No Kasanot’ Panangurnos iti Teokratiko a Libraria

NI Sherezade, maysa a masirib nga ubing a babai a taga-España, ket uppat ti tawenna idi impakaammo ti maestrana iti klase a koloranda ti ladawan ti “Ama ti Krismas.” Dagus a kiniddaw ni Sherezade a saan a makiraman. Inlawlawagna a saan a palubosan ti konsiensiana a mangaramid iti dayta.

Iti pannakakellaatna iti daytoy a panagkedked, imbaga kenkuana ti maestra a katupag laeng dayta ti panangkolor iti ladawan ti maysa a munieka ket awan pagdaksanna dayta. Simmungbat ni Sherezade: “No munieka laeng dayta, kaykayatko pay ti mangiladawan a mismo iti maysa a munieka no umanamongkayo.”

Iti maysa pay a gundaway, naibaga iti klase a koloranda ti bandera ti nasion. Kiniddaw manen ni Sherezade no mabalinnat’ mangaramid iti sabali a banag. Tapno mailawlawagna, insalaysayna iti maestra ti pakasaritaan da Sidrac, Misac, ken Abdenago.​—Daniel 3:1-28.

Di nagbayag kalpasanna, kinasarita ti maestra ti ina ni Sherezade iti telepono tapno yebkasna ti panagsiddaawna. “Namin-adu a daras a dinakamat ti anakmo kaniak ti maipapan iti konsiensiana,” kinunana. “Agasem dayta? Maysa nga ubing a kastat’ edadna ilawlawagna kaniak no apay nga isut’ burburiboren ti konsiensiana! Diak umanamong iti isursuroyo kenkuana, ngem ipanamnamak kadakayo nga agbalballigikayo. Ken kayatko a maammuanyo a dayawen ken raemek ti anakyo.”

Kasano a maaddaan ti maysa nga uppat-tawenna nga ubing iti nasanay-Biblia a konsiensia? Inlawlawag ni nanangna, a Marina, a ni Sherezade ket addaan bukod a teokratiko a libraria iti kuartona. Karaman iti libraria dagiti personal a kopiana iti Pagwanawanan, nga inug-ugedanna, dagiti literaturana para iti panangasaba, ken amin dagiti publikasion ti Watchtower Society a nairuar manipud pannakayanakna. Ti pagay-ayatna iti librariana isu ti audiotape a Ti Librok dagiti Estoria ti Biblia, a rinabii a dengdenggenna bayat a sursurotenna daytoy iti librona. Dagitoy a salaysay iti Biblia ti nakatulong kenkuana nga agaramid kadagiti pangngeddeng a kas ti nadakamat iti ngato.

Makatulong ngata kadakayo ken kadagiti annakyo ti maysa a naurnos a teokratiko a libraria? Apay a kasapulan ti libraria iti pagtaengan?

“Ti Libraria Ket Saan a Kinaluho”

“Ti libraria ket saan a kinaluho, no di ket maysa kadagiti kasapulan iti biag,” kinuna ni Henry Ward Beecher. Di pagduaduaan, gistay amintayo ket addaan kadagiti kastoy a “kasapulan iti biag,” nupay ditay pagaammo dayta. Apay a kasta? Agsipud ta uray Biblia laeng ti adda kadatayo, addaantayon iti makunkuna a libraria.

Pudno a maysa a kasasayaatan a teokratiko a libraria ti Biblia. Idi maikapat a siglo, pinutar ni Jerome ti Latin a sasao a Bibliotheca Divina (Nasantuan a Libraria) a mangiladawan iti napagtitipon a naipaltiing a liblibro nga aw-awagantayo iti Biblia. Impaay ni Jehova kadatayo daytoy nasagraduan a libraria a pakagun-odantayo iti praktikal a tulong, pammagbaga, ken panangiwanwan. Daytoy ket maysa a banag a ditay koma tagtagibassiten. Ti laengen panangtagikuatayo iti intero a Biblia kaipapananna nga addaantayo iti nalawlawa a libraria ngem kadagiti kaaduan nga adipen ti Dios idi un-unana a panawen.

Idi a dagiti laeng nangina nga insurat-ima a manuskrito ti magun-odan, bassit, no adda man, ti pribado a pagtaengan nga addaan iti kompleto a Biblia. Idi a kalikaguman ni Pablo nga adalen dagiti Kasuratan bayat ti naudi a pannakaibaludna idiay Roma, kinasapulan a kiddawenna ken Timoteo nga itugotna ti sumagmamano a lukot manipud Asia Menor​—nalabit a paspaset dagitoy ti Hebreo a Kasuratan. (2 Timoteo 4:13) Nupay kasta, addaan dagiti sinagoga kadagiti napagtitipon a lukot, ket inaramat nga agpadpada da Jesu-Kristo ken ni apostol Pablo dagitoy a libraria iti trabahoda a panangasaba. (Lucas 4:15-17; Aramid 17:1-3) Makaparagsak ta nalaklaka itan a magun-od dagiti Kasuratan ngem idi umuna a siglo.

Gapu iti pannakaimbento ti pagimprentaan, magun-od itan ti gistay amin nga ad-adipen ti Dios​—aniaman ti pagsasaoda​—ti intero a Biblia iti rasonable a gatad. Addaantayo met iti naisangsangayan a gundaway a mangnayon iti daytoy nasagraduan a “libraria.” Iti las-ud ti agarup maysa a siglo, okupado ti “matalek ken masirib nga adipen” iti panangipaay iti naespirituan a taraon iti umiso a tiempo.​—Mateo 24:45-47.

Ngem nalabit a saantay a naan-anay a magunggonaan iti daytoy nagpateg nga impormasion no saantay a mangurnos iti maysa a personal a teokratiko a libraria. Kasano a maaramidan dayta? Siempre, ti umuna nga addang isut’ pananggun-od kadagiti libro a kasapulan iti kasta a libraria. Masupapakan ti panagregget, tangay pagbalinen daytoy a magun-odtay a dagus ti maitutop nga impormasion a kasapulantayo tapno marisut dagiti parikut ken masungbatan dagiti saludsod iti Biblia.

Ania Dagiti Libro a Kasapulak?

Inut-utobyon aya no kasanoyo a risuten ti maysa a parikut iti komunikasion iti panagasawayo wenno no kasanoyo a matulongan dagiti annakyo a mangliklik iti panangabuso iti droga? Kasanoyo a matulongan ti maysa a gayyem a malmaldaangan? Mailawlawagyo kadi a sibabatad dagiti pammaneknek maipapan iti kaadda ti Dios ken no apay a palpalubosanna ti kinadakes? Aniat’ iladladawan ti eskarlata ti kolorna nga animal iti Apocalipsis kapitulo 17?

Masungbatan dagitoy ken dagiti nakaad-adu pay a saludsod no addaankayo iti umdas a teokratiko a libraria. Nagimaldit ti Watchtower Society kadagiti libro, broshur, ken artikulo iti magasin a mangilawlawag iti nakaad-adu a Nainkasuratan a suheto. Kasta met, salaysayen dagitoy a literatura dagiti bambanag maipapan iti pamilia, pabilgenna ti pammatitayo iti Dios ken iti Biblia, tulongannatayo a mangparang-ay iti abilidadtayo a mangasaba, ken tumulong kadatayo a mangtarus kadagiti padto iti Biblia.

Magun-od pay laeng ti kaaduan a publikasion nga inmaldit ti Sosiedad iti napalabas a 20 a tawen. No nabiitkay pay iti kinapudno, makagunggona kadakayo ti panangala iti kakasta a literatura a magun-odan iti pagsasaoyo. Nalabit a magun-odanyo dagiti tomo Ti Pagwanawanan kadagiti napalabas a tawen iti pagsasaoyo. Dagiti napateg a reperensia, kas iti Insight on the Scriptures ken ti Comprehensive Concordance, ti naipablaak metten iti nadumaduma a pagsasao. Nupay kasta, ti pananggun-od kadagitoy a libro ket umuna laeng nga addang.

Urnosenyo ti Librariayo!

Ti pannakabirok iti kasapulan a libro ket napatpateg ngem iti pannakaammo laeng nga addaanka iti daytoy. No adu unay a panawen ti busbosentayo iti panangsapul iti kasapulantayo a reperensia, mabalin a mapukaw ti interestayo iti dayta a banag. Iti kasumbangirna, no nasayaat ti pannakaurnos dagiti librotayo, nga adda iti maysa a maitutop a lugar, ad-adda nga aggagartayo a mangaramid iti personal a panagsukimat.

No mabalin, makatulong ti panangikabil kadagiti kaaduan a teokratiko a libro iti maymaysa a disso. Mabalin ti mangaramid kadagiti estante ti libro, ket masansan nga iti bassit la a kantidad, no saantay a kabaelan ti gumatang iti naaramiden, ken bassit laeng nga espasio ti kasapulan dagitoy. Napateg met ti nalaka a maasitgan a libraria. Dagiti libro a naipempen iti attic (siled iti babaen ti atep ti balay) ket masansan nga awan ti maitedna a pagimbagan ken taptapuken laeng.

Ti sumaganad nga addang isut’ panangurnos kadagiti libro. Mangyeg iti gunggona ti bassit a panawen a mabusbos iti panangurnos kadagiti libro iti lohikal a pamay-an.

Kasanon no saan a Saksi ni Jehova ti kaaduan iti pamiliayo? Nupay dikay mabalin nga urnosen ti libraria sigun iti kayatyo, mabalinyo ti maaddaan iti bukodyo a kuarto iti estante ti libro nga uray kaskasano naglaon kadagiti sumagmamano a Nainkasuratan a publikasion.

Tumulong a Mangpatibker iti Espiritualidad ti Teokratiko a Libraria

No naurnostayon dagiti libro, kasapulantayo ti maysa a sistema a tumulong kadatayo iti panangsapul ti impormasion. Mabalin a nakapuy ti memoriatayo, ken mabalin a saantay a masinunuo dagiti linaon ti tunggal libro iti teokratiko a librariatayo. Nupay kasta, nakasaganan a mausar dagiti amin nga impormasion iti libraria. No magun-oden dagita iti mismo a pagsasaotayo, tulongannatayo ti Watch Tower Publications Index a mangsapul iti espesipiko nga impormasion iti gistay amin a suheto iti apagbiit.

Inlawlawag ni Julián, nagserbi kas maysa a special pioneer ken panglakayen iti adun a tawen, a nakapatpateg ti Index iti panangisurona iti buridekna a lalaki a personal nga agadal. “Ni Jairo, a pito ti tawenna, inimtuodna kaniak apaman a simmangpet manipud eskuelaanda idi naminsan nga aldaw, ‘Tatang, aniat’ kinuna ti Sosiedad maipapan kadagiti dinosaur?’ Innalami ti Index ket sinapulmi ti sao a ‘dinosaurs.’ Apagbiit laeng a nasarakanmi ti Agriingkayo! a nangsalaysay iti dayta a suheto. [Pebrero 8, 1990] Iti dayta met la nga aldaw, binasa ni Jairo dayta. Ammonan nga addaan ti teokratiko a librariami iti makatulong nga impormasion maipapan iti gistay amin a suheto. No kaniak a maysa, mamatiak a no masursuro dagiti annakmi nga aramaten a naimbag ti maysa a teokratiko a libraria, tumulong dayta kadakuada tapno rumang-ay iti naespirituan. Masursuroda ti agrason, ken maysa pay, matakuatanda a mabalin a makaparagsak ti personal a panagadal.”

Patien ni Fausto, ti ama ni Sherezade a nadakamat iti pangrugian, a kasapulan a mairugi ti panangsanay kadagiti annak a mangaramat iti teokratiko a libraria iti kasasapaan a gundaway. “Ipakpakitamin ken ni Sherezade, nga innem ti tawenna itan, no kasano nga aramaten ti Index,” inlawlawagna. “Yantangay maragragsakan maipapan iti namnama iti naindagaan a Paraiso, rinugianmi babaen ti panangipakitami kenkuana ti sao a ‘paradise’ iti Index ken kitaen dagiti nadakamat nga artikulo iti Pagwanawanan. Masansan nga ipakitami laeng kenkuana dagiti ladawan. Nupay kasta, nasursurona babaen iti daytoy a pamay-an a ti Index ti tulbek iti panagbirok iti impormasion iti librariami iti pagtaengan. Ammomi a naawatanna ti punto idi simmangpet manipud iti eskuelaan iti maysa nga aldaw nga addaan iti saludsod maipapan iti panangrambak iti Easter (Domingo Paskua). ‘Apay a ditay agsukisok iti Index?’ insaludsodna ken ni nanangna.”

Aniaman ti edadtayo, parparegtaennatay ti Biblia a ‘siguraduen dagiti isuamin a bambanag; kumpet a siiirut iti nasayaat.’ (1 Tesalonica 5:21) Kalikaguman daytoy a sukimatentayo no aniat’ kunaen ti Kasuratan. (Aramid 17:11) No addaantay iti maysa a nasayaat-pannakaurnosna a teokratiko a libraria, mabalin a makaay-ayo ti kasta a panagsukimat. Ti kada gundaway a sibaballigi a panangaramat iti librariatayo iti panangisagana iti palawag, panangsapul iti praktikal a balakad iti panangrisut iti maysa a parikut, wenno panangbirok iti makapainteres nga impormasion, imalditna kadatayo ti praktikal a kinapateg ti librariatayo.

Imbatad dagiti nagannak ni Sherezade: “Iti maysa a Kristiano a sangakabbalayan, ti teokratiko a libraria ket pudno a saan a maysa a kinaluho!”

[Kahon iti panid 30]

KASANOT’ PANANGURNOSYO KADAGITI LIBROYO?

Awan dagiti nainget a pagannurotan no kasanot’ panangurnos kadagiti libroyo. Nupay kasta, dagiti sumaganad a lohikal a panamaglalasin ipakitana ti maysa a pamay-an a mabalin a panangurnos kadagiti libroyo sigun iti linaonna.

1. Dagiti libro a naglaon iti bersikulo-por-bersikulo a panangusig iti sumagmamano a paset ti Biblia

(Dagiti pagarigan: Ti Katan-okan a Tao a Nagbiag Pay Laeng, Apocalipsis​—Ti Grande a Tampokna Asidegen!, “The Nations Shall Know That I Am Jehovah”​—How?, “Maaramid Coma ti Pagayatam Ditoy Daga”)

2. Dagiti libro a mainaig iti biag ti pamilia

(Dagiti pagarigan: Panangparagsak ti Biag ti Pamiliayo, Dagiti Saludsod nga Iyimtuod ti Agtutubo​—Dagiti Sungbat nga Epektibo, Ti Librok dagiti Estoria ti Biblia)

3. Dagiti Biblia ken reperensia

(Dagiti pagarigan: New World Translation of the Holy Scriptures​—With References, dadduma pay a Biblia, dagiti Watch Tower Publications Index, Comprehensive Concordance, Insight on the Scriptures, The Kingdom Interlinear Translation of the Greek Scriptures, maysa a nasayaat a diksionario)

4. Dagiti libro nga agdama a maar-aramat para iti Panagadal ti Libro ti Kongregasion ken iti Teokratiko nga Eskuelaan ti Panagministro

5. Dagiti audiocassette ken video

6. Dagiti Tomo Ti Pagwanawanan ken Agriingkayo!

7. Pakasaritaan dagiti Saksi ni Jehova

(Dagiti pagarigan: dagiti Yearbook of Jehovah’s Witnesses, Dagiti Saksi ni Jehova​—Manangiwaragawag iti Pagarian ti Dios)

8. Dagiti libro ken broshur a regular nga ar-aramatentay iti ministeriotayo

(Dagiti pagarigan: Mabalinyo ti Agbiag nga Agnanayon iti Paraiso a Daga, Panakirinnason manipud kadagiti Kasuratan, Life​— How Did It Get Here? By Evolution or by Creation?, Ti Panangbiruk ti Sangatauan iti Dios, Nagkaykaysa iti Panagdayaw iti Maymaysa a Pudno a Dios)

[Ladawan iti panid 31]

Ni Sherezade ket maysan a nalaing nga estudiante ti Biblia

[Ladawan iti panid 31]

Nupay adda iti kinaagtutubo, ar-aramaten daytoy nga ubing ti maysa a teokratiko a libraria

Kanayonan a Kameng ti Bagi a Manarawidwid

ITI panggep a panangnayon kadagiti kameng ti Bagi a Manarawidwid dagiti Saksi ni Jehova, nangrugi idi Hulio 1, 1994, maysa a kameng ti nainayon iti 11 a papanglakayen nga agserserbi ita. Ti baro a kameng isu ni Gerrit Lösch.

Simrek ni Kabsat Lösch iti amin-tiempo a serbisio idi Nobiembre 1, 1961, ken nagturpos iti maika-41 a klase ti Watchtower Bible School of Gilead. Isut’ nagserbi kas manangaywan iti sirkito ken distrito idiay Austria manipud 1963 aginggat’ 1976. Nangasawa idi 1967, ket nagserbida ken baketna, ni Merete, kamaudiananna iti 14 a tawen kas kameng ti pamilia ti Bethel idiay Austria nga adda iti Vienna. Uppat a tawenen ti napalabas idi mayakarda iti hedkuarter ti Sosiedad idiay Brooklyn, Nueva York, a sadiay nagserbi ni Kabsat Lösch iti Executive Offices ken kas katulongan iti Service Committee. Gapu iti nadumaduma a kapadasanna iti tay-ak ti Europa ken pannakaammona iti pagsasao nga Aleman, Ingles, Romaniano, ken Italiano, nagpateg la ketdi ti maitulongna iti trabaho ti Bagi a Manarawidwid.