Kristiano a nagannak ken dagiti agtutubo ti dakkel a posibilidad a ti panagkedked iti dara ti maysa nga ubing ti maraem?

Nupay saan pay a nataengan, masapul a kabaelan nga ilawlawag ti maysa a Kristiano nga agtutubo a sibabatad ken sititibker no aniat’ narelihiusuan a panagkedkedna iti panangawat ti dara. Mabalin nga aginsayo dagiti nagannak a kadduada dagiti annakda tapno dagitoy makagun-odda ti kapadasan iti panangilawlawag iti bukodda a pammati.​—6/15, panid 18.

◻ Kasano a nagunggonaan unay dagiti babbai kabayatan ti naindagaan a ministerio ni Jesus?

Rinugian ni Jesus ti trabaho a nangiyeg liwliwa, namnama, ken maysa a baro a dayaw kadagiti babbai iti isuamin a rasa. Insurona dagiti babbai kadagiti nauneg a naespirituan a kinapudno. (Juan 4:7, 24-26) Bayat ti ministeriona, inawatna ti panagministerio dagiti babbai kabayatan a nagdaliasat iti intero a daga. (Marcos 15:40, 41)​—7/1, pinanid 14-15.

◻ Aniada a pamay-an ti panangisuro ni Jesus ti nasarakan dagiti nagannak nga epektibo kadagiti annakda?

Nasayaat nga agusar dagiti nagannak kadagiti ilustrasion tapno maaramidda dagiti Nakristianuan a kinapudno a makaapelo iti puso dagiti ubbingda, ken mabalinda ti agusar kadagiti napagpanunotanen a saludsod tapno maammuanda no ania ti kapanunotan dagiti in-inauna nga annakda. (Idiligyo iti Mateo 17:24-27.)​—7/1, panid 26.

◻ Apay a surotentay ti naayat a kinamanangaasi?

Ti kualidad ti naayat a kinamanangaasi iyasidegnatayo iti Dios ken kadagiti sabsabali. Nayonanna ti kinamanagpadagus ken pagbalinennatayo a naan-anus. Patibkerenna dagiti singgalut ti pamilia ken ti Kristiano a kongregasion. Kangrunaanna, ti naayat a kinamanangaasi mangted dayag ken Jehova.​—7/15, panid 22.

◻ Apay a posible para iti maysa a Kristiano a maallilaw no maipapan iti pannakikadua? (1 Corinto 15:33)

Mabalin nga agparang a mannakigayyem ken nasayaat ti maysa a tao, ngem no isut’ di makiraman iti pannakaseknan ti Kristiano maipaay iti serbisio ni Jehova wenno uray ti panamati iti Biblia, isut’ dakes a kadua. Apay? Gapu ta ti biagna ket naibatay kadagiti naiduma a prinsipio, ken dagiti bambanag a napateg iti maysa a Kristiano ket mabalin a bassit pategda kenkuana.​—7/15, panid 23.

◻ Apay a ti Aldaw ti Panangukom ket tiempo ti inanama?

Ti Aldaw ti Panangukom ket tiempo ti sangaribo a tawen. Daytat’ idauluan ti Dios a mismo ken ti Anakna, ni Kristo Jesus, ti dinutokan ti Dios nga agtignay kas Ukom. Tiemponto daytoy tapno maisubli ti sangatauan iti perpekto a natauan a biag a napukaw ni Adan agpaay kadagiti annakna. (1 Corinto 15:21, 22)​—8/1, pinanid 5-7.

Paglibakanyo Aya Dagiti Managbasol a Pagannayasan?

“MASARAKAK, ngarud, daytoy a linteg iti biangko: a no tarigagayak nga aramiden ti nalinteg, adda met kaniak ti dakes. Pudno nga agragsakak iti linteg sigun iti makin-uneg a kinataok, ngem makitak ti sabali a linteg kadagiti kamengko a maibusor iti linteg ti isipko ket adipenennak iti linteg ti basol nga adda kadagiti kamengko.”​—Roma 7:21-23.

Kinasapulanna ti kinapakumbaba para ken apostol Pablo ti panangawat ti adda iti ngato. Ngem, ti panangaramidna ti kasta, tinulonganna a lapdan dagiti imperpekto a pagannayasanna a mangdaeg kenkuana.

Umasping dayta kadagiti pudno a Kristiano ita. Idi nakagtengtayo iti umiso a pannakaammo ti kinapudno ti Biblia, inaramidtayo dagiti nasken a panagbalbaliw iti estilo ti panagbiagtayo, a maitunos kadagiti pagalagadan ni Jehova. Dagiti managbasol a pagannayasan agtalinaedda, nupay kasta, “agsipud ta ti tarigagay ti puso ti tao dakesda manipud kinaubing.” (Genesis 8:21) Napudnotay met laeng aya a mangawat iti bagitayo kadagiti espisipiko a pagannayasan a mangpilit kadatayo? Wenno paglibakantay ti kaaddada kadatayo, a nalabit ipatotayo, ‘Dagitat’ mabalin a pagkapuyan dagiti sabsabali ngem saan kaniak’?

Ti kasta a bukod a pannakaallilaw ti makapapatay. Maysa a naibatay-Biblia nga ilustrasion ti mabalin a mangtulong kadatayo a mangapresiar ti kinapateg ti panangbigbig kadagiti managbasol a pagannayasantayo ken tapno matenggeltay ida.

Apay a ti Panangilibak ket Makapapatay

Kadagiti panawen ti Biblia adu a siudad ti sinalakniban dagiti bakud. Dagiti ruangan​—kaaduanna naaramid iti kayo​—ti narukopda a paset ti makin-uneg a bakud ti siudad; no kasta, dagitat’ nangnangruna a napigsa ti pannakasalaknibda. Dagiti agnaed nangaramidda kadagiti ruangan nga umdas laeng a pagnaan no tiempo ti talna. Dagiti kayo a ruangan masansan a naabbongan ti landok, tapno di mapuoran. Naipatakder dagiti torre kadagiti bakud tapno dagiti nadutokan nga agwanawan makitada dagiti sumungad a kabusor iti adayo.

Ita panunotenyo: Aniat’ mapasamak no dagiti agnaed iti maysa a siudad naglibakanda ti kinarasi dagiti ruangan ti siudad ket dida nangipaay iti umdas a proteksion? Dagiti kabusor a soldado maaddaanda iti nawaya a pagserkan iti siudad, a mangiturong iti pannakaabakna.

Kasta met kadatayo. Ammo ni Jehova dagiti indibidual a lugar ti pagkapuyantayo. “Awan ti parsua a mailinged iti panagkitana, ngem isuamin lamolamo ken agminar kadagiti mata daydiay pagsungbatantayo.” (Hebreo 4:13) Uray ni Satanas mabalin a napaliiwna ti dadduma a managbasol a pagannayasan kadatayo, nalabit iti panangkillo ti kinapudno, kinalaka nga agpungtot, interes iti seksual nga imoralidad, materialismo, kinatangsit, wenno sabali pay. No paglibakantay nga addaantayo kadagiti managbasol a pagannayasan, pagbalbalinentay ti bagitayo nga ad-adda a nakapkapuy kadagiti panangraut ni Satanas iti pammatitayo. (1 Pedro 5:8) Datayot’ mabalin a maatiw no dagiti dakes a tarigagay iduronda dagiti babassit a pagannayasan ket agbunga iti basol. (Santiago 1:14, 15) Kasapulantay ti agbalin a kas ken Pablo, a sipupudno nga awatentayo ti aniaman kadagiti ‘kayo a ruangan’ a mabalin a tumaud.

Papigsaenyo ti Bagiyo!

Awan mamaayna ti panangilasin kadagiti di umiso a tarigagay sa kalpasanna awan met aramidentayo maipapan kadagita. Daytat’ kas iti maysa a tao nga agsarming, a mabigbigna dagiti paset a masapul a mataming, ken pumanaw a di mangaramid kadagiti kasapulan a panagbalbaliw. (Santiago 1:23-25) Wen, kasapulantay ti agtignay iti panangsalaknibtayo kadagiti bagbagitayo manipud pannakaatiw kadagiti managbasol a pagannayasan. Kasanotay a maaramid daytoy?

Masansan, kadagiti tiempo ti Biblia, dagiti babbabassit nga ili, wenno “managpannuray nga ili,” ket saan a nabakudan. (Numeros 21:25, 32; Oc-ocom 1:27; 1 Cronicas 18:1; Jeremias 49:2) Dagiti agnaed kadagitoy nga ili ti makapagkamang iti nabakudan a siudad iti iraraut dagiti kabusor. Dagiti napapigsa a siudad nagserbida ngarud a kas pagkamangan para kadagiti tao iti kaparanget a luglugar.

Deskribiren ti Biblia ni Jehova a Dios a kas torre, maysa a salindeg, maysa a bakud a mabalintay a pagkamangan. (Proverbio 18:10; Zacarias 2:4, 5) Ni Jehova ngarud ti kadadakkelan a salaknib dagiti adipenna. Ti di agsarday a panagkararag kenkuana ket napateg unay. (1 Tesalonica 5:17) Ti sabali pay a katulongan isu ti Biblia. Iti panangusar ti Sao ti Dios, nasayaat ti panangaramidtayo iti espesial a panagadal kadagiti paset a pagkapuyantayo. Mabalintay met ti mangilasin kadagiti naibatay-Biblia nga artikulo maipapan kadagiti indibidual a ‘kayo a ruangantayo’ para iti maulit-ulit a panagusig.

Kasta met, kas kadagiti agwanwanawan iti torre, makitatay ti kabusor manipud iti adayo, kas idi, ken makapagtignay a siuumiso. Kasano? Babaen ti panangliklik kadagiti kasasaad a pakaipasanguantay ti pannakasulisog wenno pannakapilit. Kas pangarigan, ti maysa a tao a mangparparang-ay ti kinatimbeng iti panaginum kadagiti inumen a de alkohol ti sisisirib a pilienna a liklikan dagiti lugar a kaaduan a maala wenno nalabit maiparegta dagitoy nga inumen.

Amin dagitoy sapulenna ti panagregget. Nupay kasta, no kinasapulan ni apostol Pablo a ‘gubaten ti bagina’ tapno malabananna dagiti imperpekto a pagannayasan, ditay kadi met kasapulan nga ipakat ti bukodtay a panagregget? Ti kasta a naridam a panangasikaso kadagiti managbasol a pagannayasantayo ti mangisilnag a sursurotentayo ti panangiwanwan ni apostol Pedro: “Gagetam ti pannakakitana kenka iti kamaudianan nga awan tulawna ken awan pakapilawanna ken iti talna.”​—1 Corinto 9:27; 2 Pedro 3:14.

Bigbigenyo ken Agtignaykayo

Dikay maupay no, iti laksid dagiti panagreggetyo, saan nga agpukaw amin dagiti imperpekto a pagannayasanyo. Agingga nga imperpektotayo, dagiti di umiso a tarigagay ti adda kadagiti sumagmamano a rukod, kas pimmudno iti kaso ni Pablo. Ngem kasapulantay ti agtultuloy a mangmedmed kadagitoy, tapno malapdantay ida a mangibunga iti basol.

Siaammokay koma, nupay kasta, iti nagdumaan ti panangawat ti kinapudno ti kinaimperpektotayo ken ti panangpalugod iti dayta. Daytat’ mabalin nga iyilustrar ti maysa a tao nga addaan iti nakapuy a puso. Masapul a sanguenna daytoy a kinapudno babaen ti panangpadasna a taginayonen ti nasayaat a kasasaad ti pusona iti aginggat’ kabaelanna. Dina irason a gapu ta nakapuy ti literal a pusona, iwaksina aminen a maiparit ken agbiagen iti kaykayatna.

Ammuenyo, ngarud, a ti pigsatayo saan nga agpannuray iti sibubulsek a panangilibak kadagiti managbasol a pagannayasan ngem babaen iti panangbigbig kadakuada ken panagtignay maibusor kadakuada. Gapuna a dikay agbuteng a mangbigbig iti bagiyo ken ni Jehova kadagiti paset a sadiay nalakakayo a masulisog ken mapilit. Dikay kasapulan a kissayan ti panangipategyo iti bagiyo iti panangaramidyo ti kasta, wenno di met maksayan ti ayat ni Jehova kadakayo. Kinapudnona, bayat nga umas-asidegkayo iti Dios iti napasnek a pannakaseknan iti anamongna, isut’ ad-adda nga umasideg met kadakayo.​—Santiago 4:8.

[Ladawan iti panid 31]

Daytoy a modelo ti Megiddo iyilustrarna dagiti napakired a ruangan ken mangsalaknib a bakud dagiti kadaanan a siudad

[Credit Line]

Pictorial Archive (Near Eastern History) Est.