apocalipsis kapitulo 2 ken 3. Daytoy bassit nga isla a pinataud ti bulkan ket agsikkosikko ti aplayana ken nakatiktikag ken nakabatbato. Ngem ita, maimulmulan sadiay ti trigo, olibo, ken ubas. Nalawag a gapu ta naiputputong ti Patmos, agraman ti dadduma pay nga isla iti Aegeano, nagserbi dayta kas isla a pagbaludan.