Manipud Dalan ni Patay Nagturong iti Dalan ti Biag
ITI adu a tawen ti biagko ket nadangran gaput’ adiksionko iti droga. Nangrugiak babaen kadagiti suabe a droga ket nagpatinggaak kadagiti naing-ingel pay, kas ti LSD. Ti droga nagbalin a nangisimbolo ti wayawaya manipud amin a kita dagiti problema a personal ken sosial. Nakalkaldaang, pinarparegtak pay dagiti dadduma nga agtutubo a kumuyog kaniak iti dalan nga agturong ken patay.
Gapu ta pagaammodak a managlako ti droga, siak ti sipsiputan ti polisia. Aminek a mabutbutengak, ta ammok a no matiliwanak kaipapananna ti adu a tawen idiay pagbaludan. Nupay agbibiagak iti panagsensennaay, daytat’ di imdas a nangbalbaliw iti daldalanko.
Siak ti pinadpadas a tulongan dagiti dadakkelko babaen ti panangipanda kaniak iti pagtaengan dagiti madaddadael ti isipna tapno paagasandak. Ninamnamada a dagiti agas ken panangagas sadiay ti mangsolbar iti problemak, ngem apaman a makaruarak, nalasin dagiti dadakkelko nga uray ti medikal a pannakaagas ket di makabalbaliw kaniak. Pinadpadasdak a tulongan manen babaen ti pannakisarita ti maysa a padi kaniak. Di met nagkurri daytoy. Nagsigarilioak ti marihuana ken nagbartekak iti sanguananna, a kasla isut’ awan sadiay. Diak latta a kinayat ti agbalbaliw!
Ni Oriana, a nobiak, bumusor unay iti panagbibiagko, ket diak met kayat a panawannak. Iti sanguanan amin daytoy, kasla nagsayaat a pammaregta daytoy nga agbalbaliwak. Ngem, imbes ketdi, intultuloyko a sililimed ti bisiok iti droga. Naipapatik ken Oriana a masakitak. Di nagbayag narakraken ti kinataok. Kankanayon nga ikarkarik iti bagik nga agsardengakon, a matngelakon dayta, ngem daytat’ awan amin serbina. Ad-adda ketdi nga umad-adayoak nga agturturong iti dalan ni patay.
Gapu ta kayatko nga agkasarkamin ken Oriana iti mabiiten, immasidegkami iti maysa nga interior decorator tapno tarimnenna ti apartmentmi. Ti asawana ket maysa kadagiti Saksi ni Jehova, ket isut’ nangisarsarita kadakami maipapan iti pammatina. Idi damo ti panagpatpatang nakaaramid ti naun-uneg nga impresion ken ni Oriana ngem siak, ngem bayat a rumangrang-ay dayta, nalasinko a dagiti Saksi ni Jehova mamatida a sititibker nga iti mabiiten pagbalinen ti Dios daytoy a daga a paraiso ket dagiti tattao agbiagdanto ditoy nga agnanayon iti kinatalna.
Kayatko a maammuan a mismo no pudno met laeng nga “uray itan dagiti Saksi ni Jehova mangipakpakitada ti ayat ken panagraem iti maysa ken maysa,” kas kinuna ti babai. Gapuna siak ken ni Oriana ti napan idiay Kingdom Hall. Mababainak pay gaput’ atiddog a buokko ken ti pisang-pisang a badok, ngem ti panangabrasa nga impaay dagiti Saksi kaniak ti namagbalin a kaslaakon maysa kadakuada. Mariknak a mabalinko ida a talken. Nabatad a ti napasnek nga ayat ken panagraem iti maysa ken maysa ket maysan a kinapudno kadakuada.
Manipud iti dayta nga aldaw, nangrugiakon a regular a tumabtabuno ti Nakristianuan a panaggigimong, ket nangrugiak a makipagadal ti Biblia kadagiti Saksi ni Jehova. Nagpakurtarakon ken binaliwakon ti panagbadbadok, ket buyogen ti dakkel a panagregget, nabalinak met laengen nga insardeng ti panagsigarilio ken panagdroga. (2 Corinto 7:1) Nupay kasta, adda pay maysa a serioso a problema iti biagko. Diak am-ammo, nagbalinakon nga alkoholiko. No aginumak, maiyegak iti gulo. Makisungsungbatak kadagiti tattao ket naimunak unay ken ni Oriana. Natnagak iti nakaro a kinaawan ragsak. (Proverbio 23:29-35) Nagreggetak a parmeken ti bisio, ket babaen ti tulong ni Jehova, ti pannakabalin ti kararag, ken tulong dagiti kakabsat a Kristiano, naparmekko daytoy dakes nga ugali iti biagko.
Siak ken ni baketko ti nabautisaran idi Agosto 23, 1974. Pagyamanan iti kinapudno, itan ti biagmi addan kaipapananna. Yantangay napasublikon ti panagtalekko iti bagik, nagun-odak metten ti panagraemda kaniak idiay pagtrabahuak. Siak ken ni baketko ti makasapsapulen ti nasayaat a kuarta, ngem nadlawmi a bassit unay ti tiempo a nabatin a maipaay iti sagrado a serbisio. No kayatmi a tagiragsaken ti nasingsinged a pannakirelasion ken Jehova, masapul nga agaramidkami ti panagbalbaliw iti biagmi. Ta no saan, addat’ risgo a ti damo nga ayatmi iti kinapudno lumamiisto. Gapuna idi 1979 nagpayunirkamin, nga impaaymi a naan-anay ti biagmi iti panangaskasaba.
Apay nga inaramidko daytoy a desision? Bueno, sadino aya koma ti yankon itatta no awan ti lawag ti kinapudno? Dagidiay kakkakuyogko idi iti dalan ni patay ket no saanda man nga alkoholiko wenno awanandan ti pamilia wenno adda idiay pagbaludan—isudat’ natayen. Ngem, ti mensahe ti Biblia ti nangwayawaya kaniak. Ti panangagas ken kired ti pakinakem saanda nga umanay. Kasapulan ti napigsa a pakatignayan. Ti panangsapul a panangsukay ti pudpudno a pannakipagayam ken Jehova, ti Namarsua, nangipaay ti kasta a pakatignayan. Itan, sipapasnek a tarigagayko nga aramidek ti amin a kabaelak a mangtulong kadagidiay naadipen iti bisio ti droga, agraman dagidiay agsagsagaba wenno agsapsapul ti panangparmek iti problemada. Babaen iti aktibo a pannakiraman iti Nakristianuan a ministerio, siak ken ni baketko ti mangar-aramiden iti dayta. Naaddaankam ti pribilehio a nakatulongen iti adu a tattao nga agturong iti dalan ti biag. Kadagitoy isuda dagiti tallo a tattao a personal nga inyam-ammok iti droga. Iti agdama agserserbiakon kas manangaywan ti sirkito iti makinamianan a paset ti Italia.
Pudno dayta: Ti panangabuso ti droga ket kasla maysa a dalan nga iti di agbayag wenno iti nasapsapa mangiturong kenka ken patay wenno mabalin nga iti ongaong a panagbiag nga awan masanguananna. Di umdas ti sasao a panangiyebkasko ti panagyamanko ken Jehova a Dios! Impakitana kaniak ti dalan a rummuar iti kinasipnget a pagbibiagak ken intudona ti dalan nga agturong iti biag, a napunnot’ lawag, a nangiturong iti agnanayon a masanguanan.—Kas insalaysay ni Ruggero Polotti.