Agplanokayo Itan iti Espesial nga Aktibidad ti Kalgaw
1 Ammotayo babaen iti kapadasan a ti nasayaat a resulta ket agtaud iti naannad a plano. (Prov. 20:18; 21:5) Impasiguro ni Jehova kadatayo a nga isut’ tumulong tapno agballigitayo.—Prov. 16:3.
2 Gagangay a ti bulbulan iti Enero agingga ti Mayo iti kada tawen ket addaan ti nasayaat a klima, ken bayat dayta a tiempo dagiti agtutubotayo ket agbakasionda manipud iti pagadalan. Nasayaat ngarud a tiempo daytoy a maplano a maipaay iti ad-adu a teokratiko nga aktibidad. Naimbag a banag no maplano a nasakbay ken maikeddeng no ania dagiti ar-aramid a masapul nga unaen ngem iti dadduma. (Luc. 14:28-30) Nabatad, ti panangikeddeng no ania iti nasken, ti intereses iti Pagarian isut’ mailugar nga umuna ngem ti dadduma a bambanag a panggepen.—Mat. 6:33; 1 Ped. 2:11.
3 Agplanokayo nga Auxiliary Payunir: Dagiti bulbulan iti kalgaw mangtedda ti ekselente a gundaway a sumrek iti auxiliary payunir a serbisio. Dagiti agbakasion nga agtutubo maparegtada a mangusar iti uray maysa laeng a bulan ti kalgaw nga agserbida kas auxiliary payunir. Apay a dikay guyogoyen dagiti dadduma nga agtutubo nga interesado a makipagtrabaho kadakayo a nagpalista? Ti tiempo a mausar iti kastoy a wagas isut’ mangnayon ti espiritual a panagrang-ay iti maysa.
4 Idi napan nga Abril addaantayo ti 15,730 iti auxiliary payunir a trabaho ken kalpasanna iti Mayo naaddaantayo ti 11,494. Anian a nagsayaat a sungbat! Iti nagbaetan ti Enero ken Hunio, agdagup iti 45,306 ti nakiraman iti daytoy a trabaho. Kasano met ita iti daytoy a tawen? Irekomendami nga agplano itan dagiti amin iti aktibidadda. Mabalin a kabaelan dagiti dadduma ti agpayunir iti adu a bulbulan, bayat a dagiti dadduma ket maaramidda laeng iti maysa wenno dua a bulan. Ammotayo a sibabaknang a bendisionan ni Jehova iti aniaman a maaramidtayo iti serbisiona bayat ti kalgaw.
5 Bayat ti Tiempo iti Memorial: Ti selebrasion iti Memorial ti daytoy a tawen isut’ maaramid iti Biernes, Abril 17, 1992, kallennek ti init. Laglagipenyo a ti pannakaipasa dagiti emblema ti masapul a saan a mangrugi agingga a makallenek ti init, nupay ti palawag ket mangrugi a nasapsapa. Naimbag nga oportunidad daytoy a rugian dagiti agdadamo ti makitimpuyog iti organisasion ni Jehova, gapuna a nagpaiduma ti regtatayo a mangasaba kabayatan daytoy a tiempo. Makaawatkayo iti naimaldit nga imbitasion ti Memorial a mausaryonto, ket mausaryo daytoy a pangawis kadagidiay saan pay a nangrugi a tumabuno iti gimgimong.
6 Ti nasayaat a panniempo isu met ti mamagbalin a makobrian dagiti addayo a teritoria a narigat a madandanon iti matutudo a tiempo. Apay a dikay ikagumaan a dappatan dagita nga addayo a teritoria bayat iti tiempo ti Memorial?
7 Bayat nga iplano ti aktibidad iti kalgaw aramidentayo koma dayta a buyogen ti nakararagan a panangmatmat iti Salmo 90:12. Inton agngudo ti kalgaw ditayto agbabawi no naplano ken nausar a nainsiriban iti tiempotayo kadagiti pakagunggonaan. Maaddaantayto iti nabaknang a pagragsakan, teokratiko a pakalaglagipan.