Dadaelento Kadi ti Tao ti Daga?

Sigun iti nagkauna a mannurat ti Biblia, nakaab-ababa ti biag ti tao no idilig iti kinaagnanayon ti daga. Kinapudnona, iti rinibun a tawen, adun a henerasion ti naglabas. Ngem nakaskasdaaw ta agtultuloy ti planeta a Daga a mangsustento iti biag.

Kuna ti dadduma a dakkel ti nagbalbaliwan ti lubong sipud idi Gubat Sangalubongan II. Uray iti ababa a panagbiag ti tao, nakitatayo ti dakkel a nagrang-ayan ti transportasion, komunikasion, ken ti dadduma a teknolohia a nagresulta iti dakkel a panagbalbaliw iti ekonomia. Adu ita ti nanam-ay ti panagbiagda a dida impagarup a mapasaranda dagita. Ita, dandanin ag-triple ti populasion ti lubong.

Ngem siempre, adda epektona amin dagita a panagbalbaliw. Madaddadael dagiti natural a siklo ti daga gapu iti ar-aramid ti tao. Kinapudnona, agbibiagtayon iti tiempo nga inawagan ti dadduma a sientista iti Anthropocene​—ti tiempo a nakaron ti panangdadael ti tao iti planetatayo.

Impadto ti Biblia nga addanto tiempo a ti tao ‘dadaelenna ti daga.’ (Apocalipsis 11:18) Pampanunoten ti dadduma no agbibiagtayon iti dayta a tiempo. Kasano pay kakaro ti panangdadael ti tao? Interamente kadi a dadaelento ti tao ti daga?

MADADAEL KADI NGA INTERAMENTE?

Talaga kadi a madadael nga interamente ti daga? Saan a maibaga ti dadduma a sientista no ania ti epekto dagita a panagbalbaliw. Gapuna, maseknanda di la ket ta madadael ti daga gapu iti bigla ken di mapakpakadaan a panagbaliw iti klima.

Alaentayo a pagarigan ti kayeluan iti West Antarctic. Patien ti dadduma a no agtultuloy ti panagbara ti globo, agtultuloy met a marunaw daytoy a kayeluan. Ngamin, gagangay nga iballatek ti napuskol a yelo ti silnag ti init, ngem no marunaw ken umingpis dayta, sumaruten ti silnag ti init iti uneg ti baybay. Kalpasanna, bumara ti rabaw ti baybay ken agtultuloy a marunaw ti ad-adu pay a yelo. Kas resulta, umadalem ti baybay a mabalin a pakadangran ti minilion a tattao.