Panangiparang a Makaallukoy iti Interes
1 Kanayontayo koma nga ipakita iti nabara, personal nga interes kadagiti tattao a masabettayo iti tay-ak ti ministerio. Ti panagsaludsod no ania iti opinionda kadagiti bambanag isut’ demostra ti panagraem iti panangmatmatda.
2 Bayat iti Oktubre iturong ti asikasoda iti Agriingkayo! a magasina idiay tay-ak ti serbisiotayo. Isaparyo a repasuen dagiti kaudian a ruar, ket pilienyo dagiti masinnunuo a puntos a mailawlawagyo. Iturongyo ida kadagiti masinnunuo a suheto ken ilustrasion.
3 Kalpasan a maiyammoyo ti bagiyo, mabalinyo a kunaen:
◼ “Apay a kunaenyo nga adu dagiti makapaupay a kasasaad kadagitoy nga aldaw? [Palubosan a sumungbat.] Ipakaammo ti Biblia a kadagiti adu, ti biag ket awan namnamana ken makapaupay. Siputanyo no ania ti kunaenna ditoy Eclesiastes 2:17. [Basaen.] Umanamongkayo kadi a daytoy ket pudno ita? [Palubosan a sumungbat.] Ania ti pagarupenyo a makaliwliwa iti tao a sumaranget kadagiti adu a problemana? Adtoy ti maysa a kasuratan a mangted kadatayo iti positibo a panangmatmat ti biag. Basaen ti Salmo 37:39, 40.] Ditoy Oktubre 8 a ruar ti Agriingkayo! adda sumagmamano a praktikal a singasing no kasano a maparukma iti danag, buteng ken leddaang.” Kalpasanna luktanyo ti magasina ken ipakita iti artikulo nga “Maparukmayo ti Negatibo a Rikrikna.”
4 Wenno mabalinyo a kunaen:
◼ “Idinto ta insuro ni Jesus kadatayo nga ikararag ti iyaay iti Pagarian ti Dios ken maaramid iti pagayatanna ditoy daga a kas sadi langit, patienyo kadi a ti pagayatan iti Dios ket pudno a maaramidto ditoy rabaw ti daga?” Palubosan a sumungbat, kalpasanna maiturong iti Isaias 55:10, 11 a mangipakita no kasano a matungpal amin dagiti karkari ti Dios. Sa kunaenyo: “Maysa a nakaskasdaaw a padto maipapan iti pagayatan ti Dios ditoy daga isut’ masarakan ditoy Apocalipsis 21:3-5.” Kalpasanna maiturong iti panid 7 ti Oktubre 8 nga Agriingkayo! ken ipakita no kasano a pumudno daytoy babaen iti pagayatan ti Pagarian iti Dios.
5 No iparangyo iti Oktubre 22 nga “Agriingkayo!”, mabalinyo a kunaen:
◼ “Makisasaokami kadagiti kaarubatayo maipapan iti nasayaat a gobierno. Pagarupenyo kadi a posible a maadda ti maysa a gobierno a mangpennek iti amin a kasapulan ken mangsolbar ti amin a problema? [Palubosan a sumungbat.] Ti Biblia, ditoy Isaias 65:21-23, ipakitana no kasano a ti gobierno iti Dios ket aramidenna dayta. [Basaen.] Adda kaniak ditoy ti Oktubre 22 a ruar iti Agriingkayo! a napauluan ti ‘Maysa a Baro a Lubong a Mangpennek Kadagiti Amin.’ Kayatko a mabasayo daytoy.” Kalpasanna ipakita dagiti artikulo manipud pinanid 3-14, a pilien dagiti masinnunuo a puntos a maipakita iti bumalay.
6 Ti panggeptayo ket saan laeng a mangtukay iti interes ti damag iti Pagarian ngem tapno mairugi pay dagiti panagadal ti Biblia. Anian a makaay-ayo kadatayo ti pannakaadda dagita a nagsasayaat nga artikulo iti Agriingkayo! a tumulong a pangpainteres ti kinapudno. Usarentayo koma a nasayaat dagitoy bayat iti Oktubre.