Panangtulong iti Sabsabali nga Agbiruk iti Dios
1 Impaay ni Jehova iti nawadwad a naespirituan a taraon a tumulong iti tattao nga agbiruk kenkuana. (Ara. 17:27) Bayat ti Enero itukontayo ti libro a Ti Panangbiruk ti Sangatauan iti Dios wenno, kas kasukat, ti Pudno a Talna ken Talged a libro. Dagiti sumaruno a singasing ti tumulong kadatayo nga agsagana a mangipakita kadagiti kaaruba ti kasapulan a “panangbiruk ken Jehova” ken “mangawag kenkuana bayat nga asideg pay.” (Isa. 55:6) Dagiti singasing ti mabalin nga itutop kadagiti lokal a kasasaad.
2 No itukon iti libro a “Ti Panangbiruk ti Sangatauan iti Dios,” mabalinyo a rugian babaen ti panagkuna:
◼ “Makapainteres ti makasabet iti adu a nagduduma a relihion. Ngem dikay kadi umanamong a masansan a dagiti tattao ket surotenda laeng ti relihion dagiti nagannakda imbes nga isuda a mismo ti nagbiruk iti Dios? [Palubosan nga agkomento.] Daytoy a libro, Ti Panangbiruk ti Sangatauan iti Dios, ilawlawagna ti puon ken sursuro dagiti dadakkel a relihion. Sungbatanna dagiti saludsod a rebbengtayo amin a maammuan tapno mabirukantayo ti Dios.” Iturong iti panid 17, parapo 28, ken ipakita dagiti lima a saludsod nga inusig ti libro. Kalpasanna itukon ti libro.
3 Wenno, kalpasan a naiyam-ammo ti bagiyo, mabalinyo a kunaen:
◼ “Iti kaadu dagiti relihion ita, naisaludsodyo kadin no kasano a masiguro a ti relihiontayo ket anamongan ti Dios?” Kalpasan iti komento ti bumalay, iturongyo ti asikasona iti kahon idiay panid 377 iti libro a Ti Panangbiruk ti Sangatauan iti Dios, a mangipakita kadagiti sangapulo a wagas a pangbigbigan iti pudno a relihion, nga itudo a nangnangruna ti punto numero 7. Saludsodan ti bumalay no umanamong a ti maysa a mangalagad iti pudno a relihion ket mariknana a kasta maipapan iti sabsabali a rasa ken nasionalidad. No ipalubos ti tiempo, kitaen dagiti kasuratan a naisitar, sa maitukon ti libro.
4 Nasarakan dagiti adu a ti panangiturong iti maysa a kapitulo Ti Panangbiruk ti Sangatauan iti Dios a libro a mangilawlawag iti relihion ti bumalay ti tumulong a mangallukoy iti asikasona. Mabalinyo nga ipadas daytoy no itukonyo ti libro.
5 No usarenyo ti libro a “Pudno a Talna ken Talged—Kasanoyo a Masarakan Dayta?,” mabalinyo nga ipadas daytoy:
◼ “Kayat ti tunggal maysa ti agbiag iti maysa a lubong nga adda talna ken talged. Makapaldaang a kunaen, a ditay pay napadasan dayta iti biagtayo. Ania ti makunayo a kasapulan nga aramiden tapno pumudno a maaramid iti talna ken talged? [Palubosan a sumungbat.] Addaan ti Dios iti bileg a mangyeg ti talna ditoy daga, ket inkarina nga aramidenna dayta.” Iturong iti ladawan idiay panid 98, kalpasanna basaen ti Mikias 4:3, 4. Maitukon ti libro, sa maiyurnos ti sarungkar.
6 Dagiti publikasiontayo ket gutugotenda dagiti rinibo a tattao iti lalo pay a panangusig iti Biblia tapno birukenda iti Dios. Pribilehiotayo a tulongan ida iti Enero.