Panangiyammo iti Creation a Libro
1 Idinto ta gistay amin a tattao idiay teritoriatayo ket mamati iti maysa a namarsua, maysa a karit ti makisao kadagiti kaarubatayo maipapan iti daytoy a tema. Ania ti makunatayo a mangtukay iti interes ti bumalay? Ania dagiti puntos a mailawlawagyo? Dagiti sumaruno a singasing ti tumulong kadatayo nga agsagana tapno maaddaantayo iti makapainteres a saritaan kadagiti kaarubatayo bayat nga itukon daytoy a libro idiay teritoriatayo. Dagiti singasing ti mabalin a maitutop iti lokal a kasasaad.
2 Apay nga Impalubos ti Dios iti Panagsagaba?: Uray pay dagiti agkunkuna a Kristiano ket agsiddaawda maipapan iti daytoy a saludsod. Gapuna nga iruartayo daytoy idiay introduksiontayo tapno mariing iti interes ti bumalay.
3 Kalpasan ti maitutop a kablaaw, mabalinyo a kunaen:
◼ “Iti pannakisao kadagiti kaarubatayo, nasarakanmi nga adu dagiti tattao ti agsiddaaw no apay nga impalubos iti Dios ti nakaro a panagsagaba ita? Adda pay mangpabasol iti Dios kadagiti problemada. Ania ti mariknayo iti daytoy? [Palubosan a sumungbat.] Ngem saan kadi a pudno a kaaduan kadagiti problematayo ket gapuanan met laeng iti tao, saan a ti Dios? Siputanyo no kasano nga ipakita daytoy iti Eclesiastes 8:9. [Basaen.] Ipakita met ti Biblia nga iti Dios ket iyegnan ti mabiit iti pannakadadael dagidiay a mangdaddadael ti daga, tapno panungpalennan ti panagsagaba iti agnanayon. [Basaen ti Apocalipsis 11:18.]” Kalpasanna maiturong iti asikasona idiay Kapitulo 16 ti Creation a libro, nga ipakita iti ilustrasion idiay panid 197.
4 Napadas dagiti adu a ti panagturong iti maysa a kapitulo ti libro a mangilawlawag iti punto a paginteresan ket makatulong. Siputanyo no kasano a maaramid daytoy iti suheto no ti Biblia ket naipaltiing wenno saan.
5 Kalpasan a maiyammo iti bagi, mabalinyo a kunaen:
◼ “Adu a tattao ita ti addaan iti Biblia, ngem pudno kadi a patienda daytoy a kas Sao ti Dios? Ditoy 2 Timoteo 3:16 kunaenna a ti Biblia ket impaltiing iti Dios. [Basaen.] No saludsodenda kadakayo, kasanoyo a mapaneknekan a pudno daytoy? [Palubosan a sumungbat.] Iti Kapitulo 17 daytoy a libro, Life—How Did It Get Here? By Evolution or by Creation?, adda pammaneknektayo a ti Biblia ket maitunos iti siensia, medisina, ken historia, ket daytoy isut’ mapagpiaran ken agtutunos. [Basaen dagiti subtema.] Ipakita met ti Kapitulo 18 a siuumiso dagiti padtona iti masakbayan, nga iti dayta ket Dios laeng ti makaaramid. Idinto ngarud ta Sao iti Dios, masapul nga adalen ken alagaden dagiti pammagbagana. Tapno matulongankayo a mangaramid iti daytoy ragsakek unay nga ibati kadakayo daytoy a libro babaen iti bassit a kontribusionyo.”
6 Sabsabali Benneg a Makatulong: Ti nawadwad a reperensia iti likud ti libro isut’ mausar met a mangipakita iti panagsukimat a naaramid. Kadagidiay interesado a mamagdilig ti ebolusion iti panamarsua, ti tsart idiay panid 112 mangted iti pangdarasan a sumaria. Ket kadagidiay met interesado iti sientipiko a bambanag, ti Kapitulo 9 nga “Our Awesome Universe” ken Kapitulo 10 iti “Evidence From a Unique Planet” isudat’ mangted iti ekselente nga impormasion. No kayatyo a repasuen dagiti padto a mangipakita nga addatayon iti maudi nga al-aldaw, nalakayo laeng nga iturong idiay pinanid 224 ken 225 iti ababa a listaan.
7 Babaen ti panangusar kadagiti epektibo a wagas a mangiyammo iti Creation a libro, mabalin a matulongantayo pay iti adu a tattao nga agdayaw iti Namarsua ken mangadal iti Saona.