Dimtengen ti Oras ti Panangukom ti Dios
“Agbutengkay iti Dios ket isu dayawenyo, ta dimtengen ti oras ti panangukomna.”—APOCALIPSIS 14:7.
1. Ania ti iraman dagiti panglukat a kapitulo iti Apocalipsis?
TI LIBRO ti Apocalipsis naglaon kadagiti makaparagsak a padpadto nga addaan iti kaitungpalan iti kaaldawantayo. Ti napalabas nga artikulo inusigna ti dadduma kadakuada, agraman ti pannakalukat dagiti innem a simboliko a selio. Dagitoy a nalukatan a selio impalgakda ti makadadael a panagsakay dagiti uppat nga apokaliptiko a managkabayo kadagitoy “maudi nga al-aldaw.” (2 Timoteo 3:1; Apocalipsis 6:1-8) Dagitoy ibagada met ti maipapan kadagidiay agturayto a kadua ni Kristo idiay langit ken dagidiay a makalasat “iti dakkel a rigat” tapno agbiag iti daga iti agnanayon. Dagiti innem a selio ipakitada a ti “naituding a panawen” ti panangibanag ti Dios iti panangukom “ket asidegen.”—Apocalipsis 1:3; 7:4, 9-17.
2. Kasanonto a mausar dagiti pito a simboliko a tangguyob iti Apocalipsis kapitulo 8?
2 Ngem adda pay maysa a selio, ti maikapito. Ibaga kadatayo ti Apocalipsis 8:2 ti naipalgak idi a daytat’ nalukatan: “Ket nakitak dagiti pito nga anghel nga agtaktakder iti sanguanan ti Dios, ket naited kadakuada dagiti pito a tangguyob.” Kuna ti Apo 8 bersikulo 6: “Ket dagidi pito nga anghel, a nangiggem kadagidi pito a tangguyob, nagsaganada nga agtangguyob.” Idi panawen ti Biblia, mausar dagiti tangguyob a mangipakaammo kadagiti napapateg a paspasamak. Iti kasta met laeng a pamay-an, dagitoy a timek ti pito a tangguyob awaganda ti atensiontayo kadagiti bambanag a kas ti kinapateg ti biag ken patay iti kaaldawantayo. Ket bayat ti panagtangguyob dagiti anghel, dagiti tattao a Saksi ditoy daga sumurotda babaen ti panangisaknapda ti nasken a damag nga inwaragawag ti tunggal timek ti tangguyob.
Ania ti Kaipapanan ti Timek ti Tangguyob
3. Ania ti kaipapanan iti timek dagiti pito a tangguyob?
3 Dagitoy a timek ti tangguyob ipalagipna kadatayo dagiti saplit nga imbukbok ni Jehova idiay kadaanan nga Egipto. Dagitoy a saplit ket ebkas iti panangukom ni Jehova iti dayta nga umuna a pannakabalin ti lubong ken iti ulbod a relihionna, ngem linukatanda met ti dalan iti panagtalaw ti ili ti Dios. Umasping iti dayta, dagiti timek ti tangguyob iti Apocalipsis ket moderno-aldaw a saplit, nga iti daytoy a tiempo maipaay iti intero a lubong ni Satanas ken ti ulbod a relihionna. Dagitoy, nupay kasta, saanda a literal a saplit no di ket dagiti makasaplit a mensahe iti panangukom ni Jehova. Dagitoy ipamatmatda met ti dalan iti panaglisi iti ili ti Dios.
4. Kasano a ti timek dagiti pito a tangguyob nakasarakda iti kaitungpalan iti tiempotayo?
4 Maitunos kadagitoy pito a timek ti tangguyob, dagiti mangbatikos a resolusion a maibusor iti lubong ni Satanas ket naiparang kadagiti pito a naisangsangayan a tinawen a kumbension ti ili ni Jehova manipud 1922 agingga idi 1928. Ginasut a milion a kopia dagiti resolusion ti naiwaras. Nupay kasta, ti panangitangguyob kadagidiay a makasinit a mensahe ket saan laeng a maipaay kadagidiay a tawtawen, no di ket agtultuloy iti intero a maudi nga al-aldaw. Ket itatta ti panangiwaragawag kadakuada ket nabilbileg pay ngem idi, bayat a dagiti minilion iti “dakkel a bunggoy” intipondan dagiti timtimekda iti bassit a grupo dagiti napulotan nga immuna a nangaskasaba kalpasan ti Gubat Sangalubongan I. (Apocalipsis 7:9) Tinawenen, a bumilbileg ken umad-adu, dagitoy a minilion iwaragawagda a ti lubong ni Satanas ket naikeddengen a naan-anay ti pannakadadaelna.
5. Sino ti “kakatlo” iti lubong nga umuna a naukom iti dakes a pannakaukom, ken apay?
5 Idiay Apocalipsis 8:6-12, aguni ti umuna kadagiti uppat a tangguyob. Ti uraro, apuy, ken dara ket maibukbok, a nagbanag iti pannakadadael iti “kakatlo” iti lubong. Apay a “ti kakatlo” a nadakamat kas nakabasol a paset iti lubong ti umuna a maipaayan iti pannakadadael? Agsipud ta nupay amin a sistema ni Satanas ket masapul nga agsungbat iti Dios, ti maysa a paset ad-adda nga agsungbat. Ania a paset? Ti paset a nangnagan iti bagina iti nagan ni Kristo—ti Kakristianuan. Ket idi dimteng dagiti mensahe ti panangukom ti Dios a maibusor kenkuana kalpasan ti Gubat Sangalubongan I, ti iturayan ti Kakristianuan iti dayta a tiempo saklawenna ti agarup kakatlo iti sangatauan.
6. Apay a binaybay-an ni Jehova ti Kakristianuan iti pannakadadael?
6 Ti relihion ti Kakristianuan ket bunga iti 1,900-tawen nga apostasia manipud iti pudno a Kinakristiano nga impadto ni Jesus ken dagiti adalanna. (Mateo 13:24-30; Aramid 20:29, 30) Ti klero iti Kakristianuan irepresentarda dagiti bagbagida a kas mannursuro iti Kinakristiano, ngem dagiti doktrinada ket naiduma unay iti kinapudno ti Biblia, ket dagiti dakes nga ar-aramidda agtultuloy a mangiyeg iti pannakalais ti nagan ti Dios. Ti basolda iti dara gapu iti panangsuportarda kadagiti gubgubat daytoy maika-20 a siglo ket naibutaktaken. Ti Kakristianuan ket interamente a paset iti sistema dagiti bambanag ni Satanas. Gapuna, awatenna ti nabileg, makasaplit a mensahe manipud ken Jehova a mangipakita nga iti aniaman a pamay-an isut’ di maikari iti nadiosan a di pannakaanamong. Binaybay-an ni Jehova ti balay ti Kakristianuan iti pannakadadael a kas ti panangbaybay-ana iti Judio a balay idi immuna a siglo!—Mateo 23:38.
Napagbiag a Maipaay iti Sangalubongan a Panangasaba
7, 8. (a) Iti Apocalipsis kapitulo 9, ania ti ipalgak ti maikalima a timek ti tangguyob? (b) Siasino ti isimbolo dagiti dudon?
7 Idiay Apocalipsis 9:1 ti maikalima nga anghel pinuyotanna ti tangguyobna, ket ti sirmata ipalgakna ti maysa a bituen a bimmaba ditoy daga. Daytoy a bituen addaan iggem a tulbek. Babaen iti dayta linukatanna ti abut isu a nakaipupokan dagiti pangen dagiti dudon. Ti bituen isu ti kabbaro a naipatugaw a nailangitan nga Ari, ni Jesu-Kristo. Dagiti dudon isu dagti ad-adipen ti Dios, a naidadanes ken kasla napukaw idi a dagiti kangrunaan nga opisialda ket naibaludda idi 1918. Ngem ni Kristo, nga addan iti pannakabalin ti Pagarian idiay langit, wayawayaanna ida tapno maitultuloyda ti sangalubongan a publiko a panangasabada, isu a nakaupayan unay ti klero, a nangiplano iti pannakaisardeng iti trabahoda.—Mateo 24:14.
8 Dagiti dudon nadeskribirda idiay Apocalipsis 9:7 iti kastoy a pamay-an: “Ket ti langa dagiti dudon umaspingda kadagiti kabayo a maisagana iti gubat; ket iti rabaw dagiti ul-uloda adda sinan balangat a kasla balitok, ket dagidi ruprupada kasla ruprupa dagiti tattao.” Inayon ti Apo 9 bersikulo 10: “Ket adda ipusda nga umas-asping kadagiti manggagama.” Dagitoy a dudon nasayaat ti panangiladawanda iti napabiag manen a natda dagiti agtawid iti Pagarian a mapmapan manen iti naespirituan a pannakigubat manipud 1919 a nagtultuloy. Buyogen iti napabaro a bileg, inwaragawagda ti makasilud a mensahe ti panangukom ti Dios, nangnangruna maibusor iti dakes a Kakristianuan.
9, 10. (a) Ania ti ipalgak ti maikanem a timek ti tangguyob? (b) Sino ti nairaman iti linaklaksa a nabibileg a kabayo?
9 Sumaganad, pinuyotan ti maikanem nga anghel ti tangguyobna. (Apocalipsis 9:13) Daytoy ipalgakna ti pannakaibaon dagiti armada ti kabalieria. Kunaen ti bersikulo Apo 9 16 a ti bilangda ket “dua a laksa a laksa,” kayatna a sawen 200 a milion! Ket nadeskribir dagitoy iti Apo 9 bersikulo 17 ken 19 a kastoy: “Dagiti ul-ulo dagiti kabayo kasla kadagiti ul-ulo dagiti leon, ket kadagiti ngiwatda rumrummuar ti apuy ken asuk ken azufre. . . . Dagiti ipusda umaspingda kadagiti ul-uleg.” Dagitoy nga armada mangranggasda iti sidong ti panangiturong iti Ari, ni Jesu Kristo. Ket anian a nakaam-amak a buya dagitoy!
10 Ania ti irepresentar dagitoy a nabibileg a kabkabayo? Yantangay ti bilangda ket minilion, dagitoy ket saan a dagiti napulotan a natda, nga adda laengen 8,800 itatta ditoy daga. Dagitoy a linaklaksa a kabkabayo masapul nga iramanna ti “dakkel a bunggoy” iti Apocalipsis kapitulo 7, dagidiay nga addaan iti namnama nga agbiag nga agnanayon iti daga. Iti Biblia, ti sao a “linaklaksa” masansan a tuktukoyenna ti adu, saan a naikeddeng a bilang. Gapuna, dagitoy a simboliko a kabkabayo iramanna saan laeng a dagiti bumasbassiten a bilang dagiti napulotan a natda no di ket ti umad-adu ken bumilbileg ti timekna a minilion a “dakkel a bunggoy” dagiti “sabsabali a karnero” a mangitultuloy ti publiko a trabaho a rinugian ti kasla dudon a napulotan a natda.—Juan 10:16.
11. Apay a maikuna a “ti pannakabalin dagiti kabayo adda kadagiti ngiwatda,” ken kasano ti ‘panangdangranda kadagiti ipusda’?
11 Kunaen ti Apocalipsis 9:19: “Ti pannakabalin dagiti kabayo adda idi kadagiti ngiwatda,” ken “kadagiti [ipusda] mangranggasda.” Iti ania a pamay-an a ti pannakabalinda adda kadagiti ngiwatda? Gapu ta bayat dagiti adu a dekada, babaen iti Teokratiko nga Eskuelaan ti Panagministro ken dagiti dadduma a gimgimong, dagiti ad-adipen ti Dios naisuroda no kasano ti mangikasaba kadagiti mensahe iti panangukomna a buyogen iti pannakabalin ti panangisaoda. Ket iti ania a pamay-an a mangdangranda babaen kadagiti ipusda? Gapu ta inwarasda dagiti binilion a naibatay-Biblia a publikasion iti sangalubongan, a nangibati kadagiti makasilud a mensahe a maibusor iti lubong ni Satanas. Kadagiti kabusorda, dagitoy nga armada ti kabalieria ket pudno a kaslada linaklaksa.
12. Ania ti masapul nga itultuloy nga aramiden dagiti simboliko a dudon ken kabkabayo, ket ania ti epekto dayta?
12 Gapuna, dagiti simboliko a dudon ken kabayo masapul nga iwaragawagda dagiti mensahe ti panangukom ti Dios a nalawlawag pay ken napigpigsa pay bayat ti iyaadani ti aldaw ti panangibalesna. Kadagiti nasingpet-panagpuspusona, dagidiay a mensahe isuda dagiti kasayaatan a damdamag ditoy daga. Ngem kadagidiay a mangaykayat iti lubong ni Satanas, dagitoy ket dakes a damdamag, ta kaipapananda a mabiiten a madadael ti lubongda.
13. “Ti maikatlo nga ay-ay” a nainaig iti maikapito a timek ti tangguyob iramanna ti ania, ket kasano a dayta ket maysa nga “ay-ay”?
13 Ti makasaplit a dudon ken ti armada ti kabalieria nadeskribir a kas ti umuna ken maikadua kadagiti tallo a nadiosan a naikeddeng nga “ay-ay.” (Apocalipsis 9:12; 11:14) Ania “ti maikatlo nga ay-ay”? Idiay Apocalipsis 10:7 naibaga kadatayo: “Kadagiti al-aldaw ti timek ti maikapito nga anghel, . . . isu metten ti pannakatungpalto ti palimed ti Dios kas mayannurot iti naimbag a damag nga isu impakaammona kadagiti ad-adipenna a mammadto.” Daytoy a sagrado a palimed ramanenna ti “bin-i” nga immuna a naikari idiay Eden. (Genesis 3:15) Dayta a “bin-i” kangrunaanna isu ni Jesus ngem iramanna met dagiti napulotan a kakaduana a makipagturayto a kaduana idiay langit. Gapuna ti sagrado a palimed ket maipapan iti nailangitan a Pagarian ti Dios. Daytoy a Pagarian iyegnanto ti maikatlo a nadiosan ti panggepna nga “ay-ay,” ta daytanto ti mangibanag iti panangukom ti Dios a maibusor iti lubong ni Satanas iti panungpalanna.
Naipasdeken ti Pagarian
14. Ania ti inyanunsio ti timek ti maikapito a tangguyob iti Apocalipsis 11:15?
14 Kalpasanna mapasamaken! Kunaen ti Apocalipsis 11:15: “Ket daydi maikapito nga anghel nagtangguyob. Ket simmaruno dagiti dadakkel a timek idiay langit, a kunkunada: ‘Ti pagarian ti lubong nagbalin a kukua ni Apotayo [ni Jehova] ken ni Kristona, ket agarinto nga awan inggana.’” Wen, naiyanunsio a ti Pagarian ti Dios babaen ken Kristo ket naipasdeken idiay langit idi tawen 1914. Ket idi napagbiag manen dagiti natda kalpasan ti Gubat Sangalubongan I, inwaragawagda daytoy a damag.
15. Idi 1922, ania a pasamak ti nangipamatmat iti baro a panagrang-ay ti panangikasaba ti Pagarian
15 Idiay 1922 a kumbension dagiti ad-adipen ni Jehova idiay Cedar Point, Ohio, E.U.A., dagiti rinibribo a timmabuno nangngegda ti makaparagsak nga anunsio: “Daytoy ti aldaw dagiti al-aldaw. Adtoy, ti Ari agturturayen! Dakayo dagiti ahentena iti publiko. Ngarud iwaragawagyo, iwaragawagyo, iwaragawagyo, ti Ari ken ti pagarianna.” Dayta ti nangirugi ti dakkel a publiko a pannakaikasaba ti Pagarian a nangiraman kadagiti panangukom nga inwaragawag dagiti pito nga angheliko a managtangguyob. Itatta, agarup tallo ket kagudua a milion nga ad-adipen ni Jehova iti nasurok a 57,000 a kongregasion iti intero a lubong ti nairaman iti daytoy a sangalubongan a panangikasaba ti Pagarian. Pudno a linaklaksa!
16. Idiay Apocalipsis kapitulo 12, ania pay a pasamak a nakairamanan ti langit ken ti daga ti naipalgak babaen iti timek ti maikapito a tangguyob?
16 Ngem ti maikapito nga anghel ad-adu pay ti ipalgakna. Ti Apocalipsis 12:7 kunaenna nga “adda idi gubat sadi langit.” Ti Apo 12 bersikulo 9 ipaayna kadatayo daytoy a nagbanagan iti panagtignay ni Kristo nga Ari: “Ket naigarangugong daydi dakkel a dragon, daydi uleg a kadaanan nga isu ti managan ti Diablo ken Satanas, isu a mangallilaw iti isuamin a lubong; naitappuak ditoy daga, ket dagidi anghelna naitappuakda a naikanunong kenkuana.” Inayon pay ti Apo 12 bersikulo 12: “Gapuna agrag-okayo, O langlangit ken dakayo nga agnaed kadakuada!” Wen, ti langlangit ket nadalusanen iti impluensia ni Satanas, banag a mangyeg rag-o kadagiti matalek nga anghel. Ngem aniat’ kaipapanan daytoy iti sangatauan? Dayta met laeng a bersikulo sungbatanna: “Asikayo pay daga ken baybay, ta ti Diablo immulog kadakayo nga addaan dakkel a pungtot, nga ammona a bassiten ti tiempona.”
17. Apay a ti panangiladawan iti sangalubongan a gobierno a kas “maysa nga atap nga animal” iti Apocalipsis kapitulo 13 ket maitutop?
17 Ti Apocalipsis 12:3 deskribirenna ni Satanas a kas ‘maysa a dakkel a dragon, nga adda pito nga ulona ken sangapulo a sarana,’ maysa a nagdakkelan a kasla animal a manangdadael. Daytoy ti mangipakita nga isu ti nangdisenio iti naindagaan a napolitikaan nga “atap nga animal” a nadeskribir idiay kapitulo 13, bersikulo 1 ken 2. Dayta nga animal addaan met iti pito nga ulo ken sangapulo a sara, kas panangtulad ken Satanas. Kunaen ti Apo 13 bersikulo 2: “Inted daydi dragon [ni Satanas] kenkuana ti pannakabalinna ken ti tronona ken dakkel a kinaturay.” Ti panangiladawan kadagiti napolitikaan a gobgobierno kas maysa nga atap nga animal ket pudno a maitutop, ta iti daytoy laeng maika-20 a siglo, nasurok a sangagasut a milion a tattao ti napapatay kadagiti gubgubat dagiti nasnasion.
18. Ania ti dua ti sarana nga animal iti Apocalipsis 13:11, ket kasano a dagiti tigtignayna tulongannatayo a mangilasin iti dayta?
18 Ti sumaganad nga eksena iti Apocalipsis 13 ipalgakna, kas kunaen ti bersikulo 11, ti “sabali nga atap nga animal nga immuli manipud iti daga, ket adda dua a sarana a kasla ti maysa a kordero, ket agsasao idi a kas dragon.” Daytoy a dua ti sarana nga animal isu ti Anglo-Americano a nagkadua iti politika. Dayta ket kasla maysa a kordero ta agpampammarang a saan a bumusor, napudno unay a porma iti gobierno. Ngem agsasao a kas iti dragon, kas ken ni Satanas, ket naawagan “sabali nga atap nga animal” agsipud ta ti panangiturayna ket kas iti animal. Parigatenna ken butbutngenna ken mangusar pay iti kinaranggas no ti pamay-an ti panangiturayna ket saan a maawat. Paregtaenna, saan a ti panagpaituray iti Pagarian ti Dios, no di ket, ti panagpaituray iti lubong ni Satanas. Dayta ti gapu no apay a kunaen ti Apo 13 bersikulo 14: “Ket allilawenna dagiti agnaed iti rabaw ti daga.”
19, 20. (a) Ania ti idemonstrar ti kinatarnaw dagiti ad-adipen ni Jehova? (b) Kasano nga ammotayo a ti napulotan a natda pudno nga agballigi iti lubong ni Satanas?
19 Daytoy a lubong iti sidong ti panangituray ni Satanas ket narigat a lugar a pagbiagan para kadagidiay saan a paset iti dayta, kas maitunos iti bilin ni Jesus kadagiti Kristiano. (Juan 17:16) Gapuna, daytat’ maysa a naisangsangayan a demonstrasion iti pannakabalin ken bendision ni Jehova a dagiti ad-adipenna iti intero a lubong itatta salsalimetmetanda ti kinatarnawda ken sangsangkamaysa nga itultuloyda nga idayaw ni Jehova ken dagiti nalinteg a daldalanna. Aramidenda daytoy iti sidong ti nakaro nga ibubusor, pannakaidadanes, ken uray pay ipapatay.
20 Ti napulotan a natda nangnangruna isuda dagiti puntiria ni Satanas agsipud ta dagitoy dagiti kakadua ni Kristo nga agturay. Ngem ti Apocalipsis kapitulo 14 ipakitana a ti naan-anay a bilangda, 144,000, ket sibaballigi a naurnongen a kadua ni Kristo iti Naarian a pannakabalin. Dagitoy sisusungdo a nagtalinaedda a kadua ti Apoda, ta kas kunaen ti Apo 14 bersikulo 4: “Dagitoy dagiti sumursurot iti Kordero uray adino a papananna”—ket daytoy aramidenda nupay adda narungsot a panangidadanes ni Satanas kadakuada.
Panangawat nga Umuna kadagiti Panangukom ti Dios
21, 22. (a) Ania dagiti anunsio nga inaramid dagiti anghel idiay Apocalipsis 14:7, 8? (b) Apay a ti anghel inyanunsiona ti pannakarba ti relihiuso a Babilonia idinto ta adda pay met laeng dayta?
21 Idiay Apocalipsis 14:7 maysa nga anghel ti nagkuna iti dakkel a timek: “Agbutengkay iti Dios ket isu dayawenyo, ta dimtengen ti oras ti panangukomna, ket agdaydayawkayo iti Daydiay nangaramid iti langit ken iti daga ken iti baybay ken kadagiti ubbog dagiti dandanum.” Sino ti umuna a makaawat iti makadangran a panangukom ti Dios? Sumungbat ti Apo 14 bersikulo 8: “Ket ti sabali nga anghel, a maikadua, simmaruno a kunkunana: ‘Narba! Narba ti Babilonia a Dakkel, isu a nangpainum kadagiti isuamin a pagpagarian iti arak ti pungtot gapu iti pannakikamalalana!’” Ditoy iti damdamo unay, ngem saan nga iti maudi, ti Apocalipsis saritaenna ti “Babilonia a Dakkel,” ti sangalubongan nga imperio ti ulbod a relihion.
22 Yantangay ti relihion addaan pay laeng iti impluensia kadagiti nadumaduma a paspaset iti daga, apay nga inyanunsio ti anghel a ti Babilonia a Dakkel ket narban? Bueno, ania ti napasamak idi 539 K.K.P. idi narba ti kadaanan a Babilonia ngem saan pay a naan-anay a nadadael? Ket, dagiti nakautibo nga ad-adipen ni Jehova nagsublida iti dagada dua a tawen kalpasanna ket insublida ti pudno a panagdayaw! Iti kasta met laeng a pamay-an, ti pannakaisubli dagiti ad-adipen ti Dios iti napabaro a panagtrabaho ken iti naespirituan a kinarang-ay a nangrugi idi 1919 ket nalawag a pammaneknek nga idin, idi 1919, napadasan ti Babilonia a Dakkel ti pannakarba iti panangmatmat ni Jehova. Isu ti nangkondenar kenkuana idin iti pannakapukawna kamaudiananna.
23. (a) Kasano a maisagsagana ti pannakadadael ti Babilonia a Dakkel? (b) Ania pay dagiti padpadto a mausigto iti sumaganad a bilang iti Ti Pagwanawanan?
23 Kas pakpakauna iti umadanin a pannakapukawna, ti moderno a Babilonia nakagtengen iti nakaro a parikut. Ti kinadakesna, ti nakalablabes nga imoralidadna, ti panagkuskusitna, ken ti pannakinaminna iti politika naibutaktaken iti amin a lugar. Iti kaaduan idiay Europa, sumagmamano laengen a tattao ti mapan makimisa. Kadagiti adu a sosialistiko a pagpagilian, ti relihion ket maibilbilang a kas “ti opium iti tattao.” Kasta met, ti moderno a Babilonia ket malalais iti imatang dagiti amin a managayat iti kinapudno ti Sao ti Dios. Gapuna isut’ agur-urayen, a kaiyariganna, addan iti linea iti ipapatay a maipaay iti maitutop a pannakapukawna. Wen, “ti naituding a panawen asidegen” a maipaay kadagiti makariribuk ti lubong a paspasamak! Ket ti sumaganad a bilang iti Pagwanawanan, dagiti dadduma pay nga artikulo a pagadalan salaysayendanto dagiti padpadto iti Apocalipsis maipapan iti umadanin a pannakadadael ti relihiuso a “balangkantis,” agraman ti intero a sistema dagiti bambanag ni Satanas.
Kasano ti Isusungbatyo?
◻ Ania ti kaipapanan ti timek dagiti pito a tangguyob a nangrugi idiay Apocalipsis kapitulo 8 maipaay iti kaaldawantayo?
◻ Apay nga umuna a maukom iti dakes a pannakaukom ti Kakristianuan?
◻ Kasano a nadeskribir ti trabaho a panangaskasaba dagiti napulotan a natda idiay Apocalipsis kapitulo 9?
◻ Ania idi ti kaipapanan ti anunsio idiay Apocalipsis 11:15 maipaay iti langit ken ti daga?
◻ Kas nadeskribir idiay Apocalipsis 14:8, kasano a narba ti relihiuso a Babilonia idi 1919, ket ania ti kaipapanan daytoy para kenkuana?