No Kasano ti Agballigi iti Kinapayunir

TI KADI kinapayunir ti karerayo? No payunirkayo, wenno amin-tiempo a manangiwaragawag iti Pagarian, awan duadua nga interesadokayo nga agballigi. Ngem ti panagballigi sapulenna saan laeng a ti panangbusbosyo iti tiempo iti naituding a propesion. Ti naballigi a tao masapul nga awatenna ti panagsanay ket kankanayon a parang-ayenna dagiti abilidadna.

Kasano, ngarud, a saan laeng a makapagtultuloykayo a payunir no di ket rumang-aykay pay iti karerayo? Addada sumagmamano a napateg a salsaludsod a mabalin nga usigenyo.

Kasano Kabileg ti Relasionyo iti Dios?

Maysa a kakapatgan a banag iti panagballigi kas payunir isu ti kaadda iti nasinged, nabileg a relasion ken Jehova a Dios. Maipapan itoy, makasursurotayo manipud ken salmista David. Isut’ nagdawat: “Iparangmo kaniak dagiti daldalanmo, O Jehova; isurom kaniak dagiti dandanam. Iturongnak iti kinapudnom ket isuronak, ta sika ti Dios ti pannakaisalakanko. Ta kenka agur-urayak iti agmalmalem.”​—Salmo 25:4, 5.

Naan-anay a nagpannuray ni David iti ‘Dios ti pannakaisalakanna.’ Tinarigagayanna a ni Jehova ti mangisuro kenkuana ken ‘mangiparang kenkuana kadagiti daldalanna.’ Dikay kadi marikna ti kasta unay a panagtarigagay ni David a mangay-ayo iti Dios? Daytoy ket saan laeng a gagangay a tarigagay, ta kinuna ni David: “Ta kenka agur-urayak iti agmalmalem.”

Ngem kasano a taginayonenyo ti kasta a nasinged a relasion ken Jehova? Paliiwenyo a ti immuna a naibagan ket karkararag ni David. Wen, ti pannakisarita babaen iti kararag isu ti pamuon a mismo ti nasayaat a relasion iti Dios. Ket maliwliwatayo iti pannakaammo a din kasapulan ti pannakitulag iti nailangitan nga Amatayo. Mabalin nga umadanitayo kenkuana iti aniaman a tiempo. Kas kinuna ni David: “Ta sika ti um-umkisak iti agmalmalem.” (Salmo 86:3) Uray pay ti Anak a mismo ti Dios, a nagna ditoy daga kas perpekto a tao, nabigbigna a saan a makapagballigi no awan ti tulong ti Amana. Nakisarita ni Jesus kenkuana iti kararag iti agmalmalem​—iti parbangon, bayat iti aldaw, ken iti agpatnag.​—Marcos 1:35; Lucas 11:1; 6:12.

Kas Kristiano, masapul a surotentayo ti ulidan ni Jesus tapno agballigitayo iti ministeriotayo. (Hebreo 5:7) Maipapan iti kararag, maysa a Kristiano a babai a naballigin a payunir iti 30 a tawtawen inyebkasna daytoy: “Masarakan a nasken ti kararag kaniak tapno agballigiak kas payunir. Daytat’ nakatulong kaniak nga agpannuray a naan-anay ken Jehova, ta mabigbigko a diak kabaelan nga aramiden dayta a bukbukodko. Kankanayon a dumawatak iti tulong tapno makapagtultuloy.”

Wen, tapno makapagballigi iti kinapayunir, masapul a taginayonentayo ti nabileg a relasion ken ni Jehova, a naan-anay nga agpannuray kenkuana babaen iti kararag. Nupay kasta, ti sumaganad ket sabali pay a napateg a saludsod nga imtuodentayo iti bagitayo met laeng.

Kasano Kadakkel ti Panagayatko kadagiti Tattao?

Ti panagpayunir ket ebkas iti ayat. Apay? Agsipud ta ti amin-tiempo a ministerio ramanenna ti panagsakripisio. Kas payunir, kankanayon nga ipapaayyo ti tiempoyo ken bilegyo a tumulong kadagiti dadduma. Ngem tapno maitultuloyyo nga aramiden daytoy, masapul a napudno ti panaginteresyo iti kasapulan dagiti dadduma. Idi adda ditoy daga, impakita ni Jesus ti kasta a panagayat kadagiti tattao. Kas pangarigan, adda idi tiempo nga isu ken dagiti adalanna nagbarangayda a mapan iti napakni a lugar tapno ‘aginanada bassit.’ Nupay kasta, immun-unan ti umariwekwek. “Ay, idi dimsaag, nakitana ti umariwekwek, ket kinaasianna ida, ta kasda la karnero nga awan pastorda. Ket rinugianna a sinursuruan ida kadagiti adu a banag.”​—Marcos 6:30-34.

Kas ken Jesus, kas payunir masapul a nauneg ti panagayattayo kadagiti tattao. Ti kasta nga ayat tignayennatayo a mangipaay iti bagitayo kadakuada. Kas iti kinuna ti maysa nga eskriba ken Jesus: “Daytoy a panagayat [iti Dios] iti amin a puso ken iti amin a kararua ken iti amin nga isip ken kadagiti amin a pigsa ken ti panagayat ti kaarruba a kas iti bagi met laeng isut’ napatpateg ngem kadagiti amin a daton ken sagut.” (Marcos 12:33) Dagitoy a sasao tulongannatayo a mangapresiar a saan laeng a ti aramidentayo iti ministeriotayo ti napateg no di ket kasta met no apay nga aramidentayo dayta.

Kas payunir, mangbusboskayo ti ad-adu a tiempo iti panangasaba ken panagaramid adalan ngem kadagiti dadduma. Ngem makasabetkayo met kadagiti ad-adu a tattao. Kasano ti panagriknayo kadakuada? Kinuna ti maysa a payunir: “Ammok a ti ayat ket bunga ti espiritu. Gapuna no awan dayta awanak koma iti kinapudno, ket kasta met ti panagballigi kas payunir. Ti ayat pagpanunotenna dagiti tattao, sipapanunotda kadagiti kasapulanda, ket apresiarek ta agtignay dagiti tattao gapu iti ayat. Siempre, addada tiempo a masubok ti panagayatyo kadagiti tattao gapu iti kababalin ken rikriknada. Ngarud nangnangruna a padasek ti umimdeng ken agbalin a naanus.”

Kasta kadit’ riknayo kadagiti tattao idiay teritoriayo? Tapno naballigi kas payunir, masapul nga ayatenyo dagiti tattao. (1 Tesalonica 2:6-8) Tapno agbalin nga epektibokayo iti karera a kinapayunir, nupay kasta, kasapulanyo met ti nasayaat nga eskediol. Gapuna, saludsodanyo ti bagiyo.

Addaanak Kadi ti Natimbeng nga Eskediol?

Tapno makapagtultuloy a sibaballigi iti amin-tiempo a ministerio, ti payunir masapul nga organisado a naimbag. No awan ti nasayaat a personal nga eskediol, ti panagpayunir mabalin a makaupay. Siempre, ti kaadda iti eskediol a mangipaay iti espesipiko a tiempo iti tay-ak ti ministerio ket saan laeng nga isu ti kasapulan.

Ti payunir kasapulanna ti natimbeng nga eskediol. Addaankayo kadi ti maysa? Mabalin met nga imtuodenyo ti bagiyo: Mangbusbusbosak aya ti maitutop a tiempo kadagiti nadumaduma a paset iti ministerio? Makunak kadi nga ikabkabilko ti inggat’ kabaelak a mangdanon kadagiti tattao iti teritoriak? Mangar-aramidek kadi iti kasapulan a panagbalbaliw iti eskediolko tapno makasarungkarak no addada iti pagtaengan? Mangar-aramidak aya ti epektibo a panagsarungkar? Kinuna ni Jesus: “Inkayo ngarud ket pagbalinenyo nga ad-adalan dagiti tattao . . . nga isursuroyo ida.” (Mateo 28:19, 20) Agpadpada ti panangasaba ken panangisuro ket paset ti ministeriotayo. Kontentokayo kadin a mangipaima iti literatura, wenno sarungkaranyo dagiti amin a mangipakita iti interes, awatenda man wenno saan ti literatura ti Biblia? Iti ababa a pannao, ipatpategyo kadi ti tiempoyo?

Narang-ayak Kadi a Mannursuro?

Dayta ket sabali pay a napateg a saludsod. Idiay 2 Timoteo 4:2, nagsurat ni Pablo: “Ikasabam ti sao, umagawaka iti tiempona man ken saanna a tiempo, . . . a buyogen ti amin a panaganus ken ti panangisursuro.” Tapno makaikasaba iti sao, iti uneg man wenno iti ruar ti kongregasion, dagiti naballigi a payunir ikagumaanda ti manggun-od ken mangpasayaat iti arte ti panangisuroda. Apay nga awagan ti panangisuro a maysa nga arte? Agsipud ta ti panangisuro sapulenna ti kinasigo ken panagsanay.

Kasano ti panangparang-aymo ti kinasigom kas mannursuro? Sumungbat ni apostol Pablo: “Gagetam dagitoy a bambanag, isuda laeng ti sangoem, tapno ti irarang-aymo maiparangarang koma kadagiti isuamin.” (1 Timoteo 4:15) Wen, masapul a maaddaan dagiti payunir ti tiempo a maipaay iti personal a panagadal ti Biblia, panangpampanunot, ken panagmennamenna. Daytoy iramanna ti praktikal a panangiyaplikar kadagiti singasing a masarakan kadagiti publikasion a kas ti Panakirinnason Manipud kadagiti Kasuratan, Ti Ministeriotayo iti Pagarian, ken ti Giya ti Teokratiko nga Eskuelaan ti Panagministro.a

Tapno agballigi iti kinapayunir, ngarud, taginayonenyo ti nabileg a personal a relasion ken Jehova a Dios. Daytoy, met, tignayennakayo a manggun-od ken mangiparangarang iti nauneg a panagayat kadagiti tattao. Siempre, tapno maiyebkas daytoy nga ayat, saan laeng nga agbalinkayo a sipapanunot iti kaadu ti busbusbosenyo a tiempo iti ministerio, no di ket tarigagayanyo met nga ipateg ti tiempoyo. Kasano? Babaen ti panangikagumaan a mangidanon iti mensahe ti Pagarian kadagiti ad-adu a tattao no mabalin. Kamaudiananna, itultuloyyo ti agbalin a narang-ay a mannursuro babaen ti panangsuro kadagiti nadumaduma a pamay-an ti iyaadani kadagiti tattao iti ministerio ken sipapasnek a panagadal iti Biblia nga addaan panggep a mapasayaat iti arte ti panangisuroyo.

[Dagiti Footnote]