Ilalapsut iti Organisado a Krimen “Maysaak Idi a Yakuza”
“PAPA, inton agawidka, agkuyogtanto a mapan makigimong. Karim kaniak, di ngamin?” Naawatko daytoy a surat manipud iti maikadua a balasangko idi naibaludak iti maikatlo a daras. Kanayon a tumabuno kadagiti gimong dagiti Saksi ni Jehova a kadua ti asawak. Gapu ta dagiti surat ti pamiliak ti kakaisuna a gubuayan ti liwliwak, inkarik kenkuana nga aramidek ti kiniddawna.
‘Apay nga agbibiagak a kriminal a mangyadayo kaniak iti pamiliak?’ kinunak iti bagik. Nalagipko dagidi aldaw nga ubingak pay unay. Natay ni Tatang idi 18 a bulanko pay laeng, isu a diak man la malagip ti rupana. Namindua a nakiasawa ni Nanang kalpasan dayta. Nakaro ti panangapektar dagita a kasasaad ti pamilia kaniak, ket idi addaak iti haiskul rinugiak ti nakikadua kadagiti butangero. Nagbalinak a naranggas ken masansan a nairaman iti pannakiranget iti ruar ti eskuelaan. Idi addaakon iti maikadua a tawen ti haiskul, nangorganisarak iti grupo dagiti estudiante a manglaban iti sabali a grupo. Kas resulta, naaresto ket naibaonak iti maysa a koreksional nga institusion iti sumagmamano a tiempo.
Kayarigak ti maysa a bola nga agtultulid a sumalog iti naranggas a panagbiag. Di nagbayag, nangbukelak iti grupo dagiti delingkuente, ket agpallailangkami iti opisina ti grupo ti yakuza. Idi agtawenak iti 18, nagbalinakon a miembro dayta a grupo. Idi agtawenak iti 20, naarestoak gapu iti nadumaduma a kinaranggas nga aramid ket nasentensiaanak iti tallo a tawen a pannakabalud. Umuna, naibaludak idiay Nara Juvenile Prison, ngem saan a simmayaat ti kababalinko. Gapuna naibaonak iti sabali a pagbaludan, daydiay pakaibalbaludan dagiti adulto. Ngem kimmaro ti kababalinko ket nagtungpalak kamaudiananna idiay Kyoto, iti maysa a pagbaludan dagiti napeklan a kriminal.
‘Apay nga itultuloyko nga aramiden dagita a krimen?’ sinaludsodak ti bagik. No lagipek ti napalabas, mabigbigko a maigapu dayta iti minamaag a panagrasrasonko. Idi, pagarupko a ti kasta a kababalin ket malalaki, pammaneknek iti kinamalalakik. Idi nawayawayaanak iti pagbaludan idi agtawenak iti 25, dagiti kakaduak a butangero rinaraemdak a kas natan-ok a tao. Ita, nalukatanen ti gundaway a maingato ti saadko iti ummong dagiti kriminal.
Ti Reaksion ti Pamiliak
Nangasawaak iti dayta a tiempo, ket di nagbayag naaddaankami ken ni baketko iti dua nga annak a babbai. Ngem, saan a nagbalbaliw ti biagko. Agkaraawid ken agkarasubliak kadagiti polis—kabkabilek dagiti tattao ken mangikkikilak. Tunggal insidente tinulongannak a manggun-od iti panagraem dagiti padak a butangero ken ti panagtalek ti amok. Kamaudiananna, ti immun-una a yakuza a “kabsatko” nagun-odanna ti kangatuan a saad iti barkada ket nagbalin nga amo. Naragsakanak ta nagun-odak ti maikadua a saad.
‘Ania ti rikna ni baketko ken dagiti annakko iti wagas ti panagbiagko?’ kinunak iti bagik. Mabalin a mabainda ta adda kriminal nga asawa ken amada. Naibaludak manen idi agtawenak iti 30 ken idi manen agtawenak iti 32. Iti daytoy a tiempo, ti tallo a tawen a pannakabalud ket talaga a narigatkon nga ibturan. Saan a mapalubosan dagiti annakko nga umay bumisita kaniak. Mailiwak a makipatang ken mangarakup kadakuada.
Idi tiempo a kaserserrekko iti naudi a pannakaibaludko, rinugian ni baketko ti nakipagadal iti Biblia kadagiti Saksi ni Jehova. Inaldaw-aldaw a sinuratannak maipapan iti kinapudno a maad-adalna. Pinampanunotko, ‘Ania daytoy kinapudno a sarsaritaen ti asawak?’ Nabasak ti intero a Biblia bayat a naibaludak. Inamirisko ti ibagbaga ni baketko kadagiti suratna maipapan iti namnama iti masanguanan ken ti panggep ti Dios.
Ti namnama dagiti tattao nga agbiag nga agnanayon iti Paraiso a daga ket makaawis agsipud ta pudno a maamakak iti ipapatay. Sangkapanunotko, ‘No matayka, sika ti lugi.’ No lagipek ti napalabas, mabigbigko a ti panagamak iti ipapatay ti nangiduron kaniak a mangdangran kadagiti sabsabali sakbay a madangrandak. Impabigbig met dagiti surat ti asawak a kinakawaw ti kalatko a ngumato ti saadko iti ummong ti barkada.
Kaskasdi, diak natignay a mangadal iti kinapudno. Indedikar ni baketko ti bagina ken Jehova ket nagbalin a maysa a nabautisaran a Saksina. Nupay iti suratko immanamongak a tumabuno kadagiti gimongda, diak pampanunoten idi ti agbalin a maysa kadagiti Saksi ni Jehova. Mariknak a kasla immadayon ti asawak ken dagiti annakko kaniak, a pinanawandakon.
Iruruar iti Pagbaludan
Kamaudiananna, dimtengen ti aldaw a mawayawayaanak. Idiay ruangan ti Pagbaludan ti Nagoya, adu a butangero ti naglilinia a mangabrasa kaniak. Iti dakkel a bunggoy dagiti tattao, nupay kasta, birbirokek laeng ti asawak ken dagiti babbalasangko. Idi nakitak dagiti babbalasangko, nga adut’ dinakkelandan iti tallo a tawen ken innem a bulan, nakaluaak.
Dua nga aldaw kalpasan ti panagawidko, tinungpalko ti karik iti maikadua a balasangko ket timmabunoak iti gimong dagiti Saksi ni Jehova. Nasdaawak a makakita iti kinaragsak dagiti amin a timmabuno. Sibabara nga inabrasadak dagiti Saksi, ngem kasla saanak a maikari. Idi naammuak idi agangay a pagaammo dagidiay kimmablaaw kaniak ti kriminal a kasasaadko, nakarkaro manen ti siddaawko. Nariknak ti kinabarada, nupay kasta, ket nagustuak ti naipalawag a naikugnal iti Biblia. Daytat’ maipapan kadagiti tattao nga agbiag nga agnanayon iti Paraiso a daga.
Ti panangpampanunot iti asawak ken dagiti babbalasangko a makalasat a sumrek iti Paraiso ken ti pannakadadaelko riniribuknak unay. Inutobko a naimbag no ania ti aramidek tapno agbiagak nga agnanayon a kadua ti pamiliak. Inamirisko ti ilalapsut iti panagbiagko kas maysa a butangero, ket rinugiak ti nagadal iti Biblia.
Ilalapsut iti Kriminal a Panagbiagko
Sinardengakon ti tumabuno kadagiti gimong ti barkada ket simmardengakon a makikadkadua iti yakuza. Saan a nalaka ti mangbalbaliw iti panagpampanunotko. Pagragragsakak laeng ti agmaneho iti dakkel a kotse a nagatang iti sabali a pagilian—tapno mangpennek laeng iti riknak. Tallo a tawen ti napalabas sakbay nga inlakok ti kotsek ken gimmatang iti kalalainganna a modelo. Agannayasak met a mangsapul iti kalakaan a pamuspusan. Nupay kasta, bayat a naammuak ti kinapudno, makitak a masapul nga agbalbaliwak. Ngem kas kunaen ti Jeremias 17:9, “ti puso manangallilaw a nakarkaro ngem dagiti amin a banag, ket isu napalalo a nagdakes.” Ammok no ania ti nalinteg ngem marigatanak a mangyaplikar iti nasursurok. Kasla nagdakkelan a bantay dagiti parikut a sangsanguek. Mariribukanak, ket namin-ano a daras a pinanunotko nga isardeng ti panagadal ket baybay-akon ti panagbalin a maysa kadagiti Saksi ni Jehova.
Idin, inawis ti mangyad-adal iti Biblia kaniak ti maysa nga agdaldaliasat a manangaywan a kapadak idi ti kasasaadna nga agpalawag iti kongregasionmi. Manipud Akita, nga 400 a milia ti kaadayona, immay idiay Suzuka a mangparegta kaniak. Kalpasan dayta, no mabannoganak ket panunotekon ti sumardeng, makaawatak iti surat a naggapu kenkuana, a damdamagenna no kankanayon a magmagnaak iti dana ti Apo.
Kanayon a nagkararagak ken Jehova a tulongannak a lumapsut kadagiti amin a pannakainaigko iti yakuza. Nagtalekak a sungbatan ni Jehova ti kararagko. Idi Abril 1987, nabaelak met laengen ti limmapsut iti organisasion a yakuza. Agsipud ta ti negosiok binulan a mapanak iti ballasiw-taaw, a panawak ti pamiliak, binaliwak ti trabahok iti panagdianitor. Daytoy inikkannak iti tiempo iti malem a maipaay kadagiti naespirituan nga aramid. Iti damdamo unay, nakaawatak iti sueldo. Bassit laeng, ngem pinaragsaknak unay.
Idi addaak iti maikadua a saad iti organisasion a yakuza, nabaknangak, ngem itan adda naespirituan a kinabaknangko a di agkupas. Am-ammok ni Jehova. Ammok dagiti panggepna. Adda dagiti alagadek a prinsipio. Addaanak kadagiti pudno a gagayyem a mangipateg. Iti ummong ti yakuza, pammarang laeng ti panangipateg dagiti butangero, ngem awan uray maysa nga am-ammok a yakuza, a mangisakripisio iti biagna a maipaay kadagiti sabsabali.
Idi Agosto 1988, insimbolokon ti dedikasionko ken Jehova babaen ti bautismo iti danum, ket iti simmaganad a bulan, rinugiakon ti mangbusbos iti 60 nga oras iti binulan a mangipakpakaammo kadagiti sabsabali iti naimbag a damag a nangbalbaliw iti biagko. Agserserbiakon kas amin-tiempo a ministro nanipud pay idi Marso 1989 ket ita naikkanakon iti pribilehio nga agserbi kas ministerial nga adipen iti kongregasion.
Naikkatkon ti kaaduan a pakakitaan ti yakuza a panagbiagko. Nupay kasta, adda maysa a nabati. Dayta ti batek iti bagik a mangipalagip kaniak, agraman iti pamiliak ken dagiti sabsabali, a nagbiagak idi a yakuza. Naminsan, ti inauna a balasangko nagawid manipud eskuelaan nga agsangsangit, nga ibagbagana a saanen nga ageskuela agsipud ta imbaga dagiti gagayyemna a maysaak a yakuza ket addaanak kadagiti batek. Naisalaysayko a naimbag dayta a banag kadagiti babbalasangko, ket naawatanda ti kasasaad. Segseggaak ti aldaw inton agbalinen a paraiso ti daga ket ti lasagko agbalinto a ‘nasalsalibukag ngem ti lasag ti maysa nga ubing.’ Iti kasta dagiti batekko ken dagiti pakalaglagipan iti 20 a tawen a panagbiagko a yakuza mapalabasdanton. (Job 33:25; Apocalipsis 21:4)—Kas insalaysay ni Yasuo Kataoka.
[Ladawan iti panid 11]
Segseggaak ti aldaw inton mapukawton dagiti batekko
[Ladawan iti panid 13]
Idiay Kingdom Hall a kaduak ti pamiliak