Panangasaba—Maysa a Nadayaw a Pribilehio
1 Ti ministerio ti naimbag a damag isut’ maysa a nadayaw a pribilehio nga indatag ni Jehova kadatayo. (Roma 15:16; 1 Tim. 1:12) Kasta kadi ti panangmatmatyo? Ti panangawit iti nagan ti Dios isut’ maysa a dayaw a naited laeng iti sumagmamano. Kasanotayo a mapadakkel ti panangipateg iti daytoy a pribilehio?
2 Ti panangikasaba iti damag ti Pagarian ket saanna a yeg ti pabor daytoy lubong kadatayo. Adu ti mangmatmat iti trabahotayo a kas aleng-aleng wenno di maikankano. Umsien ken busoren dagiti dadduma dayta. Iti imatangda agparangtayo a kas nayaw-awan ken minamaag. (Juan 15:19; 1 Cor. 1:18, 21; 2 Tim. 3:12) Dagiti makaupay a komentoda ti nairanta a pangiddep iti regta ken mamagtallikud kadatayo iti nadayaw a pribilehiotayo. Dagiti negatibo a panangmatmat ti inggakat ni Satanas, isu a “binulsekna ti pampanunot dagiti di manamati, tapno ti lawag ti nadayag a naimbag a damag . . . saan koma nga agsilnag.” (2 Cor. 4:4) Kasano ti panagtignayyo?
3 Nasken nga adda iti panunot a ti panangasabatayo maipapan iti Pagarian isut’ kangrunaan a trabaho ita nga ar-aramiden ti tunggal maysa kadatayo. (Roma 10:13-15) Ti kaadda kadatayo ti anamong ti Dios, saan a ti tao, isut’ nasken a banag. Ti negatibo a komento daytoy lubong saannatayo a lapdan iti situtured a panangiwaragawag ti naimbag a damag.—Ara. 4:29.
4 Napasnek unay ni Jesus iti pribilehiona a mangaramid iti pagayatan ni Amana. (Juan 4:34) Saanna nga impalubos ti aniaman a makasinga wenno kabusor a namagsarimadeng kenkuana. Ti panangikasaba iti damag ti Pagarian isut’ kanayon nga umuna a mailugar iti biagna. (Luc. 4:43) Nabilintayo a tuladen iti ehemplona. (1 Ped. 2:21) Ti panangaramid iti dayta agserbitayo a kas “katrabahuan ti Dios.” (1 Cor. 3:9) Gundawayantayo aya a naan-anay daytoy a pribilehio? Kas Saksi ni Jehova, masapul a kanayon a nakasaganatayo a “mangaramid iti publiko a panangideklara iti naganna.”—Heb. 13:15.
5 Ti pasettayo iti ministerio ti agpannuray a kanayon iti kababalintayo. Managyamantayo kadi iti amin nga inaramid ni Jehova kadatayo? Napatanortayo aya iti pusotayo ti ayat ken Jehova a mangtignay kadatayo nga aramiden ti amin a kabaelan iti serbisiona? Ti kasta nga ayat ti manggutugot kadatayo a napinget ken regular iti panangikasaba ti Pagarian a trabaho agingga iti ipalubos ti kasasaadtayo. Ti regtatayo isut’ ebidensia ti ayattayo ken Jehova ken ti kaarrubatayo.—Mar. 12:30, 31.
6 Maipakita no kasano ti panangipateg iti maysa a banag babaen ti aramiden ken sawentayo maipapan iti dayta. Pudno kadi nga ipatpategtayo ti pribilehio a mangikasaba iti Pagarian? Maipasindayawtayo aya ti ministeriotayo? Naikeddengtayo kadi ti aganus iti daytoy a nasken a trabaho iti sidong ti panangbusor? No nangato ti panangraem iti daytoy a nakaskasdaaw a pribilehio, masigurotayo ti agbalin a naregta ken naimpusuan.—2 Cor. 4:1, 7.