Panangiparang ti Naimbag a Damag​—Panangiparang ti Naimbag a Damag​—Kadagiti Nangina nga Aldaw

¹ Nupay adu kadagiti selebrasion ti Christmas ken Baro a Tawen ket namunganayda iti pagano, nasurok a maysa a bilion kadagiti agkunkuna a Kristiano ti mangrambak kadagitoy iti tinawen. Kasano a madanon iti puspuso dagitoy babaen ti naimbag a damag kabayatan dagiti nangina nga aldaw?

² Naparbeng ken Managraemkayo: Aramiden dagiti panglakayen ti espesial nga urnos nga agpaay iti nangina nga aldaw a panangasaba, nangruna iti Disiembre 25 ken Enero 1. Bayat nga ibaklay iti ministeriotayo, nalabit a maranaantayo dagiti adu a tattao a kupado kadagiti bisita ken ti panagsaganada iti taraon. Kas naparbeng, maaramidtayo nga ababa ken napunto dagiti komentotayo. Manglukat daytoy iti dalan a maipaay ti mainayon a pammaneknek iti masakbayan.

³ Saantayo a makiraman kadagiti nailubongan a relihioso a rambak, ken ditay met usaren dagiti kablaaw iti nangina nga aldaw. Ngarud, kasapulan ti taktika no kasanotayo nga agtignay kadagita a kablaawda. Saantayo a pagbalinen nga isyu daytoy, ngem iti adu a kaso mabalintayo ti agyaman iti bumalay ti naimbag a tarigagayna. No agsaludsod dagiti tattao maipapan ti pammatitayo, ipasigurado kadakuada a raementayo ni Kristo Jesus, agsipud kasapulan dayta kadagidiay agraem iti Dios. (Juan 5:23) No kalikaguman ti maysa a tao nga ammuen iti ad-adu pay nga impormasion bayat dayta a tiempo wenno ti masakbayan, mabalintayo nga iranud kadakuada dagiti material idiay Panakirinnason a libro iti pinanid 242-244 ken 246.

⁴ Dagiti Introduksion: Nalabit a masarakan dagiti tattao a mas naamoda a makisao kadatayo maipapan iti Dios bayat daytoy a tiempo ti tawen. Mabalintayo a gundawayan daytoy iti introduksiontayo. Kas ehemplo, mabalintayo a kunaen: “Iti daytoy tiempo ti Christmas, masansan a mangngegan dagiti tattao nga iyebkasda iti namnama nga addanto talna ditoy daga ken naimbag a nakem kadagiti tattao. Patienyo kadi nga iyeg ti Dios iti talna ditoy daga iti daytoy tiempotayo?” Kalpasanna maitultuloy a maipakita a ni Jesu-Kristo isu daydiay naipadto a “Prinsipe ti Kappia.” (Isa. 9:6, 7) Kas nadutokan nga Agturay iti gobierno ti Dios, agtignayton ni Kristo a mangyeg iti talna ditoy daga.—Dan. 2:44; Apoc. 21:3-5.

⁵ Nupay kaaduan a tattao ket naaleng-alengda maipapan iti mensahe ti Pagarian ken pagragsakanda dagiti palso a relihioso a nangina nga aldaw, sigurado a bendisionan ni Jehova iti reggettayo a mangsarak kadagiti agsapsapul ti kinapudno ket iturongna ida iti organisasionna.—Juan 4:23, 24.

Urnos iti Panagadal ti Libro iti Kongregasion

Paset 5: Bisita ti Manangaywan iti Serbisio:

¹ Ti manangaywan iti serbisio isut’ maysa a managibanghelio ken mannursuro. Akmenna ti maysa a panulbek a papel iti pannakatulong ti kongregasion a mangtungpal iti responsabilidadna a mangasaba ken mangisuro ti naimbag a damag idiay naituding a teritoriana.—Mar. 13:10.

² Maipamaysa ti manangaywan iti serbisio ti panangpabara iti ad-adu nga aktibidad idiay tay-ak ti ministerio. Maibanag daytoy a nangruna babaen iti Panagadal ti Libro iti Kongregasion. Gagangay, ti manangaywan iti serbisio isut’ nadutokan a mangidaulo iti panagadal ti libro, ngem maminsan iti kada bulan ti katulonganna isut’ aglugar iti pagakmanna bayat a bumisita iti maysa a grupo.—km 12/81 p. 1, 3.

³ Panagsagana iti Bisita: Sakbay daytoy a bisita, masapul nga usisaen ti manangaywan iti serbisio dagiti Congregation’s Publisher Record cards dagiti naikameng iti grupo. Iyurnosna a makasao iti konduktor tapno repasuenda ti aktibidad dagiti agibumbunannag a naitimpuyog iti grupo. Mapalagipan ti konduktor iti panagadal a ti panagadalda ket agpaut laeng iti 45 minutos tapno mailugaran ti 15 minutos a palawag iti serbisio babaen ti manangaywan iti serbisio.

⁴ Daytoy a palawag ti mangitandudo iti lalo pay a panangipateg ti ministerio. No kasapulan dagiti agibumbunannag ti tulong iti nagduduma a benneg ti ministerio, ti manangaywan iti serbisio isut’ mangitukon ti praktikal a singasing a maipaay iti panagrang-ay. Masapul a positibo ken makaparegta dagiti balikasna tapno saan a makapabain wenno makaupay iti siasinoman dagiti negatibo a komento. Ti palawagna isut’ mangparegta kadagiti amin a rumang-ay.

⁵ Ikagumaan ti manangaywan iti serbisio ti makipagtrabaho kadagiti adu iti serbisio agingga ti mabalin. Bayat a makikuyog kadagiti agibumbunannag iti panagbalaybalay, mabalinna nga itukon ti makatulong a singasing no kasano a maparang-ay dagiti panangiparangda. Masapul a maaramid daytoy saan a babaen iti nadillaw a wagas ngem babaen ti napudno a tarigagay a makatulong. Maitukonna met ti kumuyog kadagiti agibumbunannag iti panagsarungkar ken panagadalda ti Biblia. No adda agminar iti grupo nga agkasapulan ti personal a badang, mabalinna a sarungkaran ida bayat iti lawas tapno tulonganna ida. Daytoy nabara, personal nga asikaso ti makatignay manen iti dadduma a nagbahada ti serbisioda iti tay-ak.

⁶ Taripnong ti Serbisio: Dagiti taripnong sakbay ti serbisio iti tay-ak bayat dayta a lawas isut’ idaulo ti manangaywan iti serbisio. Masapul nga irugida iti umiso a tiempo uray no adda pay laeng sumagmamano. Ti taripnong isut’ saan nga sumubra iti 10 agingga iti 15 a minutos. Sakbay a mapalubosan iti grupo, masapulen nga ammo ti tunggal maysa no sadinoda ken no siasino iti kakuyogda. (1 Cor. 14:33, 40) Paregtaen ti manangaywan iti serbisio ti tunggal maysa a rummuardan iti tay-ak ti serbisio nga awan taktak.

⁷ Ti regular a sarungkar iti manangaywan ti serbisio kadagiti grupo iti panagadal ti libro isut’ maysa a napudno a bendision iti kongregasion. Babaen ti tunggal maysa kadatayo a makitunos kenkuana no isut’ agbisita, ti ministeriotayo isut’ naurnos ken epektibo. Mainayon pay, magun-odna met iti rag-o manipud ti trabahona.—Heb. 13:17.