Dagiti Bendision a Bunga ti Pannakipagtrabaho iti Sabsabali
1 Patienyo kadi nga addada gunggona iti pannakipagtrabaho iti sabsabali iti ministerio? Patien ni Jesus dayta. Nupay adu idi ti anien ket bassit ti agani, imbaonna a “sagdudua” dagiti 70 nga adalanna iti tay-ak. Anian a nakagunggona kadakuada amin ti inda panangasaba iti “tunggal siudad ken lugar nga umayannanto a mismo.”—Luc. 10:1, 17; Mat. 9:37.
2 Makaparayray ti pannakipagtrabaho iti sabsabali. Managbabain ti dadduma kadatayo ket bumdengda nga umasideg kadagiti dida am-ammo. No adda kaduatayo mabalin nga agtalgedtay a mangisao iti Saot’ Dios a situtured. No adda kaduatayo, mabalin a nalaklaka nga itungpal ti trabaho iti wagas a nakasanayantayo. (Prov. 27:17) Kinuna ti masirib a tao: “Ti dua naim-imbagda ngem iti maysa.”—Ecl. 4:9.
3 Nasayaat ti makikuyog iti nagduduma nga agibumbunannag ken payunir. Dagiti kakadua ni apostol Pablo iti serbisio inramanna da Bernabe, Silas, Timoteo, ken Juan Marcos, ket tinagiragsakda ti adu a bendision bayat ti panangasabada. Mabalin met a pudno dayta ita. Napadasyo kadin ti nakikuyog iti maysa a nabayagen iti kinapudno? Kalpasan a naimatanganyo ti laingna a mangasaba, nalabit nakapidutkay ti sumagmamano a nasayaat nga ideya a timmulong kadakayo a rumang-ay. Napadasyo kadin ti nakikuyog iti nabiit pay nga agibumbunannag? Nalabit a nairanudyon ti naadalyo ket iti kasta natulonganda nga ad-adda nga epektibo ken nangbirok iti dakdakkel a rag-o iti ministerioda.
4 Adda kadi yad-adalanyo ti Biblia ita? No kasta, apay a dikay awisen ti maysa kadagiti panglakayen wenno ti manangaywan ti sirkito a makikuyog kadakayo? Makagunggona kadagiti estudiantetay ti Biblia no maam-ammoda dagiti manangaywan. No agalikakakay a mangikondukta ti adal no sisasango ti panglakayen, nalabit sidadaanto a mangikondukta iti dayta ket bay-annaka nga agobserba. Kalpasanna, dumawatka kadagiti singasing no kasano a matulongan ti estudiante a napartak a rumang-ay.
5 Makaparegtakay koma no makikaduakayo iti sabsabali. Positibo koma dagiti komentoyo maipapan iti teritoria. Dikay agidanondanon maipapan iti sabsabali wenno agreklamo maipapan kadagiti urnos ti kongregasion. Ipamaysa ti panunotyo iti ministerio ken kadagiti bendision manipud ken Jehova. No aramidenyo, agawidkayto a dua a nasalibukag iti naespirituan.
6 Mabalin a narigat a makikuyogkayo a regular kadagiti dadduma gapu iti kasasaadyo. Nupay kasta, no kabaelanyo, apay a dikay padasen nga iwayaan ti makikuyog iti sabali nga agibumbunannag? Agpadakayto a mabendisionan!—Roma 1:11, 12.