Adda Aya Asinoman a Nakakitan iti Dios?

“TI AGDINDINAMAG a patriarka Abraham, a nagbiag nasurok a 1,900 a tawtawen sakbay ti pannakaiyanak ni Jesu-Kristo, ti sibabara a minatmatan ti Namarsuatayo ta isut’ naawagan “gayyem ti Dios.” (Santiago 2:23, Byington) No adda asinoman a maikkan iti pribilehio a makakita iti Dios, pudno unay ni Abraham dayta a tao. Iti naminsan nga okasion, tallo a sangaili ti immay kenkuana nga addaan iti nadiosan a mensahe. Inawagan ni Abraham ti maysa kadakuada kas ni Jehova. Kaipapanan kadi daytoy nga aktual a nakita ni Abraham ti Dios?

Daytoy a salaysay ti masarakan idiay Genesis 18:1-3. Sadiay intay mabasa: “Ket ni Jehova nagparang kenkuana iti caroblean ni Mamre, idi adda a situtugaw iti ruangan ti sapaw iti kapudot ti aldaw. Ket intangadna dagiti matana ket kinitana ket adtoy, tallo a lallaki sitatakderda iti sanguananna. Ket idi nakitana ida napan simmabet kadakuada nanipud iti ruangan ti sapaw ket nagruknoy agingga iti daga. Ket kinunana: ‘Jehova, no ita, nasarakak ti parabur kadagiti matam, dawatek kenka a dika labasan ti adipenmo.’”

Kamaudiananna, idi ni Abraham ken dagiti tallo a sangailina tantannawaganda ti Sodoma manipud iti nangato a disso, dua ti pimmanaw a mangkita iti siudad. Kalpasanna kuna ti Ge 18 bersikulo 22: “Ngem no maipapan ken Jehova, isu ti kaskasdi a sitatakder pay laeng iti sanguanan ni Abraham.” Agparang iti daytoy a ti Dios adda ken ni Abraham iti nakawesan ti lasag a bagi. Daytoy ti mabalin a patien dagiti dadduma a tattao a kunada a ti Dios ken ni Jesu-Kristo maymaysada ken isu met laeng a persona.

Maipapan iti Genesis 18:3, insurat ti eskolar ti Biblia a ni Melancthon W. Jacobus: “Ditoy agparang ti Dios iti damdamona iti rekord kas tao kadagiti tattao, tapno ipakita ti kinapudno ti Kinaisuna, ken ti relasionna kadagiti tattao, ket iti daytoy gagangay nga aramid ipasiguradona iti patriarka ti Nasantuan a pannakipatpatang ken pannakikadkadua.” Dagidiay addaan iti daytoy a panangmatmat ipatoda a ni Abraham aktual a nakitana ni Jehova kadagiti pisikal a matana ket dagiti tattao a nakakita ken ni Jesu-Kristo nakitada met ti Dios. Ngem daytoy a konklusion kadi ket maitunos iti Biblia?

No Ania ti Kinuna ni Jesus

Imbes nga inyanunsiona nga isut’ Dios nga adda iti lasag, kinuna ni Jesu-Kristo: “Siak ti Anak ti Dios.” (Juan 10:36) Kas perpekto a pannakabagi ni Jehova a Dios, kinuna met ni Jesus: “Awan ti pannakabalinko nga agaramid a sisiak iti uray ania; kas iti mangngegko, mangukomak; ket ti panangukomko nalinteg, ta diak sapulen ti nakemko no di ket ti nakem ti nangibaon kaniak.” (Juan 5:30) Idi ni Jesus adda iti kayo a pagtutuokan, nagkararag iti naindaklan a Namarsua idiay langit, nga isut’ inawaganna kas “Diosko, Diosko.” (Mateo 27:46) Kalpasan ti panagungarna, kinuna ni Jesus ken Maria Magdalena: “Umuliak ken Amak ken Amayo ken iti Diosko ken Diosyo.” (Juan 20:1, 17) Yantangay ni Jesu-Kristo ket saan nga isu ti naglasag a Dios, awan asinoman a nakakita ken ni Jesus ti makapagkuna nga isu ket nakitanan ti Dios.

Ni Juan, ti apostol a dinungdungngo unay ni Jesus, ti nangpatalged iti kinapudno a dagiti apostoles saanda a nakita a pulos ti Dios idi a nakitada ni Jesus. Iti paltiing, kinuna ni Juan: “Awan ti nakakita iti Dios uray kaano.” (Juan 1:18) Ngarud, asino ti nakita ni Abraham? Ti kapadasan ni Moises tulongannatayo a mangsapul iti sungbat.

No Kasano a Nakita ni Moises ti Dios

Naminsan inyebkas ni Moises ti tarigagayna a makita ti Dios. Idiay Exodo 33:18-20, mabasatayo: “‘Iparangmo kaniak [ni Moises] dawatek kenka, ti dayagmo.’ Ngem kinunana [ti Dios]: ‘Ipakitakto amin nga imbagko iti sangom ket ibunannagkonto ti nagan ni Jehova iti sangom; ket managparaburakto iti pagparaburakto, ket kaasiakto ti kayatkonto a kaasian.’ Ket innayonna pay: ‘Dika mabalin a kitaen ti rupak, ta awan ti tao a makakita kaniak ket agbiag.’”

Ti impalubos ti Dios ken Moises a makita isu ti aglabas a dayagna. Kuna ti . Ex 33 bersikulo 21-23: “Ket ni Jehova kinunana: ‘Adtoy adda maysa a yan nga asideg kaniak, ket agtakderkanto iti rabaw ti bato. Ket maaramidto a no lumabas ti dayagko, ikabilkanto iti maysa a tengnga ti bato, ket salinongankanto iti imak inggana iti diak makalabas. Ket ilisikto ti imak, ket sika makitamto ti likudak. Ngem ti rupak saanmonto a makita.’”

Maitunos iti kinuna ni Jehova ken ni Moises ken ti kinuna ni apostol Juan, awan nakita ni Moises a nakawesan ti lasag wenno material a porma iti Dios. Ti laeng nakita ni Moises isut’ dayag ti nasantuan a kaaddana a lumablabas. Uray pay iti dayta isut’ masapul a masalakniban. Kaawatan, saan a ti Dios a mismo ti nakita ni Moises.

Idi nakisao ni Moises iti Dios a “rupan-rupa,” kas kunana idiay Exodo 33:11, isut’ saan a nakipinnerreng ken ni Jehova. Daytoy a sasao ipamatmatna ti wagas a pannakisao ni Moises iti Dios, saan nga iti inna nakita. Ti pannakisao iti Dios a “rupan-rupa” ipamatmatna ti panagpatpatang ti dua. Umasping iti dayta, mabalinan ti maysa nga indibidual ti maaddaan ti pannakipatang iti maysa babaen iti telepono a dina makitkita daydiay sabali a tao.

Idi ni Moises nakisao iti Dios ken immawat iti instruksion kenkuana, ti pannakikomunikar ket saan a babaen kadagiti sirmata, kas masansan a kaso kadagiti dadduma a mammadto. Makita daytoy idiay Numeros 12:6-8, a sadiay intay mabasa: “Ket kinunana: ‘Denggenyo ita dagiti sasaok. No adda maysa a mammadto kadakayo nga agpaay ken ni Jehova, ipakaammokto kenkuana ti bagik iti maysa a parparmata. Makisaoakto kenkuana iti tagtagainep. Ni adipenko a Moises saan a kasta! Isu ti matalek iti amin a balayko. Kenkuana makisaoakto iti ngiwan-ngiwat a nabatad met laeng, ket saan nga iti nalimed a palpalawag; ket makitananto ti langa ni Jehova.’” Ket iti ania a kaipapanan a ni Moises nakitana “ti langa ni Jehova”?

Ni Moises “nakitana ti langa ni Jehova” idi isu, ni Aaron, ken dagiti dadduma a lallaki addada idiay Bantay Sinai. Idiay Exodo 24:10, adda a naisurat: “Ket nakitada ti Dios ti Israel. Ket adda kasla nabaldosaan iti bato a sapiro iti babaen dagiti dapanna ket kasla pumadmad iti langit gapu iti lawagna.” Ngem kasano a ni Moises ken dagiti dadduma a lallaki “nakitada ti Dios ti Israel,” yantangay kinuna ti Dios kenkuana, “Awan tao a makakita kaniak ket agbiag”? Ilawlawag ti Ex 24 bersikulo 11, ta kunana: “Ket kadagiti natan-ok kadagiti annak ti Israel saanna nga inkabil ti imana, ket naaddaanda ti parparmata iti pudno a Dios ket nanganda ket naginumda.” Gapuna ti langa ti Dios a nakita da Moises ken dagiti dadduma ket babaen iti maysa a parmata.

Dagiti Angheliko a Pannakabagi

Saanen a nasken para iti naindaklan a Namarsua iti uniberso a bumaba manipud iti natan-ok a lugarna iti langit tapno mangipan kadagiti mensahe kadagiti dadduma a tattao. Malaksid kadagiti tallo a nailanad a pasamak idi a ti mismo a timek ti Dios ket nangngegan bayat nga adda ditoy daga ti Anakna, ni Jehova ti kanayon a nangus-usar kadagiti anghel a mangiyallatiw kadagiti mensahena. (Mateo 3:17; 17:5; Juan 12:28) Uray pay ti linteg nga inted ti Dios iti nasion ti Israel idiay Bantay Sinai ket naiyallatiw babaen kadagiti anghel, nupay ni Moises ti nairepresentar a makisasao a direkta iti Dios a mismo. Maipapan iti daytoy, nagsurat ni apostol Pablo: “Ania, ngarud, ti Linteg? Isu nainayon gapu kadagiti salungasing, agingga iti iyaay ti bin-i isu a nakaipaayan ti kari; ket napatalgedan gapu kadagiti anghel iti ima ti maysa a mangibabaet.”​—Galacia 3:19.

A ni Moises aktual a nakisao iti maysa nga anghel a personal a nangirepresentar iti Dios naipamatmat met idiay Aramid 7:38, a kunana: “Daytoy daydi nagyan iti gimong iti let-ang a kadua ti anghel a makisasao kenkuana idiay Bantay Sinai ken agraman dagiti ammatayo.” Dayta nga anghel ti personal a pannakangiwat ni Jehova a Dios, ti Namarsua, gapuna nakisao ken ni Moises a kasla ti Dios a mismo ti makisasao.

Ti anghel a nangiyawat iti mensahe ti Dios ken ni Moises idiay dumardarang a kayo ket maysa met a pannakangiwatna. Isut’ nailasin kas anghel ni Jehova idiay Exodo 3:2, a sadiay naibaga kadatayo: “Ket ti anghel ni Jehova nagparang kenkuana iti maysa a gil-ayab ti apuy iti tengnga ti maysa a kayo a bassit.” Ti Ex 3 bersikulo 4 kunana: “Ket ni Jehova idi makitana a simmibay nga agbuya, ti Dios inawaganna nanipud iti tengnga ti kayo a bassit.” Idiay Ex 3 bersikulo 6, daytoy angheliko a pannakangiwat ti Dios kinunana: “Siak ti Dios ni amam, ti Dios ni Abraham, ti Dios ni Isaac ken ti Dios ni Jacob.” Gapuna no makisasao iti daytoy personal a pannakabagi ti Dios, ni Moises ti kasla makisasao a mismo ken ni Jehova.​—Exodo 4:10.

Iti maika-6 a kapitulo ti Oc-ocom, makakitatayo ti sabali pay a pangarigan iti tao a makisasao iti Dios babaen iti angheliko a pannakabagi. Iyam-ammo ti Uk 6 bersikulo 11 ti nangiyawat ti mensahe kas ti “anghel ni Jehova.” Sadiay mabasatayo: “Ket ti anghel ni Jehova immay ket nagtugaw iti sirok ti lugo nga adda idiay Ofra, a naipatagikua ken ni Joas nga Abeiezerita, ket ni anakna a Gedeon adda nga agsaksaksak idi ti trigo idiay pagpespesan ti ubas tapno isu mailemmengna kadagiti Madianitas.” Daytoy a mensahero, “anghel ni Jehova,” iti kalpasanna nairepresentar a kasla isu a mismo ni Jehova a Dios. Idiay Uk 6 bersikulo 14 ken 15, mabasatayo: “Ket ni Jehova kimmita kenkuana [ni Gedeon] ket kinunana: ‘Inka iti daytoy a pigsam, ket ispalem ala ti Israel iti ima ti Madian. Saan aya a siak ti agbaon kenka?’ Ket isu kinunana kenkuana: ‘O Jehova, iti ania ti pangispalkonto iti Israel?’” Gapuna ti naglasag nga anghel a nakita ni Gedeon ken isu ti nakisaritaanna ti nairepresentar iti salaysay ti Biblia a kasla isu ti Dios a mismo. Iti Uk 6 bersikulo 22, kuna ni Gedeon: “Agsipud ta nakitak ti anghel ni Jehova iti rupanrupa!” Ti anghel ti nagsao nga apagpag-isu iti sinao ti Dios kenkuana. Gapuna, ni Gedeon nakisao iti Dios babaen iti angheliko a pannakangiwat.

Usigenyo pay met, ti kaso ni Manoa ken ti asawana, dagiti nagannak ken ni Samson. Daytoy a salaysay saritaenna met ti angheliko a mensahero kas “anghel ni Jehova” ken “ti anghel ti pudno a Dios.” (Oc-ocom 13:2-18) Iti Uk 13 bersikulo 22, kuna ni Manoa ken ni asawana: “Data pudno a mataytanto, ta nakitata ti Dios.” Nupay saanna a nakita nga aktual ni Jehova a Dios, patien ni Manoa a kasta agsipud ta nakitana ti naglasag a personal a pannakangiwat ti Dios.

“Awan Tao a Nakakita iti Dios”

Itan posible a matarusan no apay a nakisao ni Abraham iti naglasag nga angheliko a pannakangiwat ti Dios a kasla isu ti makisasao ken Jehova a Dios a mismo. Yantangay daytoy nga anghel nagsao nga apagpag-isu iti kayat ti Dios a paibaga ken ni Abraham ket ngarud personal nga adda sadiay a mangibagi Kenkuana, ti rekord ti Biblia maikunana a “ni Jehova nagparang kenkuana.”​—Genesis 18:1.

Laglagipenyo a ti angheliko a pannakangiwat ti Dios mabalinna a maiyallatiw dagiti mensahena nga apagpag-isu kas iti telepono wenno radio maiyallatiwna dagiti sasao iti sabali a tao. Gapuna, mabalin a matarusan no kasano a ni Abraham, Moises, Manoa, ken dagiti dadduma nabalinanda ti makisao iti naglasag nga anghel a kasla makisasaoda iti Dios. Nupay dagita nga indibidual nakitada dagitoy nga anghel ken ti dayag ni Jehova a naisarming kadakuada, saanda a nabaelan a nakita ti Dios. Ngarud, daytoy ket saan a maisuppiat iti sao ni apostol Juan: “Awan ti nakakita iti Dios uray kaano.” (Juan 1:18) Ti nakita dagiti tattao isuda dagiti angheliko a pannakabagi ket saan a ti Dios a mismo.