Paset 1—Ipakita ti Konsiderasion iti Sabsabali
1 Agrag-otayo a makakita iti panagrang-ay dagiti tattao ni Jehova, a nagresulta ti ad-adu pay a nainayon a kongregasion. Iti dadduma a lugar, nangruna kadagiti dadakkel a siodad, adu a kongregasion ti masapul a mangusar iti maysa laeng a Kingdom Hall. Daytoy a kasasaad kasapulanna ti mainayon a konsiderasion iti biang dagiti amin a mairaman.
2 Kada kongregasion a mangusar iti Kingdom Hall ti masapul a mangpanaw iti dayta iti nadalus ken naurnos a kasasaad nga agpaay kadagiti kakabsat a sumaruno nga umay. Masapul a naurnos a naimbag dagiti tugaw, aniaman a literatura iti counter ti masapul a maidulin, ket dagiti personal a bambanag iti Kingdom Hall ti masapul a maidaginsen. Mapanawan dagiti rest room iti nadalus a kasasaad, a siguruen nga adda dagiti kasapulan nga abasto ken maibelleng iti karga dagiti basuraan.
3 No adda sabali a gimong a naiyiskediol a mangrugi a madagdagus, dagidiay nabati iti umuna a gimong ti saan koma nga agtaktak a pumanaw. Ti mapaatiddog a sosial a panagsasarita ti agresulta iti panagdupudop ken pannakataktak dagiti kakabsat nga agsagana a maipaay iti sumaruno a gimong. Mabalin a limitado iti lugar a pagparadaan, gapuna a naasi a banag iti nasapa nga ipapanaw tapno makaparada dagiti agsangpet. Iti sabali a bangir, dagidiay tumabuno iti sumaruno a gimong ti saan koma a sumangpet a nasapa unay, a mamataud iti panagdadarison idiay paradaan ken idiay ruar ti Kingdom Hall.
4 Kadagiti adu a kongregasion ti mairaman, kasapulan iti nagpaiduma a kooperasion iti urnos ti linawas a panagdalus iti Kingdom Hall. Masansan, agsisinnublat dagiti kongregasion nga agdalus ti Kingdom Hall iti naituding a periodo. No ti kongregasionyo ket maaddaan iti dayta a rebbengen, siguruenyo a maaramid a naan-anay ken nasapa iti panagdalus tapno dagiti dadduma a kongregasion a mangusar iti patakder ket awan pambaranda nga agreklamo.
5 Sagpaminsan a kasapulan dagiti kongregasion ti panangbaliwda iti tiempo dagiti gimongda bayat ti bisita iti manangaywan ti sirkito. No apektado ti maysa a kongregasion, pakaammuan a nasakbay dagiti panglakayen iti sabali a kongregasion tapno maipakaammoda daytoy a nasapa kadagiti agibumbunannagda. Kasta met, no adda autorisado nga aktibidad, kas iti Pioneer Service School, miting dagiti panglakayen iti sirkito, wenno kasar, a maiyiskediol, dagiti dadduma a kongregasion ken manangaywan iti sirkito nga apektado ti masapul a makonsulta a nasakbay tapno saanda a maiyiskediol nga usaren ti Kingdom Hall nga agrarana.
6 Adda dadduma a patakder nga us-usaren dagiti kongregasion a naituding iti nagduduma a sirkito. Nasken kadagiti managdaliasat a manangaywan a bisitaenda dagitoy a patakder tapno maipakaammo iti dadduma maipapan ti umay a bisita a naiyiskediol. Dagiti ultimo minuto a panagbaliw wenno dadduma a parikut ti agresulta no dagiti dua a manangaywan iti sirkito ket nakaiskediolda nga agbisita bayat ti maymaysa a lawas.
7 Ti naayat a konsiderasion iti maysa ken maysa, agraman naimbag a naabante a plano ken kooperasion, ti tumulong a mangsalimetmet a nabara iti relasion dagiti kongregasion ken maisiguro nga “isuamin a bambanag maaramid koma a sitatakneng ken addaan urnos.”—1 Cor. 14:40.