Ti Panangipategyo iti Ipapatay ni Kristo
1 Awan ti tao a nagbiag pay laeng a nakaaramid a kas iti naaramid ni Kristo a maipaay ti sangatauan. (Mat. 20:28) Babaen ti kurso iti biag ken ipapatayna, maaddaantayo ti oportunidad nga umawat iti kadakkelan a sagut a magun-odan, ti agnanayon a biag. Kaskasdi, kaaduan kadagiti tattao ti bassit iti panangipategda no ania ti naaramidan ni Kristo.
2 Usigenyo ti pannakasabet ni Jesus kadagiti sangapulo nga agkukutel. Nupay sangapuloda amin a naagasan ni Jesus, maymaysa laeng ti nagsubli kenkuana tapno iyebkasna ti panagyaman. Dagiti sabali a siam? Nagtultuloyda iti dalanda a dida man laeng napanunot ti nagyaman iti managparaborda. (Luc. 17:15-17) Siasino iti kaaspingtayo? Kayattayo ti agbalin a kas iti daydiay tao a nangipakita ti pudno a panagyaman.
3 Panangipakita ti Panangipategtayo: Kada tawen a mangisingasing ti Sosiedad iti masinnunuo a bersikulo ti Biblia a basaen bayat iti lawas ti Memorial. Masarakan dagitoy iti kalendariotayo idiay baba dagiti petsa ti Abril 1-6 ken kasta met idiay Dagiti Pakaammo daytoy Ti Ministeriotayo iti Pagarian. Maipakita ti panangipategtayo babaen ti panangbasa ken panangutob kadagitoy a bersikulo.
4 Ti serbisiotayo iti tay-ak adda singgalutna ti panangipateg a maipaay iti Memorial. Gagangay a maysa a bulan daytoy a rinibo dagiti makiraman iti kina-auxiliary payunir. Idi napan nga Abril adda 17,009 a nakipaset ditoy Pilipinas. Maaramidyo kadi dayta iti daytoy Abril? No dikay makapayunir, iplanoyo a parang-ayen iti pannakiramanyo ti panangasaba a trabaho kas ipalubos iti kasasaadyo.
5 Pabilgenyo ti Panangipateg Dagiti Dadduma: Kada tawen iti Memorial, adu nga interesado a tattao ti masabettayo. Kas ehemplo, kadagiti 360,297 a timmabuno iti Memorial idi napan a tawen, nasurok a 245,000 ti interesado a tattao.
6 Ti panangusar iti naimaldit nga imbitasion ti Sosiedad, tumulong iti interesado a tattao a kumita no apay a naipasdek ti Memorial, no siasino dagiti makipaset iti emblema, ken no ania ti kaipapanan dagiti emblema. (1 Cor. 11:23-26) Kasta met, ilawlawagyo ti namnama dagidiay a makipaset ken dagidiay a mangimatang laeng a saan a makiraman. (Juan 10:16; Apoc. 14:3, 4) Daytoy ti tumulong kadakuada a mangawat nga amin ket kasapulan a ‘mangalagad iti pammati’ ken ti basta tumabuno laeng iti Memorial ti maminsan iti makatawen ket saan nga umdas.—Juan 3:16.
7 Ti Memorial iti ipapatay ni Kristo isut’ nagpaiduma unay a pasamak. Babaen ti naan-anay a panagsagana a maipaay iti dayta, maipakitatayo ti pudno a panangipateg iti amin nga inaramid ni Jehova ken ni Kristo nga agpaay kadatayo.