Panangyeg iti Naespirituan a Wayawaya Kadagidiay Nabalud

“UR-URAYENDAKAYO.” “Kadagitoy napalabas a sumagmamano a rabii, natagtagainepko a dumtengkayo.” “Agyamankami ta nangtudingkayo iti maysa a kanayon a bumisita kadakami.” “Kayatmi ti agyaman kadakayo kadagiti amin a bendision a di kaikarian nga inawatmi ken Jehova ken iti organisasionna ken iti naespirituan a taraon a maipapaay iti umiso a tiempo.”

Ania ti nakagapu kadagitoy nga ebkas ti panagyaman? Dagitoy ti sumagmamano kadagiti ebkas a naggapu kadagiti balud iti nadumaduma a pagbaludan idiay Mexico. Apresiarenda ti atension a maaw-awatda kadagiti Saksi ni Jehova, a nangyeg iti naespirituan a wayawaya kadakuada bayat ti kaaddada iti pagbaludan. Adda 42 a pagbaludan idiay Mexico a regular a sarsarungkaran dagiti Saksi ni Jehova tapno ipaay dagiti naespirituan a kasapulan dagiti balud. Maawagan dagitoy a lugar iti Centro Readaptación Social (Social Rehabilitation Center). Iti dadduma kadagitoy a pagbaludan, regular pay a maar-aramid dagiti Nakristianuan a gimong a nagsayaatan dagiti resultana. Kas pagarigan, iti maysa a nabiit pay a panagbilang, adda agarup 380 a tattao a tumabtabuno iti panaggigimong kadagitoy a lugar. Iti dayta a tiempo adda promedio a 350 a maikonkondukta a panangyadal iti Biblia. Tallopulo ket pito ti kualipikadon a mangrugi a mangasaba, ket 32 ti nangidedikaren iti biagda ken Jehova, nga insimbolo daytoy babaen ti bautismo iti danum.

No Kasano a Maaramid ti Trabaho

Kasano nga ar-aramiden dagiti Saksi ni Jehova ti trabahoda a panangasaba kadagitoy a lugar? Umuna mapanda kadagiti opisial a mangay-aywan tapno kiddawenda ti naisurat a pammalubos a sumrek iti pagbaludan, nga ilawlawagda ti panggep ti isasarungkar​—sursuruan dagiti balud no kasanoda a mapasayaat ti kalidad ti biagda ken agserbi iti Dios iti pamay-an a makaay-ayo kenkuana.

Iti tunggal kaso inteden dagiti autoridad ti pammalubosda. Apresiaren dagitoy nga opisial ti panangisuro iti Biblia a maituktukon kadagiti balud. Napaliiw dagiti autoridad ti pagbaludan a tungtungpalen dagiti Saksi ni Jehova dagiti naipasdek a pagalagadan ti seguridad kadagitoy a lugar. Impalubosda kadagitoy a sumarsarungkar a ministro nga usarenda dagiti opisina, panganan, ken pagtrabahuan a pangangayan kadagiti gimongda. Iti maysa a lugar, napalubosan pay dagiti Saksi a mangibangon iti bassit a Kingdom Hall, kas ipakita iti sumaganad a kapadasan nga insalaysay ti maysa nga agdaldaliasat a manangaywan iti abagatan a daya a Mexico.

“Idi kattapog ti 1991 rinugianmi ti simmarungkar iti pagbaludan ti Tehuantepec, Oaxaca, a sadiay nakasarakkami iti nakaro a naespirituan a bisin. Di nagbayag nakairugikami iti 27 a panagadal iti Biblia. Gapu iti interes dagiti balud, nayeskediul ti lima a gimong ti kongregasion. Inkeddeng ti maysa kadagiti balud, a nangipakita iti dakkel nga ayat ken Jehova, ti mangibangon iti maysa a bassit a Kingdom Hall iti uneg ti pagbaludan tapno adda lugar a paggimongan. Napan iti direktor ti pagbaludan ket kiniddawna ti pammalubos, ket mannakitinnulong unay dagiti autoridad. Iti rugrugi ti Disiembre 1992, innem a balud ti kualipikadon nga agibumbunannag ti naimbag a damag. Gapu iti naipakita nga irarang-ay, nayurnos ti pannakaangay ti Memorial iti uneg ti pagbaludan. Kiniddawmi iti direktor ti pagbaludan ti pammalubos a mangiserrek kadagiti emblema​—ti tinapay ken arak​—ket kalpasan ti uppat nga oras a panagsasarita, naited ti pammalubos.

“Naiparparna nga idi Abril 3, 1993 (tallo nga aldaw sakbay ti selebrasion ti Memorial), sumagmamano a balud ti nawayawayaan. Idi naawat ti maysa kadagiti agibumbunannag a balud ti papelesna a mawayawayaan, kiniddawna a makisarita iti direktor ti pagbaludan tapno makagun-od iti pammalubos nga agtalinaed agingga a malpas ti selebrasion ti Memorial. Talaga a namagsiddaaw daytoy iti direktor, ta saan a gagangay daytoy a kiddaw, ngem gapu iti dakkel nga interes ti balud a tumabuno iti Memorial idiay pagbaludan, pinatganna ti kiddaw. Ti Memorial tinabunuan ti 53 a tattao, a nakasangitda gapu iti rag-o idi agngudo ti programa. Nagnunumuanmi nga awagan daytoy a grupo a ‘Freedom Cereso,’ agsipud ta nawayawayaanda iti naespirituan a pamay-an.”

Maapresiar unay ti trabaho dagiti Saksi ni Jehova kadagitoy a lugar. Iti maysa kadagitoy a pagbaludan, sipapanayag nga irekomendar ti tao a mangay-aywan ti itatabuno kadagiti gimong dagiti Saksi ni Jehova kas “agas” para iti napartak a rehabilitasion dagiti balud.

Naballigi a Programa ti Rehabilitasion

Ti trabaho dagiti Saksi ni Jehova nagbanag iti naan-anay a rehabilitasion dagiti adu a balud. Nupay masansan a pudno a dagidiay nabalud agsublida iti panagaramid iti krimen kalpasan a mawayawayaanda, dagidiay pudno nga immawat iti mensahe ti Sao ti Dios naan-anay a nagbalbaliwdan. Ti panagbalbaliwda ipalagipna kadatayo dagiti sasao ni apostol Pablo: “Uray dagiti mannakiabig . . . , wenno dagiti mannanakaw, wenno dagiti naagum a tattao, wenno dagiti managbarbartek, wenno dagiti manangrabngis, wenno dagiti manangkikil didanto tawiden ti pagarian ti Dios. Ket kaskasdi a kasta idi ti sumagmamano kadakayo. Ngem naugasankayon a nadalus, ngem nasantipikarkayon, ngem naideklarakayon a nalinteg iti nagan ni Apotayo a Jesu-Kristo ken babaen iti espiritu ti Diostayo.”​—1 Corinto 6:9-11.

Nabatad ti naisangsangayan a panagbalbaliw iti personalidadda no iyebkasda dagiti riknada. Kastoy ti kuna ni Miguel, nga adda idiay pagbaludan ti Campeche idiay Campeche City: “Itatta maibagak a buyogen ti rag-o nga ibilangko ti bagik a karaman kadagiti sabsabali a karnero nga addaan iti namnama a nailanad iti 2 Pedro 3:13 ken Mateo 5:5.” Nagkomento ni José, nga adda idiay pagbaludan ti Koben, Campeche: “Uray no baludak ken mabalin a nakadakdakes ti krimen nga inaramidko, maawatak a naasi unay ni Jehova ken dumngeg kadagiti kararag ken ararawko. Mabalinna a pakawanen dagiti biddutko ket ikkannak iti gundaway a mangbusbos iti natda pay a biagko a mangiranud iti naimbag a damag maipapan iti Pagarian ti Dios. Agyamankami kadagiti panglakayen gapu ta nangbusbosda iti tiempo a simmarungkar kadakami iti pagbaludan tapno magunggonaankami kadagiti kari ti Pagarian ti Dios. Anian a nagsayaat a bendision! Maikunak kadi a baludak? Saan, inikkannak ni Jehova ti naespirituan a wayawaya a kasapulak.”

Ania ti namagbalbaliw kadagiti mammapatay, manangrames, arsonista, mannanakaw, ken dadduma pay tapno agbalin a nalinteg ti panagbiagda a Kristiano? Sigun kadagitoy met laeng a lallaki, isu ti mamagbalbaliw a pannakabalin ti Sao ti Dios ken ti nasayaat a pannakilangen kadagiti pudno a napasnek a tattao. Ti kaso ni Tiburcio, a naibalud idiay Mazatlán, Sinaloa, iyilustrarna ti balligi daytoy a programa ti rehabilitasion. Isut’ adda idi idiay pagbaludan ti Concordia, Sinaloa, a sadiay naaddaan kadagiti parikut gapu iti naranggas a kababalinna. Maysa kadagiti Saksi ni Jehova ni baketna, ket malmaltratuenna idi [ti asawana], uray no umay sumarungkar kenkuana idiay pagbaludan. Naanus ken intultuloy ti asawana ti sumarungkar kenkuana, gapuna nagkiddaw nga iyeganna iti libro a Mabalinyo ti Agbiag nga Agnanayon iti Paraiso a Daga, isu a rinugianna nga inadal a mismo.a Kalpasanna nagkiddaw nga adda koma umay iti pagbaludan a mangyadal kenkuana. Nangrugin a rumang-ay iti naespirituan, ket simmayaaten ti relasionna kadagiti sabsabali. Nayakar iti pagbaludan idiay Mazatlán a sadiay adda grupo nga agad-adal iti Biblia, ket maysa itan nga agibumbunannag. Kunana: “Itatta, siak agraman ti asawak ken dagiti annakko ken dagiti kaduak a balud, agyamanak unay ta nangngegak dagiti kinapudno ti Biblia iti daytoy a lugar, a manginanama nga iti asideg a masanguanan, mawayawayaanakton ket makatabunoakton kadagiti amin nga asamblea ken gimong ti kongregasion.”

Kasta met ni Conrado, nga agyamyaman unay kadagiti naaramidanna a panagbalbaliw iti biagna. Nakaro dagiti parikutna iti panagasawa isut’ gapuna a pinanawan ni baketna. Liniwliwana ti bagina iti droga. Idi agangay aglaklakon iti droga. Naaresto ken nasentensiaan a mabalud gapu iti panagibibiahena iti marihuana ken cocaine. Idiay pagbaludan adda grupo a makipagad-adal iti Biblia kadagiti Saksi ni Jehova, ket naawis a makipagadal kadakuada. Kastoy ti panangyebkasna iti rikriknana: “Naawisak iti naurnos a pannakaikondukta ti panagadal, ti programa ti panangsukimat babaen kadagiti publikasion, ken ti kinapudno a ti amin ket naibatay iti Biblia. Dagus a kiniddawko ti panagadal iti Biblia ket rinugiak ti timmabuno kadagiti gimong.” Enero 1993 idi. Itatta nawayawayaanen iti pagbaludan ni Conrado ket agtultuloy ti irarang-ayna iti kongregasion Kristiano.

Ti Islas Marías

Idiay Mexico adda pagam-amkan a pagbaludan a buklen dagiti uppat nga isla a maaw-awagan Islas Marías. Makapagbiahe dagiti balud iti intero a pagbaludan nga isla a nakaipupokanda. Daddumat’ agnanaeden sadiay a kadua dagiti assawa ken annakda.

Naipasdek idiay ti maysa a bassit a kongregasion. Tallo a kakabsat a lallaki manipud Mazatlán ti mapan sadiay iti maminsan iti makabulan, a tumulong a mangikondukta kadagiti gimong, mangipaay kadagiti literatura, ken mangparegta. No dadduma mapan sumarungkar ti manangaywan ti sirkito kadakuada. Ti promedio a tumabuno adda iti baet ti 20 ken 25. Adda uppat a bautisado ken dua a di bautisado nga agibumbunannag. Ipadamag ti agdaldaliasat a manangaywan a “dagiti dadduma magnada iti 17 a kilometro [10 a milia] a tumabuno kadagiti gimong iti Domingo ket masapul nga agawidda a dagus kalpasan ti gimong tapno makasublida kadagiti seldada para iti sinaggaysa a panaginagan. Uray pay no napartak ti pannagna, busbosenna ti dua nga oras nga agawid.” Nabiit pay, kinuna ti maysa kadagiti kakabsat, a nakaammo iti kinapudno iti dayta a pagbaludan: “Idi interesadoak a mawayawayaanakon iti mabiit, ngem itan uray kaano a pagayatan ni Jehova, ta iti aniaman a kasasaad adda adu a trabaho nga aramidek ditoy uneg ti pagbaludan.”

Maragsakankami a makakita a ti kinapudno us-usarenna ti bilegna a mangwayawaya kadagiti napasnek a tattao nga agbirbirok iti pamay-an a mangay-ayo ken Jehova. Nasurok a sangadosena kadagitoy, a nakaammo iti kinapudno idiay pagbaludan, ti nawayawayaanen, nabautisaran, ken itan nadayawen ti panagbiagda kas ad-adipen ti Dios, dadduma ti nagbalin payen a panglakayen iti kongregasion. Ti pannakabalin ti Biblia a mangagas kadagiti puso ken mangbalbaliw kadagiti tattao ket nakabilbileg ti pannakaiparangarangna. Apaman a sumrek dagitoy a tattao a naibalud idi gapu iti panagaramid iti dakes iti dalan ti lawag ti Sao ti Dios, mapasaranda ti pudno a wayawaya nga inkari ni Jesus idi kinunana: “Maammuanyonto ti kinapudno, ket ti kinapudno wayawayaannakayto.”​—Juan 8:32; Salmo 119:105.

[Footnote]

[Ladawan iti panid 23]

Adu ti nagunggonaan kadagiti Nakristianuan a kinapudno a nasursuroda iti pagbaludan