“Yegyo ti Amin nga Apagkapullo iti Kamalig”

“Padasendak, pangaasiyo, iti daytoy a banag, . . . no siak diakto luktan kadakayo dagiti tawtawa ti langit.”​—MALAKIAS 3:10.

1. (a) Idi maikalima a siglo K.K.P., aniat’ inyawis ni Jehova iti ilina? (b) Idi umuna a siglo K.P., aniat’ resulta ti iyaay ni Jehova iti templo tapno mangukom?

IDI maikalima a siglo K.K.P., di nagmatalek dagiti Israelitas ken Jehova. Dida inted dagiti apagkapullo ken dagiti di maitutop nga animal ti inyegda iti templo kas datdaton. Nupay kasta, inkari ni Jehova a no yegda ti amin nga apagkapullo iti kamalig, ibuyatna ti aglaplapusanan a bendision. (Malakias 3:8-10) Agarup 500 a tawen kalpasanna, immay ni Jehova, nga imbagi ni Jesus kas babaonenna iti tulag, iti templo idiay Jerusalem tapno mangukom. (Malakias 3:1) Nasarakan a nagkurang ti Israel kas maysa a nasion, ngem sibabaknang a nabendisionan dagidiay nagsubli ken Jehova. (Malakias 3:7) Napulotanda kas naespirituan nga annak ni Jehova, maysa a baro a parsua, “ti Israel ti Dios.”​—Galacia 6:16; Roma 3:25, 26.

2. Kaano a naaddaan ti Malakias 3:1-10 iti maikadua a kaitungpalan, ket aniat’ naiyawis nga aramidentayo mainaig itoy?

² Agarup 1,900 a tawen kalpasan daytoy, idi 1914, naitrono ni Jesus a kas Ari ti nailangitan a Pagarian ti Dios, ket naikeddeng a maaddaan dagiti nadiosan pannakaipaltiingna a sasao idiay Malakias 3:1-10 iti maikadua a kaitungpalan. Mainaig itoy naragsak a pasamak, maaw-awis dagiti Kristiano ita a yegda ti amin nga apagkapullo iti kamalig. No aramidentayo dayta, tagiragsakentayto met dagiti aglaplapusanan a bendision.

3. Siasino ti babaonen a nangisagana ti dalan iti sango ni Jehova (a) idi umuna a siglo? (b) sakbay ti umuna a gubat sangalubongan?

³ Maipanggep iti iyaayna iti templo, kinuna ni Jehova: “Adtoy! Ibaonko ti babaonek, ket isu isaganananto ti dalan iti sangok.” (Malakias 3:1) Kas umuna-siglo a kaitungpalan daytoy, immay ni Juan a Mammautisar iti Israel nga inkaskasabana ti panagbabawi kadagiti basbasol. (Marcos 1:2, 3) Adda kadi trabaho a panangisagana mainaig iti maikadua nga iyaay ni Jehova iti templona? Wen. Kadagiti dekada sakbay ti umuna a gubat sangalubongan, nagparang dagiti Estudiante ti Biblia iti buya ti lubong nga insursuroda dagiti nadalus a doktrina ti Biblia ken imbutaktakda dagiti mangibabain-Dios a kinaulbod, kas dagiti doktrina a Trinidad ken umap-apuy nga impierno. Impakdaarda met ti panagpatingga ti Panawen dagiti Gentil idi 1914. Adu ti nangipangag kadagitoy managawit iti lawag ti kinapudno.​—Salmo 43:3; Mateo 5:14, 16.

4. Ania a saludsod ti nasken a masungbatan bayat ti aldaw ti Apo?

⁴ Nangrugi idi tawen 1914 ti awagan ti Biblia nga “aldaw ti Apo.” (Apocalipsis 1:10) Maaramid dagiti napateg a pasamak bayat dayta nga aldaw, agraman ti pannakailasin ti “matalek ken naannad nga adipen” ken ti pannakadutok dayta “nga agaywan kadagiti amin a gameng [ti Apo].” (Mateo 24:45-47) Idi 1914, rinibo a simbaan ti nangaklon a Kristianoda. Ania a grupo ti binigbig ti Apo, ni Jesu-Kristo, kas matalek ken naannad nga adipenna? Nasungbatan dayta a saludsod idi dimteng ni Jehova iti templona.

Iyaay iti Naespirituan a Templo

5, 6. (a) Ania a templo ti inayan ni Jehova a mangukom? (b) Ania a panangukom ti inawat ti Kakristianuan manipud ken Jehova?

⁵ Nupay kasta, ania a templo ti inayanna? Nalawag a saan nga iti literal a templo idiay Jerusalem. Nadadael ti naudi kadagidiay a templo idi 70 K.P. Nupay kasta, addaan ni Jehova iti dakdakkel a templo nga inyanniniwan ti templo idiay Jerusalem. Dinakamat ni Pablo daytoy dakdakkel a templo ken impakitana a pudno a nadayag dayta, ngamin idiay langit ti nasantuan a disso dayta ken ditoy daga ti paraanganna. (Hebreo 9:11, 12, 24; 10:19, 20) Daytoy dakkel a naespirituan a templo ti inayan ni Jehova tapno mangukom.​—Idiligyo ti Apocalipsis 11:1; 15:8.

⁶ Kaano a napasamak daytoy? Sigun iti nawadwad a pammaneknek, idi 1918.a Aniat’ resultana? No iti Kakristianuan, nasangpetan ni Jehova ti maysa nga organisasion nga agtedtedted ti dara kadagiti imana, maysa a rinuker a narelihiusuan a sistema a nakikamalala iti daytoy a lubong, a nakidasig kadagiti nabaknang ken nangirurumen kadagiti napanglaw, nangisuro kadagiti pagano a doktrina imbes nga annurotenna koma ti nadalus a panagdayaw. (Santiago 1:27; 4:4) Babaen ken Malakias, impakdaar ni Jehova: “Nasiglatakto a saksi a maibusor kadagiti managanito, ken maibusor kadagiti mannakikamalala, ken maibusor kadagiti mangmangged kadagiti tangdanda, iti balo a babai ken kadagiti ul-ulila.” (Malakias 3:5) Inaramid ti Kakristianuan amin daytoy ken nakarkaro pay. Idi 1919 nalawag nga isut’ kinondenar ni Jehova iti pannakadadael agraman ti dadduma a paset ti Babilonia a Dakkel, ti sangalubongan a sistema ti ulbod a relihion. Nanipud idin, naiyawag kadagiti nalinteg-panagpuspusona a tattao: “Rumuarkayo kenkuana, ilik.”​—Apocalipsis 18:1-4.

7. Siasino ti binigbig ni Jesus kas matalek ken naannad nga adipenna?

⁷ Siasino ngarud, ti matalek ken naannad nga adipen? Idi umuna a siglo, buklen dayta ti bassit a grupo a nangipangag iti trabaho a panangsaksi ni Juan a Mammautisar ken ni Jesus, ti babaonen ti tulag. Iti siglotayo, isuda dagiti sumagmamano a ribo a nangipangag iti trabaho a panangisagana dagiti Estudiante ti Biblia bayat dagiti tawen kasakbayan ti 1914. Inibturan dagitoy dagiti naulpit a suot bayat ti umuna a gubat sangalubongan, ngem impakitada a ti pusoda adda iti dasig ni Jehova.

Trabaho a Panangdalus

8, 9. Idi 1918, kadagiti ania a pamay-an a nagugoran ti matalek ken naannad nga adipen, ket ania ti inkari ni Jehova iti daytoy a banag?

⁸ Nupay kasta, kasapulan a magugoran uray daytoy a grupo. Dadduma a naitimpuyog kadakuada ti nagbalin a kabusor ti pammati ket masapul a maikkatda. (Filipos 3:18) Nagkedked dagiti dadduma a mangibaklay kadagiti rebbengen a nainaig iti panagserbi ken Jehova ket simmiasida. (Hebreo 2:1) Malaksid iti dayta, adda pay laeng dagiti Binababilonia nga aramid a nasken a maiwaksi. Nasken a madalusan met ti matalek ken naannad nga adipen no iti organisasion. Nasken a masursuro ken maiyaplikar ti umiso a takder ti neutralidad iti daytoy a lubong. Ket bayat a dumakes a dumakes ti lubong, nasken a sipipinget a makidangadangda tapno maikkat ti moral ken naespirituan a kinarugit kadagiti kongregasion.​—Idiligyo ti Judas 3, 4.

⁹ Wen, kasapulan ti panangdalus, ngem siaayat nga inkari ni Jehova maipanggep ken naitronon a Jesus: “Isu tumugawto a kas iti mangdalus ken manggugor iti pirak ket gugorannanto dagiti annak ni Levi; ket dalusannanto ida a kas iti balitok ken pirak, ket agidatagdanto ken Jehova kadagiti daton iti kinalinteg.” (Malakias 3:3) Nangrugi idi 1918, babaen daytoy a babaonen ti tulag, tinungpal ni Jehova ti karina ket dinalusanna ti ilina.

10. Ania a kita ti daton ti inyeg ti ili ti Dios, ket aniat’ inyawis ni Jehova kadakuada?

¹⁰ Nagunggonaan amin dagiti napulotan a kakabsat ni Kristo ken ti dakkel nga umariwekwek a nakitimpuyog kadakuada kamaudiananna iti serbisio ni Jehova iti panagtignay ni Jehova kas mananggugor ken manangdalus iti pirak. (Apocalipsis 7:9, 14, 15) Kas maysa nga organisasion nangidatagda, ken mangidatdatagda pay laeng, ti daton iti kinalinteg. Ket ti datonda “makaay-ayo ken Jehova, a kas kadagiti al-aldaw idi ugma ken kas kadagiti tawen idi punganay.” (Malakias 3:4) Isu dagitoy ti naimpadtuan nga inawis ni Jehova: “‘Yegyo ti amin nga apagkapullo iti kamalig, tapno adda koma taraon iti balayko; ket padasendak, pangaasiyo, iti daytoy a banag,’ kuna ni Jehova dagiti buybuyot, ‘no siak diakto luktan kadakayo dagiti tawtawa ti langit ket ibuyatkonto kadakayo ti aglaplapusanan a bendision.’”​—Malakias 3:10.

Dagiti Daton ken Apagkapullo

11. Apay a saanen a maipaannurot dagiti daton a sagudayen ti Linteg Mosaiko?

¹¹ Idi kaaldawan ni Malakias, literal a datdaton ken apagkapullo, kas iti bukbukel, bunga, ken animal, ti inyeg ti ili ti Dios. Uray idi kaaldawan ni Jesus, nangidatag dagiti matalek nga Israelitas kadagiti literal a daton iti templo. Nupay kasta, nabaliwan amin dayta kalpasan ti ipapatay ni Jesus. Nawaswas ti Linteg, agraman ti bilin a mangidatag kadagiti espesipiko a material a daton ken apagkapullo. (Efeso 2:15) Tinungpal ni Jesus ti naimpadtuan nga inladawan dagiti daton iti sidong ti Linteg. (Efeso 5:2; Hebreo 10:1, 2, 10) Iti ania a pamay-an, ngarud, a mangiyeg dagiti Kristiano kadagiti daton ken apagkapullo?

12. Ania a kita dagiti naespirituan a daton ken sakripisio ti idatag dagiti Kristiano?

¹² Kadakuada, naespirituan a kita dagiti datonda. (Idiligyo ti Filipos 2:17; 2 Timoteo 4:6.) Kas pangarigan, dinakamat ni Pablo ti trabaho a panangasaba kas maysa a daton idi a kinunana: “Gapu kenkuana idatontayo a kankanayon iti Dios ti daton ti panagdaydayaw, kayatna a sawen, ti bunga dagiti bibig a mangipaduyakyak iti naganna.” Tinukoyna ti sabali pay a naespirituan a kita ti sakripisio idi inggunamgunamna: “Dikay lipatan ti panagaramid iti naimbag, ken iti panagririnnaman, ta ti Dios pagay-ayatanna unay dagiti kastoy a daton.” (Hebreo 13:15, 16) No paregtaen dagiti nagannak dagiti annakda a sumrek iti payunir a serbisio, maikuna nga idatdatonda ida ken Jehova, a kas iti panangidaton ni Jefte iti anakna a babai kas “daton a mapuoran” iti Dios, a namagballigi kenkuana.​—Oc-ocom 11:30, 31, 39.

13. Apay a saan a maipaannurot kadagiti Kristiano ti pannangted ti literal nga apagkapullo ti sapulda?

¹³ Ngem, komusta met ngay dagiti apagkapullo? Obligado kadi dagiti Kristiano a mangilasin iti apagkapullo ti material a sapulda ket itedda dayta iti organisasion ni Jehova, a kas iti maar-aramid kadagiti dadduma a simbaan ti Kakristianuan? Saan, saan a maipaannurot dayta. Awan kasuratan a mangibagbaga iti kasta a linteg kadagiti Kristiano. Idi nangur-or ni Pablo kadagiti kontribusion a maipaay kadagiti agkasapulan idiay Judea, awan dinakdakamatna nga espesipiko a gatad a masapul a maited. Imbes ketdi, kinunana: “Tunggal maysa itdenna koma ti pinanggepna iti pusona, saan nga iti dakes a nakem wenno mapilpilit, ta ti Dios ayatenna ti mangted a siaayat.” (2 Corinto 9:7) Iti panangtukoyna kadagidiay addaan iti espesial nga annongen, impakita ni Pablo a nupay masupsuportaran a naimbag dagiti dadduma babaen kadagiti boluntario a kontribusion, isut’ sidadaan nga agsapul ken mangsuportar iti bagina. (Aramid 18:3, 4; 1 Corinto 9:13-15) Awan naituding nga apagkapullo maipaay itoy a panggep.

14. (a) Apay a ti pannangted ti apagkapullo saanna nga itakderan ti pannangtedtayo ti amin a kukuatayo ken Jehova? (b) Aniat’ itakderan ti apagkapullo.?

¹⁴ Nalawag, adda isimsimbolo, wenno itaktakderan ti apagkapullo kadagiti Kristiano. Yantangay apagkapullo dayta ket ti numero a sangapulo masansan nga isimbolona ti naindagaan a kinakompleto idiay Biblia, isimsimbolo kadi ti apagkapullo ti pannangtedtayo ti amin a kukuatayo ken Jehova? Saan. No idedikartayo ti bagbagitayo ken Jehova ken isimbolo dayta babaen ti bautismo iti danum, iti kasta ipapaaytayo ti amin a kukuatayo kenkuana. Manipud iti tiempo ti dedikasiontayo, awan ti ik-ikutantayo a di kukuan ni Jehova. Nupay kasta, palubosan ni Jehova dagiti indibidual a mangaramat kadagiti sanikuada. Isu a ti apagkapullo itakderanna ti paset ti kukuatayo nga iyegtayo ken Jehova, wenno usaren iti serbisio ni Jehova, kas pakakitaan ti ayattayo kenkuana ken ti panangbigbigtayo iti kinapudno a kukuanatayo. Ti agdama-aldaw nga apagkapullo saan a basta apagkapullo laeng. Iti dadduma a kasasaad basbassit ngem iti dayta. Iti dadduma ad-adu. Tunggal maysa yegna ti kas pinanggep ti pusona ken ti ipalubos dagiti kasasaad.

15, 16. Aniat’ nairaman iti naespirituan nga apagkapullotayo?

¹⁵ Aniat’ nairaman iti daytoy naespirituan nga apagkapullo? Maysa, itedtayo ken Jehova ti panawen ken pigsatayo. Ti panawen a busbosentayo kadagiti gimong, iti itatabuno kadagiti asamblea ken kumbension, iti tay-ak ti serbisio, amin daytoy ti maited ken Jehova​—paset ti apagkapullotayo. Ti panawen a busbosentayo iti panangsarungkar kadagiti masakit ken panangtulong kadagiti dadduma​—manen, dagitoy ket paset ti apagkapullotayo. Ti itutulong iti panangbangon kadagiti Kingdom Hall ken pannakiraman iti trabaho a panangmantenir ken panangdalus iti paggigimongan ket paset met dayta.

¹⁶ Ti apagkapullotayo iramanna met dagiti pinansial a kontribusiontayo. Gapu iti nakaskasdaaw nga irarang-ay ti organisasion ni Jehova kadagiti kallabes a tawen, dimmakkel met dagiti pinansial nga obligasion. Kasapulan dagiti baro a Kingdom Hall, kasta met dagiti baro a pasilidad ti sanga ken baro nga Assembly Hall, malaksid pay iti panangmantenir kadagidiay nabangonen. Ti panangsupusop kadagiti gastos dagidiay nangidaton iti bagbagida maipaay iti espesial a serbisio​—a masansan a mangar-aramid kadagiti dakkel a personal a panagsakripisio tapno maitungpal dayta​—ket maysa met a dakkel a karit. Agdagup 40 milion a doliar ti nabusbos idi 1991 iti panangsuportar kadagiti misionero, agdaldaliasat a manangaywan, ken espesial payunir laeng, nga amin dagitoy ti masupsuportaran babaen kadagiti boluntario a kontribusion.

17. Ania ti itedtayo a naespirituan nga apagkapullotayo?

¹⁷ Ania ngay ti itedtayo kas apagkapullotayo? Saan a nangikeddeng ni Jehova iti porsiento. Nupay kasta, ti dedikasiontayo, pudpudno nga ayat ken Jehova ken kadagiti kakabsat, kasta met ti pannakarikna iti kinaganat gapu iti pannakabigbigtayo nga adu pay ti biag a maisalakan, paregtaendatayo a mangyeg ti amin a naespirituan nga apagkapullotayo. Matignaytayo nga agserbi ken Jehova iti amin a kabaelantayo. No agkedkedtayo wenno nasakit ti nakemtayo a mangipaay iti bagbagitayo wenno kadagiti sanikuatayo, katupag daytoy ti panangtakaw iti Dios.​—Idiligyo ti Lucas 21:1-4.

Mabendisionan iti Aglaplapusanan

18, 19. Kasano a nabendisionan ti ili ni Jehova gapu iti pannangtedda ti amin nga apagkapulloda?

¹⁸ Nanipud idi 1919, sipaparabur nga impaay ti ili ni Jehova ti panawen, pigsa, ken sanikuada kadagiti pakasapulan iti trabaho a panangasaba. Pudno nga inyegda ti amin nga apagkapullo iti kamalig. Kas resultana, tinungpal ni Jehova ti karina ket imbuyatna ti aglaplapusanan a bendision. Makita daytoy iti nakakadkadlaw unay nga irarang-ay ti bilangda. Manipud iti sumagmamano a ribo a napulotan nga agserserbi ken Jehova idi isut’ immay iti templona idi 1918, immaduda agingga ita dagiti napulotan agraman dagiti kaduada, ti sabsabali a karnero, ti agdagupen iti nasurok nga uppat a milion iti 211 a nadumaduma a dagdaga. (Isaias 60:22) Nabendisionan pay dagitoy iti agtultuloy nga irarang-ay iti pannakaawat iti kinapudno. Limmawag kadakuada ti naimpadtuan a sao. Sititibker a naipasdek ti panagtalekda iti pannakatungpal dagiti panggep ni Jehova. (2 Pedro 1:19) Pudno a tattaoda nga “insuro ni Jehova.”​—Isaias 54:13.

¹⁹ Babaen ken Malakias, impadto ni Jehova ti kanayonan a bendision: “Iti kasta dagiti nagbuteng ken Jehova nagsaoda iti maysa ken maysa, tunggal maysa iti kaduana, ket ni Jehova nagimdeng ken nangipangag. Ket maysa a libro a pakalaglagipan ti nangrugi a nasuratan agpaay kadagidiay nagbuteng ken Jehova ken kadagidiay a nagpanunot iti naganna.” (Malakias 3:16) Kadagiti amin nga organisasion nga agkunkuna a Kristiano, dagiti laeng Saksi ni Jehova ti agpadpada a sipapanunot iti naganna ken mangidaydayaw iti dayta kadagiti amin a nasion. (Salmo 34:3) Anian a ragsakda a makaammo a silalagip ni Jehova iti kinamatalekda!

20, 21. (a) Ania a naparaburan a relasion ti tagtagiragsaken dagiti pudno a Kristiano? (b) No iti Kinakristiano, ania a paggiddiatan ti lumawag a lumawag?

²⁰ Ti napulotan a natda isu ti naisangsangayan nga ili ni Jehova, ket kaduada ti dakkel nga umariwekwek, a makitimtimpuyog kadakuada, nga agani kadagiti bendision iti nadalus a panagdayaw. (Zacarias 8:23) Babaen ken Malakias, ikari ni Jehova: “‘Isuda kukuakto ida,’ kuna ni Jehova dagiti buybuyot, ‘iti aldaw nga aramidekto ti maysa a naisangsangayan a sanikua. Ket kaasiakto ida, a kas iti panangngaasi ti tao iti anakna nga agserserbi kenkuana.’” (Malakias 3:17) Anian a bendision nga addaan ni Jehova iti kasta a nadungngo a panangigaga kadakuada!

²¹ Pudno unay, lumawag a lumawag ti paggiddiatan dagiti pudno a Kristiano ken dagiti ulbod. Bayat nga ikagkagumaan ti ili ni Jehova a salimetmetan dagiti pagalagadanna, ad-adda met a mailumlumlom ti Kakristianuan iti gayonggayong ti kinarugit ti lubong. Wen, pudno dagiti sasao ni Jehova: “Dakayo a tattao mabigbigyonto manen ti paggiddiatan ti nalinteg ken ti managdakdakes, daydiay agserserbi iti Dios ken daydiay saan nga agserserbi kenkuana.”​—Malakias 3:18.

22. Aniada a bendision ti mainanamatayo a tagiragsaken no itultuloytayo nga ited ti amin nga apagkapullo?

²² Asidegen nga umay ti aldaw ti panangsingir kadagiti ulbod a Kristiano. “‘Adtoy! ti aldaw umay a manguram a kasla urno, ket amin dagiti natangsit ken dagiti agaramid iti dakes agbalindanto a kasla arutang. Ket ti aldaw nga umay uramennanto ida,’ kuna ni Jehova dagiti buybuyot.” (Malakias 4:1) Ammo ti ili ni Jehova a salaknibannanto ida iti dayta a tiempo, a kas iti panangsalaknibna iti naespirituan a nasionna idi 70 K.P. (Malakias 4:2) Anian a ragsakda a maaddaan iti dayta a pammatalged! Gapuna, agingga iti dayta a tiempo ipakitatayo ti panangapresiar ken ayat ken Jehova babaen ti panangiyegtayo ti amin nga apagkapullo iti kamalig. Iti kasta, mainanamatayo nga agtultuloy a bendisionannatayo iti aglaplapusanan.

[Footnote]

Mailawlawagyo Kadi?

◻ Iti moderno a panawen, kaano nga immay ni Jehova iti templo a kaduana ti babaonenna iti tulag?

◻ Siasino ti matalek ken naannad nga adipen, ket ania a pananggugor ti kasapulanda kalpasan ti 1918?

◻ Ania a kita dagiti naespirituan a daton ti iyeg dagiti pudno a Kristiano ken Jehova?

◻ Ania ti apagkapullo a naiyawis nga iyeg dagiti Kristiano iti kamalig?

◻ Aniada a bendision ti tagiragsaken ti ili ti Dios gapu iti pannangted kadagiti naespirituan nga apagkapullo?

[Ladawan iti panid 15]

Dagiti naespirituan nga apagkapullotayo iramanda ti pannangted ti pigsa ken sanikuatayo iti panangbangon kadagiti Kingdom Hall

[Ladawan iti panid 16]

Gapu iti panangbendision ni Jehova iti ilina, adu a pasdek ti kasapulan, agraman dagiti Kingdom Hall ken Assembly Hall