Kapitulo 133
Turposen ni Jesus Amin a Kiniddaw ti Dios
INTON ni Jesu-Kristo a Mannakigubat nga Ari ikkatennan ni Satanas ken ti nakillo a lubongna, anian a pakaigapuanto ti panagrag-o! Ti natalna a Sangaribo a Tawen a Turay ni Jesus mangruginto met laengen!
Iti sidong ti panangiturong ni Jesus ken dagiti kaduana nga ar-ari, dagiti makalasat iti Armagedon dalusandanto dagiti rebba nga imbati dayta nalinteg a gubat. Mabalin a dagiti nakalasat ditoy daga aganakdanto iti sumagmamano a tiempo, ken makiramandanto iti naragsak a trabaho a panamagbalin iti daga a napintas a kasla parke a minuyongan.
Inton agangay paruarenen ni Jesus dagiti di mabilang a minilion manipud tanemda tapno tagiragsakenda daytoy napintas a Paraiso. Aramidennanto daytoy kas kaitungpalan ti mismo a pammatalgedna: “Umay ti oras a ti amin nga adda kadagiti tanem a pakalaglagipan . . . rummuardanto.”
Maysa kadagidiay pagungarento ni Jesus isut’ dati a managdakdakes a natay iti sibayna idiay pagtutuokan a kayo. Lagipenyo nga inkari ni Jesus kenkuana: “Pudno kunaek kenka ita nga aldaw, Makipaggiankanto kaniak idiay Paraiso.” Saan, dayta a tao saanto a maipan sadi langit tapno makipagari ken Jesus, wenno agbalinto manen ni Jesus a tao ket makipagtaeng kenkuana iti Paraiso a daga. Imbes ketdi, makikaduanto ni Jesus iti dati a managdakdakes iti kaipapanan nga Isut’ mangpagungarto kenkuana agturong iti biag iti Paraiso ket siguraduennanto a maipaay dagiti kasapulanna, agpadpada iti pisikal ken espiritual, kas naiyilustrar iti sumaruno a panid.
Agasenyo dayta! Iti sidong ti naayat nga atension ni Jesus, ti intero a natauan a pamilia—dagiti nakalasat iti Armagedon, dagiti annakda, ken dagiti binilion a napagungar a natay nga agtulnog kenkuana—agturongdanto iti natauan a kinaperpekto. Ni Jehova, baeten iti agturay nga Anakna, ni Jesu-Kristo, makipagnaedto iti sangatauan iti naespirituan. “Ket,” kas kunaen ti timek a nangngeg ni Juan manipud langit, “punasennanto ti lulua kadagiti matada, ket awanton ni patay, awanto metten ti sasaibbek wenno sangsangit wenno rigrigat.” Awanton ti agsagaba wenno agsakit ditoy daga.
Inton agngudo ti Sangaribo a Tawen a Turay ni Jesus, ti kasasaad kaslanton iti orihinal a pinanggep ti Dios idi imbilinna iti immuna a pareha, da Adan ken Eva, nga agpaaduda ket punnuendat’ daga. Wen, mapunnonton ti daga iti nalinteg a rasa ti perpekto a tattao. Daytoy ket maigapu iti pannakaipakatton dagiti gunggona ti daton a subbot ni Jesus iti tunggal maysa. Ti ipapatay gaput’ basol ni Adan mapukawton!
Iti kasta, maibanagton ni Jesus ti amin a kiniddaw ni Jehova kenkuana. Gapuna, iti ngudo ti sangaribo a tawen, iyawatnanton ken Amana ti Pagarian ken ti naperpekton a pamilia ti sangatauan. Kalpasanna ti Dios paruk-atannanton ni Satanas ken dagiti demoniona manipud mangliwengliweng nga arig-ipapatay a kinaawan-aramid. Iti ania a panggep?
Bueno, iti ngudo ti sangaribo a tawen, kaaduan kadagidiay agnanaedto iti Paraiso isuda dagiti napagungar a di pay pulos nasuot ti pammatida. Sakbay ti ipapatayda, dida pay naam-ammo dagiti kari ti Dios ket ngarud dida maidemostra ti pammatida kadagita. Sa, kalpasan ti pannakapagungar ken pannakaisuro dagiti kinapudno ti Biblia, nalaka laeng para kadakuada idiay Paraiso, nga awan aniaman nga ibubusor, ti agserbi iti Dios. Ngem no maikkan gundaway ni Satanas a mangpasardeng iti agtultuloy a panagserbida iti Dios, agmatalekdanto ngata iti sidong ti pannakasuot? Tapno masungbatan daytoy a saludsod, maluk-atanto ni Satanas.
Ti Apocalipsis a naited ken Juan ipanayagna a kalpasan ti Sangaribo a Tawen a Turay ni Jesus, mapaneknekanto a naballigi ni Satanas iti panangibaw-ingnat’ di naikeddeng ti bilangna a tattao manipud panagserbi iti Dios. Ngem, inton malpasen ti maudi a suot, ni Satanas, dagiti demoniona, ken amin dagiti naallilawna madadaeldanton iti agnanayon. Iti kasumbangirna, dagiti naan-anayen a nasubok, a matalek a nakalasat agtultuloydanto nga agbiag tapno tagiragsakenda iti agnanayon dagiti bendision ti nailangitan nga Amada.
Nalawag, nagakem ni Jesus, ken agtultuloyto nga agakem, iti napateg a papel iti panangibanag kadagiti nadayag a panggep ti Dios. Anian a grande a masanguanan ti tagiragsakentayto kas resulta ti amin a naibanagna kas naindaklan a nailangitan nga Ari ti Dios. Kaskasdi, ditay malipatan ti amin nga inaramidna bayat ti kinataona.
Situtulok nga immay ni Jesus ditoy daga ket insuronatayo maipapan iti Amana. Nangnangruna iti daytoy imparangarangna dagiti nasudi a kalidad ti Dios. Matignay ti puspusotayo no usigentayo ti natan-ok a kinamaingel ken kinamalalakina, ti di maartapan a kinasiribna, ti naisangsangayan nga abilidadna kas mannursuro, ti natured a panangidaulona, ken ti nadungngo a kinamanangaasi ken kinamanagriknana. No lagipentay ti di mailadawan a panagsagabana idi impaayna ti subbot, a babaen laeng iti dayta a magun-odantay ti biag, sigurado a matignay ti puspusotayo iti panangapresiar kenkuana!
Pudno, anian a kinatao ti nakitatayo iti daytoy a panangadal iti biag ni Jesus! Ti kinatan-okna ket nalawag ken ringbawanna ti amin. Matignaytayo a mangiyallangugan iti sasao ni Poncio Pilato a gobernador ti Roma: “Adtoy! Ti tao!” Wen, kinapudnona, “Ti tao,” ti katan-okan a tao a nagbiag pay laeng!
Babaen ti panangakseptartayo iti probision ti datonna a subbot, ti sangol ti basol ken ipapatay a natawidtayo manipud ken Adan mabalin a maikkat kadatayo, ket agbalin ni Jesus nga “Agnanayon nga Ama” kadatayo. Amin a mayat a makagun-od ti biag nga agnanayon rebbeng a gumun-oddat’ pannakaammo saan laeng nga iti Dios no di kasta met iti Anakna, ni Jesu-Kristo. Sapay koma ta ti panangbasa ken panangadalyo itoy a libro tulongannakayo iti pananggun-od ti kasta a makaited-biag a pannakaammo! 1 Juan 2:17; 1:7; Juan 5:28, 29; 3:16; 17:3; 19:5; Lucas 23:43; Genesis 1:28; 1 Corinto 15:24-28; Apocalipsis 20:1-3, 6-10; 21:3, 4; Isaias 9:6.
▪ Anianto ti naragsak a pribilehio dagiti makalasat ti Armagedon ken dagiti annakda?
▪ Siasinoda pay ti mangtagiragsakto iti Paraiso malaksid kadagiti makalasat ti Armagedon ken dagiti annakda, ket iti ania a pannakaawat nga addanto ni Jesus kadakuada?
▪ Anianto ti kasasaad iti ngudo ti sangaribo a tawen, ket aniat’ aramidenton ni Jesus?
▪ Apay a maluk-atanto ni Satanas manipud abut a mangliwengliweng, ket anianto ti sigurado a mapasamak kenkuana ken iti amin a sumurot kenkuana?
▪ Kasano nga agbalin ni Jesus nga “Agnanayon nga Ama” kadatayo?