Dayawenyo ni Jah iti Pananggun-od ti Suskripsion
1 Anian a rag-o ti panangawat iti kada baro a ruar iti Ti Pagwanawanan! Mangted iti makapnek a naespirituan a taraon ken balakad, ken pagridamennaka iti paspasamak ditoy lubong a kas kaitungpalan dagiti padto ti Biblia. Iti kasta lalo nga ipategtayo dagiti gundaway a mangidayaw ken Jehova.—Amos 3:7; Heb. 13:15.
2 Agingga iti daytoy a paset ti tawen iti serbisio, Ti Pagwanawanan ket naglaon kadagiti suheto a kas “Ti Golden Rule Lausen Aya?” ken “Talna—Umayto Aya Babaen ti Disarmamento?” Iti nasuroken a 100 a tawtawen, daytoy a magasina ti kampionato a maipaay iti Pagarian ti Dios a kas pudpudno a solusion iti amin a problema ti sangatauan. Kakuyog ti Agriingkayo!, daytoy a magasina ti namagridam kadagiti managbasa a kumita iti agdama nga aldaw a paspasamak a kas mangmarka iti “maudi nga al-aldaw.”—2 Tim. 3:1-5.
SUSKRIPSION A MANGABASTO ITI ESPIRITUAL A TARAON
3 Kabayatan ti Abril ken Mayo itukontayo dagiti suskripsion iti Ti Pagwanawanan wenno Agriingkayo! Kada miembro kadi ti pamiliayo ket addaan iti bukod a suskripsion? No kasta, nakasaganakayon a mangirekomenda kadagiti sabsabali nga agsuskribeda met. Narayraykayo koma a mangitukon iti suskripsion a kas met laeng iti panangitukonyo iti kada kopia ti magasina no aldaw iti panagmagasina.
4 Dikay koma ipato a nasakbay a ti maysa a tao ket kayatna wenno dina kayat ti agsuskribe, ngem bay-anyo a ti tao ket ipangagna iti sinsero, narayray a presentasionyo. Naparnuay ti maysa a kabsat a babai iti mas positibo a kababalin babaen ti panagkunana: “Dikay maukom ti maysa a libro babaen iti akkubna.” Nasursurona ti lalo a panagbalin a kaasping ni Jehova, a saan a mangidumduma. (Ara. 10:34) Intukonyo kadin dagiti suskripsion kadagiti estudianteyo ti Biblia, dagiti rota ti magasina, kadagiti katrabaho, kaaruba, ken dagiti kabagian?
5 Masansan a dagiti bumalay ket kunaenda nga awan ti kuartada iti dayta a tiempo. No mapasamak dayta ken no ti tao ket situtulok, suratanyo iti resibo ti suskripsion iti dayta nga umuna a dupag ket agsublikayo a maipaay iti kontribusion ti kalpasanna. Siguruenyo ti agsubli iti napagnummuan a tiempo.
IMPORMAL A PANANGASABA
6 Ti impormal a panangasaba isut’ kanayon a maigunamgunam kadagitoy nga aldaw. Maysa daytoy nga ekselente a pamay-an a mangsarak kadagidiay saan a madandanon iti taengda bayat nga agbalaybalaytayo. Ken kasano met dagiti katrabahotayo? Bayat iti maysa a bulan a kampania ti suskripsion, maysa a kabsat a lalaki ti nangeddeng iti nainsiriban a panangasaba kadagiti katrabahona. Intuyangna iti kalatna a sangapulo a suskripsion. Nupay kasta, nasdaaw idi nabaelanna ti nagreport iti 68 a suskripsion iti dayta a bulan!
7 Kadagiti pagtaengan a pagkedkedanda ti agsuskribe, mabalinyo a kunaen iti umasping a kastoy: “Nupay dikay tarigagayan ti agsuskribe iti daytoy a tiempo, mamatiak a pagragsakanyo daytoy ruar a napagsaritaantayo. Kukuayon dayta agraman iti kaduana a magasina iti ₱5.00.”
8 Kiniddaw ti salmista kadatayo: “Dayawenyo ni Jah, dakayo a tattao.” (Sal. 147:1) Aramidentayo daytoy a sireregta babaen iti panangitukon ti suskripsion bayat iti Abril ken Mayo.