Dagiti Saludsod Manipud Kadagiti Managbasa
◼ Ania ti biddut ni Moises a nakaikkatan ti pribilehiona a sumrek iti Naikari a Daga? Ti kadi panangpang-orna iti bato imbes a ti pannakisao iti dayta wenno ti dina panangsantifikar ken Jehova a Dios?
Kasla ti biddut ni Moises ket saan laeng a ti panangpang-orna iti bato imbes a nakisao iti bato, kas imbilin ti Dios.
Idi agngudo iti 40 a tawtawen iti panagalla-allada, dagiti Israelitas nagpakarsoda idiay Cades-barnea iti let-ang ti Zin (wenno, Paran). Nagpakarsoda idin sadiay adu a dekada sakbayna, gapu ta ti tallo nga ubbog iti lugar ti nangpatauden iti baresbes, kas makita iti naipakuyog a ladawan. Iti daytoy nga okasion, nupay kasta, narigat ti danum, isu a kaipapananna a dagiti tattao dida makasarak ti adu a taraon. Gapuna a nakisusikda ken Moises, ti pannakabagi ni Jehova, a kunkunana: “Ket apay a pinasang-atdakami nga impanaw iti Egipto tapno iyegnakami iti daytoy dakes a lugar? Saan a lugar iti bin-i ken higos ken ti ubas ken ti granada, ken awan ti danum nga inumen ditoy.”—Numeros 20:5.
Kalpasanna imbaga ti Dios ken Moises ken Aaron: “Alaenyo ti sarukod ket tiptiponenyo ti gimong, . . . ket sawenyo iti bato iti sango dagiti matmatada nga itedna koma ti danumna; ket sika iruarmonto ti danum kadakuada nga aggapu iti bato ket itedmonto ti inumen ti gimong ken dagiti an-animalda.” (Numeros 20:8) Ania ti sumaganad a napasamak?
“Ket ni Moises ken Aaron inummongda ti gimong a tiniptipon iti sanguanan ti bato, ket kinunada kadakuada: ‘Denggenyonto ita, dakayo a nasungit! Dakami yegandakayto aya ti danum nga aggapu iti daytoy a bato?’ Ket ni Moises inngatona ti imana ket pinang-orna ti bato idi sarukodna iti namindua; ket ti danum rimmuar a naglupluppias.”—Numeros 20:10, 11.
Dadduma ti nakapaliiw nga inturong ti Dios ni Moises ken ni Aaron nga “agsao iti bato,” ngem “pinang-orda ti bato.” Daytoy kadi a nagdumaan ti nangupay unay ken ni Jehova ta imbagana ken Moises ken ni Aaron a dina palubosan ti panangiturongda iti Israel a sumrek iti Naikari a Daga?
Kasla saan a kasta. Ti kinapudno ket sumagmamano laeng a bulan kalpasan ti Iruruarda, immuna dagiti tattao nagreklamoda gapu iti kinakurang iti danum. Daytoy ket iti asideg iti Bantay Sinai (Horeb), idiay lugar a naawagan idi iti Meriba (iti lugar a makita iti baba). Paliiwenyo no ania ti imbaga ti Dios ken ni Moises iti dayta nga okasion: “Addaakto iti sanguanam iti rabaw ti bato sadi Horeb. Ket baotemto ti bato, ket rummuarto idiay ti danum, tapno uminum dagiti tattao.” (Exodo 17:2-7; 33:6) Gapuna, idiay Cades, naibaga ken Moises a makisao iti bato, mabalin nga agannayas a mangaramid iti immuna nga inaramidna iti panangibilin ti Dios, uray pay no ti kayat a sawen ti Dios ket ti pannakisao iti bato ket umdasen.
Kasla agparang nga adda pay sabali a nangiturong iti panangukom ti Dios ken Moises ken ni Aaron. Ania ngata dayta? Kinuna ni Moises kadagiti mannakisusik a tattao: “Dakami yegandakayto aya ti danum nga aggapu iti daytoy a bato?” Ti Salmo 106:33 mangipaay kadatayo iti pannakaawat iti daytoy, ta ipakitana a ni Moises nagtignay gapu iti dakes a nakem ket isut’ ‘nagsao a dina napuotan.’ Babaen kadagiti napungtot a sasao, inturongna ti atension iti bagina ken ni Aaron imbes nga iti Daydiay pudno a makaipaay a simimilagro iti danum. Gapuna, sakbay la unay ti ipapatay ni Moises idiay beddeng iti Naikari a Daga, tinukoy ti Dios ti pasamak idiay Cades-barnea ket impamatmatna a ti biddut ni Moises ket saanna a ‘sinantifikar ti Dios iti imatang iti ili.’—Numeros 27:12-14.
Makagun-odtayo iti leksion iti daytoy. Nupay no pudno a napateg ti panangmedmedtayo iti bagitayo kadagiti napungtot nga ar-aramid, agpadpada a nasken ti panangtengngeltayo iti espiritutayo, nangnangruna no agbiddut dagiti dadduma. No palubosantayo ti bagitayo a mariribukan iti kasta unay, mabalin a mangrugi a matmatantayo dagiti ad-adipen ti Dios iti natauan a pakaibatayan, imbes a bigbigentayo a dagitoy ket “karkarnero” pay ti Dios. Pudno, imperpektoda ket mabalin a makaaramidda kadagiti makaparurod a bambanag, ngem dagitoy “ti ilina ken ti karkarnero ti pagpaarabanna.” (Salmo 100:3) Pinalubosan ti Dios ti Anakna a matay a maipaay kadagita, gapuna saan kadi nga ikagumaantayo ti agbalin a naanus kadakuada, ditay unay ikankano ti panagriknatayo wenno ti pannakaapektartayo ket ad-adda nga ipategtayo ti takderda iti Dios?
[Dagiti ladawan iti panid 31]
Panawen ti primavera idiay baresbes iti aglawlaw ti maysa kadagiti ubbog iti lugar ti Cades-barnea
[Credit Line]
Photos, pages 10, 31: Pictorial Archive (Near Eastern History) Est.